قصتي مع المرأه المرعبه..واثر الورد في حفظ الإنسان..

السلام عليكم ورحمة الله وبركاته..
اخواتي الكريمات القصه هذي حصلت لي من مده قريبه..
وكنت ناويه والله اكتبها للتحذير والتنبيه لكن انقطعت فتره
عن النت ونسيت..:29:
واللي ذكرني بجو الرعب اللي عشته جعله ماينعاد علي ولاعلى احد من اخواني المسلمين
اللي ذكرني قصة اختي غيم واولادها بسم الله عليهم..:(
حسيت اني رجعت لنفس الموقف المرعب :08:
والله زمان فتن والإنسان يطلع من بيته مايدري وش يقابل بطريقه
من الناس اللي صارت ماتخاف رب العالمين..
سحره..مدمنين ..سكارى..مرضى نفسيين ..مجرمين ..
ماودي اخوفكم اكثر انا بس والله نيتي اني احذركم واذكركم..
وابشركم اني لقيت السلاح اللي يواجه كل هالمخاوف والرعب بس بعد القصه..
قصتي مع المرأه المشعوذه..
خرجنا يوم من الايام انا وزوجي واولادي نتعشى بحديقه عامه في منطقتنا
فرشنا فرشتنا وكانت الحديقه خاليه الا من القليل من الناس وبعض الحريم
قريبات مننا..
على طول بعد مافرشنا وجلسنا قاموا ولدي وبنتي يناقزون بابا ..بابا نبي الحمام
تعرفون عليهم اوقات مايحتاج :06:
راحوا لدورات المياه وهي بعيده جداً عن مكاننا..وبقيت انا وابني اللي عمره 8 شهور..
ياااااااه تصدقون يدي بدت ترتعش كأني في الموقف الحين :(
من يوم جلسنا بالحديقه لاحظت ان فيه عائله باكستانيه يتمشون ويقطعون الحديقه رايحين
جايين..قدامي من بعيد شوي..
قبل يروح زوجي بالاولاد لاحظت انهم قربوا مننا بناتهم ثنتين يلعبن بالمراجيح كبار متغطيات
واولادهم برضه اثنين يمكن اعطيهم 17 سنه حتى تقولن توم كبر بعض..
المفاجأه هنا ..المرأه اللي معاهم كبيره مره بالعمر واضح من شكلها ومشيتها..
وسمينه مره وقصيره..
واللي المفروض انه الاب شاب رياضي طويل عريض وسيم يمكن عمره 30 سنه..
بعد ماراح زوجي يودي اولادي للحمام اكرمكم الله ..
انطلقت الحرمه وكان وجهي لهم طول الوقت متجهه لمكاني ..ماعطيتها وجه لأن
كان فيه فتحه للخروج وراي حسبتها بتطلع..لكن المفاجأه كانت انها فصخت جزمتها
على طرف السجاده بسرررررررعه هائله ونقزت ولاها جنبي بالظبط ..
انا تعرفط وجهي من المفاجأه لكن من هدارتي وطيب نيتي قلت يمكن الضعيفه
بتشحذ..
قلت لها اهلا وسهلا ..وانا ماناظرت بوجهها للحين..
ماردت..
قلت هذا زوجك واولادك ..
ماردت ..
قلت يور هزبند <<يقالي زابطه الانقليزي..
هزت راسها نعم بدون ماترد..
اللي ماانتبهت له إلا الحين انها كانت طول الوقت حاطه عيونها بعيوني
تبيني اركز فيها ..وانا ادربي الدميجه واسولف..
لكن لاحظت ملاحظه غريبه ومريبه انها كانت تفرك ايدينها بقوه وبسرعه
ثم تقلبهم بالجهه المعاكسه مره ثانيه وبنفس السرعه..
عندها فقط <<صح النوم
انتبهت ان الموضوع فيه إن..ناظرت بعيونها يابنات وانا ادعي عليها واطردها
والله انها اللحظه اللي حطيت عيني بعينها دخت وملت على جنبي الثاني
بغيت اطيح على ولدي ..
لكن كأن احد ردني لمكاني وانا اقول بأعلى صوتي ..اعوذ بالله السميع العليم منك..
اعوذ بالله السميع العليم منك..
وارددها بقوه وبهستيريا وانا اناظر فيها..
هي لما قلت هالكلام سبحان الله زي اللي نفظها الكهرب قامت تنتفظ ..
ظربتها مع فخذها وقلت لها قوميييي انقلعي الله يقلعك..بقووووه..
مازالت تناظرني ووالله العظيم رب العرش العظيم انها ولامره رمشت بعيونها
من يوم تقعد لما قامت تناظرني بنظره وحده ..
وعيونها والله رماديه تقولون شوي وتولع بس تبرق..
قامت نقزت وطاااااارت لم جماعتها وكلمت الرجل اللي قلت لكم وهي ملقيتني وراها
وهو عاقد يدينه قدام صدره ويناظرني من بعيد بحقد..واقف ماتحرك من مكانه ..
قلت ان ماجا وسطرني هاللي كبر الجدار..
لكن فرجها الله جا زوجي والله تقولن انقشعوا مثل الفيران طيران اختفوا..
انا قعدت لي نصف ساعه مفهيه مادري وين انا متخدره من الرعب..
لأني كنت متأكده انه اغمى علي لكن الله ايقظني ونجاني والسبب هو...
اني كنت محافظه على قرأة الورد..
ولايمكن كان ماشفتوني بعدها بسم الله علي :06:
بعطيكم بعض التنبيهات المهمه دائماً ..
والتي اصبحت اكثر اهميه هذا الزمن الصعب..
1-قرأة الورد الصباحي والمسائي يومياً دون انقطاع
على نفسك وعلى زوجك واولادك.
2-ترك الاغاني والمخالفات الشرعيه (احفظ الله يحفظك)
3-الحفاظ على البنات الصغيرات وتعليمهن الحشمه ..
4-تحفيظ ابنائنا الورد ولو المعوذات من صغرهم ليحفظهم الله
من كل شر يجتالهم في المدارس او الشوارع او بين العماله.
5- بنات كثر السحر والتعامل فيه بسبب قلة الدين والميل للشهوات
واستحكام الشياطين على بعض بني آدم..
فاحذرن من صديقات السوء اللآتي يزين هذه الامور في عيونكن..
...
بنات انا متأكده ان ماحدث لي كان نوع من الشعوذه ولاكني لم
اعرف الهدف منه واتمنى ان لااعرف وهذا من فضل الله ومنه..
لذلك ارجع واقول احفظ الله بطاعته في كل الامور في حجابك وامور
دينك وسيحفظك الله ولن يخيبك في وقت الازمات..
وهذا ماحدث لي اسأل الله ان لايعيده علي ولاعلى احد من اخواتي المسلمات..
ارجو نشر القصه لأخذ الحيطه والحذر في الاماكن العامه والاسواق..