قصتي مع حملي المهدد بالاجهاض ولكن.....

راح اقولكم اليوم قصتي مع حملي المهدد بالاجهاض ..

الحمدالله حللت وطلعت حامل وفرحت وكملت شهرين ونزلت معاي افرازات دم وهنيه فقدت الامل انه حملي يستمر رحت على طول للمستشفى وصروني والحمدالله الجنين ينبض وصحته زينه ولكن تحت الكيس بحر من الدم وعطوني مثبتات والحمدالله على كل شي..رجعت البيت ارتحت ولكن فليل ونا رايحه عزكم الله للحمام واحس شي يصب شراات الماي لين ريولي تحت الا وهو دم احمر هنيه من الصدمه وقفت ولا تحركت ونا اشوف الدم يصب ويخيس ملابسي وسيده على طول للمستشفى وصروني الحمدالله الجنين مافيه شي ولكن مستغربين من هالدم قالولي الزمي الراحه ثم الراحه ثم الراحه..وتميت على هالحاله من الشهر الثاني لين الرابع من نزيف لين عيادات والحمدالله كل مره يصورون الجنين بخير ولكن الدم يزيد من تحته..بس يابنات كنت كله احلم احلام الدل انه فيني عين وكنت اشوف فالاحلام الحرمه اللي ترعاني..المهم فالشهر الرابع ونا كنت نايمه جاني ألم ومن شدة الالم انتفضت لين ماتحركن اسناني قلت خلاص ولاده ونا اتألم اختي كانت تقولي هذي مش ولاده هذي العين باذن الله راحح تطلع لانيه في هذا الشهر كنت اقرا يوميا سورة البقره بنية الشفاء المهم رحت للمستشفى صوروني ولله الحمد الجنين بافضل الصحه والعافيه ولكن مازال الدوم موجود وبكميه وعزكم الله سوولي فحص من تحت عشان يشوفون عنق الرحم اذا امبطل ولكن بفضل الله كان مسكر وخذوا مني عينه اذا في التهاب ورجعت البيت واستودعت جنيني وحملي..والله يابنات اذا تحركت يمين ولا يسار الدم يطلع وبعد يومين قالولي فيني التهاب وعطوني حبوب ولاكن مافي فايده الالتهاب ماراح المهم فالشهر الخامس رحت عياده خاصه وخبرتها عن حالتي وعن احلامي قالتلي راح اعطيج ابر تثبيت وتحاميل تثبيت وقالتلي ابد لاتتحركين بس للحمام عزكم الله على الاقل يوصل لين السابع لانه عندج عنق الرحم من الداخل قصر ومن الخارج طويل انا هنيه استغربت قلتلها دكتوره انا حملت ثلاث مراات ولله الحمد لانزيف ولاشي واولد فالتاسع الدكتوره هنيه سكتت قالت لو تشوفين عنق الرحم عندج كأنه قطوه دخلت داخل ولعبت بأظافرها على العنق وقالت انتي صارلج نفس الزلزال فالرحم بس الله حفظ الجنين..المهم يابنات لزمت قراءة سورة البقره يوميا والصدقه والدعاء ..فالشهر السادس رحت للدكتوره نفسها صورت قالت ما شاء الله الحال تغير 70 بالميه شو سويتي قلتلها بفضل الله قالتي الالتهاب اللي عندج مايضرج بس هالبكتريا تضرب الكيس تبا تفتحه قلتلها هذي مش بكتريا هذي عين ولكن بقدرة الله راح تروح ..لانه يابنات يعطوني حبوب تحاميل للألتهاب ولكن ماشي فايده..في نص الشهر السادس حلمت الحرمه اللي ماكلتني وهي تقول فالحلم اني انا تعبت والسبب هيه فلازم تلبس من ملابسي وكان لون الجلابيه اصفر المهم قمت من النوم وخبرت امي قالت خلاص راح اكلمها وخليها تتوضا المهم تسبحت بالوضو مالها ونمت يوم نمت اشوف عمري جمييييله وناظر عمري فالمنظره واقول الحمدالله العين راحت وكنت لابسه الجلابيه الصفرا آآآآآآه العين حق يابنات..ومن بعده تم الدم يخف من اللون الاحمر لين البرتقالي لين الاصفر لين البني لين الاسود ولله الحمد استمرت هاي الحاله لين الشهر السابع وطبعا انا مستمره على ابر التثبيت والتحاميل وقراءة سورة البقره يوميا والدعاء والصدقه..وصلت السابع رحت عند دكتورتي قالت الحمدالله الدم راااح والجنين بافضل صحه وعنق الرحم مازال متماسك عندج ياربي لك الحمد والشكر..دخلت الثامن والدكتوره خايفه اولد فيه ودخلت التاسع وماطعت اولد هههههههههههههه قالتلي الدكتوره العنق عندج قوي يمكن عمليه من كثر ماخذتي ابر تثبيت وتحاميل ..دعيت ربي انه يسهل علي المهم قبل موعد ولادتي ب 5 ايام جاني الم وتحملته بعدين زاااد ورحت المستشفى وقالولي لسسسه الوقت مطول على ولادتج ولاكن رحمة الله وسعت كل شي ماكملت ساعه وولدت بأحلى ولد وكانت اسهل ولاده ياربي لك الحمد والشكر.. الحين ولدي عمره ثلاث سنوات وقاعد يلعب بالكريم على ريولي ونا ماتحمل ريحة الكريم لنيه حامل ادعولي انه يثبت حملي وافرح فيه يارب..


كتبت هالقصه لانه مافي شي أسمه يأس وفقد أمل فالحياه والله يابنات طلع معاي الدم بجميع الوانه وبكثره بشكل ماتتصورون من الشهر الثاني لين السابع..لدرجه قالولي عنق الرحم قصر عندج واحتمال تولدين فالسابع حتى الدكاتره يأست ولكن ربيه اكبر عنهم وارحم عنهم بفضل الله ومن ثم وقراءة القرآن والدعاء والصدقه والاستغفار جلبت الموازين الدم رااح والولاده من السابع صارت فالتاسع والولاده قالوا انه عمليه وصعبه ربيت طبيعي واقل عن نص ساعه واسهل ولاده ..قالولي الدم يخرب الجنين ويولد مريض ما شاء الله تبارك الله ولدي احلى واحد بين اخوانه مشى قبل وتكلم قبل وهذا بفضل الله..
بنااات عليكم بقراءة سورة البقره والدعاء والصدقه والاستغفار والله راح اتشوفون العجب..
صح نسيت اقولكم البكتريا اللي فيني الحمدالله راحت ولا كأنه صارلي شي..
اتمنى قصتي هذي تبعث لكل وحده فيكن الامل يارب العالمين ..
اللهم يالله ارزق كل محرووومه بالحمل السليم عاجلا غير اجل..وثبت يالله كل حامل حملها وارزقنا يالله بالاجنه السليمين المعافين الصالحين وارزقم يالله حسن الخلق والخلق لازيادة فيهم ولا نقصاان وارزقم يالله قوة فالدين والبدن وسعادة فالدنيا والاخره يارب العالمين..