قصتي مع ولد زوجي حسبي الله عليه

السلام عليكم ورحمة الله وبركاته
ابقول لكم قصتي مع ولد زوجي اللي خلتني اتوب اسوي معروف مع احد

تزوجت زوجي قبل 19 سنة وهو مطلق زوجته وله ابن منها اسماه عبدالرحمن
حكى لي قصته معها ومشاكلها التي تسبب في سوء علاقتهما معا , وانها هربت واخذت ابنه معها واختبأت به الى ان طلبت الحضانه رسميا بالمحكمة فحكم لها القاضي وحكم للأب بزيارة كل اسبوعين خميس وجمعه ,
المهم حزن زوجي جدا وانتظر موعد الزيارة ليأخذ ابنه ويضمه الى قلبه فقد كان يحبه جدا جدا , وحين جاء الأربعاء وذهب للبلد الذي تسكن فيه مع اهلها يبعد عن الرياض تقريبا 800 كيلو متلهفا لرؤيته لم يعطوه اياه وحاول مرارا ورفضوا , ذهب لقسم الشرطة وبذلك سلموه الولد لكن الولد لقن بأنه حرامي سيأخذك فأخذ يسبه ويصرخ ورحمه ابوه واعاده لأمه مع مجموعة من الهدايا والملابس .
ثم رجع للرياض وجلس تقريبا شهرين ثم اتصل عليهم يخبرهم انه سيأتي ليأخذ الولد لكن المفاجأة أنهم انتقلوا الى مدينة اخرى ولم يعطوه عنوان فصار كالمجنون يشتاق لأبنه الى درجة البكاء وهو ساجد يصلي بالليل , ومرت الشهور والسنين وهو يدور بين المحكمة والشرطة يبحث عن حل كيف اجد ابني كيف اراه ولا مجيب ولا احد يعطيه رد يشفي غليله ويبرد قلبه .
وبعد 4سنوات جاء خطاب من الشرطة استدعاء لزوجي وفرح وبسرعة البرق ذهب للمركز ووجد ان زوجته تطالبه بالنفقة للولد بخطاب فقط دون حظورها ودون ان تذكر عنوان بيتها , فقط ذكرت رقم حسابها بالبنك لوضع النفقة ,
رد زوجي , لماذا لا تحضرونها حتى تعطيني حقي بالزيارة لأعطيها النفقة , لكن الشرطي قال ادفع انت الآن وبعدين رح طالب بولدك عندها , دفع لهم زوجي مجبرا وعاد .
وبعد ان صار الولد عمره 14 سنة عرف زوجي مسكن الأم بالمدينة وذهب لزيارته فورا لكن الأم صرفة ابنها وقالت انه مسافر وهكذا كلما جاء حتى كبر الولد ولازم يطلع بطاقة احوال ولازم ابوه اللي يطلع له بدفتر العائلة اضطرت الأم أن تخرجه له ويذهب معه لمدة ساعة للبطاقة فقط وكان الولد فضا مع ابوه , فحزن الأب زلم يبدي شيئا ,
وعاد للرياض واخذ يتصل على ابنه ويطلبه ان يأتي للسكن معنا لكن الولد كان كالحاقد على ابوه واتهمه انه لايحبه والا ليش تتركني طول هالسنين ما اعرفك ولا كأن عندي اب حاول زوجي ان يشرح لأبنه مافعلت امه لكن الولد كان وقحا ورد بقسوة على ابوه وصار الأب يقلل الإتصال لأن الأبن في كل اتصال يجرح اباه بقسوته عليه ودما يقول له انا متدرب حديد وووو وكانه يوجه تهديدا لأبوه ,
ومع الوقت سقط الأبن من قلب ابوه حتى صار يطنش اي اتصال من ولده , وكنت انا الح على زوجي وأقول (( رد عليه يمكن يتغير وربي يهديه , عطه فرصة يعرفك ومع الوقت يكتشف ان امه كانت تكذب عليه )) لكن كان يصرخ علي انتي مالك دخل واسمع اشياء تجرح ,
وهكذا حتى انتهى الأبن من الثانوية العامة واتصل على ابوه يطلب سيارة ب 200000 ريال فرفض ابوه لظروف الأقساط التي عليه , ثم قرر الأبن زارة ابوه وحجز بالطيارة وجاء للرياض ووصل الى بيتنا بالليل وحين طرق الباب وعرف زوجي من هو رفض ان يدخله البيت رفضا تاما , وكان الدنيا برررررد وشتاء واتصل على عيالي وقال انا ماعندي احد اعرفه بالرياض وانا بردان جدا قالوا لي ابنائي ذلك ورحمته واخذت اعد لزوجي كل شيء يحبه وحين اراه رايق البال اترجاه ان تدخل ابنك , لكنه يرفض ويهاوشني بشده .
ولم ايأس وكل فتره اتوسل اليه وارجوه ان يسامحه ويدخله عن البرد والجوع لكن يرفض , الى اليوم التالي وانا اترجاه وبكيت عنده الى ان ادخله ولكن بالمجلس فقط , فقلت الحمد لله فقال لي زوجي سأتركه ساعة فقط ثم سأخرجه يدبر نفسه , وبسرعة البرق اتصلت على اقرب مطعم وطلبت عشاء ومشروبات وارسلتها للمجلس وبعد العشاء جاني هواش من زوجي ليش اعشيه , وارسلت له فلوس مع عيالي .
ثم اخرجه زوجي وعاد للمدينة للأمه , وبعد فترة انتقلت امه للرياض مع زوجها وابنها وطلبت من زوجها ان تسكن بنفس الحي اللي بيتنا فيه .
المهم صرت اعطي الولد كل فترة مبلغ من المال بحسب استطاعتي , واطبخ الحلويات والأكلات ولا انسى ان اضع له نصيبه ويأخذه من اخوته دون علم ابوه ( طبعا رحمة فيه لأنه يقول لعيالي انه جيعان وزوج امه مايصرف الا القليل عليهم وانه قاسي عليه ومن هالحكي , وانا بسرعة ارحم واصدق , شوي وصارت الأم تتصل علي وتسبسب بزوجي وتطلعه شيء ماينطاق وكيف صبرتي عليه , والولد يكلم اخوانه وبطريقة خبيثة يظهر لهم انهم عايشين بجحيم مع ابوهم , و صاروا عيالي يعاندون مع ابوهم ويعصونه وبنتي صارت تلمح بأنها خلاص ماعاد تتحمل الحياة معنا وودها تهرب من البيت ووو اشياء كثيرة
ومع هذا كله كنت ادافع دوما عنه عند ابوه وابوه مو راضي يسامحه ابدا .
ويوم دخل للكلية عطاه ابوه 50000 ريال يشتري سيارة وشرى سيارة وبعد شهر صدم بها وطلب من ابوه ورفض ابوه وصلحها مدري من وين , وبعد اسبوع صدم ثانية وبعد كم يوم صدم ثالثة وخربت مرة السيارة وصار يتشكى على عيالي , وعيال يقولون لي , حاولت مه زوجي ورفض يصلحها بتاتا , قال الولد لعيالي مالقيت احد يسلفني حتى اصلحها , قلت انا خلاص اذا يبي سلف انا اتسلف باسمي وهو يعطيني وانا اسدد ومن يوم قلت لهم رد بسرعة ايه اعطيها كل شهر من مكافأتي 500 ريال ,
على طول حولت له من اختي 3000 ريال للتصليح وفورا صلحها ويوم طلعها وراح يمشي بها عند سور الجامعه صدم الأشجار والسور وكسر مجموعة منها وكأنه لم يصلح شيئا .
استغربت هالحوادث وكلها بغضون 3 اشهر , وبدأت اجلس مع عيال وهم يكلمونه بالتلفون واسمع صوته , والله قرصني قلبي صوته كأنه سكران بعض المرات وينام باليومين متواصلة مثل السكرانين , بس ماقلت لأحد تعوذت من ابليس , وكنت اتكلم مع نفسي واأنبها واقول بتصيرين زوجة اب شريرة مثل الأفلام ,
وارجع احسن له من جديد حتى ان زوجي قالي بشتري لولدك سيارة علشان يوديكم بدالي , قلت اذا بتشتري اعدل بين عيالك وبين ولدك اشترله هو بعد لا يضيق صدره ورفض زوجي .
حتى انني اشتري العشاء الفاخر من الطاعم واخلي عيالي ينادون اخوهم عبدالرحمن ويتعشى واقول لهم قولوا لأبوكم هذا العشاء عبدالرحمن اللي شراه لنا ولك علشان اقرب بين القلوب ,
المهم جلسنا على هالحال سنة الى رمضان ورحت مع اختي للحرم واعتمرت ودعيت بالطواف لعيالي ولولد زوجي عبدالرحمن مثل عيال بالضبط وفي آخر الطواف دعيت وقلت يارب اذا عبدالرحمن جالس يخدعنا انك يارب تكشفه لنا , ( ( لأن في داخلي صراع اشك فيه انه خربان وتجي الرحمة وتبعد الشك ))
ورجعت للرياض وحلمت اني في بيت كبير وقديم وكان فيه اسد وخفت منه بقوة وكنت بنحاش بس شفت هالأسد مريض مايقدر يتحرك ورحمته وصرت ااكله الين قوى , وقالو لي في الحلم الناس كيف تأكلين اسد بكرة ياكلك قلت لا المعروف ما اعتقد ينساه وفعلا شفي الأسد وصار قوي جدا واتجه لي ليأكلني فهربت منه وصار يلاحقني ويدفع الباب ليدخل علي , واستيقضت من النوم .
وبعد يوم واحد اتصل ابن زوجي عبدالرحمن على بنتي الكبيرة الصباح برمضان وهو كأنه سكران وعنده مجموعة رجال اصواتهم عالية وقال لها : امك شريرة ووو من الكلام القذر والوسخ اللي يوقف شعر الراس ,
واتهمني انني انا التي امنع ابوه ان يدخله للبيت وان يعطيه المال وانا التي منعته يشتري له سيارة وووو الكثير من التهم التي اصابتني بالدهشة فاغلقة التلفون بنتي وجائتني وانا نائمة وكنت اردد اتقي شر من احسنت اليه , فأخبرتني بمافعل , ثم اتصل على ابوه وقال ان زوجتك تقول فيك اشياء خطيرة ماتنقال وهي سيئة , واتصل على اخوات زوجي وقال لهم مثل ماقال لأبوه واخذ يشب الفتنة , طبعا ابوه سألني فبكيت بحرقة كيف يفعل بي ابنك ذلك وانت تشهد على ماكنت اقوله لك وصدقني زوجي وخاصمة فجن جنون الولد واتصل على ابوه وهدده بأن يضع في سيارته الحشيش ويبلغ عنه لتمسكه الشرطة ,
غضب زوجي وذهب للشرطة واخبرهم عن التهديد , من اجل لو نفذه الولد فلا تثبت على زوجي شيئا ( حسبي الله ونعم الوكيل )
اتصل الشرطة على الولد ليعرفوا سبب التهديد فرفض الحظور لكونه مسافر يعيد بالمدينة وبعد مرور ايام هدأ الأب
وترك البلاغ لم يراع فيه وقال هذا بزر خلاص بنسى كلامه بس يبي يخوفني والا مايقدر يسوي شيء .
ونسنا السالفة
ويوم الأربعا ءالماضي طلعنا بعد العشاء للسوق وتونا فتحنا باب القراج الا اللي واقف قدام الباب زي اللي بيسوي شيء وبسرعة انحاش بسيارته , زوجي طبعا شك خذا دورة ورجع لقاه متجه للبيت ونزل له وتو زوجي يهاوشه وش تبي من بيتي الا الولد نزل بسرعة وامسك ابوه مع يده ويلويها يبي يكسرها وابيده الثانيه خنق ابوه الين تسمعون غرغرة صوت زوجي حتى ماقدر يتنفس بغى يموت الين فكه ولد الجيران , بلغ ابوه الشرطة بسرعة ومسكوا الولد وسجنوه , الين يتحول للمحكمة بقضية عقوق , قامت امه تتصل على الناس وتقول اني انا الي محرشة ابوه عليه واني شريرة , وصارت تتصل وتهدد زوجي وتهددني بأنها بتنتقم مننا ( حسبي الله ونعم الوكيل ) وصار الولد يتهمني بشرفي وبناتي الله يكفيناه بما شاء
وبكرة بيحولونه للمحكمة ولو ماتنازل زوجي بتنتقم بعيالي .
وللعلم طلع يشرب ويسكر وراعي سهرات مختلطة وفظايح عرفناها عنه الله يحفظ عيالي يارب ونفسي وزوجي .


بعد هالسالفة خلاص ما اسوي معروف بأحد اعرفه ابدا ابدا
والله قد قالت لي وحدة اتركيه لا تساعدينه عيال الزوج ما يبان فيهم المعروف وكنت اقول لها بالعكس الأقربون اولى بالمعروف , وكانت هي الصادقة ,

انصحكم يا اخوات ان لا تحسنوا لأبناء الزوج ابدا ابدا