قصتي مع تأخر الحمل من المنشطات الى اطفال الانابيب ( الجزء الثاني )

بسم الله الرحمن الرحيم و به نستعين
اللهم صل و سلم على نبينا محمد و اله و صحبه اجمعين


قلتلكم الله يعزكم نزلت علي الدوره

على طول فتحت تطبيق مستشفى الحبيب
واخترت موعد استشاره عند دكتور محمد بقنه في مستشفى الحبيب فرع العليا بالرياض

وكنت بكل حال سواء لقيت موعد او مالقيت راح اروح له من بكره اللي هو كان ثاني يوم الدوره عشان السونار لازم ثاني يوم الدوره و عشان ما اضيع وقت
والحمدلله ان مواعيده تلقينها على طول

رحت للموعد و طبعا دكتور محمد بقنه المعروف لا يُعرّف و سمعته سابقته عشان كذا ما ترددت اني اروح له
و ادري كثير بيسالوني (هل رحتي له لانك تعرفين وحده حملت من بعد الله ثم دكتور محمد؟)
بقول لكم هو دكتور الكل يشهد ب امانته و انه نعم المثل للدكتور ، اذا رحتي ل دكتور شاطر ف اعرفي انه بيسوي اللي عليه والباقي على رب العالمين ونفسيتك و اهتمامك بنفسك..
لكن فيه موقف جميل و إنساني لدكتور محمد مع صديقتي..

راحت له لانها ماحملت و كان احد المقربين لها متوفي و هي متأثره جدااااا بوفاته
قال لها يابنتي ترا اهم شي النفسيه

خلي الحزن اللي فيك يخف و تستردين نفسيتك الحلوه و طاقتك ما انصحك تسوين انابيب وانتي كذا نفسيتك لان النفسيه مهمه جدااااا

طبعا هي رفضت كلام الدكتور لان كل تفكيرها انها تبي شي يرجّع الفرح لحياتها بعد وفاة قريبها 🥺💔

وسوت العمليه كامله وحللت و طلعت حامل ماشاءالله لكن ما استمر شهر الحمل 💔 بدون اي اسباب لكن لان نفسيتها متدهوره وكل الوقت حزينه وتبكي ..

وفعلا كانت نظرة وكلمة الدكتور لها صحيحه..


طيب الحين يا خواتي نبدأ تجربتي :

*رحت ثاني يوم الدوره انا وزوجي استشاره عند دكتور محمد بقنه

طبعا اسلوبه مرن و عملي الله يوفقه

*سألنا عن كل شي والتاريخ المرضي لنا
ومثل ماقلتلكم تحليل زوجي سليم ومسوينه من قبل نجي عند الدكتور وانا المشكله الوحيده تكيس مبايض

*بدأ يشرح لي خطوات العلاج من اشعه صبغه و منشطات و تحاليل ووووو

( لانك جايه للدكتور استشاره ف هو يقول لك خطوات العلاج من اول خطوه مو على طول يقول انتي وش تبين و يلا نسوي .. لا طبعا )

قال لي في البدايه لازم تسوين اشعه صبغه

مع العلم اني سويتها لكن قبل 4 سنوات تقريبا يعني قبل زواجي لاني كنت منفصله

الين قلت له دكتور انا جايه ابي عملية اطفال انابيب

قال دام كذا ما يحتاج تسوين اشعه صبغه لان ب عملية اطفال الانابيب نسحب البويضات من المبيض ونرجعها بعد التلقيح في الرحم


طبعاً بحكم اني:

1- جربت المنشطات من قبل وماصار حمل

2- جايبه اخر تحاليل شامله لي و شافها الدكتور وكلها طبيعيه

3- مدة زواجنا 3 سنوات

وافق الدكتور على قراري لكن قال لازم قبل كل شي نشوف اشعه كامله للرحم والمبايض في ثاني يوم الدوره عشان نقرر

طبعا مايدري اني جايته متحمسه وجاهزه ثاني يوم الدوره 🫢😂😂 قلت انا اليوم ثاني يوم دوره قال تمام سوي الاشعه وتعالي

طبعا طلعنا من عيادة الدكتور ورحنا الاستقبال عشان الدفع وبعدها ل غرفة الاشعه وطبعا كلهم بنفس الممر
ومن الاشيا اللي حبيتها جدا جدا جدا بالاشعه على الرغم ان سعرها نفس سعر الاشعه ب اي مستوصف الا اني انبهرت بتصوير الاشعه

تقريبا 10 صور اشعه

و دقه

ووضوح

وتكون محفوظه لك ب ملفك اللي بتطبيق الحبيب ب جوالك

وممرضه اشعه هي اللي تسوي لك ( طبعا سونار مهبلي)


رجعنا لعيادة الدكتور و شاف الاشعه وقال الرحم تمام
وسماكة الرحم تمام
والمبايض تمام
قلت دكتور والتكيسات ؟؟؟؟؟؟
وهنا كانت المفاجأه لي و لكل وحده تعاني من تكيس مبايض 🥳

قال ان الشي الايجابي هو ان عملية اطفال الانابيب مالها دخل بالتكيس وان اللي تعاني من تكيسات المبايض يكون عندها مخزون ممتاز من البويضات ، و غالبا اللي عندها تكيس مبايض يتأخر سن اليأس عندها لان مخزون المبيض عندها اعلى سبحان الله فعلا ورب ضارةٍ نافعه ♥️

بعد ما تطمن الدكتور على الاشعه قال انتي جاهزه لو تبين تبدأين الاجراء من الدوره هاذي
قلت انت وش تشوف يا دكتور ؟
قال ممكن انصحك تخلينها الدوره الجايه بس لسبب واحد : عشان تاخذين فيتامينات مثل حمض الفوليك و سنتروم و فيتامين د
و قلت للدكتور ان هالفيتامينات انا اصلا اخذها من تقريبا شهرين باستمرار قال ممتاز
ف توكلت على الله و قررت انا وزوجي اننا نسويها
طبعا دكتور محمد وقتها أخذ مجسّم للرحم و صور توضيحيه و قام يشرح كل شي عن عملية اطفال الانابيب و السحب و الارجاع

*بعدها وصف لي الدكتور هاذي الفيتامينات قال اللي عندك تمام واللي مو عندك اشتريه :

1-سنتروم
2-حمض الفوليك
3-فيتامين د( اللي كل يوم حبه مو اللي كل اسبوع حبه )

*بالاضافه الى انه غيّر لي جرعة علاج التكيسات جلوكوفاج من 500 الى 750

*والشي الاهم بدينا منشطات ابر :

اسم المنشط / جونال اف

طريقته / ابره قلم زي قلم الانسولين بالضبط وطريقته سهله وتعلمك الممرضه كيف تاخذينه وحتى لو تبين كل يوم تروحين تاخذين الجرعه بالمستشفى براحتك بس مااشوف انه يسوى المشوار

الجرعه / طبعا تختلف الجرعه على حسب الحاله انا وصف لي الدكتور 225 وحده

المده / حتى المده طبعا تختلف حسب الحاله انا قال لي اخذ الجرعه لمدة خمس ايام

اليوم السادس عطاني موعد اشعه ( ولازم تنتبهون تكون مواعيد الاشعه متقاربه عشان مايصير معكم فرط تنشيط خاصه اللي معهم تكيس مبايض)



اهتمامي بنفسي كان :

1-النفسيه النفسيه النفسيييييييييه حريصه كل الحرص اني ابعد عن كل شي يعكر مزاجي وان لنفسي علي حق و اني هالفتره لازم احط نفسي بالاولويه قبل كل شي بالحياااااااة

2- اشرب ماء اقل شي 3 لتر يوميا

3- حاولت اخفف سكريات ومشروبات غازيه كثيرررر

4- اكلي كله صار اكل بيت ( مو دايت ) بس ماصرت اطلب من المطاعم

5- اقرا اذكاري بعد كل صلاه و الاستغفار كل ماتذكرت


التكاليف:

1- الاستشاره مع دكتور محمد بقنه ( 315ريال)

2- اشعه سونار مهبلي ( 210 ريال)

3- فيتامين د اليومي ( 33 ريال )راح ارفق لكم صورته لانه ممتاز خاصه ان اغلب الشعب عنده نقص

4- المنشط جونال اف : طبعا الابره نفسها تجي كميات مختلفه على حسب اللي يكفيك واللي قاللك الدكتور

يعني مثلا انا قال لي الدكتور لازم يوميا اخذ 225 وحده لمدة 5 ايام

يعني احتاج1125 وحده

ف صرف لي الصيدلي ابرة جونال اف 900 ( 1089 ريال)

وابرة جونال اف 300 ( 363 ريال )

و اللي يبقى 75 وحده حفظت القلم بالثلاجه لاني قلت يمكن يكمل معي الدكتور منشطات و احتاجه


هذا كان البدااااااايه ويارب اني قدرت اشرح من قلب و راح احاول اكمل اللي صار العصر لاني استنفدت طاقتي وانا اكتب
واللي عندها اي سؤال تبشر



( ربي لاتذرني فردا وانت خير الوارثين )

(ربي ارحم والدي واموات المسلمين اجمعين و اطل بعمر امي بالصحه)

( لااله الا انت سبحانك اني كنت من الظالمين )