السلام عليكم ورحمة الله وبركاتة
كيفكم يابنات ؟
انا وعدتكم اكتب لكم قصةولادتي واللي كانت في المجمع الطبي بالظهران
وبصراحة يابنات كانه حلم مومصدقة اني ولدت
هذا سلمكم الله بعد معاناة من المراجعات والمشي اليومي واكل التمر بالشهر التاسع بكثرة لتسهيل الولادة مع الادعية الا اني عوشرت
وخلاص النفسية صارت زفت لاني مره كنت خايفه وموعارفه وش قدامي بس اقرا بالمنتدى قصص بعض البنات
وفي اخر مراجعة لي سوت لي الدكتورة كشف من تحت وقامت تضغط بشويش على بطني وقالت ان شاء الله تولدين قبل الطلق الصناعي وحددتلي بعد ثلاث ايام اتنوم واخذه وانا من دلاختي وافقت ماكنت ادري وشو الطلق ولا كيف الالم راح يكون
وبعد مارجعت البيت نمت شوي وقريت بالمنتدى عن الحلتيته وخليت زوجي يجيبها لي والله يابنات اني ظليت اشمشم فيها وريحتها معفنه وبقوة حتى زوجي لما جابها كان لافها بكذا كيس من ريحتها
وبعد العشاء قالي زوجي اشرايك نروح نمشي
ورحت ومشيت بس هالمره مشيي كان غير كنت امشي سررررريع ومده طويله لاني طفشت ابغى اولد وطول ماانا امشي كنت ادعي ربي يسهلي الولادة واني اولد اليوم
ورجعت البيت وتعشيت وطالعت التلفزيون شوي
وبعدين رحت انام وقبل انام سولفت مع زوجي وقلتله تخيل اصحيك بعد شوي واقولك ودني المستشفى واضحك وقمنا نسولف شوي ونتذكر مواقف صارت لنا تضحك بعدين هو نام
والله يابنات اني بس جلست نصف ساعة الا ويجيني الم في اسفل بطني اول مره احسه من بداية حملي كان مغص غريب
وقلت لنفسي يابنت لاتتوهمين هذي مو ولادة
الا ويرجع لي نفس المغص بعد عشر دقايق وصار يتكرر
انا هنا بديت اشك وقلت بحسب كم بين كل مغص والثاني
وكان المغص محتمل وبعدين لما حسبت له كان كل ست دقايق
وبعدها الا واحس شي نزل مني الله يكرمكم
واروح لدورة المياة الا واحصل افرازات شفافة مخلوط معها دم
انا هنا قمت اتنافض وابكي وعرفت ان ساعة الجد قربت
واروح اصحي زوجي وهوفز خايف ولبس بسرعة ووداني المستشفى لان الالم كل ماله يزيد
وانا كل ماجاني طلق تسمرت مكاني معد اقدر اتحرك واجلس اصيح
ونركب السيارة وطيران على المستشفى وزوجي يهديني ويذكرني بالادعيه وقالي موكنتي تتريقي وتقولي تخيل اصحيك سبحان الله صارت مزحة برزحة وكنت ارتجف مره خايفة واذا جاني طلق اقوله لاتمشي وقف احس اني بموت
ونوصل للمجمع والطوارئ ويدخلوني للكشف وزوجي يسوي اجراءات الدخول وكان الوقت الساعة 2 الفجر
وتجي الممرضة علشان تكشف وانا موقادرة اتحمل وماابغى احد يلمسني
وبعد ماكشفت قالتلي 3سانتي وانا اقول كل هالالم وبس ثلاثة سانتي
وقامت تقولي الممرضة مافيه يصيح انتا فيه طلق خذ نفس
وكان المستشفى على حظي فاضي مافيه حالات ولادة كثير
ولما طلعوني غرفة الولادة الا والغرفة اللي جمبي اسمع وحده تصيح خلاااص ولادة والدكتورة تصيح عليها باعلى صوت ادفعي ادفعي وزوجها كان ينتظرها برا وانا وزوجي قمنا نناظر ببعض ومصدومين من هالوضع وانا خلاص شوي ويغمى علي وزوجي قام يمسك يدي ويهديني الا والحرمه ماشاء الله ولدت وجابت ولد وزوجي بارك لزوجها وانا كنت اقول ياحظها ارتاحت
وكانت بس انا وهي حالات ولادة ذاك اليوم
المهم لمادخلوني غرفة الولادة ركبو جهاز الطلق وجت الدكتورة وكشفت وقالت كل شي تمام وراحت
والله يابنات انها كلما جت طلقه اني امسك بحافة السرير واحس شوي وبكسرة من شدة الالم وزوجي عندي بالغرفة اني مااحس علية يكلمني ماارد عليه ولاادري عن شي حتى ان زوجي يقول اني قلت كلام ويذكرني وانا والله ماادري حتى يقول انك قمتي توصين وان البيبي مايربيه الا امي ومن هالكلام بس ابغى ارتاح وكان الطلق معي حامي وكل شوي تجي طلقة ورى الثانيه وكان الرحم مفتوح 3سانتي من الساعة 2 وحتى الساعة6
وكل ماسالتهم كم وصل ويقولولي 3 كنت ابكي احس الوقت مره طول وكرهت هالرقم وقمت اقولهم ابغى عملية عطوني اي شي يهدي هالالم بس الدكتورة قالت فال الله ولافالك الطبيعي اسهل من القيصري وانا خلاص تعبت متى ينتهى هالالم موعارفة
ااااااااااااااااااه ياطول الوقت ذاك اليوم الساعة مو راضية تمشي
وبعد الساعة 6 بدا الرحم يفتح سانتي سانتي بعد كل نصف ساعة ولما جاء عشرة سانتي جت الدكتورة والقابلات ويشجعوني علشان الدفع وانا خلاص منتهية الطلق اخذ كل قوتي وهد حيلي ويصيحون يقولون ادفعي وانا ماقدرت ويقولوني بعدين البيبي فيه خطر وبيتعب وانا مافيه امل اسمع لحد كاني يابنات في عالم ثاني وانا ماعرفت ادفع زين
وبعدين تجيني ذيك الطلقه اللي بغيت اموت منها وادفع معها ويطلع احلى بدوري على الساعة عشرة الصباح
وجابوه عندي وسلمت عليه وكانت لحظات حلوة واخذوة علشان ينظفونه وخيطتني الدكتورة احلى خياطة وطبعا ما حسيت بشي واستغرب من البنات اللي يشتكون من الم الخياطة اصلا معد الوحده تحس بشي
وبعدين جابولي اكل وغيرت ملابسي وطلعوني غرفتي
وبعدهانمت نومه ماهي طبيعية من شدة الالم ولاني مواصلة من اليوم اللي قبلة
وماصحيت الاعلى الزيارة
وسلاااااااااااااااامتكم وعقبال كل الحوامل بولادة ميسرة
واللي تبي تسالني عن المستشفى بصراحة كلمت روعة قليلة علية ونظافة واهتمام وتعاملهم حلو وحتى الخياطة مره حلوة ولله الحمد وكل وحدة بالولادة بغرفة لحالها ومشددين مره على الاطفال وهذا شي حلو
واللي تبي تولد فيه بقولها اولدي فيه وانتي مطمنة
وفي النهاية ابي منكم دعوة ان الله يرزقني بر بدوري ويجعلة من حفظت كتاب الله
شدون @shdon_6
محررة برونزية
يلزم عليك تسجيل الدخول أولًا لكتابة تعليق.
نوارة83
•
الحمد لله على سلامتك ومبروك ماجبتي
ماشالله بس ياحلوه بنجوك وانتي ماتدرين
مستحيل ماتحسين بالخياطه بدون بنج
انا بنجوني والحمدلله ماكنها تشتغل فيني ماحسيت بالخياطه بس بنجتني في المهبل
بس اني قعدة بعقلي وشفتهم هههههههههه شكلك خرفتي وقت الولاده
بس آآآآه محلى لحضة شوفة النونو الله يرزقها المحرومين
مستحيل ماتحسين بالخياطه بدون بنج
انا بنجوني والحمدلله ماكنها تشتغل فيني ماحسيت بالخياطه بس بنجتني في المهبل
بس اني قعدة بعقلي وشفتهم هههههههههه شكلك خرفتي وقت الولاده
بس آآآآه محلى لحضة شوفة النونو الله يرزقها المحرومين
الصفحة الأخيرة