قصتي مع دكتور سعودي محتال

مريت بقصة ما أقدر أنساها طول حياتي و الله يعوضني خير .. أنا متزوجة من تسع سنين و ما حملت بسبب عقم زوجي .. و رحت كل مكان و قالوا ما في أمل .. بس أنا دايماً عندي أمل .. كل ما أسمع عن دكتور أو علاج أجرب و أسير و أقول باخذ بكل الأسباب عشان ما أندم أو أعاتب نفسي .. و مرة فتح في دبي دكتور سعودي اسمه طاهر شاهين عيادة لعلاج العقم .. أخذ فيلا في الجميرا .. و سوى دعاية كبيرة .. و طبعاً المحرومين اللي مثلنا ما يصدقوا حد يقولهم أن في علاج .. و بالفعل سرت عنده و قال لزوجي إني أقدر أعالجك و بتنجبون إن شاء الله .. طبعاً ما صدقنا .. أول دكتور يقولنا في علاج .. و بالفعل زوجي المسكين كان يروح عنده و يدفع الآلاف حتى مروا شهرين .. و قال لازم أشوف الحرمة أعطيها علاج .. و بالفعل عطاني هرمونات ( و الله أعلم شو عطاني ) .. و بعدها بمدة اتأخرت على الدورة .. و سوى الفحص في العيادة ( فحص الدم )و قال إني حامل .. و قال إن الحمل ما يبين في البول .. و بالفعل صدقته و تتخيلوووووووووون الفرحة .. أخيراً بيكون عندي عيال مثل غيري .. اشتريت كتب الحمل و صرت أقرا .. خذت إجازة من الدوام .. ما كنت أتحرك من الشبرية .. و ريلي يدلعني آخر دلع .. و أمي و عمتي ما تعرفون كم فرحتهم كانت ..
اشتهر الدكتور في فترة قصيرة .. و الناس قاموا يسيرون العيادة من كل دول الخليج .. و اتسوت زحمة العيادة ... و الناس قاموا يدفعون و الحريم يحملن بعد شهرين إلى ستة من علاجهن أو أوزواجهم .. المهم بعد مرور شهرين على حملي ( الكااااااااااذب طبعاً ) نزل علي دم ، و سرت عند نفس الدكتور و قال لي لا تقلقين و يمكن ينزل الجنين بس الحمدلله أحين في أمل بتحملين مرة ثانية .. بعد فترة انفضح أمر ها الدكتور طلع يعطي الحريم هرمونات و ما تنزل الدورة إلا عقب كل شهرين و يوم تنزل الدورة يقول إجهاض .. و يوم اشتكوا الناس طلع أن الدكتور المذكور ممنوع من مزاولة المهنة في السعودية و هو مطرود منها ... و دائرة الصحة في دبي ما كشفه إلا بعد كذب على واااااايد من المحرومين أمثالنا.. و عقب ما نهب أموال الناس ..
آسفة طولت عليكم .. بس اتعلمت درس إني ما أروح عند أي دكتور .. ما تتخيلون كم اتعذبت في الفترة هذي .. كم تألمت لأني كنت أتصرف مثل الحوامل لا بعد اشتريت من الفرحة لبس الحوامل للشهور الأخيرة .. المهم خواتي طلعت من هذي التجربة بأمل أكبر بقدرة الله .. و زاد إيماني و توكلي عليه سبحانه .. و عرفت إن ماحد بيده العلاج إلا الله سبحانه و تعالى .. و سامحوني إني ضايقتكم بقصتي ..