قصتي مع ابوي ..الله يجمعني به

السلام عليكم رحمة الله وبركاته بأختصار يااخواتي ابي متوفي له تسع سنوات كان مشلول وعند اختي جلسنا عندها شهرين وبدات الدراسه وقلت لها بشيل ابوي لبيتنا وبقوم فيه انا واخوي عمره 15وافقت ورحنا ..انا ابوي كان يحبني ومدللني ودايم يحضني ويسلم على راسي وماااايصبر عنا انا واخي صرت اهتم فيه اغير له (الله يكرمكم)قبل اروح المدرسه كنت ثالث ثانوي طبعا ..افطره واغير له ملابسه ونشيله نفرش له في ضل البيت عشان يتهوى ولما ارجع ادخله في البيت واجيب له الغداء والعصر كذلك نفرش له ونخرجه ..وكنت يوم بعد يوم نروشه وانضفه وكان مسليني وسعييييييده اني اخدمه وبعدين انخطبت وتزوجت كان يقولي والله ماالقى احد يقوم فيني لارحتي والله يابنات دخلت عليه ليلة زواجي بفستاني لقيته متلحف البطانيه ويبكي وعلى طول طلعت ماتحملت اشوفه كذا وبعد زواجي بثلاثة شهور اتوفى وآآآآه ياقلبي ماني ناسيته والله والله ماتهنيت في شيء بعده دااااايم على بالي اشتاااااااااق له كل ماضاقت الدنيا صرت مشتاقه لحضنه ياااعمري كان يوصي زوجي علي ابكي عليه تسع سنين كأنه امس فاااااقدته حيييييل سامحوني طولت حبيت افضفض عما بداخلي
يراعي الفقد والغربه بعيني يايبه جراح
رسم اصعب تفاصيل المواجع واتعب الصوره
سواد الليل بالدنيا ودمع من قمرها طاح
على غصن الامل يوم توفى فيه عصفوره
انا ادري عاهدك صبري وتدري هالصبر مفتاح
يرد الروح لكني كثير القاي مقهوره ..
بوسط الدمع والاحض طيوفك والعنا لماح
يجر الضيم لانفاسي وانا ادري ماانتهى دوره ..
يطاردني ورى جرحي ويهدي للفكر اشباح
من الذكرى على بيت(ن )عجز لايستره سوره .
الين اليوم والصدمه تنادي للاسى ارواح
الين اليوم والغصه تحيد القلب عن طوره ..
انا اذكر يومعزوزي سمع بالتعازي ناح
ذبل لحضات واتبسم وحط الحيا بالكوره ..
يقول الناس ماتدري ترى بابا هنا ماراح
وبعد شوي يسألني ؟سمعتي اخر اسطوره ..
والملم مابقى فيني واغطي خافقي بوشاح
من اهاتي عشان احيا لو ان الروح مفطوره..
واجيك المغسله واشفى بنور من جبينك لاح
واشم الورد واتالم وارد اتنفس زهوره .
واردد يايبه عطرك غدى مع بسمتك فواح
واتم تم لك فمان الله على الونات مجروره ..
فمان الله ياوجه(ن) تركنا للشقى وارتاح
عسى هالروح في اعلى جنان الخلد مسروره
(واسوني الله يخليكم تعبت كتبتها مرتين ) فمان الله