قصتي - معانااااااة مستمررررة

السلام عليكم ورحمه الله وبركاته

بدون أي مقدمات راح ابدأ قصتي .
وقبل لا ابدأ احلف بالله اني صادقة باللي بقوله وحلفاني مو لشيء بس من طبعي تعودت احلف .
انا يابنات عمري 26 سنة جامعية حلوة والاهم من ذا كله حساااااااااسه حيل وطيبه طيبه ماتنفع بهالزمن .
انا يابنات من يوم ولدت او بالاصح من عرفت نفسي بحدود 7,6 سنوااات وانا مو مستقيمه بمشيتي اللي عرفته من اهلي انه معاي لين بالعظااام وكنت انا الوحيدة من باقي اخواني واخواتي اللي عندها لين بالعظام . وعندي اخت اصغر مني بسنه لكنها طبيعية . ابوي دخلنا المدرسة سواء ( يعني ابوي اخرني سنة في البيت لجل اني في ظنه صغيره او شي زي كذا ) ومن دخلت المدرسة وانا اشوف البنات كل البنات طبيعيات بما فيهم اختي الا انا ( دايم اتعثر بمشيتي ) وكنت اتحطم كثيييير وكانو الابلات يعطفون علي بزيادة ( وليتهم ما اعطفوا ) حسسوني اني ضعيفة ونفس الشي اهلي كلهم دائما يستضعفوني . بسبب مشيتي .
وربي صرت اشوف اهلي والابلات وحتى اقاربنا خالاتي عماتي وغيرهم دائما نظرتهم لي ( ضعيفة ومسكينه ) كنت احززن وانقهر ( انقهر منهم ) ويوم افكر الاقي نفسي استااهل الشفقة لانه صدق مشيتي مو طبيعية .
اااه يابنات كنت اكرره المدرسه وكنت ابكي في نفسي وانا رايحة للمدرسه (ما ابكي قدام اهلي ) ااه كنت اشووف امي تلبسنا المراااييل واختي فرحانة وانا شايله ( هم وهمووم ) لان المدرسة عندي (لازم امشي لازم ) .
كنت من قهري احط حرتي بالمذااكرة (عشااان انسى ) وكنت متفووقة وانجح بامتيااز .
نفس الشي بالمتوسط والثانوي بالعكس صرت اخس من قبل ( مشيتي زفت وانا نفسيتي دمااار )
مشيتي فتحت لي ابوااب كثيرة من الهم والحزن .
كنت اتعرض لموااقف مو زينة بسبب مشيتي ( انا واختي نروح للمدرسة مشي ) اختي كانت تمشي جنبي وتضحك علي بالذات لاكنا متزاعلين واوقات تسبقني بخطواتها .
صرت اشووف مشيتي في عيوون النااس كلهم .
كانو الشباب يتعرضون لي انا بالذات عن اختي (بالمعاكسات ) ليش ؟؟ لان انا مشيتي
مو طبيعية ( هم يفكروني قااااصدة ) والله يابنات اني اتحجب حجااب كامل وقفازات وكل شي .
مع الوقت صرت اخاااف من كل شي . اخااف من النااس كلهم .
اخااف من الاسواق والمجمعات واخااف من المستشفيات واخاف من الجامعة واخاف من الزواجات ومن كل شي فيه ناااس وبالذاااات لاصاروا كثيرين .
بعد ماخلصت الثانوي كنت جايبه نسبة ممتازة واختي وقتها ماجابت نسبة كويسة ورسبت نفسها لجل تعيد ( الفصل الثاني من التوجيهي ) كنت لحاالي كااان عندي خوووف غير طبيعي . البنات يخافون من النسبة وانا اخااف من المشي في الصباح والظهر .
بس الحمد لله جبت امتياز ودخلت الجامعة وربي يابنات معاناتي ماتوقفت .
في اول يوم في الجامعة كنت انتفض من الخووف بس امسك نفسي لاحد يشوفني .
اااه ياما عاانيت . الجامعة بحد ذاتها مجتمع وربي معاناة .
بنات وربي لو اقلكم ماتصدقون . تعرفون البنات واللبس . انا كنت اكرر لبسي كثير ... ليش
ممكن ماتتوقعون .
وربي يابنات ابوي ربي منعم عليه ولو اطلبه عيونه عطاني . بس انا ما احب ارووح السوووق . لجل كذا كنت اكرر لبسي . واوقاات اغصب نفسي واروح والا اوصي اختي اذا رااحت تجيب لي معااها .
بنات انا كنت ولا زالت شخصيتي جذابة شوي (وربي مو مدح لنفسي ) وربي صدق وكانو كثير بنات يحبون يتعرفون علي وربي وربي وربي (مو غرور ) وربي صدق ممكن بعضهم مصلحة بس عاادي ..واي بنت تطلبني دفتر او مذكرة او أي شي اساعدها وما اقول لا ابدا .
بنات انا كنت صح متعقدة من مشيتي بس كان لي صاحبات وكان عندنا شلة وفلة وضحك بس المووت عندي يوم اروح لفرشتنا والاقيهم كلهم جالسات وانا جاية امشي قدامهم كنت استحي حييييل (اما كسواليف عااادي اسولف واضحك وانا في نفسي هم )
بنات اتمنى انكم فهمتوني .
انا كل ما اكبر تتجدد مشكلة بحياتي بسبة هالمشية .. صااارت ثقتي بنفسي صفر صفر صفر .
زواجات كثيرة ما احضرها الا الاقاارب فقط . اسواق ما ارووح الا مرتين ثلاث بالكثير في السنة . امرض احااول اني مااروح مستشفى . اخاف من الدرج الكهربائي .
العمرة مرتين بس في حياتي واهلي كل رمضان يروحون واوقات في الصيف بعد وانا اقلهم لا مابروح .
بنات هذي السنة الثالثة لي في البيت ومعدلي امتياز مع مرتبة الشرف (بامكاني اكمل دراستي وبامكاني اتوظف ) بس اخترت البيت لاني خوااافة .
بنات يبقى عندي مشكلة اخيرة اللي هي ..
قبل سنتين انخطبت اختي وربي فرحت لها فرح وياربي توفقها يارب .
بنات من وقت ماتزوجت اختي صرت وحيدة شوي
وصرت افكر بالزواج وكيف لو تزوجت وش اسوي .
المشكله وممكن ماتصدقون وربي انها مشكله اني انخطب بس دائما ارفض
اخااف خوف مو طبيعي .
انا اتمنى اكون زوجة واكون ام ويصير لي اولاد وبيت وكل شي .
بس يوم افكر بنفسي واشوف مشيتي واشوف نظرات الناس لي واشوف الشفقة بعيونهم واشوف نفسيتي (انا ادري ان عندي رهاب اجتماعي ) (ماعمري رحت عيادة طب نفسي ) بس انا اعرف اني مريضه بالرهاااااب . يوم اشوف الاشياء ذي كلها اقول مثلي حراااااااام تتزوج .
يعني اكيد الزواج مسؤوليات انا مارااح اكون قدها (انا اعرف نفسي ) وطيب جالي عيال كيف اربيهم ( انا بجيب لهم عقد نفسية ) بيصيرون منطوين ومعقدين .

بنات انا تعبت وربي تعبت وربي ادعي الله اني اموت وارتاح .
كنت اتمنى اني معاقه على الاقل يعرفون الناس اني معاقة ( اما كذا لا سليمة ولا معاقة )
بنات انا ربي اعطاني جمال وربي اناظر المراية اقول حرام هالوجه يكون على هالجسم التعبان .
مشكلتي حسااسه حيل أي احد يناظرني اقول اكيد يناظر مشيتي (ما اقول فستاني حلو او مكياجي حلو ) فهمتوني كيف .
صرت اناظر نفسي بسلبيه واشوف الناس وهم يمشون واقول ياحظهم .
بنات تكفون لاتقولون ان مشكلتي تافهة وربي وربي مايحس بالنار الا واطيها .
لا حد يقول لي روحي طبيب نفسي ( انا اصلا اخاف من المستشفيات كيف اروح لهم ) وكيف اقول لاهلي اني مريضه نفسيا وربي هم يشوفوني ملاك ومو حاسين فيه ودايم انا المستشارة عندهم . اروح اضعف قدامهم واقلهم ودوني ..
ابغى حل غير الطبيب النفسي .
انا لي اسبوع تقريبا صرت ادخل مواقع نفسية واسال عن الادوية اللي عن الرهاب المشكله اغلبها لها اثاااار جانبية .
انا ابغى علاج اخذه من الصيدليه وخلاص ما ابغى اروح طبيب نفسي .
بنات انا اصلي وادعي وارتاح بس مجرد مايصير لي موقف اتحطم .
حيااااااتي عذااااااب
وربي عذااااب
" اللهم ان كانت الحياة خيرا لي فاحيني , وان كانت الحياة شرا لي فامتني "
وصلى الله على محمد وسلم .