بسم الله الرحمن الرحيم
في يوم 8\12\1430هـ
كان اسوء يوم يمر عليا في التاريخ
في بداية اليوم في الصباح فرحت بالجو وأتفائلنا خير وبعدين نزل المطر ودعينا كلنا ان ربي يشفي لنا جدي حبيبي
ويطول بعمره ويعدي ازمته على خير
وجدي في العناية المركزه في مستشفى خاص حسبي الله عليه ونعم الوكيل وعلى كل اللي يشتغلو فيه
نزل المطر وماتوقعناه مره كثير بصراحه لان كانت كميته مو كارثة المهم اتصلو علينا من المستشفى وقالولنا لازم نجي فورا المستشفى جدي في حاله حرجه
خرجو اخواتي وماما مع السواق بسرعه وانا خرجت مع اخويا بعدهم بربع ساعه تقريبا
طبعا ماما تبغى توصل المستشفى باي طريقة مااهتمت بالسيل ولا بالسياره وكانت تدعي وتدعي ان ربي يوصلها لجدي بسرعه والحمدلله رب العالمين على كرمه ماما واخواتي وصلو بالسلامه المستشفى صح السياره انعدمت وسارت ماتسوى شيء بس الحمدلله على سلامتهم
نجي ليا انا واخويا خرجنا بعدهم والسيل كان في طريقنا خلاص اتشهدنا وقلنا حنموت حنموت والحمدلله كنا قريبين من البيت تركنا السياره في الشارع وخرجنا نجري للبيت من الخوف وربي كان كريم معانا ونجانا
رجعنا البيت وقلبنا يحترق نبغى نروح لجدي على الاقل نودعه لو صار له شيء حياتنا كلها معاه وقعدنا نتذكر ايامه معانا وتضحياته والله كانت حالتنا تقطع القلب وربي
انا من زيادة البكا والخوف ان جدي يسير فيه شيء وانا مو موجودة معاه خرجت اجري في الشارع وقلت اموت ارحم من جدي يحتاجني وانا مو معاه واخويا يجري ورايا يمسكني والشغاله تبكي من منظري
المهم اتصل اخويا في واحد يقرب لنا من بعيد معاه سياره مره كبيره واول مره نطلب منه شيء
وقلناله تعال خذنا جدي محتاج دم ومحتاجنا معاه
ماقصر والله وجا وهنا كانت بداية تأنيب الضمير اللي عشناها انا واخويا وهو في الطريق لنا السيل كان مغطي نص سيارته وأتصل علينا قال لو ماجيت سامحوني
وانا خلاااااااااااااااااااااااااص جاني انهيار على جدي وعلى الرجال اللي حيموت بسببنا
والله حاله صعبه ومسكت سجادتي وأصلي وأصلي يمكن 100ركعه وادعي من قلبي ان ربي يشفي جدي وينجي الرجال اللي جاينا
وبعد 6ساعات قلق وتعب لدرجة حلقي نشف من الخوف اتصل علينا وقال انا قريب منكم والله ماقدرت اوصف حالتي فرحت وخفت وكل شيء وجانا بالسلامه وطلع رجال ماشاءالله معانا وقال لازم نروح جدكم محتاج دم بكميات كبيره تقريبا 8 اكياس لانه جاه نزيف
وفعلن جازفنا وخرجنا تاني وندعي يارب سهل علينا احنا خارجين ننقذ واحد يموت يارب
وفي نص الطريق المويه طبعا غطت السياره كمان ووقفت في وسط الشارع انا ماقدرت اسكت سرت ابكي
واشوف الناس جنبي تغرق علشان سياراتهم صغيره ومو قادره اسوي شيء مناظر تقطع القلب حزنت وبكيت ودعيت ربي يسلمنا وينجينا وكان في واحد جنبنا الله يرحمه غرق لدرجة بس يده اللي بانت وكان اخويا يبغى يساعده فسخ ثوبه علشان يمسك فيه ماقدر يمسك والمويه اخذتو معاها واحنا كمان بننسحب خرجنا من السياره وسرنا نجري في المويه وتركنا السياره كمان وقلنا تتعوض
وجرينا مناظرنا كاننا في يوم القيامه انا رابطه العبايه ورميت صندلي واخويا فسخ ثوبه وماسكه قال يمكن احد يمسك فيه
والرجال اللي معانا ماشي زي اخويا وجرينا تقريبا 3ساعات لدرجة اني تعبت واستسلمت وقلت خلاص انا ابغى اموت تعبت الا اخويا وقريبنا يسحبوني سحب
وبعد المعاناه هذي كلها وصلنا المستشفى تقريبا الساعه 12 في الليل واحنا مهلوكين رمينا نفسنا رمي
الا نلاقي جدي مره تعبان بسبب اهمال وخطأ طبي من المستشفى الله ياخذهم يارب ونصحونا لنقله بسرعه لمستشفى حكومي في هذاك الجو طبعا مانقدر
وانا ماقدرت اقاوم اغمى عليا وماقدرت افكر بشيء ونمت لتاني يوم وانا بملابسي المبلوله صحيت لقيت بجد اني كنت مااحلم
وان حصلت كارثة في جدة وناس ماتت وقعدت افتكر منظر الناس اللي شفتهم يغرقو لغاية اليوم احنا تعبانين
وأخويا مريض لانه ماقدر ينقد الرجال اللي كان يبغى يمسك ثوبه
وقريبنا عايش مصدوم شويه من الكارثه اللي حصلت
وفي الاخير احمد الله واشكره انه نجانا واستجاب دعائي والله يرحم كل اللي ماتو يااااااااااارب ويغفر لهم
شركة تغذية @shrk_tghthy
محررة
يلزم عليك تسجيل الدخول أولًا لكتابة تعليق.
الحمد لله على سلامتكم بس المستشفى المفروض يعطوه دم وبعدين تعوضوهم مويجيبوا الناس في السيول
الصفحة الأخيرة
عيشتيني معاكي بلقصه
الله يرحم موتانا وموتى المسلمين
والحمد لله على سلامتكم..
تــــحــــيــــاتـــــي..