ashwwwaq @ashwwwaq
عضوة
قصتي مع الأخطاء الطبية وكيف غيرت لي مجرى حياتي
بداية قصتي
في يوم من الايام قرروا اهلي نروح العمره ف إجازة منتصف الأسبوع والحمدلله رحنا وكان اخوي الصغير الله يصلحه مشاغب يلعب في ساحة الحرم وانا كنت اخاف يضيع بين الناس وكنت اجري وراه واجيبه لعند اختي الكبيره , بعدها راح مره ثانيه يجري وانا خفت عليه ورحت ولحقته ،، فجأه مادري على ايش دعست وزحلقت على ظهري بقوه ولا عاد قدرت اقوم ،وجلست ابكي وتجمعوا الناس عليا وشالوني ودوني المستشفى وأعطوني إبره و فيفادول ،
طلعت من المستشفى وسافرنا لديره وأحنا بالطريق اقول لابوي ظهري يوجعني رجع الألم ودني المستشفى قال طيب نوصل واوديك،،
وفعلاً وصلنا ديرتنا ووداني المستشفى ،،
سوولي تحليل لدم وبعدها قال الدكتور عندها نقص ف الدم بنعطيها دم،
واسعفوني بالدم وكان اول مره بحياتي يعطوني دم ،،
اتذكر اني جلست نص ساعة تقريباً وبعدها فجأه من غير اي مقدمات ،، كأن تريلا صدمتني جسمي كله الم الم فضيع فضيع الم عظيم ما عرفته في حياتي جسمي كله كأن أحد كب عليا موية نار ،،
جلست اصيح واشوف امي تمسكني اشواق وش فيك اشواق وانا ما عاد قدرت ارد عليها اصيح وارجع دم من فمي (الله يكرمكم) ،، ارتبكوا الممرضات والدكاتره حولوني على طول مستشفى ثاني اعطوني مسكنات ومغذيات ومافي فايده اصيح وأبكي من الالم كان الم عظيم فيني وورم جسمي وورمت رجولي وانتفخت ،، وقرروا يدخلوني العمليات يسحبون الدم الفاسد من مكان ما انتفخت سووا العمليه وسحبو نخاع العظام وسوو عمليات ثانيه في رجولي كلها بدون أخذ موافقة اهلي،، وطلعوني العنايه ومن صحيت حسيت الالم تضاعف اضعاف اضعاف وجلست اصيح وابكي وصرت مثل المجنونه اصيح وارمي كل شي حولي وطيحت المغذيات وقطعت الابره من يدي وقطعت شعري وخمشت رجولي من فوق العمليات ،، جو الممرضات والدكاتره مسكوني وربطوني وربطوا يديني بالسرير ، وامي تخاصمت معاهم ايش سويتوا ف اشواق😔، قاموا الممرضات خرجوها من عندي ومنعو عني الزياره،
وتمر الايام وانا ابكي واصيح ويتجمعون عليا مزاورين لناس ما اعرفهم بالمستشفى ويتخاصمون مع الدكاتره حرام عليكم ارحموها شوفوها أعطوها شي يسكن عليها وواحد جاء وقال حسبي الله فيكم اشواق اشواق اذكري الله قولي لا إله إلا الله ،
ليه تربطونها وجاء فك يديني، وجت الممرضه تخاصمت معاه وطردتهم من عندي ورجعت تربطني بالسرير ،
و تمر الايام وانا بس اصيح وأبكي من قوة الالم وكل يوم على هالحال ويدخلوني العمليات ويزيدون عمليات فوق العمليات وتتجرثم ويضربني الدكتور عليها ويقصقص لحمي بالمقص ويضربني عليهاويقول مدلعه اشواق ،، وانا اصيح وهم يضحكون مع دكاتره الامتياز ،، ولا احد حولي غير امي تبكي من بكائي ،،
وبعدها ما عاد تحركت والعمليات تجرثمت وتعمقت جروحها وتفتفت عظامي مكان العمليات وظهري كله صار جروح صرت مثل الميته ما عاد اتحرك بس ابكي بدون حركه وتشقق شفايفي وكنت اقرا أية (وإذا مرضت فهو يشفين) ومكتوب تحتها مستشفى المذبحة والمجزره ،
جتني صدمه نفسيه كانت امي تقرأ قران عليا وكانت تعلمني أردد دعاء اللهم انا عبدك أبن عبدك إبن أمتك ناصيتي بيدك ماضً فيا حكمك عدلاً فيا قضائك أسألك بكل أسم هو لك سُميت به نفسك أو أنزلته في كتابك أو أستأثرت به في علم الغيب عندك أن تجعل القران ربي قلبي ونور صدري وجلاء همي وحزني) وصرت اصيح وانا احاول ارددها وابكي والدكاتره اهملوني ماعاد يعطوني شي لدرجة صار عندي صرع ويغمى عليا من قوة الالم،
يوم من الايام ما حسيت بنفسي الا امي وابويه يبكون على راسي وانا ما اقدر اتكلم بس أشوفهم قالولي بعدين اهلي ان المستشفى اتصلوا فيهم وقالوا لهم المريضه اشواق ماتت ،،
قالت لي أختي فيما بعد بالحال اللي جاء أمي ،،
وإن الدكاتره أستخدموا معاي الصعقات الكهربائيه والحمدلله رجعت نبضاتي ،
ورجعت أتألم وأبكي ومن كثر ما أتألم أصيح وكل اللي ف المستشفى يسمع صياحي،، واتهموني الدكاتره بالجنون وودوني مستشفى الصحه النفسيه وكانو يبغون يثبتون اني مجنونه ،،
دخلوني عند دكتور النفسيه وكانت طريقة كلامه تخوف وما سمح لاحد يجلس معاي وانا كنت أتألم وأبكي ، قال اشواق حاولي تكلميني قولت ابغى امي قال طيب امك موجوده و بتجي بس ايش غير امك تبغين قولت يا دكتور ابغى الالم يخف عني بس قال طيب ان شاء الله بيخف وحاول يكلمني باشياء ثانيه وقعد يكتب ف التقرير ،،
ورجعوني المستشفى يشيلوني على نقالة الموتى لاني ما عاد صرت اتحرك واذا تحركت أتألم أكثر وأصيح وجبسوا رجولي كلها،، وتمر الأيام وفكوا الجبس عني والجروح في تدهور
جو الدكاتره وقالوا لامي بنقطع وحده من رجول أشواق ونسوي عمليات سحب في يدينها لانها ورمت
حزنت امي ومسحت على راسي وقالت الله المستعان يا اشواق😔
ف اخر الليل دخل علينا دكتور سعودي وكنت أتألم قال يا ام اشواق كفايه لعب ،، كفايه الدكاتره لعبوا في اشواق ،
انا دكتور مثلهم وجيت انصحك لوجه الله طلعوا اشواق من هنا،
كل يوم اسمعها تتألم وتصيح والله حرام اللي يصير فيها، امي تفاجأت 😳 قالت ايش يا دكتور ،ورجع كلمها مره ثانيه وقال انا الدكتور عبدالرحمن وأشواق مثل بنتي وانصحكم لوجه الله ودوها الرياض او اي مستشفى ثاني غير هالمستشفى
،قالت لحظه خذ كلم ابوها بالجوال و كلم ابويه ،،
وجاء ابويه على طول يبغى يطلعني اعترضوا الدكاتره وقالوا ليه تطلعها هي باقي مريضه قال أن بطلعها على مسؤوليتي ،
قالوا بتطلعها من هنا على المقبره .
وطلعني ووداني على طول المطار يشيلوني ف نقالة الموتى ووصلت الرياض وأستقبلني الإسعاف وعلى طول على المستشفى، تفاجأو الدكاتره هناك وقالوا العمليات اللي فيني كلها مجرثمه وقالوا مستحيل انها كانت في مستشفى،، ودخلوني العمليات سوولي عمليات تنظيف وتعقيم للجروح وشالوا بعض العظام اللي تفتفت وركبتي كانت مثل العين ف وسطها توسع الجرح فيها وانخرقت من كل الجهات وما يمسكها الا لحم بسيط من اطرافها وكانت بتنقطع رجلي لولا لطف الله ،،
بعد ما صحيت من العمليات طلعوني بيودوني قسم الأشاعة وكنت أتألم وأصيح ،، وواحد وهو مار أستأذن من أمي يقرأ علي قران وقرأ عليا ،، وقال الله يشفيها بنتك الله أعلم شكل فيها عين قوية من مجموعه حسبي الله ونعم الوكيل والله يشفيها
وكل يوم يعقمون الجروح وصارت الجروح خاليه من الجراثيم دخلوني العمليات وسوو لي عمليات ترقيع وتجميل لرجولي وجبسوني من رقبتي الى اخر اصابع رجولي عشان يلتأم العظام مكان اللي شالوه والجروح تكون غير قابله لتلوث
وانا كنت بس ابكي وأصيح من الم العمليات عندي وشافوا الآلآم عندي ما خفت راحوا سحبو دمي كله مع الوريد واسعفوني بدم جديد
وجلست بالعناية بالشهور يعطوني مسكنات تنومني باستمرار بعدها بأيام فكوا الجبس عني وسوولي عمليه بصدري يركبون فيني جهاز عشان يغذوني منه بشي يشبه اللبن ، لاني ما كنت اكل ولا أشرب أبداً ولا أستجيب للعلاج،،
كانت النفسيه صفر وجاني خوف ورهبه من الناس وكنت مثل الميته على فراشي تقريباً مدة سنتين و تمر الاعياد والمناسبات وانا على نفس وضعي ما اتحرك ويقلبوني الممرضات على السرير مره على اليمين ومره على اليسار عشان تطيب الجروح اللي بظهري وبعدها الحمدلله خفت الالام تدريجياً ونقلوني على بريطانيا واستقبلني البرافسور والدكاتره استقبلوني بابتسامة وقمة ف التعامل والعطف معاي عكس اللي شفته قبل .. وسوولي كشف شامل كامل ونتائج العمليات السابقه وقررو يسوولي عمليات بسيطه و سحب لدم عندي وغيرو دمي بدم جديد يعطوني دم ويسحبونه ويعطوني دم ويسحبونه ويعطوني دم ويسحبونه ٣ مرات،، وجلست بالعناية المركزه
خرجوني لقسم التنويم وكانوا طيبين معاي رغم انهم مو مسلمين ويساعدوني ويطبطبون عليا ويخففون على أمي انها ما تحزن عليا
وبعدها سوولي علاج طبيعي بسيط ليديني و يحاولون يخلوني أجلس تدريجياً على الكرسي ، وبعد عدة ايام مع التمارين قدرت الحمدلله أجلس على الكرسي،،
ورجعت الرياض ودخلت تأهيل المعاقين وكملت علاجي هناك وسوولي علاج طبيعي وتهيئه نفسيه وعلاج مائي بالمسبح وكنت أخاف من الناس أشوف أحد أصيح وأبكي بعدها زاروني معاقين كنت أخاف منهم بس مع مرور الوقت الحمدلله خف هذا الخوف وكانوا يعطوني دافع معنوي عشان احب الحياة وتحسنت الحمدلله مع العلاج ودرست مع المعاقين ،،
ورجعت بريطانيا اكمل علاجي وجلست كم سنه وعالجوني نفسياً وجسدياً
ومع مرور الوقت الحمدلله ردت لي روحي وصرت اتغلب على نفسيتي ،
وبوقوف امي وابوي معاي طلعوني الحديقه عشان أقابل الناس ولا أخاف منهم رغم انه مازال الخوف فيني ،،
كنت أحسب الناس إذا شافوني بيأذوني وأقعد أبكي لكن الحمدلله،،
ودخلت المدرسه هناك ودرست فيها ونصحني البرافسور إني لازم أتواصل مع الناس عشان يروح هذا الخوف مني،،
وكل يوم اسوي علاج طبيعي عشان ارجع امشي لكن باتت التمارين كلها بالفشل ،، وما قدرت وسوولي الدكاتره جبييره صناعيه ركبوها ف رجولي عشان أحاول لكن للأسف وبعد الاشاعات والتقارير قالوا انه خلاص ماعاد في امل اني ارجع امشي مره ثانيه وإني بكمل حياتي بدخولي ف عالم ذوي الاعاقه لانه صار تصلب وموت الاوعائي بالعظام وانا اصلا ما كنت اعرف يعني ايش اعاقة كان كل همي تخف عني ذيك الآلآم والحمدلله
،، وصرفولي مشاية مثل عربية الأطفال أحاول أسوي تمارين عليها ، وادويه اخذها مدى الحياة وأمر علاجي بالخارج بأي وقت على حساب الامير محمد بن نايف حفظه الله
سافرت من بريطانيا ورجعت كملت دراسه وعلاج بتأهيل المعاقين ف الرياض والحمدلله مرت الايام ورجعت ديرتنا ودخلت بيتنا وشفت أخواني الصغار كبروا ما يعرفوني يستحون .. وابويه يعرفهم علي هذي اشواق اختكم 😢 والحمدلله عسى في إعاقتي إن شاء الله خيره
مهما قالوا الدكاتره مستحيل أرجع أمشي الأمل بالله كبير لأن الله على كل شي قدير❤️
والحمدلله رجعت أكمل دراستي بعد عدة محاولات مع المدارس عشان يقبلوني لكنهم رفضوني بحجة إن المدارس غير مهيئة للمعاقين
وبديت أحتك بالناس وأطور من نفسي وصرت خبيرة كمبيوتر وإن شاء الله أكمل جامعة ع الرغم ان الجامعه الي في ديرتي ما يقبلون معاقين وغير مهيئه .. لكن بإذن الله التحق وأكمل تعليمي ♿️
هناك أناس أمسكو يدي بشدة فشكراً لهم وربي يجزاكم الجنة🌷🌷
واليد التي أمسكت بها وتركتني لازلت أشكرها من قلبي،
فـ لولا فعلتها لما تعلمت أن في الحياة أشياءُ لا تؤتمن
وأخيراً
هذا قضاء الله وقدره مكتوب عليا ولا أعتراض على أمر الله والحمدلله دائما وأبداً
72
22K
يلزم عليك تسجيل الدخول أولًا لكتابة تعليق.
الحمد لله دائما وابدا
هذا ابتلاء من الله
الله يجزيكي على صبرك الجنة بلا حساب ولا سابقة عذاب ويحفط ابوكي وامك
هذا ابتلاء من الله
الله يجزيكي على صبرك الجنة بلا حساب ولا سابقة عذاب ويحفط ابوكي وامك
مشاءلله تبارك الله اهنيك على قوة ارادتك وانتي *****لله انسانه طموحه ومستقبلك باهر بأذن الله كل اللي مريتي فيه ابتلاء من الله سبحانه ول تعلمي ان الله سبحانه اذا" أحب" عبداً ابتلاه ومشاءلله عندك طموح للجامعه ثابري لين تدخلينها وتحققين طموحك
الله يجعل ماجاك شفيع لك بدخول الجنة
من غير حساب يارب او سابق عذاب ..
ليش الاهل تركوك فترة طويلة بالمستشفى لما شافوهم ماحلو مشكلة الالم ؟
وهل اشتكيتو المستشفى ؟
من غير حساب يارب او سابق عذاب ..
ليش الاهل تركوك فترة طويلة بالمستشفى لما شافوهم ماحلو مشكلة الالم ؟
وهل اشتكيتو المستشفى ؟
الصفحة الأخيرة
اسال الله رب العرش العظيم ان يشفيكِ ويفرح قلبك وقلب والدينك بشفائك عاجلاً غير اجل مافيه شي كبير على رب العالمين بس دعاء واشويه صبر 🙏🏻💜