قصتي مع الالتهابات وحصوة الكلى ..للاستفادة والدعاء

حبيباتي /
راح ادخل في القصه على طول
وبدون مقدمات لأني بالعافيه اقدر اجلس عالنت :(

..
انا من قبل 6 اشهر ولدت ..
اول ماعرفت اني حامل كنت اراجع الدكتورة في مستوصف الحي اللي انا فيه عشان كان عندي التهابات وكتبت لي كبسولات تتاخذ ثلاث حبات مره واحده...
بس انا مااخذتها لاني كنت شاكه وقتها اني حامل وفعلا حللت وطلعت حامل..
ومن وقتها جلست اعاني من الالتهابات المهبليه وماكنت اقدر اخذ ادوية لاني حامل..
في نهاية الرابع صارت تجيني الام في كليتي الشمال..
توقعتها عادي من الحمل ...
وكل ماتعبت اشرب نصف لتر ماء ويروح العوار ..
بعد ماولدت .. رحت للدكتورة نجاح قربان في مستشفى القوات اللي في جده..
اكيد الكل عارفها .. عشان اركب لولب..
وكشفت علي قالت عندك التهابات واعطتني دوار وقلت لها عن الام الكليه .. وسويت تحليل..
والحمدلله طلعت تحاليل وظائف الكلى طبيعيه اللهم لك الحمد..
بس قلت انا متأكده اني اتألم وحولتني على قسم الاشعه السونار ...
وبالفعل سويتها وطلع عندي تراب خفيف اللي هو الحصوة ..
اللهم لك الحمد والشكر على كل حال..

وبعد مراجعات في العسكري اللي هو مستشفى القوات اللي في جده..
عشان الالتهابات .. لقيت كل المضادات اللي صرفوها لي ماجابت اي نتيجه
يخف الالتهاب ويرجع بعد مااخلص المضاد
ومااخفيكم انا من كارهي ومعارضي وممقتي المستشفيات الخاااصه
لكني يومها قلت لزوجي انا باروح السامريه اللي في النسيم
بحكم انه قريب مني وطفشت حقيقة من مراجعات ومرمطة العسكري..
اول مارحت السامرية
وكشف ب70 ريال
وعلى الدكتورة جيهان محمود اخصائية نساء وتوليد
كشفت علي قالت انتي عندك الالتهابات من قوتها وطول بقاءها في رحمك مستفحله تماما..
قلت في نفسي وش الجديد/ مين ماعندها هالايام التهابات..:o
عطتني مضادات وقالت بعد اول دورة تجيني اسوي لك كي بالتبريد
عشان نمص كل الالتهابات وماعاد ترجع...
وبالفعل رحت لها وسوت لي الكي بالتبريد ب500 ريال..
ولي اسبوع اللحين
بعد الكي بيوم نزل مني شيء ماتتخيلونه يابنات .. وقلقت
بس اللحين لي 6 ايام بدأ يخف ويارب دائماً...
وادعي في نفسي يارب ماعاد ترجع ..


اثناء الكشف عند الدكتورة ولما سألتها عن العملية التجميليه
قالت تسويها بالليزر ومن جوا غرز عادي
بس الليزرمن برا بس
وب 2500 ريال بس

احد جرب عندها .؟

.. ياليت اللي لها تجربة شخصيه تفيدنا..
وبعد ياليت تفيدوننا عن الدكتورة جيهان محمود...

..
وهذي كل قصتي مع صراع الالتهابات والام الكلى
يابنات
انا ماقلت قصتي إلا عشان اللي ربي رحمها بما اصابني تحمد الله
واللي ربي بلاها بااكبر مني تحمد ربها بعد
لا تنسون تحمدون ربي على كل حال
وتذكروا دوماً انك لا تدري لعل في الامر خيرة...

صلوا على النبي
ودعواتكم ربي يشفي كليتي ...