قصتي ولادتي الي ما اتمناها لحد منكم ان شاء الله
الطلق بدا معاي من الاحد 1-6 الساعه 2 ونصف حول الفجر يعني
وكان منتظم ويجيني كل نصف ساعه ورحت جهزت اغراضي وخذيت شور وقعدت اقراء الادعيه واستمر معي الالام لين الساعه 7 الصبح وبعدين ماحسيت بشيء رحت ونمت وقمت الساعه 11 الظهر على الالام ولحد الحين خفيفه واستمرت معااي ومنتظمه كل نصف ساعه
يوم تعشيت رحت ومشيت وعطيت خبر حق مرت اخو زوجي لانها هي الي بتروح وياي تكون جاهزه وتخلي الجوال قريب عندها وجات الساعه 11 الليل والالام نفس الشيء مازادت ولانقصت وكل نصف ساعه قلت بنااام علشان لو زادت اكون نمت شوي رحت الله يعزكم الحمام ابي اغسل اسناني والا احس رطوبه يوم شفت الا احصل السداده نزلت علي وتخرعت زياده ورحت على طول انام ما ابي افكر
وسبحان الله نمت وقمت الفجر الاثنين 2-6على الالام زادت شوي علي خلاص هني معاد نمت صليت وقعدت ادعي والالام كل مالها وتزيد رحت قومت زوجي علشان يوديني للمستشفى الساعه 7 الصبح رحنا والالام اشتدت خلاص يوم وصلت المستشفى قلت حق سلفتي خلينا نمشيء شوي مشيت يمكن خمس دقايق ولا استحملت قلت لها خلاص دخليني عليهم . رحنا لهم وكشفوا علي حصلوا الرحم مفتوح 4 سانتي الحمدالله وعاد هني بدت مأساتي وماعانتي مع التعب والنفسيه
لانهم قالوا بنشوف نبض البيبي يوم شافته ماحصلوا نبض اجتمعوا علي الممرضات والدكاتره وفي الاخير قرروا انه مافي نبض وخلاص بيدخلوني غرفه الولاده انا شكيت في الامر لانهم ماكانوا يبينون لي ابدا يوم جاء الدكتور سالته البيبي فيه شيء قال بصريح العباره (( البيبي عطاك عمره توفى )) خلاص انا هني اسودت الدنيا حولي ومعاد اقدر استحمل من قوة الخبر وقوه الطلق . ودوني لغرفه الولاده واختفت سلفتي معاد اشوفها وانا من النوع الي ما احب ادخل غرفه الولاده بروحي احب احد يكون وياي . اثاريها المسكينه هي بعد تخرعت من الخبر وماقدرت تستحمل فا اتصلت على خالتي تجي علشان تقولي الخبر مايدرون ان الدكتور قالي وانا الحين في حاله مايعلم بها الا الله . وفي غرفه الولاده بدلولي ملابسي وقعدت اتالم على الخبر وعلى الطلق القوي وبعد نصف ساعه دخلوا علي خالتي وسلفتي وشافوني تعبانه حيل وابكي سألتني خالتي شفيك قلت لها(( البيبي مات )) ياخالتي هني انصدمت هي شلون يخبروني وانا فيني ولاده وعصبت عليهم وانا خلاص كل مالها والالام تشدت عندي ومعاد قدرت استحمل قمت اطلبهم عمليه او ابره ظهر وهم رافضين يقولون كل شيء الحمدالله طبيعي ليش نسوي عمليه او ابره ظهرا تاخر في الولاده وانا اترجاهم يفكوني ابي انسى ابي بنج كامل ينسيني الي انا فيه نفسيتي تعبت حيل بدل ما اكون قويه حق الولاده صرت كلش دمرانه يوم شافوني ها الشكل راحوا جابوا لي ابره العضل وعطوني الكمام هني نسيت الدنيا ومافيها خدرني الكمام وهون علي الالام الطلق بس لحد الحين تفكيري في بنتي الي مات ودموعي تنزل ماوقفت (( اللهم لك الحمد ولك الشكر )) يوم جات الساعه 11قبل الظهر شالوا الكمام مني وقالوا يله 10 سانتي ادفعي الراس بداء يطلع وقعدت ادفع لين طلعت بنتي الميته 11 ونصف الظهر وقعدوها قدامي وانا ابكي وابكي اكثر واكثر واشوفوهم يوم غطوها كامل ولفوها تعبت صدق تعب يارب ماتذوقون الي انا ذقته من الالام وحرقة قلب لبنتي الي فقدتها .
بعدين فتحوا الباب وصاروا مجتمعين عند الباب عائلتي الي هي اهل زوجي وقعدوا يواسوني ويقرون علي ويصبروني
سبب وفاتها التف الحبل السري علي رقبتها قبل الولاده بساعات لان وانا اطلق في البيت كانت تتحرك في بطني يا سبحان الله
وبس هذي قصتي
يارب ياكريم سهل على خواتي الحوامل ولادتهم يارب
يارب عوضني با الولد الصالح يارب
ام ملاك15 @am_mlak15
محررة فضية
يلزم عليك تسجيل الدخول أولًا لكتابة تعليق.
اميره وبس
•
الله يصبر قلبك حبيتي وان شاء الله تكون شفيعة لك يوم القيامة وقتها تقولين ليتني فقدت كل عيالي
عظم الله اجرك وجعلها شفيعه لك 00 هذا مكتوب وقدره الله 000 عليك بالصبر الله يكون في عونك 00 ان لله وان اليه راجعون 00
اوروبيه
•
عظم الله اجرك وجعلها شفيعه لك 00 هذا مكتوب وقدره الله 000 عليك بالصبر الله يكون في عونك 00 ان لله وان اليه راجعون 00عظم الله اجرك وجعلها شفيعه لك 00 هذا مكتوب وقدره الله 000 عليك بالصبر الله يكون في عونك 00 ان لله...
عظم الله اجرك وجعلها شفيعه لك 00 هذا مكتوب وقدره الله 000 عليك بالصبر الله يكون في عونك 00 ان لله وان اليه راجعون
ام HAMAD
•
لا حول ولا قوة الا بالله عظم الله اجركم وربي يعوضج حبيبتي خير ان شاء الله والله يرحمها وتكون شفيعه لج ياااااااااااارب
الصفحة الأخيرة