قصتي مع تاخر الحمل والبشاااره بالحمل ^_^

السلام عليكم ورحمة الله وبركاته



بااحكيلكم قصتي مع تاخر الحمل واللي صار لي من تعب نفسي مترتب على كدا وكيف ربي في النهايه اعطاني اللي اتمناه وعقبال الجميع يااارب


انا اتزوجت وانا عمري 19 سنه يعني صغيره . .. وجلست 3 سنوات مافي اي بادره للحمل وكل مارحنا كشفنا بمكان يقولو لي مافيكي شي لكن زوجك عنده دوالي في منطقة الخصيتين مسببه له قتل في الحيوانات المنويه

وكان مسكين يتعالج وعمل عملية استئصال للدوالي ومافي علاج طبي ولا شعبي الا واخدو لكن بدون فايده


وبعد سنه حملت وكانت فرحتنا مااااتوصف لانكم تعرفوا يف تكون نظراتالناس اللي مثل السكاكين في القلب:mad:


لكن كل مارحت اكشف على الجنين بالسونار مااشوف الا سواااد وماعندي اي اعراض للوحام او غيره كاني مو حامل !!


انا ماكنت اعرف شي في الامور هادي لكن اللي حولي كانوا يستغربو بس قالو دام ان الدكتوره ساكته اذا اكيد طبيعي


وبعد 3 اشهر اجهضت للاسف كان عندي كيس بدون جنين مااوصف لكم التعب اللي تعبتو :44:

تعب نفسي الله لايوريكم تخيلو اسقاط من بعد 3 سنوات تاخير لكن دعيت ان ربي يعوضني خير ممافقدت

وبعد سنه و8شهور حملت تاني ومااااا امداني افرح اسبوعين الا وانا اجهضه مره تانيه بكيت وجاتني مثل الحاله النفسيه حتى زوجي مرره تعب نفسيا وصارت بيننا مشاكل لاحصر لها جلست على كدا سته شهور وبعدها تطلقت :44:


هنا مرره تعبت وصرت في حاله من التيه والوحده شي قاتل والا اسمع ان طليقي اتزوج بعد طلاقنا وزوجته حملت على طوول ماشاء الله وربي رزقه ببنوته <<< الله يسعدهم ويخليهم لبعض


جلست سنه ببيت اهلي احاول اشغل نفسي بااي شي

والحمدلله اختي جابت لنا ولد اتجننت بيه وحسيتو مثل ولدي والله يجزاهم خير اختي وزوجها كانو مره متفهمين وضعي وخلوني على راحتي معاه وهادا والله الشي اللي جبر كسري من جوه


المهم


بعد سنه اتزوجت والحمدلله وجلست اربع شهور وحملت انا مررره فرحت بس برضو ياافرحه ماتمت اجهضت من ثاني يوم عرفت فيه بحملي :44: زوجي كان يخفف عليا ويقول انا ماابغى عيال دحين خلينا ناخد راحتنا لاحقين عليهم <<< الله لايحرمني منه حنيتو معايا ساعدتني مرره كثير وخففت عليا ضغوط الله العالم بيها



وبعد شهرين حملت ونزل قبل مااعرف بيه فجاه جاتني آلآم واروح المستشفى الا والدكتوره تقول اجهاض :44:


وربي خلااااااااص الدنيا اتقفلت بوجهي استغفر الله العظيم ويأست يارب لاتواخذني يأست من حملي لدرجة اني ماابغى اسمع السيره هادي طلبت من زوجي اني اشتغل ولقيت وظيفه بدوام طوييل ووافق فديت قلبه عشان بس انسى


وجلست سنه من الياس الى يوم في اخر الليل اتوضيت وفرشت سجادتي وكنت ابكي وادعي ( ربي لاتذرني فردا وانت خير الوارثين ) واكرر الدعاء وابكي الييين تعبت من البكا خلصت صلاتي ورحت نمت ونسيت الموضوع او بالاصح شلته من بالي


بعدها بيومين احلم اني اقرا سورة مريم ( يَا زَكَرِيَّا إِنَّا نُبَشِّرُكَ بِغُلامٍ اسْمُهُ يَحْيَى لَمْ نَجْعَل لَّهُ مِن قَبْلُ سَمِيًّا ) واشوف نفسي اكررها وصحيت من نومي


وصرت ادعي بخير هادي الرؤيا بعدها اشوف ان العاده عندي متاخره وانا ناسيه باامر الحلم هاادا لاني كنت عادة انا لدوره تجيني انا ووحده من زميلاتي في نفس اليوم اشوف البنت جاتها وخلصت وقربت تجيها تاني وانا لسى انتظر الدوره


كانت تقول لي يمكن حامل ؟؟

كنت اقول لها انا عارفه نفسي ماني حامل مااعندي اي اعراض حمل

بس وقتها كنت دايخه على طول وكنت احسب من الكرسي حق مكتبي يمكن يهتز وانا احسب نفسي دايخه

وكنت احس ان جسمي يحكني احك كان فيه جرب بسم الله وكنت اقول يمكن حساسيه بااخد ليا موعد في دكتور الجلديه قريب ان شاء الله


يعني بالعربي ماكان الحمل في بالي بتاااتا

لمن يوم اتفاجأ من صديقتي تجيب لي التحليل المنزلي وتقول لي جربي ماراح تخسري شي:27:

قلت طيب باجرب بس عشان ترتاحي انتي وتعرفي اني مو حامل


وحللت ...!!!



وكانت المفااجأة خطييين واضحييين ..!!! صرت متنننحه في التحليل وصديقتي فرحانه تبارك لي وانا عيني ماراحت من التحليل من الذهول االا وافتكر الرؤيا اللي شفتها وكييف اني نسيتها سبحان الله


وبرضو كنت مستنيه اني اجهض كالعاده وادعي ربي ان يثبت لي حملي

وفعلا ماصدقت الا لمن حسيت بحركة الجنين وقتها فرحت وقلت للكل ههههههههههههههههههه

عشان كدا حبيباتي لاتيأسوا من رحمت الله والله الله بصلاة اخر الليل وربي فيها الخيير الكثير واحنا لاهيين عنها ..


^_^ يارب ياكريم في الشهر هادا اشوف كل الحوائيات اللي يبغوا الحمل يبشرونا بالحمل ونفرح فيها سوا ياكريم ^_^