قصتي.. زوجي وبنات عمي

السلام عليكم
اخباركم ياحوائيات

من كنت في الجامعه وانا مخطوبه لولد عمي ,على اننا نتزوج بعد مااخلص جامعه , بس سبحان الله والحمدلله انه ماكان فيه نصيب بسبب مشاكل من خواته سوالف غيره وماغيره

المهم زوجي في هالوقت كان مبتعث من عمله في دوله اجنبيه وهو يصير لي ولدعمي من عم ثاني غير عمي ابو خطيبي الاول

كلم اهله بالصدفه الا قالوا له ان فلان تكنسل زواجه وقالوا صارت مشاكل وخرب الزواج ,,زوجي على طول كلم ابوه وقال له ابيك تخطبها انا ابيها وفعلا كلموا ابوي ووافق وشاورني وطرت من الفرحه ماني مصدقه
لان لو ابسوي مقارنه بينه وبين ولد عمي زوجي افضل من كل النواحي جمال ومال ومنصب وكل شي

بعدها جاء من الدوله اللي هو فيها عشان نملك ولما شافني بالملكه انهبل وقال اني اذكرك وحنا صغار كنتي تهبلين والحين انتي اجمل بكثير واني حاط عيوني عليك وكنت منقهر انك انخطبتي لولد عمي ومن هالكلام وكان فرحاااااااان مره

وملكنا ورجع لدولته وكان يكلمني دايما ويتغزل بجمالي ومهو مصدق اني صرت من نصيبه

وصار زواجنا في الصيف في نفس السنه وكان تمام معي ورحنا شهر عسل لدولتين وانبسطنا

قبل لا اسافر معه لدولته اللي مبتعث لها صار سؤ تفاهم بيني وبينه على شي تافه وبحكم اني عروس وابي اتدلع على زوجي عاندته واصريت على موقفي وانا معترفه اني غلطانه بس كوني عروس المفروض والوضع الطبيعي يعديها لي وخصوصا ان انا مافيني طبع العناد ابد

ركبنا الطياره وحنا زعلانين من بعض ولا واحد يكلم الثاني لين وصلنا.. واول ماوصلنا لبيتنا وصكر الباب علينا جا عندي وقال لي شوفي يابنت الناس مو انتي اللي تبين تمشيني على كيفك .انتي ماعرفتيني زين ماني مخفه بيدك
وقال كلام كثير من ضمنه انتي مغروره وشايفه نفسك وانا اللي بكسر خشمك واعلمك ان الله حق
انا انصدمت من كلامه مهو لها الدرجه عاد ماسويت شي كبير .وقلت له ترا انا مااقصد وحتى الاعتذار اعتذرت له بس يرجع ويقول انتي دلوعه ومغروره وانا اللي بكسر خشمك وعشان تعرفين زين من فلان

شهر كامل كنت مخنوقه فيه يعاملني مثل الخدامه بس يبي يهينني وانا ساكته وصابره وانفذ كل اوامره ولا اطلع ولا اروح ولا اجي . اهلي يكلموني رحتي للمكان الفلاني شفتي المكان الفلاني وانا ايه ودمعتي على خدي مايدرون اني محبوسه

بعد الشهر بدا يفك شوي وصار يطلعني وتنفست شوي ..
والله شفتوا شعور المحبوس في السجن وطلع هذا كان شعوري اول يوم طلعت فيه هههههه


وتعامله معاي جاف يعاملني بغرور وفوقيه . مهما اطبخ له واسوي له مايمدحني ويلمح لي انه واجب علي
اذا قلت يمين قال شمال اذا بغيت شي جاب العكس وانا ساكته وصابره مااقول الا سمعا وطاعه واصلا اخاف اخالفه وانا في هالغربه لايذبحني


بس اللي قاهرني لازالت عنده فكرة اني مغروره ومتكبره ماادري ليه مع ان لو فيني ذرة غرور من اللي شفته منه راح تتبخر بس مدري ليه مصر

تعرفت على جاراتي سعوديات وخليجيات والحمدلله انه خلاني اتواصل معاهم ولا منعني واستفدت منهم كثير وريحوني لاني كنت اشكي لهم وكانو يخففون عني وينصحوني



ورحمه من ربي اني حملت بعد 3 شهور تغير يمكن 50% معاي لما عرف اني حامل وبدا يجيب اللي ابيه ومايخالفني ولا يدقني بالكلام يعني فيه تحسن كبير

وفي مره كنت اكلم وحده من خواتي بالتلفون مدري وش خلاني اعلمها لانها قالت لي صوتك وش فيه وين الحيويه اللي فيك كانك حزينه وقعدت ابكي وعلمتها بكل شي انهبلت وهدتني وقلت لاتعلمين احد قالت ابشري

طبعا اختي ماسكتت وعلمت اختي الكبيره واختي رفعت السماعه على اكبر خوات زوجي وقالت ليه كذا اختي امانه عندكم ليه اخوكم يعاملها كذا والله لو انها عدوه

واتصلت ام زوجي عليه وقعدت تخانقه بالتلفون هزئته تهزئ انا يوم شفت وجهه تغيير وحمر وقام الدم يغلي فيه عرفت ان اختي ماسكتت واكيد قالو له وقعدت اتشهد وانا في مكاني قلت الحين يبي يذبحني
لما خلص من مكالمته رمى التلفون علي وطلع برا اخذت التلفون وقعدت تكلمني امه يابنتي لاتاخذين بخاطرك ترا انتي اختياره وهويحبك بس الشيطان جا بينكم حسبي الله ونعم الوكيل ومن هالكلام
عاد انا من خوفي قلت لها والله ماودي ان اختي قالت شي مابيه يدري انا خايفه يسوي لي شي يضربني اواي شي قالت امه لاتخافين انا هددته ان مد يده عليك او ضايقك لاهو ولدي ولا ابيه

ذاك اليوم ماشفته رجع بالليل متاخر لما جاء اليوم الثاني عادي معاي يكلمني بس مايطالع لي مايطالع لوجهي

ووحده من جاراتي الله يجزاها الف خير قالت لي شوفي بقول لك شي وجربي منتي خسرانه ... امسكي زوجك في وقت هو هادي فيه ومروق وكلميه بهدوء وفهميه انك تحبينه وان رضاك علي يهمني وان معاملتك لي من اول ماتزوجت عقاب على سوء فهم بسيط.. عاقبتني عليه شهورر وانا مااستاهل كل هذا منك
وماخذ فكره اني دلوعه ومغروره اسئلك بالله واحلفك باعز ماتملك في يوم تدلعت او انغريت عليك فيه مع ان مافيها شي لو تدلعت عليك
وفعلا فتحت قلبي وقلت كل شي كاتمته بصدري لمدة 6 شهور وقلتله اني ماابي اعلم اختي قلت والله ماابي اقول لها بس هي تلح علي تقول صوتك ماهو عاجبني وانا من معاملتك القاسيه لي غصب عني بكيت وفضفضت ولو ماتكلمت كان ميته
فاجائني يوم قال بالعكس احلا شي سويتيه انك علمتي اختك وقال مكالمة امي لي صحتني وحسيت بتانيب الضمير وبغلطي عليك والله احس ماادري وين اودي وجهي منك ومن اهلك على فعايلي
وانا فعلا لو الف الكره الارضيه ماالقى وحده مثلك وحده غيرك حزمت شناطها ورجعت انت تحملتيني كثير وهذا دليل انك تحبيني واعتذررررر لي
وانا اسمع كلامه ماني مصدقه انا في حلم ولا علم
واللي صدمني صدق لما قال ولا انتي مغروره ولا متكبره مثل ماقالوا؟؟!!!!!
انا هنا قلت له من ؟؟ منهم ؟؟؟
قال لي ان ولد عمي اللي كان خاطبني لما درى ان زوجي خطبني قال له اوووما وش تبي فيها مغررروره ودلوعه خواتي حايمه كبودهم منها انفذ بجلدك مثل مانفذت انا !!!

ويقول ان بنات عمي يمشون ويقولون فلان مسكين الله يعينه خذاها بتطلع عيونه ..اخونا تركها تبي تمشيه على كيفها
ويقول كلامهم اثر فيني اي حركه تسوينها اقول في نفسي ايه تدلع واي كلمه تقولينها اقول شايفه نفسها علي
واي راي تقولينه اقول ايه تبي تمشيني على كيفها

يقول انا كنت بفسخ الخطبه من كلامهم بس امي وابوي وخواتي وقفوا لي قالو هذولي غيرانات منها ويبون يشوهون سمعتها حنا نعرفها زين مافيها اي شي من هالكلام

يقول بس تزوجتك وانا مقتنع ان هالاوصاف فيك بليس لعب براسي
يقول مدري وين عقلي لين امي صحتني من غفلتي

حسبي الله ونعم الوكيل عليهم خربوا علي اجمل ايام عمري ماتهنيت بسببهم .اجمل ايام عمري راحت بالهم والصياح والقهر على ذنب انا ماادري عنه ولا هو فيني

من جد اكرههم واكره انهم قريباتي ..بعد مارجعنا للسعوديه سلمت على عمامي الا هم ماجيتهم ولا ابيهم وبالمناسبات مااسلم عليهم الحين
ولازالوا ماهم تاركيني بحالي يقولون من قهرها تبي اخونا اللي عافها
الحين لي 5 سنوات وعندي ولد وبنت ولله الحمد وعايشه مبسوطه مع زوجي
وبنات عمي للحين ماتزوجو
ربي ياخذ لي حقي منهم عاجلا غير اجل
حسبي الله ونعم الوكيل

يتبع الرد 72