قصتي مع عدد حيوانات المنوية من صفر لمليون

اهلين بنات
قصتي بدأت في شهر ١١/٢٠١٨ : بعد ٩شهور من زواج وتأخر الحمل وبلا مانع قررنا نكشف ،الحمدلله اموري طلعت تمام لكن زوجي للاسف طلع تحليل السائل صفر حيوان منوي مااحكي لكم عن الصدمة بالخبر وكيف اسودت الدنيا فجاءه لكن ربنا كريم
-اهم شي تكونين الداعم الاول لنفسية زوجك
اوكي حتى انتي متضرره من هالموضوع لكن يكفي ان السبب مو منك وهذا بحد ذاته يطمنك ،مريت بضغط من عائلتي واهله لكن والله ماكنت اعلمه واكتمها بقلبي عشان لايسوء وضعه النفسي زياده -
اذكر اول مادخل علي بنتيجة التحليل ووجه مسود وانا ماادري وش يعني صفر لكن الهمني ربي ومسكت يديه وناظرت وسط عينه وقلت :عيال من غيرك ماابيهم .
ماتتخيلون كيف دمعت عينه وليومكم يشكر لي كلمتي هذي .
الحمدلله عدينا مرحلة الصدمة وبين ندور دكتور كويس
بحثنا وحصلنا مدح للاستشاري نايف الهذال خلووق جدًا و مميز في مجال العقم والذكوره ويشتغل في التخصصي الرياض و مستشفى الحبيب فرع السويدي
رحنا له وشخص الحاله قال دوالي ويحتاج عملية
وفعلا سوينها ، -والله كنت واقفه عن باب العمليات اروح واجي من التوتر شايله هم النتيجه وكيف بستقبل اي خبر ""لحالي "" وبعد كيف بوصل لزوجي الخبر بعد مايفوق -
طلع الدكتور بشرني بخير وطمني بكلامه الله يسعده ثم قال شلنا الدوالي واخذت خزعه من الحيونات المنوية وقالي انصحك نجمدها في حال ماضبط الحال لان المشكلة مو من الدوالي المشكلة انسداد اما في الحبل المنوي او البربخ او في مصنع الخصية ونسبة نجاح عملية الانسداد ٥٠-٤٠٪؜ .
هنا ماادري افرح او اصيح لكن الحمدلله ربي رحيم
وبعدها قعدنا ٤شهور وحلل السائل خلال هالفترة مرتين وبرضه صفر
رجعنا لدكتور و شرح لنا العملية وانها دقييقة جدًا وتفاصيل كثيره ، استخرنا وتوكلنا على الله وسوينا العملية
العملية مدتها كانت ٣ساعات ونص والله مرت كأنها ٣سنين صحت واستغفرت وصليت والعملية ماخلصت 😭🥺
الحمدلله طلع الدكتور والله يبيض وجهه طمني كثير ثم قال ان الانسداد طلع في البربخ وانه ركب وصله ومايمدينا نقرر ان العملية نجحت او لا الا بعد تحليل السائل شهريًا لمدة ٦شهور ان ظهر حيوانات فالحمدلله نجحت العملية ،و ان ماظهور الشكوى لله واطفال الانابيب الحل
الحمدلله والشكر لله مر رمضان و عرفة وانا ادعي بكل سجود ربي هب لي من لدنك ذرية طيبة
وربك مايخيب رجاك اللهم لك الحمد
بعد ثلاث شهور من العملية ظهر عدد ٨٠٠٠ والله من فرحتي بهالعدد بكيت وسجدت اللهم لك الحمد صح عدد قليل لكن هذا دليل ان العملية نجحت بفضل الله
وبعد شهر حلل وطلعت مليون 😭
الحمدلله الحمدلله الحمدلله🥺
يارب لك الحمد صبر وتعب وعمليات خلال ٩شهور عوضتنا خير ياكريم وياااررب ارزقنا الضنا وكل محروم ،يارب بلغني بحملي صحيح معافى قبل مااكمل سنة من معاناتي 😭
ويارب الشهر الجاي يتضاعف العدد ويبلغنا خير🥺
املك بربك لاينقطع هو الرزاق سبحانه ،ابذلي السبب ولاتنسين المسبب رب العباد الرزاق الواهب وكما رزق مريم بلا مسببات قادر يرزقك وانتم فاعلين السبب .
هذي قصة كفاحنا ويارب اكون الهمتكم ويارب ابشركم بحملي 🥺