قصتي ليست في الاحلام

السلام عليكم ورحمة الله

صباح الخير

حبيت اكتب لكم قصتي للافاده وبحكم دخولي للمنتدى كثير وانتم بمثابة خواتي

كاي فتاة كان حلمي فستان ابيض وحياة سعيدة وزوج يحترمني ولا يظلمني ,

قبل سنتيين انخطبت من طليقي وكان مو من مدينتي , ترددت كثير بحكم الغربه وكنت حاسه ان فيه شي

لكن عمي كان يمدحه ويقول زوجه وبنتك كبيره ( كان عمري 25 ) وبنظر اهل ابوي اني عانس

وبعد الضغط وافقت

بعد خمس شهور تم الزواج , يوم شافني طاح ع الارض انصدم من جمالي " تقاليدنا الرجل مايشوف

الا يوم الزواج " وبعد يومين مشيت طلعت من بيت اهلي وانا بداخلي هم الغربه لاني سكنت بقريه قلت
يابنت مع الايام يبتغير ويمكن مستحي مني لكن للاسف احساسي كان بمحله

كان ممنوع اني اساله وين تبتطلع تبتاخر ولا لا , ممنوع اقول من عندك , حتى لو بنسافر ممنوع اساله مايستشيرني بشي , حتى لو كنا نبنطلع مايسالني هو يقرر انا ماعلي الا التنفيذ يقول مابقى الا اشاور مراه قلت الرسول عليه الصلاة والسلام كان يستشير نساءه

يوم عشت معاه اكتشفت انه ضعيف شخصيه وان لسانه بس علي لدرجة ان اصدقائه يقدروون يغيرون رايه " على فكره اصدقاءه كانوا عارفينه وكانوا دايما يقولون احمد ربك ان ابوفلان زوجك "

كانت امه مسيطره عليه بالمره طبعا امه ( xxxxxxxxxxxxxxx)

كانت تغار من مدح الحريم لي وكانن يقلن لها ربي جاب لتس زوجة ولد ماتلقين مثلها
من هنا بدت المشاكل قالت لاتصرف عليها تخيلوا وانا جالسه تعبي راسه قلت ليه ماني زوجته وبذمته قالت وين راح المهر انا سكت مابي ادخل بجدال ويصير الحق علي لان امه انسانه ظالمه وقالت انت معيشها احسن من خواتها الباقيات انت مدللها وانا كنت اتعسهن لارجل ينشد الظهر به ومريض نفسي

كل المشاكل ذي ماكنت اعلم اهلي بس احساس الام امي الله يحفظها يوم كنت اكلمها تقول صوتك وش فيه اقول توني قمت من النوم ""سبحان الله الام تحس بظناها حتى لو هي بعيده عنها ""

صارت مشكله طبعن انا مراه لااروح ولا اجي هو المكلوف بمصروف البيت وحط السالفه علي وهنا اراد ربي بي خير ( كلم امي وحط فيني بلاوي الدنيا)

قلت كذاب وجلست ابكي وكل شي قلته لامي وامي علمت ابوي وجو اهله
اتهمني اني هاجرته طبعن الكلام هذا قاله لابوه وابوه علم ابوي ((( هنا ربي نصرني))) بعدها بيومين حللت وطلعت حامل مافرحت لاني كنت انجرح واسكت وهو طار من الفرحه

ونزلني عند اهلي وارسل لي رساله هددني علمت امي وابوي قالوا هذا مريض ماينعاش معه تركته مادقييت ولا ارسلت

يوم فقدني وفقد خدمتي له ارسل ع الواتس تعذرت بالوحام ويدق علي وقال والله لاربيك انا بتزوج عليك قلت بسلامتك
اليوم الثاني دق وقال لي شروطه عشان يجي ياخذني هنا انا قلت له

يا انك رجل تسنعني او تفارقني انصدم من كلمتي قال وش قصدتس قلت الله سبحانه وتعالى يقول ( واما امساك بمعروف او تسريح باحسان ) هنا شاف اني جديه بكلامي وتاسف

اليوم االثاني سقطت (نزل الجنين ) هنا تذكرت صبري عليه وارسلت له رساله قلت له اني سقطت

بس كنت اردد اللهم اجرني في مصيبتي واخلفني خيرا منها
وجاء وقام يتاسف وانا ساكته مارديت لاني اعرف انه يبيعلم امه رجعت معاه ومن دخلت الشقه كانت وسخه قمت ونظفت وانا توني مسقطه
جوني جاراتي وسلموا علي وهم سامعين باللي سواه فيني ويلمحوون بس انا سكت مهما كان هذه اسرار

طبعن امه مادقت علي تحمدلي بالسلامه وحاطه اللوم كله علي

وبعدها نقلني لشقه ثانيه كل اللي حولي اراضي فاضيه لانه يقول انتي في احد يعبي راستس علي

ويوم شفت انه ماتغير صرت اعلم اهلي بكل شي وادعي ربي اني افتك منه

صارت امه ع الطالعه والنازله تستفزني لدرجة انها قالت ابوك خطب عيالي فلان وفلان قلت لها مو حنا اللي نخطب الرجال الرجال هي اللي تجيينا هنا امه سكتت

بعدها بفتره امه زعلت وقالت بخطب لك بنت عمك وهو وافق طبعن بنية امه انه يملك ع بنت عمه وولد عمه يملك ع اخته " زواج بدل " وخطبت له وبنت عمه رفضت قالت مابقى الا اخذ ولد ...... طبعن خطبت له وابوه مادرا ويوم درا ابوه قال ماني موافق مرتك ماتلقى مثلها بالحريم عاقله وبها دين

وجا علمني فكان ردي قلت له ماصرفت علي وصبرت ع فقرك وع مذاهبك الشينه وع شروطك والحيين ماني مجبوره اعيش معاك وقلت انت فرحة عمري يوم حملت جلست ورايي ليين ماطاح قام يقول انتي وانتي اخر شي قاله انتي تغارين من امي قلت انا اغار من امك جزاك الله خير
وهو يطلع يسافر مدري وين راح ومادقييت عليه يوم جا الا انا مجهزه شناطي قال فكي اغراضك قمت وزعت جزء منها وخلييت الباقي بالشناط ورفعت الشناط

راح علم اصدقائه بالعمل قالوا ودها لاهلها من تبتنزلها يبيدقون عليك تعال خذها

كنت مسويه قهوة وشاي وحلى بروح لاهله فجاني قال جمعي اغراضك وانا اروح اشرب ماء زمزم واستقبل القبله وادعي ان ربي ييسر لي امري لما هو خير لي

طبعن وحنا بالطريق قال بطلقك انتي وانتي وانا ساكته مارديت عليه

بعدها باسبوع دق قال بجي اخذك وابي اكلم ابوك بعدها بخمس دقايق قال ماني جاي

طبعن هو يحسب اني بركض وراه انا تركته ودق قال ماتسالين علي قلت مو انت مانعني ادق عليك وهو يسكت
بعدها بكم يوم ارسل رساله طلقني
وبعدها رجعني وانا مادري وارسل علي رساله قال حملت الواتس ادخلي ابيك ( وقت العده) قال انا رجعتك وبجي اخذك
وجا ورفع صوته ع ابوي ابوي قال ليه ماجبت رجال معاك يشهدون انك رجعتها او انك جبت ورقه من المحكمه اثبات
وهو يتكلم ع ابوي ويطلع ويسكر الباب ويرسل ع الواتس يتكلم يقول ابوتس هاوشني قلت له انا ماني غبيه انا سمعت كل كلامكم قال خلييه يجيبك معاتس يومين قلت له انا ماني لعبه بيدك واكسر الشريحه

طبعن مشاكله كثيره معاي بس هذه اهمها

من اسبوع زواجنا لاحظت ملاحظات كثيره عليه كلها تدل على انه يامريض نفسي او ان فيه مس

طبعن ماتم طلاقي الا بعد ماملك لانه خاف ان محد يزوجه

بالنسبه للي يبيسألني كيف معاملتي لاهله الحمدلله عاملتهم كأنهم اهلي لان الانسان مهما كان ماله الا سمعته ( انا كنت ساكنه بحي ثاني عن بيت اهله)

كنت اجي عندهم اشتغل وانظف كنت محل احترام من اخوانه الا اخوه الكبير لان زوجته تغار مني
كانوا البنات يحبوني

طبعن هو ظلمني قال ماتطبخ وماتبي اهلي وكلام كثير بس ما اقول احسبي الله ونعم الوكيل

بالنسبه لحياتي معاه كنت مدللته دلال من يتكلم اقول تم كان يدخل البيت نظيف الاكل جاهز ملابسه جاهزه ما يسمع الا احلى الكلام علمته بامور الدين وخلص ديونه وربي بارك له بماله

نصيحه لكل بنت لم تتزوج لايكون الزواج اكبر همتس لانه يمكن امتحان من ربي لك ادعي واذكري الله وادعي ان ربي يرزقك زوج بار في اهله

اللهم اجرني في مصيبتي واخلف لي خيرا منها