قصتي للفائدة : هذا سبب زواجي بعد فضل الله

السلام عليكم
انا متابعه قديمة بس ما سجلت .. كذا كسل
المهم يا بنات بقول لك قصتي لعل الله ينفع بها ..
بعد تخرجي من الجامعة تقريبا سنتين كنت فرحانة بتخرجي واني حرة نفسي .. لا دوام ولا دراسة بس نوم وسهر .. المهم كنت مرتاحة نفسيا ..
وللعلم انا تخرجت متأخر لأني اصلا كان مستواي سيء بالجامعة ماكنت ادرس كويس ..
المهم انه بعد سنيتن من تخرجي بدأت احس بفراغ عاطفي .. والله صرت يائسه لا عمل ولا زوج ..
فعلا كرهت نفسي .. وانا كنت مدمنة نت من عام 2009 واللاب توب ما افارقه بس والله مليت يا بنات ..
والأيام تروح وصار عمري 29 وللأسف ما احد خطبني .. صحيح جاني اثنين خطبوني لكن للأسف ما تتم لأسباب كثيره منها رفض اهلي والشيء الثاني كان واحد فيهم مطلق والثاني مطلق و زوجته حامل ..
وانا اعرف انه بالنهاية نصيبي ..
لكن للأسف تأثرت من رفض اهلي وتقدم سني وخاصة انه اللي اصغر مني تزوجوا وعندهم اطفال ..
بعدها خطبني واحد هو وحيد اهله بين ست اخوات وغير متزوج واكبر مني بسنه ونص ويشتغل بالبنك وعنده بيت جاهز فوق اهله .. والله فرحت فيه من كل قلبي حتى امي فرحت لكن ابوي الله يهديه رفض بحكم انه من غير قبيلتنا مع انه يعرف اهله ناس ماعليهم وأمه لما خطبتني وشافتني والله عسل وطارت فيني .. لكن ابوي الله يصلحه صدمني برفضه هذا من غير تعامله السيء مع الخاطب وابوه وتلفظه عليهم ..
قسم بالله جلست اسبوعين لا أكل مثل الناس ولا نوم ومت من البكى .. كنت بس ابغى اتزوج واطلع من البيت .. حتى وزني نقص 4 كيلو ..
بعدها رحنا للعمره لأول مره بحياتي اشوف ادخل مكة .. اصلا سبحان الله جت فجأه ..
والله للطريق لمكة ماكنت مبسوطه حيل لأن ابوي سيء الخلق ولسانه متبري منه وانا زهقت بالسياره معه .. بس كنت اصبر نفسي لأني بعتمر ..
اعتمرت بتاريخ 28_8_1436 قبل رمضان اللي فات ..
دعيت ربي وبكيت انه يعوضني خير وينسيني احداث الخطبة اللي رفضها ابوي ..
والله في المدينة ومكة لساني فقط انه اتزوج وانه خلاص ياربي ماعاد اتحمل ابوي ولا اخلاقة السيئة وتعامله مع امي وانه كل الصبر اللي فيني نفذ ..
كنت ادعي من قلب والله
المهم رجعنا لبيتنا وطبعا لا جديد .. اليوم مثل أمس .. روتين قاتل
صرت اعوض نفسي بالنوم .. كل الوقت نايمة لأنه بجد ماعندي شيء اسويه .. لو كان عندي وظيفه كان تغير روتين حياتي الممل ..
طبعا ابوي حارمنا من الطلعات والوناسه واذا طلعنا لخوالي او عمامي والله يا بنات طلع الفرحة من عيوننا .. الله يعين بس
اللي ابغى اوصل له هنا :
في ليلة عيد الأضحى المبارك رحت انا وخواتي للسوق نشتري للعيد ..
وحنا نتسوق وكان معي 500 ريال وكنت ناويه ما اشتري اي شيء كنت ابغى اشتري فيها شريحة بيانات مفتوحه نت بمبلغ 320 ريال ههه ماكنت استغني عن النت والله هو مصبرني ومسليني ..
المهم جت حرمة كبيرة بالسن دخلت بيني انا وخواتي بالمحل ومن كلامها عرفت انها تطلب فلوس يعني متسوله ..
قالت انها جايه من هجره تبعد عن مدينتي 30 كيلو وان عندهم ضمان لكن اقطعوه وماتعرف ايش السبب وراجعت ووعدوها بعد العيد يرجعوا الضمان وانه عندها عيال ووووو
بصراحه انا كنت بعطيها 10 ريالات بس مامعي صرف فقط 500 ريال
قلت لها ؛ مامعي صرف بس انتظري الى ان اصرف واعطيك ..
قالت لي انا شفت فستان بالمحل الفلاني وابغى اشتريه لبنتي عمرها 10 سنوات وانا تركتها بالبيت وهي تنتظرني اشتري لها لبس العيد .. وانا والله طلعت ومامعي ولا ريال ولا اعرف كيف اشتري لها وافرحها بالعيد !
انا حزتها قلت لنفسي افضل اشتري لبنتها فستان ولا ادفع لها فلوس يمكن تكذب ..
فقلت لها : ابشري يا خاله بروح معك للمحل واشتري لبنتك ..
بس انتظري لين خواتي يشترن من المحل هذا ونروح كلنا مع بعض ..
المهم وهي تنتظر معي كانت والله يا بنات انها تدعيلي من قلبها .. والله دعوات فرحت لها ، وكنت بقلبي اقول من زمان ماتصدقت خل اتصدق لها ..
خلصن خواتي ومشينا للمحل وبصراحه شفت المحل اللي فيه فستان بنتها ، اعرفه غالي مره ههههههه وانا كنت حاطه ببالي حد الفستان 50 ريال وان طار 70 ريال ..
فدخلنا ورحت معها للفساتين وقالت بنتي عمرها 10 سنوات واشتري لها على ذوقك انتن بنات وتعرفن تشترن احسن مني ..
والله كسرت خاطري
المهم قعدت اختار لها فستان والله كأني اختار لاختي الصغيره ..
وفعلا اخترت لها فستان وطلع ب 105 ريال
قلت لنفسي ياربي غالي ماراح يبقى لي شيء من ال 500 ..
المهم وانا آخذ الفستان وقبل لا اروح للمحاسب قلت يارب بالصدقه هذه على الطفلة وفرحتها بفستان العيد انك تفرحني وترزقني بالزوج يارب ..
حاسبنا وخلصنا واعطيتها الفستان حتى فاتورة الشراء اعطيتها وقلت لها اذا طلع قصير او كبير عليها تقدرين ترجعين للمحل وتاخذين الأنسب لها ..
والله يابنات دعت لي دعوات طيبه ... قالت لي انتي متزوجه ؟ قلت لها لا
قالت يارب مايخلص هالشهر إلا وانتي متزوجه وانه يستر عليك ووو
جاء العيد وانتهى وانا نسيت سالفة الحرمة وبنتها .. بجد نسيتها ..
ورجعت لروتين حياتي الممل ..
اقسم بالله يا بنات بتاريخ 22_12_1436
انخطبت من ناس طيبين ومن نفس قبيلتنا ومن ولدهم لكنه مطلق من غير اولاد واكبر مني بسنة وكم شهر ..
وسبحان الله ابوي وافق بنفس اليوم واهلي فرحوا ، حتى الفحص اللي ماقبل الزواج طلعت نتائجه بسرعة والحمدلله فيه توافق مع اني كنت متخوفه انه مافي توافق ، وملكت بتاريخ 2_1_1437
حتى والله كنت اتوقع املك يوم الاحد كنت مبرمجه مخي على هذا وكنت مكتئبه ابي املك بسرعه هههه لكن فجأه اتصلوا بعد صلاة الجمعة وقالوا العصر نملك ههههه
والله يابنات هالخطبة كانت ميسره جدا جدا غير السابقات !
اقسم بالله اني وقتها تذكرت الحرمة ودعوتها لي بالسوق !
مع اني يوم اشتريت لها الفستان لا انكر انه دخل الشك بقلبي واني خفت من وراي ترجع الفستان وتاخذ قيمته لكن وكلت امري لله وقلت هي صدقه وعلى نيتي ..
ماتوقعت يا بنات ان الدعاء والصدقه لها أثر عجيب .. مع اني مؤمنة في هالشيء لكن ماعرف كأنه شيء سحري !
انا عمري 30 سنه ، والآن من بعد ملكتي صرت افكر بنفسي وكيف اكشخ وكيف اخلي بشرتي حلوه ههههه
اسأل الله ان يحفظ هذه المرأه ويستر عليها وعلى بناتها ويغنيها من واسع فضله ،، نفسي والله اقابلها مره ثانيه ماعرف ليش حبيتها ..
وهذه قصتي .. وادعوا لي بالتوفيق في حياتي القادمة .. اسألكم بالله ..
وعليكم بالصدقة واكثروا منها ... الله يكتب لكم الخير ..