قصتي مع ولدي 5 سنوات لايتكلم(خذوها عظه)

بسم الله الرحمن الرحيم
الحمد لله رب العالمين.. خلق اللوح والقلم..
وخلق الخلق من عدم.. ودبر الأرزاق والآجال بالمقادير وحكم.. وجمل الليل
بالنجوم في الظُلَمّ.

الحمد لله رب العالمين.. الذي علا فقهر.. ومَلَكَ فقدر.. وعفا فغفر.. وعلِمَ وستر.. وهزَمَ ونصر.. وخلق ونشر.

الحمد
لله رب العالمين.. صاحب العظمة والكبرياء.. يعلم ما في البطن والأحشاء..
فرق بين العروق والأمعاء.. أجرى فيهما الطعام والماء.. فسبحانك يا رب الأرض
والسماء.

قصــــــــــــــــــــــــــــتي

كان ولدي عندما بلغ العمر سنه الى سنتين وهو يردد ماما بابا..وفجأه والله صار مايتكلم آبد
يحاول يتكلم مايقدر بس صراخ والله الذي لا اله الا الله قلبي يتقطع معه ...وكان آبوه يشوفه شئ عادي
لكن مر السنه الثالثه والرابعه ولم يتكلم آبد..وكان يبكي لانه يبي يتكلم بس مو قادرحسيت بلسانه ثقل غريب
أسترجعت ذاكرتي آن يوم صار عندنا عشاء ودخل ولدي عليهم والله هاليوم ماكنت محصنته
والله طلع من عندهم يبكي افتكرت ابوه هاوشه وطلع آن آبوه ماله ذنب..بعدها بدت مآساتي عدم نطق ولدي
فطلبت من زوجي يتذكر من حضر حتى آخذ من أثارهم لاجل ولدي.. وخذنا من اثار منهم لكن ماجاب نتيجه
فبدأت هنا رحلت علاج ولدي وكان آخو زوجي دائما يقول لي لا تخلينه عالجوه...
طبعا للاسف صرت بمجتمع متخلف البعض يقول ولدك(أخرص)مايتكلم العمر كله والله قلبي يتقطع لمى آحد يقول هالكلام وانا عندي يقين أن ولدي راح يطيب بفضل الله..
ويوم من الايام رحنا لطبيب شعبي وقالي اعطيه عنبر وتعرفون العنبر غالي جدا الي كبر(حبة البخور معمول)2000ريال والله اشتريتها وتوكلت على الله وصرت احطها له مع القهوه لانها تعالج ثقل اللسان
مر شهر وشهرين وماحس ولدي تحسن...قلت يابنت خليني احجز بمستشفى عرفان
وفعلا حجزت وقابلت الدكتوره وشرحت لها ماحصل مع ولدي...وبدأت بالاشاعه المقطعيه وتخطيط
والكشف على السمع والحمد لله والشكر مافي شئ ولدي وسمعه 100%
والله فرحت من كلامها لان أهم شئ السمع لانه متعلق بالنطق...
قالــــــــــــــــــــــت لي لازم آدور على سبب آخر لان ولدي مايحتاج علاج طبي نهائي..
قلت لها كيف ادور سبب أخر والله الذي لا اله الا الله قالت لي حاولي تعصبيه لانه يجيب نتيجه..
رجعت بيتي وأنا أفكر بكلامها وبحثت عن دكتور متخصص بهذه الامور وفعلا ولله الحمد وجدت الدكتور
واجيبه على بيتنا(أسال الله العلي القدير أن يوفق الدكتور اين ماكان) وشرحنا له الوضع وهو دكتور ومدرس
الصم والبكم
وقلت هل العصبيه تجيب نتيجه...قال اذ سمعه ميه بالميه راح تنجح هالطريقه
وفعلا يابنات بدا معه الدكتور ويحاول ينطقه غصب عنه ويحاول ينرفزه حتى ينطق والله اسمع ولدي
يصيح ويبكي وانا بصاله قلبي يتقطع عليه..
وثاني يوم نفس المسلسل وبدا ولدي الحمد لله النطق يؤؤؤؤ فرحت وشكرت الله وبدا بعد كذا ينطق كل يوم ازود من قبله الين كمل شهر والحمد لله والمنى بدا يتكلم ولدي تدريجي الين تجاوزنا هذه المرحله الصعبه
بعدها قالي الدكتور قدمي له بمدرسه عاديه لان ولدك صار طبيعي جدا...وفعلا ولله الحمد قدمت له بالمدرسه
وصار طبيعي والان هو أول ثانوي ربي يحفظه..

والله يابنات اذ ولدك سمعه كويس لا تياسي لان علاجه يبغى له وقت...

ولا ننسى الدعاء لله