قصتي مع زوجي و الغربه

آخواتي العزيزات
من زمان و أنا نفسي أكتب و أفضفض ما في داخلي حتى لو ما في حل في الوقت الحالي بس بخفف علي إنكم تسمعوني من بعد الله عز و جل.
ياريت تسامحوني إذإ أفكاري مو مرتبه عم بحاول أكتب كل شي بتذكروا.
قصتي بدت من بعد ما تزوجت من 15 سنه. زوجي قريب لي لكن طول عمره مغترب في أمريكا و نادر ماكان يزور البلاد مع إنه أهله كلهم هناك. زوجي كان طيب وحنون لكنه يكره شيئ إسمه زيارات و علاقات إجتماعيه أو عائليه بتخيل إنه كل الناس بدهم منه مصلحه مع إنه أنا إجتماعيه بطبعي و بحب إنه يكون في بينا وبين الناس علاقات و زيارات بس مستحيل كل ما إتعرفنا على عائله بطلع فيها ألف عيب فبحكيلو إنه إذا مو عاجبك الناس يلي من طرفي عرفنا على ناس يكونو على هواك و على عيني و راسي لإنه عنجد خايفه إنه أولادي يطلعو مو إجتماعيين حتى إنه إبني الكبير يلي عمره 14 سنه بدى يلاحظ إنه ليه مافي ناس بتزورنا و نحنا ما بنزور حا مثل أصحابه العرب عشان هيك بحاول أشاركهم بأكثر من نشاط في الصيف لحتى ما يحسو بها النقص.
من يوم ماتزوجت زوجي مانزل على البلاد وأنا خلال هاي الفتره نزلت ثلات مرات فقط. أول مره بعد ثلات سنيين من زواجنا و كان صار عندي طفليين أهلي ما شافوني ولا شافو أولادي فيها و المره الثانيه بعد سبع سنيين و الثالته من سنتين. ومع كل هدا صابره و متحمله مع إنه إمكانياتنا الماليه جدا مريحه و الخير موجود و الحمد لله.
المهم أنا نزلاتي الأخيره كانت من حر مالي و هو ما ساعد فيها لإنه ببساطه صارلو عاطل عن العمل خمس سنين و ما بدور على شغل و لاحتى مصلحه أو رزقه نستفيد منها يمكن لإنه مركن إنه أنا بشتغل و بصرف على البيت لإنه صارلو خمس سنين ما دخل دخل على البيت و لو طلع شي بسيط بيحوطو في حسابه مع العلم إنه بياخد كل معاشي وبدو يضل هو ياخده و يصرف على البيت مادامو عايش حتا لو إنه هو اللي مو مشتغل وتعبان فيهم "شايفيين لا وين وصل ظلمه"
ما تحكولي بطلي شغل و ضلك في البيت و هو ملزوم يصرف صدقوني حاولت و قعدت سبع شهور في البيت بس طفرت و زهقت أقل مافيها بشوف عالم و بتسلى معهم و كمان بدي أكمل دراستي وهذا المجال الوحيد إلي لإنه مستحيل يدفعلي أقساط الجامعه.
بتذكر إنه في مره كنت بشتغل مع شركه و صار في نقص في الموظفيين و طلبو مني أداوم لمدة سبع شهور دوام ليلي فرفضت وتركتهم فعصب و زعل ليه تركتهم فبحكيلو عادي عندك أداوم شيفت ليلي و أطلع في نصف الليل فحكى إنه مو شايف مشكله في الموضوع و إني خسرت البيت دخل و كل هدا و هو لسه عاطل عن العمل.
أنا في البيت مع كل هدا الضغط بحاول على قد ما بقدر إنه ما أقصر فيه و لا في البيت.

لكن جد تعبت وأغلب الأحيان بنام و دمعتي على خدي و مرات بدعي عليه إنو ربنا ياخده و يريحني منه من قلب محروق " إستغفر الله العظيم "
ومرات بطلب من ربنا يهديه
ياريت إذا فيكم تساعدوني و لو حتى بالدعاء بالهدايه لزوجي