~~ قصتي مع زميلتي ؟!! وهل تصرفي خطأ ؟ احساس الذنب يؤلمني ~~

السلام عليكم



بكتب لي قصتي اللي صارت لي مع زميلاتي في العمل






انا تعاملي مع الجميع ممتاز اتحمل الكل واحاول ما اجرح احد او اغلط عليه

انا اقدم وحده فيهم في العمل لما جاو دربتهم ( هم ثلاثة ) وقاسمتهم مكتبي وفضيت دروجي وعطيتهم دروجي يستخدمونها ومابخلت على اي وحده في اي سؤال تسألة كنت اسوي هالشي عشان اكسبهم كلهم ونعيش مع بعض بسعادة


المهم

في وحده من البنات ملاحظة عليها انها دايما تدقق فيني هي الظاهر معها ابتلاء النظر الى ما في يد الاخرين

هي متزوجه والله رازقها وساتر عليها وعندها اطفال والحمدلله يعني مو ناقصها شي

لكن دايما تقارن وتقول ياحظك ماتزوجتي ماتسهرين ما تتعبين ما عندك عيال يغثونك وانا اقول الحمدلله على كل حال

تدقق في كل شي اسويه وتقلدني في اشياء كثيرة تسرق افكاري وجهدي وتنسبه لنفسها وانا اسكت اقول معليه واستحمل الاحظ دايما تبي تهمشني وتعتبرني مثل المنافسه لها مع اني ما انظر لها نظره منافسة واقول كل ياخذ رزقه ونصيبه لكن هي ماقدرت تطلع نفسها من هالنظرة لي

ودائمة التشكي كل يوم جايتني تشتكي من شي ( تحتاط تخاف احد ينظلها على صحتها ) كل يوم والله بدون مبالغه يوم ظهرها يوم راسها يوم بطنها يوم عينها يوم رجولها يوم صدرها يوم بشرتها وانا اقول الله يشفيك وانا عارفه انها تبالغ لانها ما تتشكى الا يوم تشوفني (وانا الله العالم بي مافي عضو بجسمي سليم ولا عمري تشكيت نفسها )

المهم سبق ولاحظت عليها انها تنظل من اكثر من موقف صار لي

احد المواقف كنت مستانسه ان اليوم الاربعاء وبكرة خميس اجازة وانا من طبعي كل اسبوع اكون مستانسة اخر يوم في الاسبوع والاحظها تناظرني نظرات غريبة وتتبسم لي

عقبها صرت الاحظ ان مايمر علي اجازة نهاية الاسبوع الا وانا منسدحة طووول الاجازة وماسكني صداع مايتركني ولا اقدر اسوي شي صرت اكره شي اسمه اجازة وعلمتها ردت لي رد غريب !!

قالت لي يمكن عين ؟!!!!!!!!

استغربت وقلت عين ؟ من من بتجيني العين؟ وليه بس في الاجازة وخاصة اني رحت لمستشفيات وسألت دكاترة وماعرفوا اش السبب!!

قلت في نفسي يمكن عين بس من بينظلني وخاصة اني انسانه ما اطلع من بيتي ولا احد يشوفني ماغير اهلي اللي عايشين معي في البيت وزميلاتي في العمل فقط ماعندي اي احتكاك بالعالم الخارجي

ومع ذلك خذت بالاسباب وقلت لو عين ماراح تكون الا منها هي ومدري سبحان الله اللي الهمني اتذكر نظراتها لي لما تشوفني مبسوطة ان بكرة ويك اند

واخذت كوب الماء اللي تشرب منه وشربت من وراها وسبحان الله كان اول ويك اند يمر علي بدون صداع وبدون ترقيد على السرير فتأكدت فعلا انها عينها

موقف ثاني صار لي لما فصلت عباية جديدة وعجبتها اول ماطلعت من مكتبها طحت وانشقت العباية وقب جسمي حساسية لين حذفت العباية ولا عاد لبستها

موقف ثالث ورابع وخامس بعضها مواقف صغيرة اي شي حلو عندي ويعجبها على طول يخرب او يصير فيه شي


انا وحده ما احصن نفسي ولا اقرا على نفسي ومحد يشوفني ولا اطلع الا من البيت للعمل وماعندي بالعمل الا هي وبنات ثانيات بس مايدققون فيني نفسها

الحين ابيكم تحكمون على الموقف الاخير واللي عذبني كثيرررررررر واحكموا هل انا ظلمتها وهل تصرفي غلط ولا معاي حق


هي دايما تدقق على أكلي اول ماتشوفني طلعت شي باكله على طول تقول بسك اكل لاتاكلين كافي ( لانها تسوي ريجيم وانا نحيفة وانا مضطره اكل لان جسمي يفشل والكل يعلق على نحافتي ) صرت اظطر ما اكل قدامها ووزني ينزل وخاصة اني في البيت اكون مشغولة ويادوب اكل وجبة غداء وعشاء ودكتورتي حقت التغذية قالت لي لازم اكل وجبات خفيفة عشان يزيد وزني

لكن ما اعرف وش اسوي بسببها ماتخليني اتهنى بلقمة الا وتعلق

واكتشفت انها تعد وراي كم كوب اشرب في اليوم

كنت اشرب ماء ونسكافية في اليوم ولو طلبت شي ثاني انتبهت لي وقالت بسك شرب رغم انه الكل يشرب والكل ياكل بس عينها علي انا

في احد المرات جاتني ووقفت عن راسي وقال لي انتي يا فلانه اليوم شربتي كوب ماء وشربتي نسكافية وبيالة شاهي ولا شفتك تروحين الحمام !!!! قلت لها انا امسك نفسي لاني اتكاسل اروح للحمام قالت لي لا لا بس انتي عندك قدرة عجيبة تقدرين تمسكين نفسك انا مقدر امسك نفسي مثلك وياكثر ماتشربين وماتروحين الحمام


واااااااااااه من عقب هالحوار اللي صار وانا من مستشفى لمستشفى صارت عندي حالة غريبة وهي اني لازم اروح الحمام كل خمس دقايق معاناه وعذاب تركت شغلي وعملي وتغيبت عن الدوام شهور وانا بين المستشفيات لا نومي نوم ولا حياتي حياة

احراج وتعب والنفسية دمار حتى النوم ما اقدر انام كل شوي رايحة جاية على الحمام وماينزل شي بس مجرد احساس قوي اني ابي اروح الحمام ولما ينزل مني شي ينزل مثل النار ألم فظيع

والدكاترة ماعرفوا سبب مرضي لفيت المستشفيات وصرفت فلوس وصرت محبوسة بالبيت لاني ما اقدر ابعد عن الحمام

صليت ودعيت واستخرت واحد المرات قبل ما انام قلت يارب دلني على سبب مرضي يارب علمني كيف جاني المرض ونمت وحلمت فيها واللي حلمته كان وااااااااااضح وضوح الشمس طلعت لي هي في الحلم وكانت تتكلم عن شي مثل الحسد او العين ما اذكر بالضبط

شكيت شوي فيها عقب قلت لا ما ابي اظلمها

ومع المعاناة دعيت ربي مرة ثانية نفس الدعاء وارجع احلم فيها مرة ثانية

بعدين قلت لازم اسأل شيوخ

وحكيت لهم كل اللي صار ونصحوني اخذ من أثرها

او اخليها تتوضأ لي

رحت الدوام وانا ميته من التعب بس عشان اخذ من اثرها

وخذت من اثرها وشربت من كوبها لكن مافاد

كلمت الشيخ وقلت له قال يمكن العين قوية ومو شرط تروح من اول مرة ارجعي اخذي منها

ورجعت خذت منها

ولا فاد

جربت الرقية وحسيت باعراض مثل الحرارة الشديدة والرعشة في جسمي قلت للشيخ قال هذي عين اكيد مافيها شك

ولازم تاخذين من وضوئها

هنا ماعرفت وش اسوي وشلون اطلب منها هالطلب وايش احسن طريقة اني ما احرجها كنت خايفة على مشاعرها ومابي اخسرها

وخاصة اني بعد ماخذت من اثرها وماطبت خلاص شلتها من راسي قلت لو كان صدق عينها ( رغم كل الدلالات ) الا اني اكيد بطيب عقب اثرها ودامني ماطبت معناها مو عينها

طول الوقت ابي ابعد انها تكون هي سبب معاناتي

فكرت وفكرت

قلت مافي الا اعلم وحده من البنات اللي معنا واقول لها كل شي وكلام الشيخ وكل شي

قالت لي البنت خلاص اخذي من وضوء البنات كلهم عشان محد يزعل وانا طبعا مابينت لاحد اني اشك في وحده منهم لا قلت لهم انا مريضة واعاني من سنة كاملة بين المستشفيات والشيوخ قالوا لي اخذي وضوء من كل الناس اللي تعرفينهم ( عشان ما احرج احد)

وطلبت منهم فعلا اني اخذ وضوء منهم البعض رفض الوضوء وبس دخلوا اصبع واحد وانا وافقت لاني اصلا مابي وضوئهم انا ابي وضوء الشخصه اللي اشك فيها بس هذي مجرد تمثيلية عشان اوصل لها

لكن المفاجأة ان كل البنات وافقوا وقالوا دام هالموضوع اخر حل لمعاناتك احنا ماعندنا مانع

لكن يوم جيت عند الشخصة المستهدفه رفضت وبشدة وعصبت وصارخت وقالت لا انا ما انظل وانا ما احسد ووالله تندمت وانا توقعت انها بتقدر موقفي بتسعى حتى لو بهذا الشيء البسيط تخيلو موقفي كيف كان


قلبي انكسر وحسيت باحراج شديد

انا جايتها مريضة وماطلبت منها شي غير مجرد وضوء لا طلبت تتبرع لي بعضو من جسمها ولا طلبت فلوس ولا طلبت شي قلت لها كل البنات توضو محد اعترض وانا موقفي صعب انا جربت كل الحلول جربت كل شي كل الادوية جسمي تسمم من كثر الادوية والنوم ماعاد ذقت طعمه

قدري موقفي الله لا يحطك فيه وانا ما اشك فيك ولا اشك بأي شخص لكن هي محاولة ياتصيب يا تخيب

حسيت انها خايفة خايفة اني اطيب وبعدين ازعل منها ( كان تفكيرها بنفسها فقط )

مع اني والله ماكنت بزعل من اي احد

اصلا حتى اهلي قالوا بنتوضأ لك رغم اني ادري ان اهلي ماعمرهم بينظلوني على شي

لكن موقفي الصعب والافكار اللي براسي وكلام الشيخ والاحداث اللي صارت خلتني بين خيارين صعبين يا اني اعيش بمعاناتي طول العمر يا اني اواجهها واطلب هالطلب الصعب

فقررت اختار الطلب الصعب

وقعدت ابكي لها واترجاها واذكرها ان هذا الفعل عمله الرسول عليه افضل الصلاة والسلام

ومحد من الصحابة رفض

ليه انتي ترفضين وانا ما سويت شي غير السنة وتطبيق السنة

قالت لي اقري القران والرقية وخلاص مو لازم تاخذين وضوئي

جرحتني وكسرت قلبي عمري ما اذيتها في شي عمري مازعلتها عمري ماقصرت معها في اي شي


سأكمل لاحقا