قصتي مع زوجي وش رايكم

الأسرة والمجتمع

السلام عليكم

ابدخل ف السالفه علطول وعطوني رايكم انا مخطيه والا لا وش السواة مع هالرجال

انا اغلب الايام اسهر بالليل طبعا بعد ماينام ولدي وزوجي وماعندي غير هالنت يااما مسنجر مع صديقتي او فعالم حواء

وانام2ونص او 3 الاربع طبعا مايبقى شي عالاذان بس اتسدح ف فراشي عشان ابو الشباب مايقول شي اذا شافني

سهرانه (مع ان ماله مصلحه ف الهواش) ثم اصلي وانام واقوم قبل مايأذن الظهر بنص ساعه تقريبا واتجهز لانه وقت

جيته للبيت واستقبله عاد هو ونفسيته ياانه يسفهني والا احيانا ان ذكر نفسه وصار عنده ذوق عطاني بوسه

السالفه انه امس كنت سهرانه مع صديقتي بتسويلي ايميل جديد لان ايميلي الاول فيه مشكله واذن الفجر وهي ماخلصت قام زوجي يأذن(مؤذن هو) وبعد مارجع من الاذان وكان بيفصل الكمبيوتر قلت لا اتركه لسى ماانتهيت بس

منسدحه ع السرير وسولفنا شوي وضحكنا ورجع ينااام
انا رجعت للكمبيوتر بشوف وش صار على صديقتي شوي يوم قرب وقت الاقامه قام بيروح للمسجد قال للحين جالسه
من اللي جالس لك الى هالوقت
قلت صديقتي فلانه
المهم طلع من الغرفه وهو نازل بيطلع طففى زوجي المودم
انا فجأه انقطع الاتصال دريت انه منه

رجع من الصلاة مايكلمني
الساعه9الا ربع الصبح كلمني وقال تجهزوا لان ولدي كان عنده تطعيمه
وهو قبل ماينام بالليل قلت بكره عندنا موعد للولد قال نروح بعد الظهر لانه مايحب مواعيد الصباح
انا دريت انه يبغى يصحيني بدري عشان اضطر انام بدري بالليل <<<شفتوا التفكير كأني بزر عنده
بعد ماجينا من المستوصف قال جهزي لي فطور خفييف ويعيدها خفييف وكانت الساعه 11
هو عادة اذا افطر 11 مايحرص ع الغداء واحيانا يقول لاتصلحين غداء ولا يهتم ابددد

بس اليوم تخيلوا وهو يفطر يسألني فيه دجاج قلت ايه
ويوم خلص فطور وجا يطلع قال صلحي سلييييق
قلت طيب

وكل هالوقت ترى ماكلمني غير هالكلمتين ع باله زعلاااان

بعد الظهر صلى وجا البيت وتروش ورجع للدوام بدون اي كللمه

وش راايكم

من اللي مفروض يزعل
وهل زعله ف مكانه

انا اللي اعرفه ان الرجال يزعلون اذا حريمهم كثيرات نوم وماتهتم فيه اذاجا من دوامه ومايلاقي غداه

وانا لعكس
والله اني اتجهز له قبل مايجي وابتسامه ولا طلبات ولا حنه
قبل ماكان كذا بس بعد ماولدت انقلب الرجال يعني له سنه تقريبا :44:
تكفون ردوا علي وريحوا بالي الله يسعددكم

طيب انا مو من حقي ازعل بعد لانه كل ماجلس معه يكون فاح النت بجواله لدرجة انه حتى ع السرير قبل ماننام
وانا اللاب توب معي بغرفتي
60
6K

يلزم عليك تسجيل الدخول أولًا لكتابة تعليق.

تسجيل دخول

febbie
febbie
طيب غيري نظامك بدل ماتسهرين الليل خلك على النت بالنهار ومن اللي اشوفه اغلب الرجال مايطيقون يشوفون حريمهم يسهرون او يطولون على النت
ماابي احفظ
ماابي احفظ
زوجك يبغى مصلحتك لان السهر مو زين والبركه في الصبح اصلا كيف يمديك وانت تقومين الظهر على شغل البيت و نظافته وولدك ونفسك اكيد فيه تقصير،وماسوى شي غلط وتأديبه حلو مقومك الصبح بطريفه جدا لائقه وهو قوام عليك وطيعيه وارضيه ضيولاتكبرين السالفة
شمالية و افتخر
لا حبيبتي الرجال يزعل و يتضايق من طول جلوس زوجته على الكمبيوتر

كلهم كذا

أولا غيرة لان الكمبيوتر فيه نوع من التفاعل مع الغير حتى لو صديقة

و ثانيا حب سيطرة طبيعية من الرجل

تصرف زوجك طبيعي جدا

لا تزعلين منه

و من الآن لا يشوفك

لا يشوفك

قاعدة قدام اللاب توب

اقعدي و هو برة و لا نايم
(الجمانه)
(الجمانه)
ماعندي شي غيير الله يعينك

ورفع لعيونك ياقلبي
دانه سعوديه
دانه سعوديه
كيف تقومين قبل الظهر بنص ساعه وزوجك يجي الظهر متى يمداك تسوين الغداء

وزوجك ما شاء الله يحبك ويبغى مصلحتك وترا فيه كثير من الرجال يحب زوجته تنام معاه وتصحى معاه

وهذا دليل اهتمام ما شاء الله

السهر دمار للصحه وللجمال حتى يكبر الوحده في السن

انا مع زوجك وما الومه هو يزعل ويعتب كله عشانك وعشان حياتكم تصير مرتبه

والبركه والخير في صحية الصباح


انتي اليوم جهزي نفسك ونامي معاه بدري واصحي بدري يا زين الصبح روووووعه

يمداك تنظفين وتجلسين على النت وتطبخين وتجهزين نفسك ولسه ما اذن الظهر

سبحان الله بركه