قصتي مع لحمية الرحم

السلام عليكم ورحمة الله وبركاته
الشهر الي طاف والي قبله كنت اعاني من نزيف غير منقطع انهبلت منه نفسيا تعبت
والله احس وجهي صار اصفر ولا لي خلق اتحرك
ما قول انه الكميه مره كبيره بس متوسطه يعني دم كميته تقريبا مثل دم الدوره لكن لونه كان طبيعي احمر صافي ما هو دم دوره الي ريحته ولونه مميز
المهم
رحت للدكتوره رقم واحد قالت اختلال هرمونات بسيط اخذي حبوب لتنظيم الدوره وكل شيء تمام
هذا طبعا بعد ما سوت سونار داخلي
استخرت ولا اكلت الحبوب لاني والله ما اقتنعت بكلامها حسيت فيه شيء اكبر
رحت الدكتوره رقم اثنين
سوت سونار داخلي وقال دي الدوره قلت اي دوره لها اكثر من شهر
ومثل الي قبلها قالت اختلال بسيط اخذي هالحبوب وكل شيء بيكون تمام
واستخرت ولا حتى صرفت وصفت الدوا ورميتها
ونصيحه يابنات افتو قلوبكم شوفوا اذا ما اقتنعتم بكلام الدكاتره اسألو لين تتاكدون
واحد واثنين وعشره
المهم بعدها باسبوع طفشت من نفسي ورحت لدكتوره ثالثه
وقلت شوفي لا تقولين منظم انا دورتي تجي بوقتها لان اعرفها من لون الدم بس هذا دم طبيعي انا في رحمي شيء جرح ولا مشكله معينه
قالت اوكي وسويت سونار داخلي للمره الثالثه
وقعدت ساعه تنفص عيونها وتقلبها وتصور ومتعوده على الدكتورات بسرعه تدخل السونار وبسرعه تطلعه طايرات
قالت فيه لهميه يعني لحمية قلت شنو هذا بعد اختراع جديد اول مره اسمع فيها
والمشكله اللحميه كبيره طولها تقريبا 3 سم يعني الشاطرات الي قبلها وين ما شافوها والله عجب
المهم قالت شوفي خليني اسوي تحليل هرمونات شامل لج عشان اتاكد ان النزف من هاللحميات
واللحميات اصلا لازم تنشال بس عشان نشوف لو فيه مشكله ثانيه
سويت تحاليل والحمدلله طلعت زينه
قالت شوفي اللحميات تمنع الحمل وتجيب نزف وتزيد مع الوقت يعني الافضل في كل الحلات تشيلينها
قلت طيب شيليها عبالي السالفه بسيطه مثل كوي القرحه قعدت تضحك قال لا لازم عملية تنظيفات مثل الاجهاض
المهم عطتني علاج وقالت لا تاكلين اي حبوب منظمة للدوره لانها بتوقف الدم صح لكن بتكبر اللحميات بسرعه
هنيه وقفت مع نفسي وشكرت الله على نعمة الاستخاره والحمدلله متعوده ما سوي شيء الا باستخاره اللهم لك الحمد والشكر
طبعا رحت مستشفى عام وقلت خلني اتاكد :> صرت موسوسه وقلت الدكتوره تقول عندي لحميات ولازم تنظيفات سوولي سونار وقالو صح ولازم تشيلينها لانها كبيره
والحمدلله بعدها بيومين سويت العملية عند نفس الدكتوره ووقف النزف وانقطع ورتني اللحميات انصدمت من عددها وحجمها وكيف الدكتورات ما شافوها
المهم نصيحه لكم خواتي دايم استشيروا اكثر من دكتور
والي تحاليلها مافيها شيء وما حملت تكشف على اللحميات يمكن عندكم لحميات ولا يشوفونها من عجلتهم مرات اللحميات ما تجيب نزف ولا مشاكل بس تراها مانع خفي
وتحياتي ودعواتي لي ولكن بكل خير