بسم الله الرحمن الرحيم
السلام على اهل التقى والايمان تحية الاسلام
شي يدور بخاطري يألمني كل ماتذكره كيف كنت ووين صرت وليش
بقول لكم قصتي واتمنى تلقى لها صدى في قلب كل مؤمنه محتسبه تنظر للاخره ومايهمها انتقادات او عقبات ....
زي مانتوا عارفين كل وحده في فترة البلوغ والمراهقة تهتم بميول معين اوتتجه اتجاه معين يكون شخصيتها وتشعر بالراحه بممارسته
بغض النظر عن انه الوحده تسيرانطوا ئيه او عصبيه اوحساسه اوجريئه او او او
انا اقصد الهوايه هنا وحدة مثلا ميولها تعليمي جدا فتلقيها حتى في الاجازات تبحث وتتثقف وبعضهم الطبخ وغيره
انا كنت في ذيك الفتره اميل جدا للامور الدينيه يعني لوكنت في المدرسه على الرغم من اني مشاغبه الا اني لو سمعت بمحاضرة او ندوة تلقيني اول الموجودين حتى لوكنت في البيت وقالت لي امي ان في المسجد محاضرة اروح جري
في يوم كنت في الحوش اسقي الشجر وانظف الاحواض حسيت برعب في قلبي فجأه وقلت في نفسي لين متى وانتي كذا اغاني وتقصير وبناطيل وعبايه مخصره جلست على دكة الحوض وحطيت يدي على راسي وكاني سمعت خبر سيئ واقول يالله مين بينفعني لما اصير تحت التراب لوحدي الملابس اللي البسها عشان اطلع شياكه قدام الناس لوسرت لوحدي في قبري بينسوني وينسون شياكتي وانا جالسه اتعذب لوحدي ...
يالله انا خايفه مررره يعني لين متى بعيش سنه سنتين ميه مصيري اموت واي شي غلط سويته صغير او كبير بلقاه ياربي فين اتخبى منك قمت اجري وسبت كل شي من يدي رحت لدولاب ملابسي وقطعت كل البناطيل وعبايتي المخصره ورحت اغتسل وكاني ذحين دخلت في الاسلام حسيت حتى قلبي انغسل
كنت طول الوقت اسمع محاضرات وقران التحقت بحلقة لحفظ القران الكريم واتعرفت على بنت قمة في الاخلاق اسمها شرف وهي فعلا شرف لكل وحدة تجالسها وكنت اصوم النوافل الاثنين والخميس البيض يوم عرفه .
في يوم كنت في البيت وجت وحده عند امي تقولها فلانه ماتت (وحده كبيره في السن من الجارات)قالت لها ومالقينا حد يغسلها تذكرت ان عندي كتاب اسمه حقوق الموتى فيه كيفية غسل الميت وتكفينه والدعاء وكل شي قلتلها بدون تفكير انا بغسلها قالو منتي قادره قلت بحاول لاني قد سبق وشاركت في تغسيل اختي الله يرحمها...
لما دخلت الغرفه حسيت برعب وقلت في نفسي في يوم راح اكون مكانها ؟اش قدمتي لذى اليوم ولاشي.
قلتلهم انا بقرا لكم اش اللي لازم تسووه وانتوا طبقوا انا خايفه المسها ولما جى دور اننا نحط يدها اليمين عاليسار زي الصلاه نسيت انها ميته وتلقائيا قلت لهم لا غلط كذى ومديت يدي بعدلها شهقت وسحبت يدي كاني تكهربت لاني تفاجئت ان جسم الميت موزي الحي ارتعبت اكثر ولكني قررت اكمل معاهم وساعدتهم
لما رجعت البيت مقدرت ااكل ولا انام كنت بس افكر في مصيري وخاتمتي واعمالي اللي تفشل
يالله كم قصرت كم اغتبت كم عقيت كم وكم امي خافت عليه جدا وكانت اذا سمعت بوفاة ماتقلي عشان مااتاثر خاصتا مع المدرسه ماتبغى شي ياثر على مستواي.
بعد مرور فتره كان فيه وحده من الحي ولدت ومات ولدها نادتني بنت الجيران وقالتلي تعالي غسلي الطفل مالقينا مغسله وانا الكتاب ظاع ومو متاكدة من التفاصيل ولكني توكلت على الله وغسلته لوحدي بدون مساعده وهذا الشي خلاني اقوى وانوي اني اكون مغسلة اموات على طول ..
بعد مرور فتره جيت من المدرسه وامي وجهها متغير قلتلها ايش فيه قالت ولاشي جلسنا نتغدى وامي كل شويه تسرح وتقول سبحاااان الله استغفر الله قلتلها امي اشفييييه تكلمي قلي اخويه فلانه اللي حامل في الشهر التاسع ماتت هي واللي في بطنها شهقت ورميت الملعقه من يدي قلتلها متى وكيف قالت لي جتها الولاده وراحت المستوصف وارتفع ضغطها ونقلوها عالكرسي متحرك بيودوها السياره قامت من الكرسي وكانت تدور وتجلس في الارض وتضرب راسها وتتالم وماتت مكانها تحت الشمس قرب الظهر...
حسيت اني انصعقت من طريقةموتها قمت من الغدى واخذت عبايتي ورحت لقيت شرف اللي حكيت لكم عنها موجوده هناك وكمان وحده معاها قلتلها بدخل اغسلها قالت خلاص دخلنا ولما شفتاه ماصدقت البنت كان لونها قمحي قبل تموت وذحين سمر ا مرره خفت مررره وقلت مدري عقاب او الم الموت يارب ارحمنا وهذا الشي الاول اللي خوفني الشي الثاني وقت مابدانا طلعت فجاءه رائحه كريه جدا جدا ماعمري شميت مثلها وكنت اول وحدة اشماها لدرجة اني لاشغوريا تراجعت وكان حد دفني وسكتت واستحيت اقول للي معايه وفجاة صرخت شرف وتراجعت وغطت على انفهاقالت استغفر الله استغفر الله يااارب يارب ناظرنا في بعض بخوف وكان كل وحدة بتقول شكله عقاب بس خوفنا من الله وخوفنا عليها من ان الملائكه تاخذ كلامناشهاده عليها خلانا نسكت وكنت اقول يمكن هذي ريحة الاذى ودم النفاس وانتوا بكرامه تلثمناوكملنا على مضض العلامة الثالثه لما جينا نقلبها كانت ثقيله جدا جدا لدرجة اننا كنا كلنا الثلاث نقلبها وكان الوحده تقلب لحالها كنا نقول لبعض امسكوا معايه وكل وحدة تقول ماسكه بقوه وذى الشي وترنا اكثر كنا ندعي لها ومتاثرين مرره خلصنا على قرب المغرب واول ماخرجت من الغرفه وانا في حال يرثى لها ومتحطمه ومقهوره وحزينه ولما جوا يشيلوها عشان يصلو عليها المغرب كنت اناظرها من بعييد وابكي بحرقه لين انهرت وسرت ابكي بطريقه هستيريه رغم اني اعرفها معرفه سطحيه ولكني خفت عليها الناس كانوا يصبروني يفكروني حزينه على فراقها مايدون اش لي حصل داخل شافتني جارت امي ومسحت وجهي وسندتني عليها وودتني البيت كنت امشي في ذاهله واصوات الاذان من المساجد من كل مكان وانا دموعي موقادره توقف كنت اقول في نفسي
يانفس توبي فان الموت قد حانا واعصي الهوى فالهوى مازاال فتانا امااترين المنايا كيف تلقطنا لقطا فتلحق اولانا باخرانا
وصلت البيت ولقيت امي تنتظرني لانها لحقتني لقيتني جوا رجعت البيت جلست تقلي شوفي حالتك خلاص ماراح تغسلين موتى ناظرتهاومقدرت اتكلم تروشت واخذت شرشفي وسجادتي وخرجت الحوش بصلي الاعلى جية وحدة من صديقاتي صلينا مع بعض وجلسنا في الحوش هي تسكتني وانا موقادرة اسكت ظلمت الدنيا وانا اقول في نفسي ياارب انا عرف اللي تموت نفاس تعتبرشهيدة يااارب اقبل شهادتها وتقبلها عندك وخفف عنهاياارب قطعت تفكيري صديقتي وهي تقول اللهم ثبتها عند السؤال حسيت برعب فعلا قلتلها ذحين جالسه تنسال قالت هذا اول ليله لها في اول منزل لها من منازل الاخره بارب يثبتها منت ابكي زي الطفله لين اذن عشا صليت عشا وصديقتي راحت وانا دخلت غرفتي كنت اولى او ثانيه في ذيك الفتره ماذكر بس اذكر ان كان عندي امتحان نحو مقدرت اركز مرره غبت اليوم الثاني وامي تظايقت لان بدات نفسيتي وصحتي ومستواي الدراسي ينزل ولكن تعلقي بربي كبير وخوفي منه اكبر وكنت احتسب الاجر في كل شي ..
رحت للعزى وسالت اخت زوجها قلت لها كيف حالها مع الصلاه لانهم كانوا ساكنين سواوكانت الصاعقة ..سكتت شويه وقالت بابتسامة خجل يعني هه يوم تصلي ويوم لا وكانها استحت تقلي انها ماتصلي والله اعلم مرت الايام وكانت اخر عهدي بالدين الصحيح اللي مااستقمت في حياته زي ماستقمت في تلك الايام كنت يومها انا وعمي اكبر مني بسنتين وكان يشجعني صايمين نافله وكان اخوي اللي بالشرقيه عنده اجازه وعندناوابويه جا من جدة وجالسين في الصاله ياكلوا قلي قومي كلي قلتله صايمه قلي اش صايمه قلتله نافله قال ماشاء الله قالت لا ودخلت التحفيظ قال اوهو قالت وغسل موتى صرخ ها موتى وناظرني قلي من جد قلتله من جد قلي انتي كبف قلبك وقالها بغضب قلت له قلب مؤمن ناظر لابويه قال ابويه بنتك تغسل موتى قال خلاص نوظفها في الشرشوره وجلسوا يضحكوا طلعت الحوش ابكي كان مكاني المفضل اذا فرحت اوزعلت جا عمي لان كنا متفقين نفطرمع بعض شافني ابكي قلي اشفيك قلت له اهلي يتريقوا عليه وامي حالفه معد اغسل موتى قلي معليك طنشي واحتسبي الاجر وهذا اختار ولازم تتحدي نفسك اقتنعت بكلامه واليوم الثاني رحت التحفيظ وكنا متفقين انا وشرف بعدمانكمل تسميع نجلس مع بعض نحفظ سورة البقرة ونسمعها لبعض المهم اول مادخلت ليقتها تبكي عند المواضي ووحدة جالسه تهديها قلتلها اشفيك قالت ولاشي طفشانه قلت لها مستحيل اكيد فيك شي كانت تبكي وماقدرت تتكلم سالت اللي معاها قالت بس توعديني ماتكبرين الموضوع قلتلها وعد قالت شرف اليوم الظهر كانت جالسه في بيتهم هي وحرمة ابوها وامها واخواتها ودخلت بنت الجيران تخاصم وتقولها انتي ياللي مسويه مطوعه في العصر قران وبعد المغرب انتي وفلانه في الاحضان واتهمتنا باشياء ماتنقال انصدمت قلتلها وليش مادافعتي عن نفسك قالت ماخلتني اتكلم رمت كلامها وراحت ولما لحقتها قالت انا قالت لي وحده ثقة وشافتكم ومستحيل اقلك مين لاني وعدتها انا وقتها مقدرت حتى اتكلم جلست ابكي واقلهم امي لو سمعت بكذى بتموت قهر انا معد بجي التحفيظ قالوا لي لا غلط كذى تثبتين كلامهم قلت خلاص معد بجي الزم ماعلي سمعتي وربي موجود في كل مكان اصلا انا خلاص ثانويه عامه ولازم التفت لدراستي عشان اجيب معدل وكانت غلطتي اللي ندمت عليها طول عمري شرف ماشاء الله واصلت وصارت مديرة الدار وانا طاوعت كلام الناس على حساب رضى ربي
بعدها بفتره بسيطه كانت جارتنا ندها ولد في سني وهو يصير هو وابويه اولاد عم انكسرت رجله وماكانت تقدر تروح التحفيظ فكلمت امي اني اجي كل يوم العصريه اذاكرلها هي وامي عشان مايفوتهم شي وكنت اروح انا وامي خاصتا ان الباب في الباب يعني ماعندي عذر بعد ماخلصنا جت وحدة هي وامها يتحمدوا للحرمه بسلامة ولدها والاشوية قالت لي البنت بقولك شي سمعته عنك بس مومصدقة على طول خطرلي اللي صار قلتلها خير قالت والله سمعت انتي وفلان بينكم علاقة حب وانكم تتقابلون واشياء زي كذى تقصد اللي انكسرت رجله واللي انا الحين في بيتهم شهقت لدرجة انهم كل الموجيدين التفتوا سكتنا قلتلها مين قال وانتي صدقتي قالت والله انا ماصدقت بس لماشفتك كل يوم جالسه عندها وهي ماعندها بنات شكيت قلتلها انا اجي اذاكرلها وامي معايه قالت بالله حلفت اني عمري ماصاربينه ولابين اي واحد شي زي كذا ولا افكر اصلا لاديني ولااخلاقي ولاتربية اهلي تخليني افكر في كذى حلفتها بالله انها تقلي مين قلها ولها الامان طلعوا كلهم من العائله وان الكلام من زمان وتخيلوا كنت اجلس معاهم وهم يتهامزون عليه وانا ياغافلين لكم الله تخيلوا تمنيت الموت رحت البيت ابكي واتصلت على اخويه اللي ساكن في تبوك واشتكيت له قلي اسمعي احنا واثقين فيك وانتي لسى صغيرة لو بتقعدي تهتمي لكلام الناس بتموتي خليك واثقة في نفسك واحنا معاك وقفلي الموضوع ولاتكبريها وتخلي اللي مايدري يدري وامي وابويه لايدرون اتطمنت شويه لكن نار الظلم حرقتني وصادف الموضوع امتحانات الثنويه اخرسنه تعبت مره وضغطت على نفسي عشان المعدل ونجحت واتخرجت بس معدلي ماساعدني ادخل قسم اقتصادمنزلي لانه هوايتي تعبت اكثر ظلم ورى ظلم الكل وقف ضدي واقرب الناس طعنتني مرت الايام وفجاة كنت رايحه عند بنات الجيران وانا في الطريق بين المغرب والعشا حسيت زي الهوى البارد دخل صدري كنت ادفه وهو يدفني كنت اضارب مع هوا بارد انا احاول امشي وهويرفعني على فوق لين اغمي عليه شافني ولد الجيران اللي كانت رجله مكسورة اللي طلعوا عننا كلام اناوهو وكان معاه صاحبه قله شفتها كيف ارتفعت اخذوني ودخلوني عند امي صحيت والكل حولي عمي واخواني واخواتي قلتلم اشفيه قالولي فلان وفلان شافوك ارتفعتي من الارض وطحتي انا انقهرت لان اللي شالني نفس الانسان يعني الناس بتتكلم اكثربعدها ساءت حالتي جدا ودوني عند شيخ وكنت اتعب مرة واحس اني بستفرغ واحس بالم في بطني قال الشيخ فيني سحر وحسد ومس والسحر في بطنها شي اكلته اوشربته الله ينتقم لي من اللي تسبب لي تعالجت وخفيت بس لازالت الاعراض تجيني من فترة لفتره بعدها قررت اني اسافر مع ابويه جده لان عمله هناك واكمل كليه وادخل القسم اللي احبه واهرب من كلام الناس ولكني عانيت جدا رغم ان ابويه ماقصر طلباتي اوامر بس كنت اقضي وقت طويل لوحدي وكل شي موفر لي رجعت اسمع اغاني واتابع افلام ومسلسلات عشان الوقت يمشي خسرت كثير وبسبب السحر اللي كان يخليني اتكسل عن فعل الخير بعد سنه طلبت نقل ورجعت منطقتنا وحاولت ارجع زي ماكنت ولكن هيهات سبحان الله من كثر الظلم والصدمات قلبي تحجر ولكن كنت دائما احاسب نفسي ومااخليها على هواها مرت سنه تقريبا واتقدم لي عريس تدرون مين نفس الانسان اللي طلعوا اشاعه عني وعنه انا ترددت لاني كذى بثبت ان كلام الناس صح ولكني تذكرت اني تركت التحفيظ بسبب كلام الناس وندمت وماراح اندم مره ثانيه فكرت واستخرت ووافقت واتزوجت ويافرحه ماتمت بعد فتره حسيت اني اكره زوجي لمايكون في البيت ولما يطلع اخاف لوحدي كنت قبل لايدخل البيت اشم زي ريحة الميته او الجثه المتعفنه لدرجة اني لما اشم الريحه اعرف انه جاي ولما اتصل عليه يقلي نازل من السياره جاي ومرة من المرات جا من برى في وقت متاخر
وابغاكم تتصورون شكل غرفة النوم اول ماتفتحي الباب السرير في الوجه والشباك عاليمين طبعا جهة نومي والدولاب عاليسار جهة نوم زوجي المهم والغرفة كانت مظلمة وفي نور خفيف من الشباك على الدولاب المهم كان زوجي في مكانه جالس ياكل كيك وحليب ولما خلص رمى الاكياس جنبة في الارض وانا فاتحه الدولاب واغير ملابسي ونسولف وقفلت الدولاب وطبعا ظلي مرسوم في الدولاب وواقفه جنب رجوله فقلت في نفسي مافيني حيل الف واروح مكاني خليني انقز من جهة زوجي واروح مكاني تصوروا يابنات ظلي مانقز معي انا نقزت بس ظلي راح يمشي واتعرقل في الاكياس اللي رماها زوجي من جهته انا ضرخت وجلست ابسمل وانتفض وزوجي يقلي اشفيك لما حكيت له قلي تتوهمين وبعد مانتقلت اعترف لي زوجي انه شاف نفس اللي شفته بس ماحب يخوفني وان كل الاشياء اللي كنت اعاني منها كان هويعانيعا بس ماخب يروعني لأن كان دوامه استلامات ومعضمعا بالليل فصبر وسكت رحت عن الشبخ وقلي سحر وحسد جلست سنه على ذى الحال وبعد السنه اقترح عليه انه يبني شقه فوق بيت اهله عشان مااكون لوحدي وعشان يرتاح من الايجار وقال يمكن ابلى من البيت ولما جى يشيل عفش البيت لقي شعري معقود في خيوط تحت الفراش لاني عندي علبه فيها شعري اللي اقصه تخيلوا مدري مين اللي سرق منه وسوالي السحر وبهذلني
بعد ما نقلت ارحت شوي رغم المشاكل اللي تمر بين كل زوجين الا انه اهون من اللي كنت اعانيه ولكني كنت كل فتره احلم اشوف زوجي اثنين واجد طيب وواحد شريرلمدة خمس سنوات وانا اعاني نفس الحلم حت بنتي قالت لي ماما حلمت فيك اشوفك اثنين وحدة طيبه ووجدة شريرةولما ارسلت الحلم لاحدى الاخوات في قسم تفسير الاحلام لعالم حواقالت لي يحتاج لي رقية شرعيه انا وبناتي تخيلوا يابنات حجم المعاناه هذي اللي وقفتني عن حلمي اني اغسل موتى ولكني مستحيل اتخلى عنه وندمانه اني تركت التحفيظ اوقات اقول يمكن هذا عقاب من ربي اني تركت طاعة الله من اجل الناس انا الان اجدد عزيمتي وراح احقق حلمي مرضاة لربي مهما كانت الصعوبات اللي قدامي وانتوا لاتخلوا شي يوقف في طريقكم دامك صح ودام فيه مرضاة لله الحياة قصيرة تقربوا لله فوالله السعادة كل السعاده في القرب من الله فهو الامان التام انتي اللي تنتظرين عريس كوني مع الله انتي اللي اتطلقتي كوني مع الله انتي اللي خانك زوجك وظربك وهانك كوني مع الله انتي اللي تطلبين الرزق كوني مع الله والله والله مالنا غير الله هو المنتقم المنتصر الشافي المعافي لاتياسي مهما ظاقت بك الدنيا دامك مع الله فلتذهب الدنيا بمن فيها ويكفي انك قويه بالله
اسفه جدا عالاطاله ولكنها تجربه عرضتها لكم علها تفيدكم في حياتكن وعلها تطيب جروح من قد اهلكتهم ظروف الحياة واصلي واسلم على نبينا محمد وعلى اله وصحبه وسلم
اميرة الوجد @amyr_alogd_1
عضوة جديدة
يلزم عليك تسجيل الدخول أولًا لكتابة تعليق.
رائعه جدا قصتك بس عورني راسي من الخط صغير والله يثبتك ياااارب اهم شي لاتنتكسين اختي التزمي وتعلقي بربك سبحانه والله يكشف ضرك يارب
الصفحة الأخيرة
اتمنى من الله ان يثبتك ويثبتني ويثبت كل عائده الى الله ويهدينا ويسترنا فوق الارض وتحت الارض ويوم العرض ويسدد خطانا للحق ولطاعته يارب