قصتي للعظة والعبرة واحتاج دعائكم

حابه اليوم اكتب لكم قصتي وتجربتي بالزواج واتمنى تستفيدون من تجربتي

ولاتحرموني من دعواتكم


انا دخلت الثلاثينات وماتزوجت ربي ماكتب لي ولما دخلت 32 تقدم لي واحد صاحب مركز ومنصب وفرحت وحمدت الله من كل قلبي وكان اكبر مني ب 20 سنه قلت العمر مومهم استخرت ووافقت

وكان متزوج وعنده عيال بالجامعه ومتزوجين وكنت اسأل زوجته موافقه قالوا اصلا هي كبيرة وتعبت من المسئوليه وموافقه

وجابوا المهر وتزوجت
طبعا اول يوم من الزواج حسيت بغصه وان اختياري غلط في غلط

كان مريض نفسي وروحي ولا احد قال لي ومريض سكر وشكاك ومطلق يتزوج ويطلق وانا الزوجه الرابعه مو الثانيه زي ماقالوا فوضت امري لربي وسكت

اكتشفت علاقته بعياله زززززفت وماله شخصيه وان زوجته ماتدري عن زواجه وهي اللي ساحرته

طبعا اخته وبنته قالوا لي السالفه وامه

انهرت بس مابيدي شي قلت بنفسي اكملها معه واشوف وش اخرته واصلا واضحه اخرة هالحياه

المهم بيوم كان بس يصارخ علي ويخانقني ومدري وش سالفته واكلم بنته قالت زوجته عرفت عن زواجه ومهددته ترفع عليه قضيه وتفضحه بالمحاكم وفعلا والله بعيني شفت رساله بجواله

كنت افتش بجواله ولقيت رساله تهديد من زوجته والله كاتبه اليوم تجي والا لاتلومني ع اي شي اسويه

جلست يومين بعد هالسالفه وتفاجأت بورقة طلاقي وربي وربي بدون سبب تطلقت بعد شهر

يشهد الله ما جاه مني اي تقصير وكان عذره لاابوي بنتك مب دبه حسبي الله عليك دنيا واخره

مرت الايام وتقدم لي واحد وسألنا عنه كان متزوج وزوجته عند اهلها لها 3 شهور وطالبه الطلاق

والله كان كلام اخته لنا كذا اخوي خلاص بيطلق والعيال بيكونون عند اخته قلت وش سبب الطلاق طلعت لي قصص

وان لي شقه مؤقته وبعدين راح يضبط لي البيت صدقتها الله يسلط عليها مثل ماخربت مستقبلي ولا جابوا شبكه ولا شي والام ماجت وكانوا يقولون مريضه قلت ع الاقل تدق تبارك قالوا ايه بتدق وربي لادقت ولا شي

تزوجت بيوم الزواج تدق علي الاخت وتقول اسمحي لنا امي مريضه وابوي مدري وش فيه ماراح يحضر الزواج الا اخوي وولد عمي والاهم التوفيق والطقطقه والخرابيط بس ضياع فلوس ووقت وطلعت قصص مالي الا امشي بالموضوع تفاجأت الرجال ررررررررررخمه بمعنى الكلمه

وخايف من زوجته تدري عن زواجه قلت طيب مو هي طالبه الطلاق ليش ماقلت لها انك بتتزوج قال بقولها بس ماودي اصدمها!!

عساك للصدمه اللي ماتصحى منها

كملت معه اول شهر بشقه عند اهله ومالي اي اي اي خصوصيه ولا حق كزوجه اطلع وادخل معه بحكم انه خايف من زوجته تدري او تشم خبر

لدرحة اخوه الكبير ماعرف عن الزواج الا يمكن بعد شهر وامه ماعرفت الا بيوم الزواج

مشى اول شهر عادي وبعدين صار الرجال مايجلس معي ابد ابد ابد واذا جاء من غير نفس وش فيك ومافيك اكتشفت ان زوجته رجعت له احسن من الاول بكثيير ورجعت علاقتهم زينه

جاني بيوم قال انا مدري وش اسوي ماتوقعت ترجع لي وانا رجال ماعندي استعداد افتح بيتين قلت انت من الاول عارف انك بتتزوج بيكون عندك بيتين وعيال هنا وهناك ليش ماحسبت حسابك

قال توقعت تطلب الطلاق بطلقها واحطك مكانها بصراحه انهرت وفوضت امري لربي ياخذ حقي منه

ورجعت لااهلي وصار وربي وربي مايصرف علي ولا يدق ولا شي ولا يجي عندي الا مره كل شهرين اذا زوجته سافرت

بصراحه يعني زوجة مسيار تعبت نفسيا من وضعي معه وطلبت الطلاق وع طوووول طلق ورجع لبيته وعياله


لكن مااقول الا حسبي الله ونعم الوكيل عليه وع اخته اللي ضيعت مستقبلي وهي عارفه ان اخوها مب كفو ولا قد المسئوليه

ليش تخربين بيت بنات الناس ع حساب اخوك بس عشان يأدب زوجته وترجع له

الله يحرمك ويحرمه كل لذه بهالدنيا وكل متعه مثل ماحرمتيني شبابي

بربكم بأي حق اشيل لقب مطلقه وانا مالي ذنب والكل يشهد باخلاقي ومعاملتي معه ومع اهله

وانتم عارفين وضع المطلقه بهالمجتمع غييير يعني ماراح احلم بزفه وزواج زي البنات ؟

ولا راح احلم بشبكه وشاب؟

ماراح يتقدم الا كبير او متزوج؟؟


حسبي الله على كل من يخرب حياة البنات عشان مصالحه