ام مليــكه :

امي تعبت حيل حيل لما صارت زي الشرشف على السرير وابويه اندمرت نفسيته من خوفه على امي, لأن حياته اصبحت سيئه مع مها , وعنده منها 5 عيال وشايل همهم ومو قادر يطلق عشان العيال, قد فكر يطلقها لكن اخواني منعوه . لأنه يقول انتو ربو اخوانكم وهي بتروح لأهلها. قالو لاعاد تخلفون وخلها تربي عيالها. امي ماخلينا مكان ودينها حتى الشيوخ اكثر من شيخ وديناها, بس مافيها شي, المسأله تراكمات نفسيه وتعب جسماني. تدهور حالها لما صارت ماتتكلم ولا تاكل ولا تشرب نجلسها ونحممها زي البيبي, دخلناها المستشفى جلست 4 شهور على الانابيب لما تحسن حالها , نقلوها للتنويم, صارت تطالع فينا وتتكلم بس كلامها قليل.. اول مره اشوف حال ابوي كذا مذلول تحت سريرها جالس على الارض ويهرج ويضحك لأنها فتحت وصارت تعي حولها, كأنه طفل مو عارف وش يقول وكلامه مو مرتب, يقول متى تخرجين ابغا جريش وامي تتبسم له وكل ماتبسمت له باس يدها, قرب منها قال يا ام حمد انا احبك واغليك , مااقدر استغنى عنك, مسامحتني؟, هزت راسها وابتسمت ( في لحظه نسيت كل الماضي والالم والجرح اللي تسبب لها فيه). صارت امي توقف على حيلها شوي قلنا بنطلعها البيت, ابوي نام عندها ويعطيها الادويه في الليل. قالت امي يومي طيب لكن يوم مها اطلع لها والا والله مااسامحك. نزل وانا جيت نمت عند امي , زوجي كان متعاون الله يسعده يارب, كان يومها الثاني بعد المستشفى. تعبت في الليل وصارت تشاهق وعيونها تغيرت , مو عارفه اتصرف دقيت على فهد اخوي و 10 دقايق على بال مايجي طلعت ركض على الملحق وادق الباب زي المجنونه, طلعت مها فتحت دخلت جري على غرفة نومه, قلت امي تعبانه , شلناها على المستشفى دخلوها الطوارى قاله الدكتور ومن غير مايراعي مشاعرنا , انتو جبتولي جثه آآآآآهـ ياأمي كلنا انهرنا لكن ابوي كان غير يصيح بصوت عااااالي كأن احد طعنه في قلبه. لما افتكر هاللحظه وكأن ابوي الندم دمره ومو عارف وش يسوي عشان يرجعها للحياه ثاني, ابويه كان قاسي وجاف , لكن ماكان يقدر يستغنى عنها ابد ابد , حتى وان تزوج و حتى وان كان يجرحها لكن مايقدر تبعد عنه, وكأنها جزء من جسمه لابد منه. ابويه اللحين مشغول بعياله , وتعبان حيل لأنه كبر , الله يشفيه الله يرحم امي ............ مضى على وفاتها سنه . حبيت اكتب لكم قصتها .. لأني لما تزوجت قالت لي , لاتكون حياتك بيده ولاحياته بيدك لأنك حياتك مو ملكه., انتم اضافه لحياة بعضكم , بس خليها اضافه حلوه. لاتستحين تطلبين اطلبي ولاتتركين شي لك عنده بعلة الحنيه والا الخوف. حقك لاتتركينه, احترميه وقدريه لكن اذا في موضوع معين لاتخافين تجادلين, بالعكس ناقشي وجادلي بس بأدب وعقل. لاترفعين صوتك لكن خلي لهجتك شديده بدال رفع الصوت. اهرجي معاه خذي واعطي لاتعاملينه كأنه رأيسك , عامليه كصديق وحبيب, يعني طيحي الميانه معاهـ, خذيه لك رفيق في الحياة, لاتسووين زيي وتضيع حياتك . انا كنت سلبيه بسبب عيشتي وصغر سني, وضروف حياتي قبل الزواج وبعده. زمنكم هذا افضل بكثير ... ــــــــــــــــــــــــــــــــــــــــــــــ انتهى سلامي الى قلوبكم الكريمه. ( مااقدر اضيف رد.. سويت تعديل عشان ارد:: الله يسعد كل من دخل حبايب قلبي انتم والله ,لايحرمني منكم)

امي تعبت حيل حيل لما صارت زي الشرشف على السرير وابويه اندمرت نفسيته من خوفه على امي, لأن حياته...