قصتي وبإذن الله بتصير سعيده 4

السلام عليكم ورحمة الله وبركاته
ماأدري من وين أبدأ
اللي يعرفون قصتي أكيد بيحسون بكل كلمه قلتها وبقولها....
واللي مايعرف قصتي برجع أكتبها بإختصار ياليت اللي تقدر تحط رابط لمواضيعي أكون شاكره لها..
أنا اللي حبيت واحد سنين وتزوجته بعد رفض أهلي فتره طويله بس للأسف سعادتي ماأكتملت صارت مشكله يوم زواجي وزادت بعد الزواج بشهر وأجبروني أترك البيت وخسرت جنين ماأكتمل وطلقوني منه بعد تهديده انهم بيذبحوني..
حرمونا من بعض وزوجوني واحد لمدة 3 سنوات عشت أنواع الشك والظلم والخيانه والعذاب وبعد الإستخاره ثم تشجيعكم وكلامكم قدرت أطلق منه والحمدالله..
بيوم جات وحده من قرايب زوجي الأول وعرفت بطلاقي وقالت له وجلست يوم كامل أنتظر إتصاله على جوال أمي..
وفجأه الساعه 5 العصر ...
يجي أمي إتصال من رقم غريب قلبي يدق بسرعه قلت بسمع الصوت بس إذا هو أو لا ؟
وفتحت الخط وماتكلمت
قال ؛ الوووو
يالله الصوت هذا اللي عمري كله ماأنساه
بكيت وربي وهو كأنه حاس قال الوو ردي
ماقدرت أرد خفت والله أسمع صوته ونتكلم ونرجع نتعذب من جديد
ورحت أعطيت أمي الجوال كلمته وتمنيت إنه أنا
سأل عنها وعن أحوالها وسأل عني وبدأ يفتح موضوعي قال لأمي ياعمتي أنا عقلي موقف على اليوم اللي كانت فيه ببيتي والله لاأعرف طعم نوم ولاراحه اختفت الإبتسامه يحلف إنه من بعدي نسى الضحك والسعاده..
أمي جلست تطمنه إنه كل شي يمكن خيره للإنسان ويمكن طلاقي خيره ونرجع لبعض قال لها أنا هذا سبب إتصالي؛
أنا من وصلني الخبر وانا بسعاده مايعلم فيها إلا الله
يقول لها إيش أسوي تكفين قولي لي الحل ماأبيها تضيع مني مره ثانيه وأنا عندي أمل بالله ومافقدته..
قالت له إنه فيه شيخ ممكن يساعدك وهو وعدنا..
أعطته الرقم وقال بيكلمه
قال لأمي ماأقدر أسمع صوتها بس؟؟
وأمي رفضت وقالت إني رافضه عشان مانتعذب من جديد..
قال لها أبيك تقولين لها شي واحد إنه قلبي مافيه غيرها وإنه ببقى أحبها لأخر يوم بعمري وراح أسوي المستحيل حتى نرجع لبعض والله ماأتزوج غيرها...
آه يابنات ماأدري أضحك وإلا أبكي..
أضحك من هالدنيا اللي جمعتنا وفرقتنا ورجعت جمعتنا وممكن تفرقنا..
والله السعاده ماتوصف لأني سمعت صوته تمنيت أكلمه أقوله عن الأيام اللي عشتها بدونه عن عذابي بفراقه بس حلفت ماأكلمه إلا إذا ربي جمعنا من جديد..
أتذكر إنه مرت علي أيام كنت أتمنى أسمع صوته إحتجت لكلامه اللي بيرفعني فوق ويحسسني إني بعالم ثاني...
طبعآ مر يوم على هذا الكلام وباليوم الثاني جاء أبوي وقال لي إنه فلان يقصد الشيخ إتصل عليه وقال بيجي وسألنا إذا مسوين شي وحلف إنه لو يصير شي بيطلق أمي..
خفت وبكيت ورجع الهم والخوف وجلست أدعي ربي لحد ماجاء...
جلس أبوي مع الشيخ تقريبآ 3 ساعات..
ورجع أبوي عندنا وجلس يتكلم معي وقال لي إنتي تبين ترجعين له؟
بكيت وقلت له أنا خايفه من المشاكل تكفى إذا بتسوي له مشاكل فأنا ماابي أتكلم ولاأتزوج ولاراح أزعجك بأي شي..
قال لي لا ماراح أسوي شي والله
كلمه وحده بس تبينه؟؟؟؟
قلت إيه أبيه
قال خلاص أخليه يجي..
يالله يارب تمم فرحتي يالله إذا حلم لاتخليني أصحى منه..
وعده أبوي بكره يجي مع الشيخ اللي ساعده..
وقفت عند الباب أبي أشوفه أبي أملي عيوني منه أبي أتأكد إذا حلم أو حقيقه..
وشفته يارب لاتحرمني منه ولاتخليني أسمع بيومه..
جلسو وبعد مواضيع عاديه إستمرت أكثر من نص ساعه...
تكلم الشيخ الله يوفقه دنيآ وأخره
وأبوي تكلم وجاب الماضي والمشاكل والشيخ قال له انه الإنسان مايتكلم إلا بالحاضر ...
طبعآ بعد كلام طويل واااااافق أبوي
إيه وافق والله وافق
أنا بنفسي مو مصدقه...
بس للأسف طلب رضاوه على قولته 50 ألف طبعآ هذي له بس...
وافق حبيبي على طول مع إنه مبلغ كبير
وجاء عندي أبوي قال أنا وافقت بس مالي دخل فيك لو جيتي وشكيتي أو صارت مشاكل..
قلت طيب أنا أتحمل كل شي ..
قال لي كم تبين مهر قلت ولاشي قال لازم وحلفته بالله يقوله مانبي مهر..
وراح عندهم وقلبي يدق بسرعه بيطلع من مكانه..
وقال لهم وهو رفض إلا مهر والشيخ قال 5 الاف
وهو قال 20 ألف وأصر
قلت لأمي لو ملكنا أنا راح أقوله ماأبيهم مو محتاجتهم لأنه المبلغ اللي أبوي طلبه كبير وربي ماأبي حتى زواج أبي أكون معه وبس..
أخر كلامهم إتفقو ع الملكه بعد العيد لأنه باقي كم يوم وأطلع من العده من طلاقي الأول...
طلع وهو يضحك وعيونه عالباب وسكرته بسرعه كأنه حاس إني واقفه عند الباب...
أرسل رساله لجوال أمي
(( يارب يتحقق هالحلم ونرجع لبعض أنتظر هاليوم بفارغ الصبر ياثقل دم الأيام الجايه ))
هذا اللي صاااار..
شايفه السعاده والفرح اللي إنحرمت منها قريبه مني كثير...
خايفه يصير شي الخوف بيذبحني..
والله أصحى من نومي أبكي من الخوف صح أبوي أعطاه كلمه وإتفقو بس الخوف بيذبحني..
خايفه من كل شي...
أفكر إنه بعد زواجنا بشوفه نظيف وأنا لا
لأنه ماعرف غيري وأنا تزوجت 3 سنوات وعشت عذاب حتى بالجماع..
أدري إنه المفروض ماأفكر بكذا وإنه المفروض أنبسط بس أفكار تجيني تخليني أنسى هالفرحه وأبكي..
حبيت أشاركم باللي صار وأشكركم لأنكم ساعدتوني وقدرتو تخلوني أخطي خطوات حتى صار حلمي قريب مني..
بعد الله إنتم اللي غيرتو حياتي هذا دليل على كلام الرسول عليه السلام بما معناه
( المسلم للمسلم كالجسد الواحد إذا إشتكى منه عضو تداعى له سائر البدن بالسهر والحمى )
ماأملك لكم إلا الدعاااااء
أسأل الله إذا فيكم وحده حزينه عسى ربي يبدل حزنها لسعاده...
وإذا وحده مهمومه عسى يجيها الفرج وتتبدل لفرحه...
وإذا وحده تتمنى أمنيه ربي يحقق لها أمنيتها عاجلآ وليس أجلآ...
وإذا وحده بسعاده عسى ربي يزيد هالسعاده وتستمر للأبد...
يارب يحفظ لكم كل غالي
عاجزه عن الشكر لكل اللي شاركوني ألمي وحزنو معي واللي دعو لي ...
بإذن الله أبشركم بيوم ملكتي
إدعولي وإنصحوني