السلام عليكم ورحمة الله وبركاته
كيفكم ياحلوين
ساحكي لكم قصتي مع الاخذ باالاثر !
يااخواتي كنت متزوجه شاب بس ماكان الي اتمناه للاسف لااسباب كثيره ومنها الاخلاق والريق الحلو والمعاشره الطيبه
من الدخله جتني عين وكان عندي عين قويه من قبل اتزوجه لكنني اهملتها للاسف !!!
مرت اولى سنه من زواجنا تمشي الحال وقلت يالله بنت كوني قنوعه واتركي النهر على مجراه الله كتب لك هالزوج قسمتك ونصيبك وش تسوين ??
في يوم الايام تعبت كثيير وماقدر اتحمله ولااواطنه اعوذ بالله كرهته كذا :(
رحت عندي اهلي وجلست 9شهور وهو يحاول حتى يكلمني رفضت مابي اسمع صوته اعوذ بالله \\
بعد 9 الشهور تحسنت شوي وقمت اقراء عند مشايخ بس قرايتهم مو قويه
رجعت لزوجي وحملت بنت
وكاني احس باعراض العين رحت لشيخ يمكن لو تعرفوه بالقصيم ويطلع الجن والمس ويفك السحر
قال انتوا معيونيين من ليله الدخله ومحسودين على حياتكم من ناس كثيييره
وايضا زوجتك عندها عين قديمه نزلت شعرها وفعلا كان صادق كنت معيونه بشعري :(
المهم ماطول عليكم عطاني سدر وملح وسويداء وقال الطريقه لي استمريت عليها بعدها يااخواتي انتفختتتت
لدرجه حتى اقدام رجلي تفطرت الله لايوريكم للحين لما نحفت بين التفطر فيها والخطوط للانتفاخ
الله يعوضني الجنه وبنتي انتفخت ببطني اي والله وصار وزنها ببطني على شهر تسعه 6 كيلو على اني ماكل شيء
ذابحتني الوحامه موووت
<<
جيت عند اهلي قبل الولاده بشهرين والله تعبت كثيير
يوم من الايام سوينا عشاء كبير وهو تمايم لولد اخوي وجونا عمامي اهل زوجي وخالاتي الي هما خالاته وعماتي كلللهم !
وبناتهم وبنات بناتهم يعني عوايلنا كلها وعمامي وحريمهم وبناتهم
قبل هالعزيمه بيومين جتنا جارتنا حبوبه وانسانه قويه بكلامها وصبوره قالت ليه منتفخه كذا قلت والله مادري قالت لاجاء
عشاء ولاقهوه اخذي من عجم التمر للحريم والرجاجيل وبقايا فناجيلهم وبيالاتهم للشاهي كللل المجتمعيييين
لاتستثين احد منهم !!!
وحطيه في علبه كبيره واخلطي عليها مويه وتروشي فيهااا
وعقبه الصبح بتشوفين شيء ماعمرك شفتيه في وجهم ونفسك وجسمك ??
قمت رديت عليها وقلت لها هذولاء هلي وناسي قالت سوي الي اقوله وبتشوفين
ماجاء ببالي ولا حتى فكرت اني معيونه من ربعي وعمامي واهله واهل ابوي سبحان الله :(
المهم سويت الي قالة كنت متزينه وحاطه مكياج وانتهت العزومه وبنفس الليله تروشت بغسالهم واثرهمم كللللهم
اصبحت غسلت وجهي وماكان بالمغسله مرايه رحت لعند زوجت اخوي سئلتني وش فيه وجهك انتي ماغسلتي مكياجك قلت الا والله ??
غسلت قالت روحي شوفي وجهك الله لايوريكم ماسمعوا الا صرااااااااخي واجري على ابوي واطيح بين يديه ابوي وجهي تكفي ياابوي
اثرهم شايفين وجهي بس انصدمو وعرفوا وسكتوا ماخبروني والله ياخواني كني مضرووووبه ملوووون تعرفون قوس قزح
<<يقول حرام تسميته كذا وماعرف وش اسمه العلمي
والله يااخواتي وماحلفتكم كنه هو ملوووووووون !!!!
احمر واخصر واصفر ورمادي كني هالكه او ميته ااو متعفنه الله يعوضني خير :(
والحمد الله تحسنت حالتي من بعد الغسال والاثر يالله لك الحمد
طبعا تم الطلاق بعد ان انجبت بنت اخرى غير الاولى !
والحمد الله على كل حال
احببت اشارككم قصتي مع اخذ الاثر من الناس والله يااخواتي له فائده جدا مايعرف قيمتها الا الي يحسس باالالم الي
تسببه العين الله المستعان وحماكم الله
وحسبي الله ونعم الوكيل على من حسدني !!
نسيت اقول اني تزوجت اللحين من رجل كفو وطلاقي لم يكن من اجل العين بل مشاكل متراكمه بيني وبينه فقط
Hieoonh @hieoonh
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
فرحت يوم قلتي انك تحسنتي وزعلت يوم قلتي انك تطلقتي
بس يختي ليه طلقك وهو عارف ان اللي كان بك عين؟؟