بسم الله الرحمن الرحيم
السلام عليكم ورحمه الله وبركاته
ما ادري شلون ابداء او وش اقول بالضبط
دايم اقرا بهالمنتدي الغالي واللي احسه جزء مني بس توني شاركت لاني مو من النوع اللي يحب يشارك
بس ودي أشكي لكم اللي بداخلي تعبت أكتم وابكي لوحدي ويمكن القي حل عندكم
او اقل شي تدعون لي
اولا ببدا اعرف بحياتي
انا بنت عمري 25 سنه البنت الكبيره بعدي 4اولاد 2بنات صغار
متخرجه من الثنوي من سبع سنوات وجالسه بالبيت لاشغله ولا عمله وهاذي اساس مشكلتي
اول ماتخرجت من الثنوي كانت نسبتي ضعيفه وما تأهلني ادخل كليه قلت بقعد بالبيت اساعد امي لان الوالد مايبي شغاله بالبيت وبيتنا كبيرواتفرغ لنفسي وياليتني مافكرت هالتفكير
اول سنتين عادي بعدين بديت اتملل قلت بسجل باي دوره هذيك الفتره تقدم لي معرس فرحت وقلت بلا دراسه خلاص باتزوج
تم كل شي ودخلت بالشوفه الشرعيه وكنت خايفه بس قلت شي طبيعي بس سارت مشاكل مع اهلي هذيك الليله لاني اشترطت بيت شرعي واهما رفضو اللي هم اهلي
هذيك الليله كلها بكي قلت خلاص اهلي مايبوني قلت بوافق ووكل امري لله مع اني احب تكون لي حياتي الخاصه لاني بعيش مع امه وخواته
المهم بعد يومين حسيت بنفور غير طبيعي قلت للوالد خلاص ماابيه مع اني توقعت الوالد بيتكلم علي بس بكل برود قال بكيفك استغربت رده فعله
بعد فتره امي تقول زين انك رفضتي قلت ليش قالت لا انا ولا ابوك كنا مرتاحين له طيب ليييش ماقلتولي قالت مانبي نقطع نصيبك بالله كيف تجي ذي
المهم ارتحت وعشت حياتي وكل يوم اقول بيجي عريس الغفله
وأكرف بالبيت قلت للوالد ابي اسجل دوره انقليزي بحكم اني احب الانقليزي عيا وقام يحط اعذار مو مقنعه((بنات علاقتي بأبوي جدا رسميه مستحيل اقعد انا وياه سوا ))المهم قلت لامي تتوسط لي وتكلمه
تدرون وش قال لها انتي ساس البلا اللي تخربين عقليتها هي ماتبي بس انتي السبب
امي زعلت وقالت بكيفك انتي وياه والله معاد اتدخل
ومن يومها وانا مستحيل اطلب منه شي حتي لو بسيط
سبع سنوات وانا بس زي الخدامه بالبيت لا اخت بسني اسولف وياها واخواني كلن لاهي بدنياه لانهم ببساطه اولاد واخواتي صغار بالابتدائي بس ما عندي الا امي
ليلي سار نهار ونهاري كله نوم اخلص شغل البيت بالليل عشان يخلوني اهلي انام بالنهار او احيانا اصحي العصر عشان اذاكر لاخواتي
طفشت بشكل غير طبيعي
قبل 3سنوات تقدمو لي 2 سوا شوفو الحظ
واحد نعرفه من قرايبنا والثاني من بعيد
اللي من بعيد جت امه تشوفني تخيلو متي بالظهر الساعه وحده توقييييت غلط
عيت ادخل لاني ما احب هالطريقه وشو تشوفني سلعه تعاينني قبل الشرا ء المهم دخلت بعد طلبه من امي والشكل ابد غلط توني صاحيه من النوم
شافتني ومدري وش رايها فيني طلعت وخليتها وكملت نومي لاني غسلت يدي منها وش هالجيه الغلط
المهم قالو لاهلي اسالو عنا وردو لنا خبر<<<ركزو عليها
اهلي سالو وقالو الولد ماينعاب وش رايك قلت مابداش موافقه
اهلي ماردو عليهم قالو اذا يبون يدقون بنتنا عندنا وولدهم عندهم طبعا انا زعلت من اهلي
العريس الثاني والله يابنات اني للحين اتحسف مليوووون مره عليه تدرون ليه لاني كنت ادعي ربي اني اتزوجه
تخيلو امه كلمت امي قالت نبي نتقدم بس نبي تسالين البنت قبل مايتقدمون الرجال ركزو تبي تعرف رايي قبل مايتقدمون
وش سوت امي الله يهديها طيرااااان راحت لابوي ابوي عيا على طول لانه الولد كان مريض قبل فتره وتعالج والحين صحته بخير
قال لا تفاتحينها ابد كلميها وقولي البنت عيت مع انه والله انه ماينرد الولد مافيه عيب ووظيفته مره حلوه
طبعا مادريت الا بعد ماانتهت السالفه
بعد سنه قالتلي وحه من حريم اخوانه لانها قريبه مني انهم يبون يتقدمون مره ثانيه فرحت وقلت لامي قالت طيب هو كبير وانتي صغيره
عمره الحين اربعين وانا خمسه وعشرين خلاص وش تبين اكثر انتي وافقو قالت طيب
بعد فتره كلمتني وقالت خلاص ماعاد بيجون قلت ليه قالت مدري صرفو النظر عنك
والله اني تحطمممممت حسيت اني ولا شي وما عندي حظ بالحياه
وان الفرحه عمرها ما تكتمل
وكل ما تتذكر امي تقول ياليتنا مارديناه والله انه مايتفوت اقول خلاص قفلي الموضوع
من بعدها محد تقدم لي 3بس من عرفت عمري تقدمو لي مع اني والله مو شينه بالعكس البنات يوم كنا ندرس يقولون انتي بتتخرجي وعلى طول بتتزوجين مستحيل تقعدين بالبيت
آآآآآه والله اني عفنت بالبيت
المهم
علاقتي بامي تقوت شوي دايم سوالفنا مع بعض دايم تتشكي من ابوي ومن الرجال وانهم كلهم مافيهم خير لدرجه اني سرت اكره ابوي
والله يا بنات اني اكرهه ماودي اشوفه افرح اذا عنده سفره عمل عشان ارتاح واذا سافر دايم يكلم واصرف عمري عشان ما اكلمه
بتقولون ماعندك صديقات بقول الا بس تزوجو اساسا صديقاتي قليييل بس 2 وكلهم بعيد
وكل وحده لاهيه مع عيالها وزوجها
بدت تجيني امراض بسبب كثره الشغل لان الشغاله تعتبر ببيتنا من المحرمات عشان عندنا اولاد عذر ماله داعي والله مستعده انومها عندي بس ابد نكلم صخر
حتي لما رحت المستشفي الممرضه تسالني ليش ماتخلين زوجك يجيب لك شغاله تساعدك علي البيت وعيالك ابتسم وقلت انا مو متزوجه
والله احيانا احلم اني سندرلا وبيجي الشخص التي تحلم به كل الفتيات
طبعا بالسبع سنوات زاد وزني ودايم اهلي يتكلمون علي خففي عشان تتزوجين شفتو الاغراءت
لا تقولون سجلي بنادي لان ابوي معيي يقول تمرني بالبيت وامشي ع السير طبعا وفر لي سير كهربائي عشان ما اقول ابي اطلع
التلفزيون ابد ما عندنا لا دش ولا شي حتي المجد عيا منها
الحمد لله الشي الوحيد في امي وابوي انهم محترمين بعض
قبل فتره فاتحت ابوي بموضوع انهم بالمكتبه يبيعون سديات تعلم كمبيوتر وانقليزي بس اروح للمعهد يسوون لي اختبار واخذ شهاده
تدرون وش قال قال بنجيبها لك بس احلقيها وياشر علي شنباته ان درستيها بس تاخذينها فتره وترمينها
بالله من وين بيجيني نفس بعد هالكلام
طبعا قدمت على وظايف ويبون شهاده دورات وانا ما عندي الا الثنوي
طبعا قدمت عليها بعد مشاكل ان ليش تتوظفين انا ماقصرت عليك بشي
طلبته ادخل تحفيظ قران قال احفظي وانا اسمع لك
بغيت اتطوع بوظيفه بس قلت بلاش اكيد بيعيي
بنات والله متنفسي الوحيد انه النت لا وما عندي راحه عليه الا اخر الليل
ماعندي اخت بسني اسولف معها صديقاتي والله يوفقهم متزوجات
طلعات للناس ما ابي لان خلاص احس شكلي غلط مع ان سمنتي عاديه مو لدرجه الترهل بالعكس متناسق مع جسمي
جيران مانطلع لان امي مو من النوع اللي تحب تسير
قسم بالله اني بس ابي اتزوج مو حب في الزواج لا ابي يكون لي شقه وعندي عيال ووظيفه والرجال بكيفه بس اهم شي مايهينني
واعيش مرتاحه ماعلي من احد
سرت حساااسه جدا حتي من اتفه لاسباب
وصلت لمرحله اني ما عاد اقدار ابكي احس دموعي تحجرت بعيوني
سرت مهمله جدا بنفسي ما اسبح الا مره وحده بالاسبوع وبعد طلبه هذا بالصيف فما بالكم الحين بالشتا والله العام اني ما كنت اسبح الا من الدوره للدوره
لبسي بالبيت صار كله ارواب ولو علي لو جونا ناس ما البس الا جلابيات
ابي احد يحسسني اني انثي ابي اسمع كلام حلو ابي احس بالحنان ابي احد اشكيله اذا تضايقت
امي والله ماتقصر بس كله نصايح ابي احد يشجعني على شي
والله ان مره وحده شافتني قالت كل مره اشوفك احلا من قبل وش هالزين قسم بالله بغيت احب فوق راسها من الوناسه حسيت
اخواني توظفو وابوي ماشي بواسطاته معهم طيب عطني وجه كلم احد يتوسط لي باي مكان
والله احيانا اشك انه يجي عرسان وابوي يعيي بدون مايقولي بزعم انه يبي لي الافظل
بنات والله احيانا اقول وش في بعض البنات مايعرفون يسوون شي بالبيت وتزوجو وعاشو
او بنات صايعات وبس طلعات وروحات وتزوجو
لا تقولون اختلطي عشان الحريم يشوفونك اختلط وما خليت عرس ولا عزيمه كبيره الا رحت لها
مليت ابي اعيش ابي استانس ابي اشوف الدنيا والله احيانا اقول خلاص اهلي تعودو علي ما عاد يبون يستغنون عني
لاتقولون كلمي ابوك خلي احد يكلمه راااسه حجر مايسمع لاحد
طبعا بيتنا من 20 سنه ماغيرنا فيه شي الا المجالس حقت الضيوف
ليييه مدري مع ان وظيفه ابوي مره حلوه ومو بخل بس لانها بالنسبه له مو مهمه وكل ماقلنا له غير يقول احمدو ربكم شوفو غيركم مو لاقي وين يسكن
بالله وش علينا فيهم اهم شي عنده لبسنا يكون كشخه والاكل والشرب مايقصر فيه
تدرون بعد
ان ماعندي جوال ليه يقول وش تبين فيه عندك جوال امك امي عادي تقول خلي جوالي عندك مابيه الا للضروره
عشان تحسون بالفرق اكثر
اخواني الاولاد كل واحد منهم معه جهازين رقم خاص ورقم عام
لا واكتشفت مره بالصدفه ان واحد من اخواني ان معه خمس شرائح طبعا ماقلت له لاني فتحت درج سيارته بدون علمه وانا مو ناقصه مشاكل
واللي اكتشفته (سرت مكتشفه كل شي من فضاوتي)انه يكلم بنات
قلت لامي قالت هو ولد مايلحقه عيب بس البنت هي اللي تشيل عيبها
لييييييه كذا ياربي
اخواني طبعا اللي تبينه نجيبه وانتي بالبيت اعطينا فلوس ونجيب لك طبعا اذا الشي ماعجبهم لا مايجيبونه
مره طلبت اخوي يجيب لي فلاش حق الكميوتر عشان اخزن فيه اي شي يعجبني لان جهاز الكمبيوتر حقنا مشترك للبيت كله
تدرون وش قال لاااااا مايصلح للبنات اييه ليييه مايصلح كذا وبس
لا ويقولون لا تصير اخلاقك زفت ولا تسمنين وخليك زي الفراشه بالبيت اضحكي واستانسي
وخليك اجتماعيه مع الناس للمعلوميه بس انا مررره خجوله والله مدري هي خجل او عدم ثقه بالنفس ولارجح عدم ثقه واجتمعت الثنتين
ما عرف اكون علاقات مع احد اذا تكلمت مع احد اقعد احاسب نفسي يمكن قلت شي غلط او زعلو من كلمه
واغلب اللي اعرفهم سمعت انهم يقولون هاذي مغرووووره مره وما تعطي احد وجه بالعكس والله
دايم خايفه من ايش ما ادري احس اي شي اسويه انه غلط واهلي بيحاسبوني عليه
خلاص احس عندي قابليه للانحراف
لاتقولون قوي علاقتك بالله الحمد لله علاقتي قويه دايم اقرا قران واصوم وحتي بشغل البيت احتسب الاجر
بس دايم احس فيه شي يمنعني
طلبت امي ابوي يجيب لنا شيخ يقرا علينا قال انا بقرا عليكم
طبعا انا فيني عين طبعا كلمت شيخ وقلتله الاعراض وقالي فيك عين
عشان شغلي بالبيت لاني نظيفه مره فا يديني واصابعي الاحساس فيها ضعيف مره والم بظهري رحت المستشفي وعلاجات طبيعيه وقلق
فخليتها بس مابي اشتغل وان اشتغلت ما اصدق اخلص كاني اسوي اكبر مجهود
وحتي اللبس بس ارجع من مشوار علي طول ابدل لان جسمي كله حساسيه واحس اني لابسه شوك
نومي سار يتعبني ان نمت ما تقلب لازم اوقت الساعه عشان انقلب لان اذا ما انقلب اقوم وجنبي كله يوجعني
طبعا نومي يالله انام وما عندي مشكله لو اواصل ثلاث ايام بس احس بتعب خفيف
والله مدري وش اقول ووش اخلي وادري ان الشكو لغير الله مذله بس وش اسوي
تعبت اكتم بداخلي
أعذروني على الاطاله بس شي بنفسب وحبيت اقوله ويمكن القي حل
وتكفون تكفون ادعولي باي شي زين
to0o0th @to0o0th
عضوة جديدة
يلزم عليك تسجيل الدخول أولًا لكتابة تعليق.
اللهم يارب العالمين ياسميع يامجيب ياحنان يامنان أسألك أن تسعد أختي في الله سعادة بالغة وان ترزقها الزوج الصالح المحب لها
آآآآآآآآآآآآمين يارحم الراحمين00
آآآآآآآآآآآآمين يارحم الراحمين00
الله معاك لاتشيلي هم وادعي ربك في كل وقت
وماراح يخيب ظنك لاتخلي للياس مكان بحياتك
عشان ترتاحي وكل شي صار اكيد انه من صالحك
ومايعرفها الا الله فلا تياسي واجعلي التفاؤل معك
في كل وقت واكثري من الاستغفار وابتعدي عن التملل
وماراح يخيب ظنك لاتخلي للياس مكان بحياتك
عشان ترتاحي وكل شي صار اكيد انه من صالحك
ومايعرفها الا الله فلا تياسي واجعلي التفاؤل معك
في كل وقت واكثري من الاستغفار وابتعدي عن التملل
و الله وجعتي لي قلبي و ربي
الا يشوف مصيبة غيره تهون عليه مصيبته :(
الله يهونها عليكِ ويرزقكِ بالزوج الصالح
و الله يهدي الوالد و الوالده و يصلح حالهم
الا يشوف مصيبة غيره تهون عليه مصيبته :(
الله يهونها عليكِ ويرزقكِ بالزوج الصالح
و الله يهدي الوالد و الوالده و يصلح حالهم
ياحي ياقيوم يفرج همك من حيث لا تحتسبين
بس عندك افكار كثيره وكلها تحتاج خروج من البيت
طيب حفظ القرآن احفظي في البيت والا في منتديات مع بنات
بالماسنجر اهتمي بنفسك عشان نفسك مو عشان احد
مو عشان الزوج عشان نفسك حبيها قبل تحبين ان احد يمدحك
عورني قلبي وانا أقر وتذكرت شيء وانتي تحكين
تصدقين اكتشفت ان الناس لما يعرفون همنا وحزننا ومشاكلنا يزيدهم هذا نفور منا مو قرب
لأن في الغالب الناس يحبون الرزه والكشخه وانهم يتعرفون على ناس ماعندهم مشاكل ابد
وهذا سبب بعد الصديقات بعد
اكتبي في المنتدى معنا وتفاعلي والله تنسين همك وتعيشين هم العالم كلهم
انتي توك صغيره وباذن العزيز الحكيم يبي يجيك اروع واحسن رجال في الدنيا كلها
تو عمرك 25 والله فيه بنات عمرهم 30 و34 يتالمون كل يوم وليله
عمرك رائع والجمال مو بوابة الزواج
انتي الان فاضيه استغلي هالليل بالدعاء والدعاء والدعاء تحري أوقات الإجابه لا تتركين ولا وقت
واقري سورة البقره كل يوم وباذن الله اخذها بركه
بس عندك افكار كثيره وكلها تحتاج خروج من البيت
طيب حفظ القرآن احفظي في البيت والا في منتديات مع بنات
بالماسنجر اهتمي بنفسك عشان نفسك مو عشان احد
مو عشان الزوج عشان نفسك حبيها قبل تحبين ان احد يمدحك
عورني قلبي وانا أقر وتذكرت شيء وانتي تحكين
تصدقين اكتشفت ان الناس لما يعرفون همنا وحزننا ومشاكلنا يزيدهم هذا نفور منا مو قرب
لأن في الغالب الناس يحبون الرزه والكشخه وانهم يتعرفون على ناس ماعندهم مشاكل ابد
وهذا سبب بعد الصديقات بعد
اكتبي في المنتدى معنا وتفاعلي والله تنسين همك وتعيشين هم العالم كلهم
انتي توك صغيره وباذن العزيز الحكيم يبي يجيك اروع واحسن رجال في الدنيا كلها
تو عمرك 25 والله فيه بنات عمرهم 30 و34 يتالمون كل يوم وليله
عمرك رائع والجمال مو بوابة الزواج
انتي الان فاضيه استغلي هالليل بالدعاء والدعاء والدعاء تحري أوقات الإجابه لا تتركين ولا وقت
واقري سورة البقره كل يوم وباذن الله اخذها بركه
الصفحة الأخيرة
يارب يشرح لك صدرك وييسرلك امرك
و يعينك يا قمر
والله بداخلي كلام كثييير نفسي اقوله ليكي
بس دحيين مخي في عالم تاني ... بس لي رجعه تانيه و رد تاني
بس قرأت الموضوع على عجل و حبيت اني ادعي لك
يارب يا حنان يا بديع السماوات الارض يا من اذا دعي اجاب
اسألك ان تسخر لاختي زوج صالح يحبها ويسعدها
انك سميع مجيب الدعاء