السلام عليكم ورحمة الله وبركاته
بدايةاسأل الله ان ييسر ولادة كل مسلمة وان يطرح في ذريتها البركة اللهم امين
والحقيقة شوقتوني اني اكتب لكم قصة ولادتي اللي تعذبت فيها كثير الله لا يورايكم اللي شفته
بداية القصة لما دخلت الشهر التاسع وعملت الدكتورة الفحص اياه( الفحص اللي بينعمل لتحديد حجم الحوض) المهم بعد ماعملت الفحص قالتلي الدكتورة ان حجم الحوض عندك ضيق ولازم ان وزن الطفل ما يتعدي 3.200 كجم والا بتتعسر ولادتك وقالتي لازم اتوقفي عن الحلويات والنشويات وتركزي علي الفواكه والخضار المهم مشيت علي هالبرنامج لحد يوم الولادة المعهود اللي كان قبل موعد الولادة المتوقع ب10 ايام وهذا اللي عملي لخبطة , بدا معي الوجع علي خفيف من الليل ولما قمنا انا وزوجي لصلاة الفجر وكملنا ماقدرت انام من الوجع اللي كان في ظهري وفي اسفل البطن لكني اعتقدت ان المشكلة في المسالك لاني كل ما كنت اروح للدكتورة تحليل البول اكرمكم الله يطلع مش مزبوط لان مابشرب مية كثير المهم بديت اشرب واشرب واشرب هاذق اليوم وزوجي يقولي يا مراة ممكن تكون اعراض ولادة اقوله موعدي مازال عليه10 ايام لان ماعندي خبرة وهذا اول ولادة ليا( والله لما اذكر الموقف باضحك)
المهم قعدت الالام معي وان مستحملة وزوجي طلع لمشوار بعد ما استئدني , قعدت الالام لحد المغرب حاولت اني اصلي جالسة وبعد ما كملت شعرت بشئ نزل مني ( القليل من الدم) اكرمكم الله فعرفت ان الاعراض اعراض ولادة وجاء زوجي وحملني للمستشفي طبعا الدكتورة هاذك اليوم ماكانت مناوبة المهم ايجوا الدكتورات المناوبات وكشفوا عليا الا وهما يضحكوا ويتكلموا بلغتهم وانا ما بفهمهم ولما كلموا زوجي قالوا له زوجتك شاربه ميه كثير ليششششش قال لهم انها كانت تعتقد انه الم مسالك مش الم ولادة المهم قالوا لازم تدخلي الحمام اكرمكم الله المهم هات يا كشف هات ياحمام وبعدين نوموني في غرفة وكانت الالام فضيعة( والله لما بذكرها جسمي بيقشعر) المهم اتصل زوجي علي الدكتورة اللي كنت بتابع عندها واجت وكشفت عليا وقعدت تسولف معاي ( بتحكي انجليزي) وتحكي للطبيبات الاخريات عني المهم كانت تبي ترفع من روحي المعنوية ( قالك واحد مشنوق وواحد باله في الحلوة) يعني ان الالام بدها تقطعني وهي ادردش عادي المهم بعد ما كشفت عليا قالتلي ايش اللي شاربتيه يا اسماء لازم تفرغي لان ممكن يصير ضغط علي المثانة اثناء الدفع وحاولت ماقدرت فأضطرت انها تسحبه بالانبوب ( وشوفوا الالم) ولكن الحمد لله علي كل حال , قعدت معاي الدكتورة لحد منتصف الليل تقريبا وبعدين استئدنت لان هاذيك اليوم ماهي مناوبة المهم لما كشفت عليا كان الرحم متوسع حوالي 4سم المهم قالت الدكتورة للمناوبات لازم تولد قبل 4 الصبح فخلوني نائمة وحطوا جهاز نبض الطفل وكل شوي يشوفوا النبض وانا الالام تزداد وخاصة بعد المهدئات اللي حسيتها هلوستني وفي عز الالام يسألوك تبي تاكلي او تشربي ( لاحول ولاقوة الا بالله ) هو في وحدة تقدر تأكل في هاذيقة الساعة , المهم قعدوا مراقبين نبض الطفل ولما تاخرت الولادة ونبض الطفل نزل شوي ويسالوني اذا حسيتي برغبة في الدفع قولي لنا المهم فجأة لقيتهم اتجمعوا وبدوا يعقموا في ايديهم ويعقموا في منطقة الولادة ويقولي ادفعي وانا احاول ادفع لكن ما في فائدة البيبي مار اضي يطلع واستمر الحال هذا فترة وبعدين قالتلي الدكتورة لازم تساعدني وتدفعي انا كنت بأحاول اني ادفع قد ما اقدر لكن مافأئدة واستمرت المحاولات لحد ماقالت الدكتورة لازم الولادة اتم بسرعة والا فيه خطر علي الام والطفل المهم قالتلي لازم ينسحب الطفل بالملقط ولازم توقعي علي ورقة بهذا الخصوص وانا هاذيقة اللحظة ما ادري عن حالي وقالت ممكن اتصير رضوض للطفل المهم انا سكت فكلموا زوجي وقال لهم فيه حل ثاني قالوا لا قال اعملوا اللي تشفوه في صالحها واستعملوا هذا الملقط وما احكيكلكم علي الالام المصحابة ليه بتشعرين كأن احشائك بدها تطلع ( مش عارفة اذا فيه وحدة مثلي جربته ام لا) الحقيقة اتشوفين الموت قدامك انا طول الفترة اللي قبلها استحملت وكنت اذكر الله وكان زوجي جنبي يصبرني والحقيقة هذا ليه دور كبير في رفع معنوياتي لان كان يذكرني بالله طول الوقت لكن لحظة ما دخلولي الملقط ما استحملت شوفت الموت قدامي الله لا يورايكم المهم طلعوا ابني وكان وزنه3.180 كجم والحمد لله اولا واخرا وسجد زوجي سجود شكر لحظتها والحقيقة ما بنسى ابدا وقفته معاي طول هاذيقة الفترة واقف علي راجليه ربي يجزيه خير ويقدرني علي طاعته المهم نقلوني لغرفة ثانية وارتحت شوي وبعدين نام زوجي شوي وكان الوقت وقت فجر المهم الصبج جابولي ابني شوي وبعدين عند الساعة 10 الصبح اجيت دكتورة الاطفال وقالتلي ابنك عنده مشكلة لان الولادة اتأخرت وهو شرب مية اثناء الولادة ولازم ننقلوه الي قسم الاطفال حتي يشوفوه الاخصائيين وهنا تبداء تفاصيل المرحلة الثانية
وتوة نستأذن منكم لاني مليت من الكتابة نكمل بعدين ان شاء الله
ام همام

أختي أسماء لا تطولي علينا بانتظارك

السلام عليكم ورحمة الله وبركاته
كيف حالكن يابنات ان شاء الله تمام وانا اسفة اني تأخرت عليكن بالجزء الثاني من قصة ولادتي ( هذا صارت مسلسل مش قصة):17: , بعد ما قالتلي الدكتورة ان ابنك لازم ينتقل لقسم الاطفال لان عنده مشاكل في التنفس وشرب مية كثير انا وقتها كان عندي ضيفة وما كان عندي هاذيق الرغبة اني اناقشها خاصة ان لغتها الانجليزية يا ذوب كلمة بالصيني وكلمة انجليزي , المهم بعد مارحت الضيفة زوجي جاء وحكيتله اللي صار وقالي انه كلم الدكتورة وان المشكلة ان شاء الله ماهي كبيرة , المهم هاذق اليوم مشي كله بين الضيفات جزاهم الله خير لحد المساء اجي زوجي وجاب معاه بعض الاكل وحاولت اني أكل وبعدين قتله روح طل علي البيبي شوف اخباره المهم راح وقالي انه نأئم والدكاترة في جنبه يشوفوا كمية القئ اللي عم بيرجعه لحتي يقدروا يشخصوا الحالة وبعدين ايجت الكتورة اللي كنت بتابع عندها وهنتني بالسلامة وقالتلي ان االمجموعة المناوبة قالوا انك تعبت لحد ما ولدت ولكن لاحظوا انك ماتعرفي تدفعي لهذا الولادة صعبت اكثر , وانا زي ماقلتلكم حاولت اني ادفع بكل قوة ولكن يمكن ان حجم الراس للبيبي كان كبير بالنسبة لحجم الحوض وهذا اللي تعب الولادة , والحال استمر علي نفس المنوال 3 ايام والحقيقة العناية جيدة جدا وزوجي كان يطل علي البيبي كل يوم مرتين والكلام نفس الكلام كمية القئ نفسها ما نقصت والدكاترة عندهم بيحكولك كل اشئ وما بيخبوا عليك المهم قبل ما اطلع بيوم راح زوجي لقسم الاطفال وبعدين جأني وحسيت انه شكله متغير مع انه من النوع القوي نوعا ما ( لا قوة الا بالله) المهم حسيت انه عنده كلام قلت له كيف حال البيبي قال الحمد لله قلت له مازال عم يرجع اما لا قال مازال بس الدكاترة قالوا انهم ماعرفوا ايش هو السبب اللي خليه ايرجع كثير وانه عم ينتظروا كبار الاطباء يجتمعوا ويدلوا بدلوهم لتحديد سبب القئ وقالوا انهم حطوا احتمالات كثيرة للسبب وبعدين فهمت من كلامه بطريقة غير مباشرة انه ممكن يموت الا وانا اقوله يعني ممكن يموت سكت شوي وقالي( قل لن يصيبنا الا ما كتب الله لنا) وان الاعمار بيد الله المهم انا استحملت شوي ولكن دموعي غلبتني وما قدرت امسكها قعدت ابكي وابكي وهو قاعد يصبرني بس حتي هو ما استحمل وخرج والدموع في عينييه وقعدت ابكي لوحدي واذكر الله واساله انه يحفظ ابني لي بعدين جاء زوجي وقالي انه كلم احد الاطباء ليشرح لي وضع ابني عله يصبرني لاني افهم اكثر من زوجي في المفردات الطبية ولكن صدقوني هاذيق اللحظة نصف الكلام مافهمته لانه عقلي شارد بعيد , المهم بعدين صبرني زوجي وحاولت اني انام شوي وبعدين ايجوا الممرضات وفكوا الخياطة وقالوا ان الحالة تحسنت يعني ممكن تطلعي من المستشفي واعطوا لي اذن الخروج ايجت دكتورتي ولما شافت شكلي حست انه متغير وحكي زوجي الها عن الوضع فقالت انها شافت دكتورة الاطفال المشرفة عليه وقالت ان الوضع ان شاء الله قويس وقالتلي تعالي معاي لقسم الاطفال لحتي تشوفي ابنك روحنا الي هناك وشوفته لقيت الابرة مغروزة في راسه وشكله يقطع القلب المهم شفته وبعدين اخذوا يصبروني وقالولي انه قويس وان كمية القئ بدات تنقص المهم رجعت علي البيت وانا خاطري مكسور لانه ابني مش معاي ورجعت علي البيت ونمت شوي حتي اهلي قلت ماراح اقدر اكلمهم لاني راح ابكي اكيد ( طبعا زوجي خبرهم اني ولدت والحمد لله) , المهم في المساء حاولت ان اشطف الحليب لانه صدري بدا يزعجني ونمنا هاذيق الليلة وفي الصبح كان زوجي بدوا يروح لحتي يشوف البيبي المهم قلت له بدي اروح معك ورحت معه وشفنا البيبي وكان نفس الحالة الابرة مغروزة ولكن الاطباء قالوا ان كمية القئ قلت عن يوم امس , المهم حاولت اني ارضعة لكن ماقبل يمكن لانهم رضعوه قبل ما يجي واحنا خارجين من المستشفي لقينا احدي الدكتورات المناوبات ليلة ولادتي وقالتلي انتي امس خرجتي من المستشفي كيف ترجعي اليوم مش قويس عليك واحنا في تقاليدنا المراة النافس مابتخرج من البيت 40 يوم وقال لها زوجي انها اجت تشوف ابنها بعدين جلست علي احدي الكراسي وراح زوجي علي مطعم اسلامي يشتري مشاوي المهم هو راح من هنا وانا اجتني دوخة من هنا وحسيت انه جسمي بدا يتعرق وعرفت انه هبوط في الدم وقعدت حوالي 15 دقيقة علي هاذي الحالة والناس عم تروح وتجي وانا اقول يارب امته بيجي وقلت لو تأخر اكثر راح اوقف وحدة من الممرضات لكن مشكلة اللغة انا ما بفهمهم الا ويجي زوجي ويشوفني ونرجع علي طول للبيت وعرفت ان الدكتورة اياه اخذتني بالعين ( واي عين عين الكافر) المهم لما رحت علي البيت وارتحت ونمت وبعدين اكلت الحمد لله افضل وكلم زوجي الدكتور بالموبايل وطمانه علي حالة البيبي وقال له ان القئ قل كثير وانه لو استمر بالمعدل هذا بكرة ان شاء الله راح يطلع المهم فرحت كثير وحمدت الله كثير علي هذا الفرج وقعدت استني بكرة بفارغ الصبر المهم الموعد كان الظهر وكلم زوجي الدكتور وانا استني في الاجابة الا ويقوله انه اتحسن وتقدر تأخذه علي البيت وفرحت كثير وراح زوجي واشتري غطاء ( بطانية) لانه وقتها كان خريف وجاب ابني لي واخذته وضميته الي صدري والحمد لله اولا واخرا بعد الصبر والمعاناة يأتي الفرج وهاذي هي قصة ولادتي
ايش رايكم مسلسل صح:17: :17: :17:
وهاذي صورة همام لما كان عمره 10 اشهر وتوة عمره سنة و7 شهور
http://forum.hawaaworld.com/files/28900/cvxzsd.jpg
ربي يسهل علي الحوامل ويقر اعينهم بالذرية الصالحة اللهم امين

الله يحفظه يارب ماشاءالله عليه يارب تشوفيه عريس:27:
واذا بدك العروس موجودة بنتي زينة يلا بستنة ردك :23:

السلام عليكم ورحمة الله وبركاته
الله يحفظك يازينة والله ضحكتني من قلبي وقعدت اتخيل في همام عريس وجنبه زينة بس لا تصعبوا علينا الشروط تري بنتراجع المهم الدين والاخلاق:27: :27: :27:
لكن قوليلي امته بنجي نخطب؟؟؟؟؟؟؟؟؟؟؟
الله يحفظلك زينة وتشوفيها عروس وتتهني بذريتها اللهم امين ويحفظ الذرية الصالحة لكل المسلمات:26: :26: :26: