قصتي مع تسمم الحمل .. وتعطل وظائف الكبد والكلى عندي(نداء خاص لكل من اصيبت بتسمم الحمل

السلام عليكم

انا من زمان ودي اكتب بكم قصتي بس عجااااااااااااازه :hahaha:بس الحين تحمست اكتب قصة ولادتي

كنت في الشهر الثااامن الاسبوووع 33 وكنت راااايحه السووق مع زوجي نشتري باقي اغراض بنتي

طبعا كنت مهمومه هم وبس افكر بموووضووع واحد ((ماودي اذكره)) افكر كيف اقنع زوجي يغير رايه بالموضوووع لانه موضووع راح يغير حياااتي
وكنت كل ماذكر الموضوووع كنت احس ناااربقلبي من القهر شلووون اغير رايه بدون مايتدخلون اهلي

المهم ماعلينا طبعا رحت السووق طوول ماا اتسوووق بس اذكر هالموضووع وانقهر ركبنا السيااره متجهين لبيتنا

وانا في السيااره بديت احس بضغط برحمي واحس راس بنتي صااار تحت ومرره يضغط علي وكااان يوووجع

وحاولت اعدل من جلستي قلت ءيمكن ضاغطه عليها برضوا مافيه فاايده وبديت احس رحمي بدااا يثقل ويتحجر مرررره وااااااو يوووجع
وماقلت شي لزووجي قلت يمكن عندي امساااك وانتوا بكراامه دخلت الحمام وماافي فااايده قلت شكله مو امساااك

برووح انسدح يمكن من التعب ورحت انسدحت وشوي ظهري يوجعني حسيته منقسم من النص وبعدها تطور وصرت احس فقراات ظهري تطقطق حسيت كان احد ماسك فقرات ظهري ويلوويهم مررره مؤلم

والالم يروووح ويجي قلت اصبر ومااروح المستشفى يمكن يروووح وبعدين دخل زوجي والغرفه وناااقشته بالموووضووووع اللي جااب لي الهم واحاول اغير رايه ومصر على رااايه وانا اتناااقش معااه يزيد الالم واحس بقهر منه واحس بنااار بقلبي من القهر

طلع هو من الغرفه وانا رجعت انسدحت واتغطيت بالبطانيه رجع الالم وصرت استغفر واسبح وخايفه اقول لزوجي ثم يوديني المستشفى وانا لسه على الولاده بالثاااامن ثم يلعبووون وفيني ((طبعا كان تفكيري غلط وانصح اي وحده تحس بأي شي لاتسكت وتجلس تروووح المستشفى))


بعدين جاء زوجي وسمعني وانا استغفر واتألم قالي وش فيك مافيني شي على طول دموووع وصيااح ماابي اروح المستشفى وهو انهبل ليه وش تحسين فيه؟؟

وغصبني الا ارووح المستشفى رحت لمستشفى دله ودخلت الطوارئ يوم شفت قسم الولاده وانا انهبل اقووله مافيني شي راح الالم خلنا نرجع وررفض صااارت المررضه تشدني من يدي ادخل وهو يدفني على الممرضه روووحي

ودخلت وشفت طبيبه سودانيه وقلت لها وش احس فيه قالت لازم فحص من تحت ورفضت وجلست تقنعني وافقت

لقت رحمي مو مفتوووح وقااسوا الضغط طلع مرتفع قااالت كله من الخوووف لاتخاافين وقالت لازم تحليل بووول

وسألتني معاك احد قلت زوجي قالت ناديه خليه يدخل واستغربت لان مكتوب ممنوع دخول الرجاااال بس كااان المكااان فاااضي وسألتها ليييش فيني شي بنتي فيها شي قالت لا مافيه شي بس اجراءات لازم يجي نأخذ بياناته

وانا صدقتها ورحت ناديته(اثاااريها تقوول لزوجي زووجتك يومين وتولد قهرتني ليش ماعلمتني كان هجيت ههههه) ووانا رحت دخلت الحمام عشان تحليل البول وانتوا بكرااامه طلعت قلت خلاص اقدر امشي قالت لا انت راح تنامين عندنا يوومين قلت ليش قالت لين ينخفض الضغط وبعدين خلوووني اصعد للدور الثاااني وخلووني اغير ملابسي والبس لبسهم وغرفه لي بلحالي حقت الملاحظه في قسم الولاده وقعد زوجي عندي

وجات دكتوره وقعدت تسألني اسئله انتي زعلانه من حاااجه ؟؟ قلت لا ((انا على بالي قصدها بالسؤال انو متهااوشه مع احد بس انا ماتهاوشت مع زوجي بس مناااقشه <<<فاهمه الزعل غلط))
وش اكلتي ؟؟ بروستد متى اخر مرره اكلتي؟؟؟ماذكر تحسين بصداااع؟؟ لا تحسين ان جزمتك وانتوا بكرامه صايره صغيره عليك؟؟ لا

وبعدين سألتها ليش نومتوني رااح اولد فالت ماتخااافيش سيبي الخوووف انا عوزاااكي تنامي وترتاااحي حتى ينخفض الضغط

وعطتني ابررره بعدها بثوااني حسيت براااحه عجيبه راااح الم الظهررر والاوجااااااااااع وعطتني ابره ثانيه لرئة الجنين

وقالت لي لازم تنامين بس مااعرف انام وانا مو على سريري يطير النووم عني

وكنت اناظر في جهاز نبضات قلب الجنين انه يقل نبضاات بنتي وخليت زوجي يناديها وقلت لها ليش نبضااتها تضعف

قالت ماتقلقيش عاوزااكي ترتااحي ولاتفكري بحاااجه ونااامي وفصلت الجهااااز وراااحت

ورحت اتصلت على امي وعلمتها قالت ليه مين زعلك؟؟ قلت لاماحد زعلني قالت غريبه يرتفع ضغطك فجأه وقالت توك على الولاده ماراح تولدين ليتك علمتيني قبل لاتروحين للمستشفى كان ماخليتك تروووحين كان دهنتك بزيت زيتووون((اشوى اني مادقيت على امي قبل لااروح المستشفى) المهم قالت امي بجيك وجت وزوجي راح البيت بس قبل لايطلع من عندي حط ايده على بطني قال استودعك الله الذي لاتضيع ودائعه وحط يده على راسي وقال استودعك الله الذي لاتضيع ودائعه

وحااولي فيني اناااام وكانت الدكتوره منهبله انا عطيتك متووم ينووم جمل كيف مانمتي لازم تنامي وترتاااحي وانا مااقدر انا على سرير مو سريري مااعرف قلت طلعيني وانا راح انام بيتي قااالت لا

المهم تجي الساعه 9الصبح وانا مانمت وامي تقرا علي
طبعا قبل كل هذا قلت لهم ابي الدكتوره سهير قالوا اذا جت للدوام راح تيجي لك على طول مع اني دافعه قبل ابووع 500 استدعاء عند الولاده

المهم وتدخل الدكتوره سهير وتسألني نفس اسئلة دكتورة الطوارئ وكل شي لا واستغربت وقااسو الضغط لقووه واصل 150 او 180 نااسيه

قالت لازم تحليل بووول وماقدرت اسوويه احس مافيني شي واخر شي جات الدكتوره سهير وسوت لي قسطررره واااو تووجع وقعدت اترجااها ماتسوويه

وراحت دكتوره وسهير ويمكن نص ساااعه ورجعت وقالت انتي عندك الضغط مرتفع والزلال مرتفع

وامي لما سمعت هالكلام حطت يدها على صدرها وشهقت يعني تسمم حمل واناااظر امي عرررفت انه شي خطير والا امي عاادتها انه كل الامراض عنده بسيطه ومافي شي يخووف بس يووم شفت ردة فعل امي عرررفت انه الموووضوووع خطر

التفت على طوول على الدكتووره بنتي بتعيش اهم شي بنتي قالت ان شاء الله راااح تعيش ((وانا الحمد لله مااقريت شي عن تسمم الحمل مع اني كنت اقرا كل الامرااض اللي تجي للحامل في النت والحمد لله تسمم الحمل ماقريت عنه والا كااان رااح عقلي من الخوووف))

وقالت الدكتوره عملت اجتماع مع الاستشاارين وكلهم قرروا عمليه لك فورا

وامي قالت لا ياادكتوره وشلوون بدري توولد

قالت الدكتوره لو ماولدت قيصري راح يجيها عمى وتعطل في وظائف الجسم وغيبووبه

انا سمعت هالكلام انهبلت وقعدت استغفر وادعي ربي
وعلى طول جهزوني للعمليه واتصلت عل زوجي قلت الحق راح يولدووني قيصري قااال خلاص جاااي

وجات الدكتوره ومعاها ورقه قالت وقعي قلت راح استنى زوجي قالت انتي وقعي وراح نستناااه ((طبعا كان تلعب علي بس كان لمصلحتي ولمصلحة بنتي))
وقعت وعلى طول دخلووني غرفة العمليااات وكنت ارجف وكنت اقول لدكتوره سهير ابي ارووح اصلي ركعتين

قالت صدقيني مااافي وقت

ودخلت العمليات عطوني بنج نصفي وكنت خاايفه منه مررره ماكانو يقدرون يعطوني بنج كامل وانا معي الضغط

ماحسيت بالابره ابدا وعلى طول تخدرت رجولي ماقدرت احرك اصبع وربع سااعه وطلعت بنت واء واء

وقعدت اصيح لما شفتها وحمدت ربي واخذوا بنتي حضانة الخدج كان وزنها كيلو ونص وبعد العمليه جات الدكتوره عند راسي قبل يودوني غرفة الافاااقه قالت الحمد لله انكتب لك عمر جديد ولبنتك((اللهم لك الحمد والشكر كما ينبغي لجلال وجهك وعظيم سلطانك)) كانت بنتك مفصوله عن المشيمه والحمد لله لحقنا عليها وكان في بداية نزيف في الرحم
وطلعت وحطووني بغرفة الملاحظه يووم كامل بدوون انواار بالظلام عشاان كانوا خايفين من الارتعااااش

ولما جت الدكتوره تشيك علي اليووم الثااني سألتها ايش اللي صار ليش جاني تسمم الحمل قالت يجي فجأه احيانا مايعرف السبب
وقالت انتي حصل عندك تعطل في وظائف الكبد والكلى وكان لازم ننهي الحمل
واختي زارتني بالمستشفى وتقوولي شكلك يخوووف مررره منتفخه جسمي وكتووفي ووجهي وانا ماكنت احس

والحمد لله بنتي طيبه ولله الحمد والشكر

بنااااات ادعووولي مايتكرر معي تسمم الحمل واكمل للتاسع بدووون مشااااااااااااااااكل ويرزقني ربي طفل سليم معااافى كااااااااااااااااااااااامل الخلقه

يــــــــــــــــتـــــــــــــــــبــــــــــــــع