قصتي ويا ربيعاتي ((تأليف))

السلام عليكم هذي الله يسلمكم احدى القصص اللي مؤلفتها ربيعتي
وإليكم القصة :27:


سلام عليهم بعد ما جفونا .. وقلبي بيديهم وهم انكرونا

عنوانها: ) طاخ طيخ بطيخ(وعلى فكره الاسامي الموجوده اسامي ربيعاتي وبعض المواقف حقيقيه والشخصيات بعد شخصيات ربيعاتي الحقيقيه بس اغلب الامور والمواقف من نسج الخيال فقط الشخصيات حقيقيه باستثناء هنادي الي اسمها مب صدقي اما باقي ربيعاتي اساميهن صدقيه وشخصياتهن بعد

الكاتبه: يتيمه زايد...

كانت تراقب بحذر وشوي شوي تطلع راسها

هدى: شوه المديره يايه

هنادي: صبري شوي خليني اوايج لا تهذربين فوق راسي

هدى: انزين لا طلعين راسج المديره تشوفج

هنادي: الله يخسج انطبي شوي

هدى: يا ويلي اذا زختنا بتزقر ابويه بتكتبني تعهد وابويه بيقعد يصارخ علي انا مب متفيجه لحنته

هنادي: يلا بنفل الممر فاضي

هدى: انتي متاكده

هنادي: يوم انج مب ويه شرده ليش تشردين وياي

هدى: انا غلطانه طاوعتج

هنادي: انا الي غلطانه شردت ويا ديايه لو شارده مع صالحه ولا حسنا احسن لي

هدى توطي صوتها: انزين بلا هذربان يلا خلينا نطلع ريحه الحمام تخنق

هنادي: شسويلج انتي قلتي ننخش في الحمامات

هدى: ايوا حطي كل شي ع راسي

ورن جرس الحصه الثالثه

هدى وهنادي انخشن بين زحمه البنات وعلى طول راحن صفهن بس كانن يدعن عسى بس ان المديره ما عرفتهن بس المديره كانت شاكه بهن بس مو متاكده

اسماء: وين كنتن ؟

هنادي وهي تعدل شعرها: وين يعني شاردات

اسماء وهي تخز: انتن شقايل بتنجحن هالسنه

هنادي: انتي ما عليج بننجح

اسماء طالعها بنص عين: ما اظني

حسنا وهي داشه الصف: فديييييت هنادي والله اقول الغلا وين شردتي ولا قلتيلي

هنادي: دورتج ما لقيتج وشردت مع هدى

حسنا: وما لقيتي الا تشردين مع اكبر جبانه

هنادي: اصلا هذي اول واخر مره بشرد مع هدى

صالحه دش الصف ومعاها مريوم

صالحه: مرحبا بالفالات

هدى وهي بتموت من الزيغه: صالحه دخيلج المعلمه تخبرت عنا

صالحه تضحك على شكل هدى الخايفه: لا فديتج ما سالت

حسنا: يوم انج بنت مصريه وشاطره ليش شردتي

هدى: اول وااخر مره صدقوني

مريم وهي تضحك: صدق يا هدى انج بنت مصريه

هدى: برايني بنت مصريه ولا ارسب او انزخ

حسنا: ليش حد شافكن

هنادي: المديره بس ما اظني عرفتنا فلينا على طول

صالحه: هنادي شورايج الحصه الرابعه نشرد

هنادي: وليش مب الحين؟

صالحه: الحين علينا عربي ما فينا على حشرتها

مريوم: انزين يا الشاطره والرابعه منو علينا؟

صالحه: علينا رياضه

حسنا: انا موافقه

مريوم: وانا بعد

هنادي: حتى انا

مريوم:وانتي يا اسماء

اسماء: خلوني بعيده دخيلكن

حسنا: وهدى ما بتشردين

مريوم: الله يهديج يا حسنا الحين تسالين هدى وتوها قايله ان شردتها مع هنادي اول واخر شرده

حسنا: اوووه صح نسيت

صالحه : بسكن هذربان الابله يت

اسماء: الله يعين اليوم التسميع

صالحه تلتفت صوب اسماء: وشو تسميعه بعد

اسماء: يا حلوه تسميع درس العصر العباسي

صالحه وعلى ويهها علامات استفهام: نحن متى خذنا هالدرس

حسنا: لما كنتي شارده مع هنادي

دشت المعلمه العربي ابله سحر

ابله سحر: السلام عليكم يا بنات

بنات الصف: وعليكم السلام ورحمه الله وبركاته

ابله سحر:شو حدرتو الدرس

حسنا: أي درس

ابله سحر : درس النحو يا حسنا

حسنا بضحكات متقطعه: من صدقج انتي انا اصلا كتاب النحو ما يبته

هدى تغير السالفه: ابله ما بتسمعين الدرس

هنادي تقرص هدى وتوشوشلها: الله ينطبج انا مب حافظه

هدى بصوت واطي : شسويلج

هنادي: انا براويج

وتكملت الحصه وطبعا هنادي وصالحه وحسنا ومريوم تعاقبن لا نهن مب حافظات وبعض بنات الصف

(هنادي من العين بس لانها تحب ربيعاتها وما تروم تفارقهن تضرب خط كل يوم وتي مدرسه..... لانها تدرس هناك اما اسماء فهي الاولى في الصف وشاطره بس ما ادري شقايل مرابعه هالشله الفاسده صالحه مستواها بعد حلو وهي ربيعه اسماء من زمان ووايد تحب الشردات بس مب كل الحصص اما حسنا فهي لسانها طويل وعفوية جداً وما في ابله تسلم من لسانها بس هي حبوبه ووايد تحب هنادي اما هدى فهي شاطره وكانت ناويه تدش علمي بس تعايزت ولا هي شاطره وعلاقتها بهنادي وااايد حلوه اما مريوم فهي ربيعتهن كلهن وتحبهن كلهن وهي بعد شاطره وتحب الشردات بس مب في كل الاحيان بالمختصر الشله شاطره بس في منهن اللي يحبن الشرده بس مب كل الحصص ومش أي حصص......... الحين بخليكم للجزء الثاني)

انتظر ردودكم