لولو2009 @lolo2009_2

محررة

قصتي مع زوجي........معقده

صباح الخير ياحبيباتي
باخــــــــتصــار
مشكلتي مع زوجي ان فيه وحد تلعب عليه وتعرف كل شي عنه وعني ويقول لي انها كانت بنت جيرانهم وانه تحبه وانه كل ماغير جواله ترجع وتلاقي رقمه المهم انا مادريت عنه الا قبل سبع شهور فقط واكتشفت ان كل اهله يدرون عنها وانها تحبه وتعشقه وكثير تنخطب وترفض لانها تبيه هو و دريت من اهله انه كم مره يقول له بالعربي انا احب زوجتي وانسيني بس ترجع وتدق وترسل وكم مره تحاول تتحرش فيه ومره ضربها ومره ثانيه كسر جوالها وترجع ولا كانه سوى لها شي المشكله هذي صارت له قبل خمس سنوات او اكثر وانا ياغافلين لكم الله وبحكم كثرت تنقلاتنا وعدم استقراري عنده وكذا مادريت الا قبل سبع اشهر والبنت ماملت ولا ياست وتقريبا يوميا ترسل رسالتين او اكثر انا اول مادريت انصدمت وانهارت وكرهت الدنيا وبدا الشيطان يلعب بي وبدات اشك فيه واقول لو انه بالبدايه ماعطاها وجه كان البنت ماتعلقت فيه المهم تعوذت من الشيطان وطلبت منه انه يغير جواله وانه اذا ارسلت له يوريني الرساله عشان اثق فيه وكذاولا يصدمني ثانيه
قال اوك وخلاص وراح اغير جوالي واذا ارسلت او شي راح اوريك الرسايل انا بديت مافتش وراه لاني قلت ابثق بكلامه ومره اخذت جواله ابكلم وانا ماسكه الجوال جت رساله وفتحته اثرها من البنت انصدمت ووديت له الجوال وقرا الرساله وبدا وجهه يتلون قلت له دايم ترسل لك
قال ايه بس انا ماقرا رسايلها على طول امسحها
قلت له واتفاقنا
قال ادري انك راح تتضايقين اذا قريتي رسايلها عشان كذا انا ابي ارتاح واريحك ماحد منا يقرا الرسايل
انقهرت عليه ومشيتها ومره ثانيه وانا ماسكه الجوال جات رساله وقريتها اثرها تقول له ابعطيك فرصه اخيره اذا انت تبيني علمني ولا خلني اعيش حياتي
طلبت انه يرد لها ويقول لها انا مابيك ولا اافكر فيك بس انه رفض وسكتني بانه اذا رد عليها عطاها وجه واهتمام وهي ماتستاهل مسح الرساله قدامي وطلع
انا الى هنا مثل الاطرش بالزفه ماني فاهمه الموضوع وفيه تساؤلات كثيره تدور براسي ليش البنت متعلقه فيه وهو ليش مايحط لها حد وكيف يغير جواله وتطلع رقمه بكل بساطه وكيف عرفتني وعرفت كم عنده اولاد بس مالاقيت اجابه
المهم بيوم من الايام كانت عندي اختي وقلت له انها راح تتاخر عندي قال اجل انا ابنام عند خويي انا رفضت وقلت له ماعليك منها تعال نم بالبيت قال خلاص اشوف
طلع وتاخر دقيت عليه ابشوف وينه مايرد وبعدين رد وقال لي لاتدقين مالك شغل فيني وسكر السماعه وقفل جواله ادق وادق وادق والجوال مغلق انقهرت عليه وقلت ابدق على خويه اكيد انه بجنبه وهو اللي بيرد علي دقيت على خويه اثر ه نايم رد علي سلمت وسالته عن زوجي قال انه مو عندي والله العظيم يابنات يوم قال انه مو عندي حسيت ان جسمي كله ينمل عجزت استوعب المشكله مافيه قدامي اي تفسير الا انه يكون عندها لانه مايعرف احد واهلي واهله مو بنفس منطقتنا انجنيت وبديت ادق عليه وجواله مغلق
انا كنت محتفظه برقمها طلعته ودقيت عليها عطتني مشغول قلت يمكن نايمه بس مستحيل تكون نايمه لانها دايما بنفس هالوقت ترسل ولا تدق على جواله كانت الساعه 2بالليل ادق وادق مره تعطيني مشغول وبعدين ماترد واخيرا قفلت جوالها
والله العظيم يابنات اني انهرت وبديت اصيح ودقيت على اهلي وخواتي كانوا ماشاء الله مجتمعين وفيه كل خواتي المهم ياحول بديت اكلمهم واصرخ وانهرت وقعدوا يصيحون معي ويسمون علي وامي تقرا علي قالت لي امي تبي تهديني اكيد ان فيه شي او صاير عليه حادث الله يستر
تخيلو وانا اقول يارب انه صاير عليه حادث ولا يكون عندها
طلبت مني امي اني اقوم اتوضاء واتسنن وادعي ربي قمت وقاموا اهلي معي وبديت ادعي وامي وخواتي يدعون ان الله يثبتني ويربط على عقلي وقلبي
المهم يابنات قعدت طول الليل بسجادتي والرجل مافيه عنه خبر واذن الفجر وهو ماجاء واهلي ماسكرو السماعه كانو الله يجزاهم خير معي على طول وكل وحده من خواتي تكلمني شوي وتحاول تنسيني والله ياخواتي لولا الله ثم اهلي كان يمكن هذاك اليوم جاني شي
تخيلوا يوم صارت الساعه عشر الصبح دقيت رن جواله ورد توه قايم من النوم
قلت له وينك
قال عند خويي
قلت طيب تعال الحين ابيك
قال خير وش السالفه
قلت له اذا جيت تدري وش السالفه
قالي وبكل برود لا ابروح للصناعيه واذا خلصت شغلي اجي
انا هنا بديت اطلع عن طوري بديت اهوش والج ومافيه كلمه وسخه ماقلتها له وسكر السماعه بوجهي ماخذ عشر دقايق الا وهو جاي والله يابنات يوم دخل اني انصدمت من شكله متضبط وكاشخ وريحه العطر تشميه عن بعد كيلو والشماغ موديه للكواي ومن زود الكوي تقل حاط براسه حنا مايقوى يلتفت دخل وانا معصبه ومنهاره واسب واهاوش والج وهو يضحك واقسم بالله يابنات انه يغني بغيت اعطيه كف بس الحمدلله مسكت نفسي دارت بيننا هوشه ماطلعنا منها بشي طلع مره ثانيه من البيت وبعدين رجع وقعد بالمجلس ولا قال لي ولا كلمه قعدت يومين ماكل ولا اشرب وبس اصيح جاء لمي اليوم الثالث قال بوديك لاهلك بس عشان تغيرين جو ويوم الخميس اجي اخذك قمت ولبست ومشينا لاهلي وطول الطريق وهو يحاول يسولف
ويلطف الجو بس انا ماعطيته وجه كنت انتظر انه يعتذر بس ولا على باله وصلنا لاهلي بعد مشوار 700كيلو ونزلني وباس على راسي وطلع ولا دق الابعدها بيومين
الحين يابنات صار له شهر ونص من نزلني عند اهلي اول مانزلني جلس تقريبا كل ثلاث ايام يدق مره وحده ويسكر وانا مارد عليه لانه جرحني ونفسيتي كانت تعبانه بالحيل وكنت
ابغى اتاكد اذا هو يبيني ولا لا لانه بالفتره الاخيره كان يعاملني بقسوه وحسيت انه بس وده
يطفشني وباسرع وقت بعد مادق تقريبا ثلاث او اربع مرات وانا مارديت ارسل لي رساله
انه اذا تبين ارسل شناطك عطيني خبر والله يابنات اني انهرت يوم قريت الرساله بهالبساطه
نسى كل اللي سويته على شانه والله العظيم يابنات اني ضاع وجهي من كثر ماخذ من اهلي
واعطيه واساعده مع العلم انه موظف بس مادري وين يودي الفلوس تخيلوا يابنات حتى اجار البيت اخر دفعه انا اللي دافعتها لانه كان كالعاده يمر بازمه ماليه المهم ياخواتي بعد مارسل الرساله مارديت عليه ولا اتصل ولا شي حتى مادق يسال على عياله
الحين يابنات ابي وحده تحلل لي اللي صار وهل هو على علاقه بهالبنت ولا لا وهل هو عندها هذاك اليوم ولا لا مع العلم انه كلمني خويه وقال لي انه كان عندي وحلف لي بس مستحيل اصدقه لاني اولا ماثق فيه وادري انه كذاب ثانيا من نبره صوته هذاك اليوم مبين انه منصدم من مكالمتي وانه نايم ولا عنده احد
تكفــــــــــــــــــــــون ريحوني وعلموني ايش اسوي معاه وهو مخطئ ولا اعتذر والحين مطنشني.....
لاتجي وحده وتقول انتي دقي عليه مستحيل اسويها والله لو على رقبتي ماسويتها لان الخطاء راكبه من راسه لي رجليه
سمعت ان اهله كلهم بصفي وانهم زعلانين عليه وان ابوه هزاءه بس هو مادري وش رده فعله ولا سمـــــعت صوته من يوم نزلني عند اهلي
اسفــــــــه عالاطاله
ريحوني الله يريحكم
واللي ماتبي ترد الله يوفقها ترفع الموضوع بدعوه

يابنات انا كتبت لكم القصه بالتفصيل الممل تكفــــــــون عشان ابغى وحده تعطيني من
وقتها خمس دقايق وتحلل لي اللي صار لاني والله عجزت افكر واركز احس عقلي متوقف
عن التفكير وفيه كثير تساؤلات براسي ماني لاقيه لها اجابــــه الله يوفق اللي تساعدني

216

19K

يلزم عليك تسجيل الدخول أولًا لكتابة تعليق.

تسجيل دخول

مدام الباشا • 14 سنة

العلم عند الله ،، الله يهديه ويسخره لك ،،،

من جابها من بحرها؟ • 14 سنة

قلبي معك بس ما اقدر اقولك شي هذا امر راجع لك انتي اعرف بزوجك
بس لو كنت انا حسب وضعي بمكانك بصبر الى ان يكلمني واسأليه وين كان ذيك الليله
والبنت مادام اهل زوجك يعرفونها روحي انتي وام زوجك وامك لاهلها والا لها وتفاهمي معها وعرفيها حدودها
ويمكن منها تعرفين الحقيقة وانصحك حافظي على زوجك وانتي اولى فيه من غيرك

@الحمدلله@ • 14 سنة

والله يااختي العلم عند الله ..محد يعلم الغيب ..

ياعالم هو عندها أو عند غيرها ..أو حتى عند خوية ..!

بس تصرفك كان إندفاعي ..وزوجك تصرفاته غير مسؤله ..!

اللي عليك الآن تركزين في المشكلة نفسها ..,في تصرف زوجك ..موبس هل كان عند البنت أو لأ ..!!

لأن اللي خلق البنت خلق ملايين غيرها ..!

والرجال إذا براسه لكاعه ..وناوي على زواج ماتحيره ..!

لكن يحق لك الآن تحاسبيه على تطنيشة لك ..وتجاهله لأتصالاتك ..وتصرفه الأخرق ..!!

هذي مشكلتك الأساسية ..لاتربطين بين رسايل البنت ..وبين غيابه ..على الأقل حاليآ ..علشان تحلين مشكلتك صح ..!

غلطتك أنك جمعتي الأولي والتالي وفجرتيهم مره وحده ..!!

جوريه منسيه • 14 سنة

حسبي الله على البنات اللي زي كذا

ماتخاف الله تهدم بيت زوج وزوجته

ادعي ربك وانا اختك .....اللهم من ارادني انا او زوجي بسوء فاشغله بنفسه ورد كيده الى نحره واجعل تدبيره تدميره يااااااااااااارب

حسيت فيك والله

واللي ماتخاف الله بيجي يوم يصير لها ما صار لك الدنيا دوااااااااااااره ولو بعد حييييييييييين

لحظة ودااع • 14 سنة

الله يعينك ويساعدك ويسخرة لك يااقلبي لاتخربين بيتك وماتدرين يمكن بعد الظن اثم ثاااكدي اووول