قصتي مع صديقاتي وأهل زوجة أخوي

السلام عليكم ورحمة الله وبركاته

بدخل في الموضوع على طول

بنات وش اقول لكم أنا مو مرتاحه وربي مو مرتاحه

قبل كم شهر لما قررنا نخطب لأخوي الكبير كنت طايره من الفرح لأنها اول فرحتنا عاد امي وأختي الله يهديهم قرروا يخطبوا صديقتي وانا ماكنت راضيه لأنها ما تناسب أخوي بالمره المهم اقتنعت بالاخير وقلت يلا اللي تعرفه احسن من اللي ماتعرفه صارت خطبة رجال وبعدها دقوا يبونا احنا الحريم نزورهم مع انهم يقربوا لنا من بعيد ونعرف بعض اتكلنا على الله ورحنا بعدها بكم يوم ردوا انهم مو موافقين قلنا نصيب البنت صارت تتحاشاني ومفكرتني بزعل ولاشي كلمتها وقلت لها اني مو زعلانه وهذا نصيب ووو ورجع كل شي مثل أول

اخوي بعدها على طول خطبنا له بنت ثانيه ووافقوا عليه بس كنا ننتظر التحاليل وانا انخطبت قبل اخوي ونفس الشي انتظر التحاليل وصار ظرف بعدها واجلنا الملكه لبعد شهرين

خلال هالوقت انا كنت اعرف وحده تقرب لصديقتي مره وهي صديقتي الثانيه معرفتي فيها قويه وقريبه مني كانت كل تتسأل ماخطبتوا لأخوكم ومتى بتخطبوا ووو بعدها انا قلت لصاحبتي هذي عن أخوي (قبل لاتخلص التحاليل) وقلت لها ان لسى مافيه شي أكيد بس كلام بينا
المهم لما خلصت التحاليل قلت لصديقتي الاولى عن اخوي قامت أكلتني ماقلتي لي من الأول ولاكأني صديقتك وماتبيني افرح معاك وو نقصت علي فرحتي وانا كنت مره مبسوطه عشان أخوي :icon33: حتى نفسيتي صارت دمااار كان ماباقي الاتضربني
انا قلت لقريبتها عن تصرفاتها معي وقلت لها عني (اني انخطبت) وزعلت هذي بعد ليش ماقلت من الأول طيب انا بعد مايصير أشهر ان فلان خطيبي وبعدين ماتتوافق التحاليل مايصير كذا اذا اهلنا واهم اقرب الناس لنا ماقلنا لهم
بعدين سألتني قلتي لفلانه قلت لها لا يكفيني كلامها يوم درت عن اخوي راح اقول لها لما قريب نملك

واول ما عرفت على طول تسألني خطيبك من عايلة من انا ماكنت فاضيه حتى ماجهزت ولاشي لنفسي كنت مره مضغوطه

بعدها صاروا الثنتين يسألوني وش لون فستانك بكم شريتيه وش صار بالملكه متى الحفله سوي كذا ولاتسوي كذا وو
كم مره يزورني وكيف تقدم لي ومن وين يعرفونا وكيف شافوني لأنه من منطقه ثانيه بس مو بعيده ربع ساعه او اقل بعد بس اهم مسوينها سالفه امي تعرف اهله وجاو لنا زياره وبعدها تقدموا لي
بس كذا واهم يحسسوني كأني أعرفه أو بينا شي أستغفر الله

حتى أهلنا لما دروا نفس الشي ماسكين أمي تقولوا تحقيق طيب هذا نصيب وأغلب العوائل عندنا ماخذين شباب وبنات من هالمنطقه بس يوم صار لي انا صار فيه إن والله حرام كذا:44:

بعد خطيبة اخوي اهلها الله يهديهم فضوليين بشكل ماتتصورنه يتدخلوا حتى بحياتنا الشخصيه
انا بملكتي ماسويت شي ابد لبست عادي ومكياج خفيف حاطته بالبيت حتى ماعزمنا احد بس خالتي واخوات خطيبي ثنتين وبنات اخوانهم 3 وبس حتى جدتي ماقلنا لها

بملكة اخوي قلنا لهم بس احنا اللي بنجي وعائليه بس انا وامي واختي قالوا اوكي ولما رحنا شفناهم مسويين حفله وماخلوا احد ماقالوا له ويوم ثاني وثالث بعد حفلات في بيتهم بس احنا مارحنا
لما جا وقت حفلتي خربوا الحفله تخيلو يوم الحفله الصباح متصلين لأبوي ومسوين لهم سالفه بدون مراعاه ان عندنا حفله ومزحومين وخال البنت رايح الصاله يلغي الحجز قال ايش ارضها مغتصبه وانت وش دخلك من تكون عشان تتدخل بحفلتي الكل فرحان وانا الغبنه بقلبي

طبعاً اهم من سمعوا بحفلتي قالوا يبون حفله كأن ماكفتهم الثلاث حفلات اللي سووها غيرانين مني على حفله وماتسوى علي ذيك الحفله

واضطر ابوي يسوي لهم حفله مع العلم ان حفلتي خطيبي دفع لي تكاليفها وأخوي ماعنده وابوي سوا لهم الحفله وفي نفس الصاله اللي على قولة خالها مغتصبه مغتصبه وحرام علي وحلال عليهم
ومايحتاج ربشه وفخفخه على حساب ابوي وياليت ذكروه بالخير الاقاموا يعايروا اختي وخالتي ليش ماتزوجوا غير التحقيق عليهم بالأسئله وصاروا يحطوا بالهم علي انا وخطيبي وصرنا كل نتزاعل ومشاكل بعدين دريت ان اخوي كان يقول لهم اخباري انا وخطيبي حتى عن شقتنا ووين موقعها واثاثنا ووو كل شي وانقهرت وقلت له مايقول لخطيبته شي ابد

حتى انها في كل سالفه تدخل اسمي بالنص اختك وش سوت وش اشترت ووو ومن هاللقافه حتى امها وعماتها قبل كم يوم شفتهم بزواج كل ماجات وحده تسألني جهزتي ولا لا وانا باقي وقت على زواجي

اللي قاهرني بكل السالفه ان بنتهم زوجة اخوي انا ماعمري احتكيت فيها ولاكنت اعرفها قبل ولا مره سألتها وش اخبارك مع اخوي او جهزتي او لا واهم كل صغير وكبير يتدخل بحياتي

صديقتي اللي كتبت عنها فوق بعد مادرت عن اخوي كل تقول الله يوفقني والله يفرحني وتلمح لي انا حسيت انها كانت موافقه على اخوي بس اهلها رفضوا طيب انا وش اسوي كل يوم تتشكى لي اقول لها اخذي زوجي مثلاً
حتى ابوي واخواني لو تروح مكان وتشوفهم تقول لي ترى شفت ابوك مع اخوك فلان ترى شفت صور اخوانك بالنت
صار ابوي واخواني شغلها الشاغل فلان يشبه لك وفلان يشبه امك مع انها قبل لانخطبها ماكانت كذا

من شوي بس كنت اكلمها تقول لي جهزتي قلت لسى قالت زواجك في شهر ...؟ قلت اي كيف عرفتي قالت حسيت انا بداخلي ماصدقتها بعدين تقول ان صديقتي الثانيه قريبتها قالت لها وتقول ان اهي مره سألتني متى زواجي وانا مارديت بس اهي ماتحب تتدخل في خصوصيات احد وان قريبتها قالت لها بدون ماتسأل

قلت لها لما سألتيني كنا لسى ماحددنا تونا مملكين !!! صار لنا شهر بس من حددنا تقول براحتك !!!

قلت لها وش قصدك انا كذابه قالت لا وقامت تعتذر وتتحجج ان ماكان قصدها

وهذي مو اول مره اهي دايما تجرحني وتقول ما اقصد وفهمتيني غلط ودايماً نكديه ومنكده علي عيشتي يوم اللي اكون مبسوطه تخرب فرحتي مع اني مايوم غلطت عليها بشي وكل مره تصير لها مشاكل مع البنات اوقف معاها وانصحها وادعي لها الله يوفقها بس اهي ماتعاملني بالمثل توها قبل كم يوم قالت لي انها رسبت وانا كنت اشجعها واواسيها واقول لها تنتبه لصحتها

امي تبغاني اقاطعها لأنها شافت حالتي لما هاوشتني على خطوبة اخوي وتقول لي فلانه ماتحب لك الخير بس انا ما اسمع اقول ولو صديقتي واعرفها من سنين وو

بعدين اهي كانت تحاسبني اني ماقلت لها ان اخوي خطب مع ان كان لسى ماصار شي وزعلت اهي وقريبتها اني ماقلت لهم اول ماجاو شافوني وخطبوني مع انها اسرار بيوت مالهم علاقه فيها
واهم ابد مايقولوا لي شي اهي اذا عندها شي تعزمني قبل يومين ثلاثه وقريبتها تقول لي الشهر الفلاني ومرات ماتقول
حتى لما انخطبت وتزوجت ماكنت اسالها بشي ولما حملت ماقالت لي امي كانت تمزح تقول لها سمنانه لايكون حامل قالت اي وانا قبلها بيوم كنت اكلمها تقول انها تعبانه قلت لها ليكون حامل قالت لا !!

واهم من اول ما اندق باب بيتنا يبغوا يعرفوا

عاد انا فيني طبع اني ما احب اتدخل في خصوصيات احد بشي وبنفس الوقت ما احب احد يتدخل في خصوصياتي

هل هذا صعب اني ابغاهم يعاملوني مثل ما أعاملهم والله تعبت من الفضول اللي في هالناس صرت اكره الطلعات حتى لأحد يسألني شي

واسمحوا لي اني طولت بس قلت اطلع اللي بصدري لأخواتي بنات حواء يمكن ارتاح شوي

انصحوني كيف اتعامل معاهم لأني ما أبي اجرحهم

واللي ماعندها نصيحه ترفع موضوعي بدعوه حلوه مثلها :)

الله يجزاكم خير