بسم الله الرحمن الرحيم
السلام على أحلى أمهات مستقبل ... صراحة شفت موضة جديدة كل وحدة تدخل وتكتب قصتها قلت ليش ما أسوي أنا زيهم كمان ؟؟؟؟ <<<<شكلها راح تنضرب ,,
أنا أحبكم في الله و حبيت أقول لكم قصتي وإن شاء الله يكون لكم فيها فائدة ...
نبدأ ...
قبل 5 سنين و نص جاء الأمير :arb: ووقع في حب الأميرة :27: واتزوجوا :icon28:
المهم بعد شهر من زواجي تعبت والدورة أتأخرت رحت لدكتورة الله لا يسامحها عملت لي تحليل الدم للحمل وما بين شي وبعدها فغصت فيا لما قالت آمين وما خلت كشف من فوق و لا من تحت إلا عملته وأنا لسه عروسة ( أكيد متخيلين المأساة ) خرجت من عندها بـ 100 مرض و 1000 دواء ما خلت تكيس على قرحة على عنق الرحم والحمد لله خرجت من عندها منهارة ..:09:
بعدها بـ 10 أيام زاد تعبي وما شفت إلا أبو الشباب آخذ بعضه وخرج ودقايق إلا هو في البيت ومعاه تحليل الحمل المنزلي ...
حاول معايا بالطيب أقوم أسويه وما رضيت وبعدها غصبني وسويت التحليل و ما شفت النتيجة وهو شافها وطلعت الخطين الحلوة :icon28: ورحت للمستوصف عملت لي بالسونار وبان كيس الجنين عشت أحلى 8 شهور في حياتي و فجر ثالث يوم عيد الفطر قرر الأخ يجي و يلحق العيدية ...
الحمد لله مرت 4 شهور وبعدها أخذت حبوب منع الحمل عشان دراستي و مرت سنة واثنين والثالثة قررت أترك الحبوب و كان فاضل لي سنة ونص وأتخرج قلت عبال ما يروح مفعول الحبوب وأحمل ان شاء الله يكون باقي لي سنة مو مشكلة تمشي ...
تركت الحبوب و جلست 3 شهور من غير دورة أو حمل رحت للدكتورة عملت لي فحوصات وتحاليل طلع عندي هرمون الغدة الدرقة نازل وأعطتني الدواء و جلست معاها تقريبا 7 شهور ما بين كلوميد و دافستون و ربي ما قدر بالحمل و صار عندي تكيس بس الحمد لله بالأدوية راح ,, رحت بعدها للدكتور فؤاد جعفر جلست معاه شهرين آخذ دوا زي الكلوميد بس مو فاكرة اسمه المهم المرة الأولى كان عندي بويضتين وكلها حجمها ممتاز وأخذت ابرة تفجيرية و تعبت مرة لكن ربي ما أراد بالحمل و الشهر اللي بعده سويت نفس الشي وما صار حمل وكان شهر رمضان ...
وكان لي سنة بأتعالج من غير أي فايدة غير انه هرمون الغدة أنتظم ولله الحمد ... بعدها تركت العلاجات كلها وكنت مشغولة في ترم التخرج والشغل الين راسي و تعبت مرة وقلت الحمد لله خيرة ربي أخر الحمل عشان التعب دا الدورة كانت تجيني و بعدها أجلس شهرين وبعدين تشرف ثاني ( كنت دايما أدعي يارب إذا لي خير في الحمل عجله وإذا لأ يارب يتأخر إلى ما انت تريد ) المهم خلصت الترم وسافرت وغيرت جو والحمد لله ..
وبعد ما وقفت العلاج لمدة 5 شهور تقريبا رحت للدكتور عثمان سندي وطلب مني أعمل أشعة الصبغة وهو أول واحد يطلبها منى اللي قبله على طول يكتبوا منشطات والحمد لله ,, المهم سويت الأشعة والحمد لله كانت بسيييييييييييطة مرة ولا حسيت إلا بألم خفيف جدا لا يذكر أخف حتى من ألم الدورة و طلعت الأشعة سليمة ، طلب أعمل تحاليل الغدة وهرمون الحليب و البروجسترون في يوم 21 من الدورة وعملت التحاليل و طلع الغدة وهرمون الحليب طبيعي أما البرجسترون كان .......................... 0.2 تخيلوا !! قالي الدكتور ما عندك تبويض نهائيا المهم وكتب لي دواء ( البريمولوت . ن ) عشان تنزل الدورة وصف لي هو 3 حبات في اليوم لمدة 5 أيام وقال بعد ما أتركه بأسبوع والدورة جاية و بعدها من ثاني يوم بالدورة كتب لي الإبر المنشطة( وحدة بودرة و وحدة موية ) إلى سادس يوم وأراجعه بعدها ,, المهم أخذت الدوا وزوجي راح أشترى الإبر مع اني قلت له استنى بدري نشتريها دحين لكن هو راح جابها أخذت الدوا و خلصت مر أسبوع ، عشر أيام ماجات الدورة دقيت على الدكتور وكان يوم الثلاثاء الماضي و قالي أعطيكي فرصة إلى يوم السبت وإذا ما جات تعالي امكن في تكيس ,, و نزلت استفسار هنا و طمنوني البنات انه راح يعطيني الدوا مرة ثانية وراح تنزل ,, و جلست كم يوم معدتي تعبانة و مو طايقة الأكل والصداع هلكني وألام الدورة شغالة معايا أسبوعين ، المهم أمس يوم الأحد زوجي بعد التعب اللي شافه علي جاب تحليل الحمل وقالي سويه قلت لأ من فين راح يكون وحمل الدكتورقال ما في تبويض ؟؟؟ رحت للدكتور كشف علي بالألترا ساوند و فعص في بطني يمين شمال قالي الرحم فاضي لكن بطانة الرحم سميكة وكأنه قال سكها 11.5 المهم قال : عملتي تحليل حمل ؟؟ قلت لأ لأني أصلا مستبعدة فكرت الحمل ( هرمون البروجسترون مرررررررررة نازل فين راح يصير حمل !! ) و زوجي يطالع في نفسه يضربني ، المهم قالي بكرة الصبح سوي تحليل الحمل المنزلي وإذا ما في شي دقي علي وأقول لك كيف راح تاخذي الدوا .. قلت طيب ، وطول الطريق وزوجي يقولي ما قلت لك سويه عنييييييييييييدة ، المشكلة الفترة دي اللي تأخرت علي الدورة فيها أم زوجي كانت مقتنعة إني حامل وأنا أضحك وأقول من فين ما في بويضة تتلقح مو معقل تجي بويضة من عند الجيران :) المهم قمت اليوم الساعة 6 ونص عشان أعمل الفطور لزوجي و رحت الحمام و عملت تحليل الحمل و طلع ...........................................
:icon28::icon28::icon28: موووووووووووووووووجب + وطلعت الخطين واااااااضحة و بسرعة كمان رحت جري صحيت زوجي وقلت له ، يضحك ويقول لي دوبي أحلم اني أقولك سوي التحليل و انت تقول بعدين ( متعقد مني مسكين ) المهم قلت له خذي موعد في العيادة أبغى أعمل تحليل دم ورحت العيادة الساعة 11 و الساعة 11:27 تأكدت إني حامل و طلع التحليل بوزيتيف ... الحمد لله قبل ما أكمل سنتين بشهر واحد أحمل من غير أي دوا أو منشط ...
و طيران كلمت الدكتور عثمان على جواله لأانه قلي من يوم ما تعرفي النتيجة كلميني و قلت له جلس يبارك لي و قالي تعالي الأسبوع الجي يوم الخميس إن شاء الله يبان كيس الحمل ...
بعد الإستفسار عن كيف صار الحمل ؟؟ قالي نحنا نحسب أوقات التبويض المتعارف عليها 12 ، 13 ، 14 ، 15 المهم وعلىدا الأساس عملت التحليل يوم 21 لكن اللي حصل معايا انه حصل عندي تبويض متأخر عشان كده ما بين معايا انه في تبويض و الحمد لله رب العاملن ودوبي جيت من العيادة وقلت لااااااااااااازم أبشر أخواتي ...
المهم في الفترة هذه تقريبا أسبوعين أو ثلاثة وأنا كل يوم بعض الصلاة أستغفر 100 مرة بنية الحمل وكل ما افتكرت جلست أستغفر وأدعي ربي انه يرزقني اللي اتمناه و قيام الليل يابنات عليكم بسهام الليل فإنها لا تخطئ و كنت موكلة أمري لله وقلت راح أعمل بالحديث ( تفائلوا بالخير تجدوه ) وصرت متفائلة بشكل مو طبيعي لدرجة اني خلاص أخترت الأسم اللي أبغاه واني الشهر الجي بعد الإبر راح أحمل بإذن الله والله ما تتصوروا كيف كنت اللي يشوفني يقول هذه تعلم الغيب وعارفة انها راح تحمل و خلاص خططت كل شي أبغى أعمله و سبحان الله ربي رزقني من غير لا أدوية ولا إير والحمد لله الذي رزقني من غير حول مني ولا قوة ...
أمنوا معايا يا بنات ..
يا ودود يا ودود ..
ياذا العرش المجيد ، يا مبدئ يا معيد ، يا فعالا لما يريد .
أسألك بنور وجهك الذي ملئ أركان عرشك .
و أسألك بقدرتك التي قدرت بها على جميع خلقك .
وأسألك برحمتك التي وسعت كل شيء.
أن ترزق أخواتي بالبنين و البنات وتجعلهم بذرة صالحة وتفرح قلوبهم زي فرحت قلبي يارب .
وأن تثبت حملي و حمل كل أخت يارب .
لا إله إلا أنت ، يا مغيث أغثني ، يا مغيث أغثني ،يامغيث أغثني ..
اللهم صلي على سيدنا محمد و على آله وصحبه وسلم ...:26:
أم لولي. @am_loly_2
محررة
يلزم عليك تسجيل الدخول أولًا لكتابة تعليق.
الصفحة الأخيرة
الله يتمم عليك