قصتي مع الاستغفار غير منقولة تعالوا يابنات

حبيباتي أنا سجلت بالمنتدى عشان أبلغكم باللي صار معايا وأخذت عهد على نفسي ابلغه لأكبر قدر ممكن من الناس طبعا الكلام اللي حقوله مؤ جديد ويمكن كثير مننا عارفينه وناسينه ان الاستغفار سبب لجلب الرزق  ومغفرة الرب لكن كم مننا داوم عليه وعرف قيمة هالكلام وأفاد غيره ... هذي قصتي والله على م اقول شهيد من فترة تقدم لي شخص ما كنت ابيه وكنت فعلا كارهته بشكل فظيع حاولت اقنع نفسي انه ممكن يكون خير لي بس للاسف ماتقبلته وأهلي كانوا مقتنعين تماما فيه وكان عندهم استعداد يزوجوني هو غصب عني ولا اقدر افتح فمي بكلمة بحكم العادات الموضوع وصل لأني انضربت عشان ماابين رفض قدام أهله وعدت علي ايام سودا ولما شفت ان مافي احد وقف معايا حتى أمي والكل ضدي لجأت لرب البشر بالاستغفار وصرت يوميا استغفر وانا بالطريق للدوام وانا جالسة وقبل النوم والله يا أخواتي أني ما صدقت نفسي يوم جا اخوي وقال لا الرجال ما ينفع شوي شوي أمي قالت نفس الكلام ومن بعدهم اكتشفنا أشياء عنه كانت سبب لرفض أهلي قبل رفضي ... الموقف الثاني كان عندي اختبار مادة عامة بالجامعة وانا بصراحة كنت كثيرة غياب فيها وعلاقتي بأساتذة المادة مؤ تمام اللي صار انها ظلمتني بيوم الاختبار واتهمتني بالغش ظلم  وطردتني من القاعة وانا من النوع اللي ابكي على طول وما اعرف أتصرف المهم أني لما طلعت كان الاختبار بأوله ماحليت شي ومن اول درجات اعمال السنة ماتجممل حاولت مع الأستاذة بس فردت ريشها علي وهزأتني وكلت امرئ لله وداومت عالاستغفار بنية ان الله يوفقني بها أنا ممتازة الحمد لله فتحيلوا شكلي حاملة مادة عامة وكمان عشان الغش وطلعت النتايج وكانت المفاجأة أني كنت صاحبة اعلى درجة من بين صاحباتي درجة ما كنت احلم فيها حتى لو شديت حيلي ... الموقف الاخير صار لي من كم يوم بس  والله يا بنات نمت وانا ابكي ما معايا ولا ريال اقضي للعيد وانا يتيمة الاب وظروفي شوي صعبة المهم استغفرت ونمت والله الذي لا إله الا هو ان جات جدتي صحتني من النوم أعطتني مبلغ كبير بيدي وقالت قضي للعيد وثاني يوم جاني ضعفه ولا خلص الاسبوع الا وانا عندي حول 7000 اقضي فيهم اللي ابيه من الفرحة صرت مابي اسكت من الاستغفار ابي استغفر اكثر واكثر وترا عندي مواقف اكثر من كذا بس في أمور خاصة والله ربي ماخيبني واني الحين بسعادة عمري ما حسيت فيها بس فيه نقطة لازم نعرف الله بالرخاء عشان يعرفنا بالشدة استغفروا بكل أوقاتكم أنا معايا خاتم الاستغفار كل ما كنت بمشوار ولا فاضية استغفر وحبذا لو تكون مع الاستغفار صدقة لو بالشي اليسير واتحدا اي وحدة مهمومة او مكروبة وتجرب تكثر من الاستغفار بنية صادقه ومايجيها الفرج بطريقة تخليها مؤ مصدقة نفسها معقول صار معايا كذا ... اعذروني عالاطالة اتمنى كلكم أخواتي تتحقق أحلامكم وتفرج كرباتكم وهمومكم مثل ماصار معي وآخر شي أحبكم في الله ودعواتكم لي اي استفسار أنا حاضرة