بسم الله الرحمن الرحيم
ترددت كثير قبل لا أكتب قصتي
بس قلت خلني أكتبها وأفضفض شوي
وأطلع من هالحزن والهم اللي كاتم على صدري
أبكتبها لكم أخواتي وبحاول إني اختصرها قد ما أقدر
أنا كنت أعيش بين أمي وأبوي وإخواني السبعة وأخواتي الأربع
أنا كنت التاسعة في ترتيب العائلة والرابعة بين البنات كانت حياتنا حلوه وعايشين بسعادة،
تربينا على الدين والحب والاحترام لبعضنا، كنت أنا دلوعة أبوي حتى سبحان الله ماخذه من شبهه كثير
وكان يحبني وأحبه حب ما ينوصف رغم إن كان فيه أختي اللي أصغر مني ويحبها بس حبه لي كان غير،
كنت كل ما اطلع من المدرسة وأدخل البيت يرحب بي وأحب رأسه وخشمه وكذالك أمي نفس الشيء
وإذا جاء العصر اجلس معه واسولف له ويسولف لي عن قصص زمان وينشد لي بعض الأشعار بلحن خاص
وليومكم هذا ما نسيته وإذا جاء المغرب تجهز أمي القهوه وأجي اقهويهم وأسولف معهم كنت ما أحب أفارق أبوي
وهو بعد ينبسط معي لأن أخواتي الثلاث اللي أكبر مني متزوجات وكان إذا بغيت شيء ما يردني
وإذا شافني زعلانه أو متضايقه يجي ويراضيني ويمسك خشمي بأصابعه ويبوسها (هذي الحركه دايم يسويها لي إذا شافني زعلانه)
وكان دايم يأمرنا بالصلاة وإذا جاء من المسجد يسأل صلينا وإلا لا؟, وكنت إذا جاء ينام اطل عليه واسأله إذا يحتاج شيء وأبوس رأسه،
المهم أبوي كان مريض بالقلب وأمي كانت مريضه بالضغط والسكر
فجاه تعب علينا أبوي وطاح بطوله وصار يصلي بالبيت وكان طايح على فراشه ثم دخل المستشفى كم يوم وطلع
ويوم من الأيام سمعته يناديني واجيه اركض وأقول: لبيه يبه, قال: لبى قلبك, قلت: بغيت شيء يبه آمر؟
ناظرني بنظره ماليها التعب والحزن قال: لا بس أبغى أحب خشيمك وراسك يا بنيتي,
إلا يوم تنزل دمعتي على خدي ويحبني وأحب رأسه وخشمه.
وأروح لامي ابكي وأقول لها اللي صار وأسالها: يمه أبوي وش فيه؟ قالت: ما فيه شيء إن شاء الله يمكن تعبان شوي.
المهم اليوم اللي بعده رحت للمدرسة وكل تفكيري بأبوي كنت في ثالث متوسط وكانت أيام المراجعه
ورجعت من المدرسة وكان نايم ورحت أنا أنام وقمت المغرب إلا ما ألقى أبوي!!
وأروح اسأل أهلي أبوي وينه؟ قالوا: تعب علينا وطلبنا له الإسعاف ووديناه للمسشفى وهو الحين بالعناية المركزة.
المهم ضاقت بي الدنيا جلست ابكي وادعي له رحت لامي وقلت: يمه أبغى أزوره, قالت: لا اليوم ما فيه خليه بكره.
نمت وقمت وكان هاليوم يوم الأحد بعد المغرب قالت أمي لواحد من إخواني ودوا أخواتكم يزورون أبوكم
أنا ماني رايحه لأني ما اقدر أشوفه بهذي الحاله (لان اخوي يقول حاطين أنبوب أكسجين برقبته)
المهم ودانا أخوي ومعه أخوي اللي أصغر منه رحت معهم أنا وثنتين من أخواتي الكبار
المهم يوم دخلنا المستشفى إلا ويقابلنا زميل اخوي في الاستقبال كان رايح يزور أبوي, إلا وينادي اخوي يا فلان تعال في مكتب المدير!!
أستغربنا وقلنا وش عنده مدير المستشفى يبغاه؟,وراح أخوي وخلانا مع أخوي الثاني,
إلا يوم قامت دقات قلوبنا تسرع ورجلينا ترجف حسينا إن صاير شيء لأبوي.
بعدها بكم دقيقه إلا أخوي طالع معصب ووجهه شين ويصرخ على أخوي ود خواتك للسيارة وأنا بلحقكم.
رحنا ركبنا السيارة مع اخوي وجانا اخوي وركب وشغل السيارة, قلنا وين ما زرنا أبوي؟
قال أبوي حالته خطره وممنوعة عنه الزيارة, حنا شكينا بالوضع حتى هو صد بمرئية السيارة ويمسح دموعه
رجعنا للبيت إلا يوم دخلنا إلا إخواني الكبار في البيت وعليهم ثيابهم وشمغهم بس منزلين عقلهم وجالسين جنب أمي
وأمي تبكي وتدعي لأبوي بالرحمه!!
في اللحظة هذي تأكدنا بان أبوي مات!! أيه مات عزوتنا وسندنا وحبيب قلوبنا
جلسنا بعباياتنا نبكي وأمي تضمنا لصدرها وتهدينا،
راحت أيام العزاء, بس حنا حزننا وبكانا باقي ماراح.
ومرت الأيام وصارت أمي حنونه أكثر علينا وكانت تحاول تنسينا الحزن.
المهم مرت سنه ونص على وفاة أبوي
كان ذاك الوقت كنا برمضان المهم قرب العيد وكان التاريخ ٢٦ يوم الأحد قلت لامي: يمه قرب العيد وحنا ما اشترينا شيء!!
قالت: اليوم بروح أنا وإخوانك الصغار اشتري أغراضهم وبكره أخوك بيأخذ سيارة من زميله ويوديكم أنتم يالبنات (كان ماعندنا سيارة ذيك الأيام)
المهم صلت التراويح كان ذاك اليوم هواء وبرد ويوم جت تطلع تعلق فيها ولد أختي ويبكي كان صغير ويوم فتحت باب الحوش وجت بتطلع
قالت كلمه ما أنساها طول عمري, قالت(اللي بيطلع في هاليوم ما هو راجع)!! وسكرت الباب وراحت.
كان السوق قريب لبيتنا وراحت مشي, المهم جلسنا نرتب أنا وأخواتي البيت ونبخره وبعدها بربع ساعة رن جرس الباب
إلا وافتح وألقى اخوي الصغير اللي في الابتدائي راجع يبكي وبيده جزمه أمي!!
طارت قلوبنا قلنا أمي وينها؟!!
قال: وداها أخوي على تاكسي للمستشفى, قلنا: وش فيها؟!
قال: تعبت في الطريق وقالت خذوا تاكسي تعبانه وأخذنا تاكسي
وركبت جنب أمي إلا يوم طاح رأس أمي على رجلي وقعدت تطلع صوت مثل الشخير
وقال سواق التاكسي أرفع الغطاء عن وجهها وماراح ألتفت وصد بالمراية,وقال بنوديها للمستشفى.
وأنا نزلوني وراحوا, إلا ونجلس نبكي وأروح للتلفون وأدق على إخواني وأقول لهم وراحوا للمستشفى أمي هناك
وفي ذا الوقت دق علينا اخوي اللي وداها قال: إن الدكتور يقول انخفض الضغط والسكر عندها.
بعدها بنص ساعة إلا واحد من إخواني جاي ومعه اخوي اللي كان معها يبكي واسألهم أمي وين؟!!
كنت أنا وخواتي الثنتين (المتزوجة والصغيرة) ومحد رد علينا واحنا نصارخ عليهم أمي وينها؟!!
إلا وتجي مرت أخوي وتقولنا: خالتي ماتت!!
إلا وأصيح ذيك الصيحه وأختي المتزوجة تصيح وتسحب شعرها وتروح تركض لباب الشارع وهي تقول أمي وينها؟
أبغى أشوفها إلا ولد عمي دخل اللي هو زوجها ويمسكها ويهديها
وأروح أنا لأخوي الصغير(اللي طاحت عليه) وأختي الصغيرة وهم يبكون وأضمهم على صدري وابكي معهم
وادعي إن الله يربط على قلبي وقلوبهم ويرحم أمي وأبوي.طبعاً ماتت الله يرحمها ليلة ٢٧ يوم الأحد نفس يوم أبوي
ومرت الأيام طبعا أخواتي اللي اكبر مني متزوجات وأخواني الثنين الكبار متزوجين وطالعين برا البيت
المهم شلت المسؤليه بعد أمي صرت اطبخ لهم وأنظف وأهتم بأخواني وأقوم بهم
شفت أشياء محد شافها وسكتت وشلت هموم محد يشيلها وعشت بحزن ما يدري به إلا الله سبحانه
كنت إذا تضايقت اجلس لحالي وابكي واطلع اللي بقلبي بكتابة الأشعار والخواطر
مرت سنين وكان الخطاب كل فتره يتقدمون لي وأنا ارفض
كنت أفكر بأخواني من اللي بيهتم فيهم؟! من اللي يجهز فطورهم ويصحيهم للمدارس؟ من بيحس بهم إذا تعبوا أو احد ضايقهم؟
كنت رافضه هالفكره ومأجلتها بعد مرور حوالي ٦ سنين تقدم لي واحد ملتزم ومطلق بدون عيال المهم الكل نصحني إني أوافق
ويقولون أخونك كبروا واعتمدوا على أنفسهم إلى متى وأنتي ترفضين؟!
المهم استخرت وفكرت وقلت: هذا ملتزم وأخاف أرده ويعاقبني ربي
وتذكرت حديث الرسول عليه الصلاة والسلام(إذا أتاكم من ترضون دينه وخلقه فزوجوه إلا تفعلوا تكن فتنة في الأرض وفساد كبير)
وافقت وتزوجت ولا كأني تزوجت!! ما الله وفقني ورجعت لأخواني بعد أسبوعين وأنا ابكي وحلفت ما ارجع له
لأني شفت منه أشياء ما أبغى أقولها ما أقول إلا الله يستر علي وعليه بس
وطلبت الطلاق المهم رفض يطلق بالطيب ووصلت المحاكم وكل شوي جلسه وموعد
وأنا كانت نفسيتي زفت ما غير ابكي واصلي وادعي مرت شهور على الحال كنها سنين والحمد الله تطلقت والله يعوضني خير منه
وهذا أنا الحين بين إخواني الله يصلحهم ويهديهم ولا يحرمني منهم
صحيح أنهم يتعبوني بمشاكلهم وهمومهم بس مهما كان يبقون إخواني وأتحمل المر لأجلهم واصبر وأحتسب الأجر
لأن عندي يقين بإذن الله راح يعوضني الله بكل خير إن شاء الله.
إنتهيت
بس ما أنتهت قصتي لأني لحد الآن أعيشها بحلوها ومرها وأختصرتها لكم كثير
بس طلب لكل من تقرأ قصتي اللي أمها وأبوها عايشين وبينها
طلبتك الله الله بهم ترى والله ما تعرفين قدرهم إلا إذا راحوا
وبالأخير ما أقول إلا الله لا يذوقكم اللي ذقت يارب
والله إني أحس إني بموت من الهم والحزن, وآحياناً أتمنى الموت والله
دعواتكم لي إن الله يزيل عني الهم والحزن وإن يفرجها علي ويعوضني خير
ويرحم والداي وموتى المسلمين ويغفر لي ولهم أجمعين
ويجمعني بهم في جنات الفردوس الأعلى
اللهم آمين
غلا قحطان @ghla_khtan
محررة
يلزم عليك تسجيل الدخول أولًا لكتابة تعليق.
اختي الغاليه
الله يفرج همك ويرحم والديك
بس لاتنسي ان المؤمن مبتلى والصبر زيييييين وان شاء الله ربي مايضيع صبرك ويفرجها عليك ويفرح قلبك
واكثري من الاستغفار وقيام الليل والدعاء وربي لهم دور كبير في تفريج الهم والضيق والحزن
والله يسعدك دنيا واخره وييسر لك امورك ويعينك يارب
الله يفرج همك ويرحم والديك
بس لاتنسي ان المؤمن مبتلى والصبر زيييييين وان شاء الله ربي مايضيع صبرك ويفرجها عليك ويفرح قلبك
واكثري من الاستغفار وقيام الليل والدعاء وربي لهم دور كبير في تفريج الهم والضيق والحزن
والله يسعدك دنيا واخره وييسر لك امورك ويعينك يارب
بكيتيني ياقلبي الله يرحم امك وابوك ويسكنهم جنات النعيم
وترا مو بس انتي فهالدنيا لحالك تعانين ياما وياما في هالبيوت ناااس
مهمومه ومكروبه وتنتظر فرج ربها ومافي واحد منا مافقد عزيز وحبيب وماشالله عليكي صبرتي ولا زلتي صابره احسنتي لوالديكي ولازلت تحسنين لاخوانك هنيئا لك بالاجر دامك صابره محتسبه
وان شاء الله بيعوض ربي صبرك خير ان لم يكن في الدنيا فتيقني باذن الله انه في الاخره اسال الله ان يفرج همنا وهمك والمسلمين اجمعين ويرزقك بالزوج الصالح الذي تقر به عينك آمين
وترا مو بس انتي فهالدنيا لحالك تعانين ياما وياما في هالبيوت ناااس
مهمومه ومكروبه وتنتظر فرج ربها ومافي واحد منا مافقد عزيز وحبيب وماشالله عليكي صبرتي ولا زلتي صابره احسنتي لوالديكي ولازلت تحسنين لاخوانك هنيئا لك بالاجر دامك صابره محتسبه
وان شاء الله بيعوض ربي صبرك خير ان لم يكن في الدنيا فتيقني باذن الله انه في الاخره اسال الله ان يفرج همنا وهمك والمسلمين اجمعين ويرزقك بالزوج الصالح الذي تقر به عينك آمين
لوله2010
•
غلاقحطان الله يربط على قلوبكم ويصبركم وان شاء الله يرزقك بزوج الطيب اللي يعوضك صبرك ويزوج الله من بقى من اخوانك
وتراك ياغلا بكيتيني تذكرت ابوي الله يرحمة وجميع اموات المسلمين
وتراك ياغلا بكيتيني تذكرت ابوي الله يرحمة وجميع اموات المسلمين
الصفحة الأخيرة
مايبتلى الاالمؤمن
كثري الدعاء لك ولوالديك بالرحمة واحتسبي الاجر
واذاجاءك خاطب ثقه تاكدي بالسزءال عنه ولاتجلسين بلازوج
بعدين تحتاجين الذريه في وقت مايمديك ان تنجبين فعمرالمرأة قصير
اللهم اغفرلوالديها وارزقهامن خيرة عبادك الصالحين