قصتي مع الحمل بين دموع الفرح ودموع الحزن

بسم الله الرحمن الرحيم
اليوم راح اكتب قصتي من يوم ماتزوجت الى اليوم انا لي 8 سنوات متزوجة
طبعا قبل مااتزوج كنت زي اى بنت تحلم انها تكون عائله هي وزوجها ومعهم اطفال ويكونوا سعيدين اول ماتزوجت كنت ودى احمل بسرعة لان زوجي اكبر واحد في اخوانة وخواته ومافية في العائلة اطفال وانا نفس ا لشئ اكبر وحدة بين اخواني ومافية في العائله اطفال كانت الدورة الحمد لله منتظمة واحوالنا تمام بعد سبعة اشهر بالتمام تأخرت على الدورة قلت اكيد حامل اول مرة تتأخر الدورة عن موعدها فرحت مرة وعلمت اهلى واخوات زوجى وكلهم قالو اكيد حامل المهم حللت تحليل منزلى طلع خط واحد قالوا اجلسي اسبوع وحللى يمكن يوضح جلست اسبوع وكني والله جالسه على جمر ماصدقت مر الاسبوع وقلت ماحلل الافي المستشفي رحت انا وزجي على المستشفى وعملت تحليل قالو نص ساعة وارجعوا للنتيجة اخذنا لفة بالسيارة لين انتهت النص ساعة ورجعنا قال زوجى اجلسي في السيارة وانا اروح اجيب النتيجة قلت طيب وجلست مراقبة بوابة المستشفي متى يجى شوى الاهو طالع وهو يكلم بالجوال ويضحك قلت بس اكيد فيه حمل ركب السيارة نطيت في وجهه بشر قال







قال :للاسف مافيه حمل ياشيخة على ايش مستعجله لاحقين عليهم خلينا نستانس ونرتاح انا مابغى عيال الابعد خمس سنوات
وعيت الدوره لاتنزل والناس اكلوني (نزلت ولا باقي ’متاكدة انة مافيه حمل ) والله بعضهم يدقوا عليه بس يبغوا يسألوا وخاصة اخوات زوجي كرهت نفسي انى علمتهم ان الدورة متاخرة استنيت شهرين بعدين قلت لازم اروح لدكتورة رحت للمستشفى سوتلي اشعة قالتلى عندك تكيس اعطتني حبوب استخدمها لمدة خمسة ايام وتنزل الدوره وقالت إذا مانزلت ارجعيلي جلست خمسة ايام ومانزلت جلست يومين زيادة ورحت لدكتورة وانا في الانتظار نزلت علي الدورة دخلت عندها اعطتني منشطات وطلبت تحليل هومونات لى وتحليل لزوجي اول مارجعت البيت جوا اخوات زوجى شافوني تعبانة قامت وحد منهم قالت : اشفيك قلتلها :ولاشى بس الدورة نزلت وتاعبتنى قالت :احسب الدكتورة قالتلك ان فيك عيب اوبلا او امراض قلتلها لاالحمدلله مافيني شي والله يابنات اني انقهرت وحسيتها جرحتنى بقوة بعدها قالتلي امي انصحك تحفظي سرك وسر زوجك وبيتك ولا تعلمى احد باى شئ خاص فيكم وراح ترتاحي وفعلا من يومها اتفقنا انا وزوجى ما نعلم احد بمراجعاتنا ولاكلام ادكاترة حتى اذا نبغى نروح المستشفي نقول بنروح السوق او المطعم او اى مكان وفعلا يابنات ارتحت من الاسئله والكلام حتى انهم يحسبونا مارحنا نتعالج ولارحنا شفنا اش المشكلة لان اخته تزوجت بعدي وحملت مرتين جات مرة عندنا وقتها مرعلى زواجي 3 سنوات وقالت شكلكم ماتبغواعيال ليش ماتتحركوا انا سكت ردعليها زوجي قلها اللى رايدة الله بيصر المهم نرجع لقصة علاجى جلست يابنات 3سنوات وانا من مستشفى لمستشفى مره اشعات ومرة تحاليل ومره مستشفى خاص ومرة حكومى اجمعوا على انه عندى تكيس مبايض وهرمون حليب وهتيك يامنشطات وحبوب وابر وكل شي اريح كم شهر وارجع قالو بما انه ما صارحمل لازم تسوى اشعة الصبغة سويتها في سليمان فقية و الحمد لله طلعت سليمة وقتها وقفت الابر تعبت واخذنا العسل مع طلع النخيل وحبوب اللقاح وداومنا على سورة البقرة اناوزوجي وقيام الليل ورحت عند ممرخة مرختني قالت عندك الرحم نازل ومايل جلست شهرين مستمرة على هذا البرنامج والشهر الثالث رايت رؤيا ان عمتى تطالع في وجهى وتفولى انتي حامل هذى العمة في الحقيقة تعرف المره الحامل من عيونها ووجهها المهم ماهتميت بالرؤيا تاخرت عني الدوره قلت اكيد تخلبطت لانى وقفت الحبوب جلست اسبوع وقلت لازم احلل اشوف اشتريت التحليل و قلت الصبح احلل نمت وصحيت قبل الفجر حسيت الله صحاني يبغى يفرحني ماشا الله طلعت خطين حمرا غامقة الحمد الله طلعت حامل :)والله ماصدقت رحت المستشفى واكدولى انى حامل فرحت فرحة انا وزوجى واهلى واهله الله اعلم بهاا امي حظنتني وجلست تبكي يمكن ساعة :icon28:المهم صرت اتابع الحمل عند دكتورتي كل اسبوعين والله يبنات المراجعة الى بين فيها نبض الجنين حسيت باحساس عمري ماحسيت فيه حسيت اني بطير من الفرح وبدينا اناوزوجي نخطط وش نسمي البيبي وين نخلي سريرة واغراضة في نص الشهر الثالث نزل على زى الخيوط دم خفيفة مع الم الله يكرمكم رحت المستشفي قالت الدكتورة نبض الجنين توقف :icon33:نزل على الخبر كالصاعقة ماقدرت امسك نفسي بكيت وبكيت حتى الدكتورة رحمتني وجلست تهدي فيني وتقول يمكن خير الله ما يكتب الاخير يمكن يطلع تعبان او مشوة هى تتكلم وانابعالم ثاني نادت زوجى وخبرتة الخبر المؤلم وقالت اذامانزل خلال اسبوع راجعوني والله خرجت من عندها ماشوف الطريق من الدموع احس اني مني قادرة اتماسك من الصدمه زوجى ماسكنى لين ركبني السيارة وصرت ابكى بصوت عالى بعد ماهديت طالعت يساري انصدمت زوجي يبكي والله ان دموعة غالية على واول مره اشوفها وهشى زادني حزن بعدها سقطت والله يوم رجعت البيت ارتحت على ظهري قلت يمكن مثل بعض حريم يقولوا لهم مافيه نبض وبعد فترة يبين النبض ويتم الحمل كان عندي امل لكن الحمد لله على كل حال
بنات خلاص مني قادرة فيني نوم :scream::scream::scream::scream::scream::scream:الخميس انشأ الله اكمل قصتي مع التلقيح المجهرى E]


تكمله القصة في الصفحة 4