ّ.ّ قصـة ولادتــــــي من طئ طئ لـ وعليكم السلام (( بكريـة ))

أهليييييين ياكرووووشات

طبعآ اول شي حابه أدعي لكل الحوامل أن الله يسهل ويتمم عليهم يااااااااااارب

ويرزق كل محرومه بالعيااال اللي يملون حياااااااااتهم اللهم أمين

وأحمد الله وأشكره على النعمة اللي رزقني إياهـ من جد أحلى شي بالدنيا الأطفال

الله يحفظ لي ولدي يااااااااارب ويخليه لي ويصلحه ويرزقني برهـ وعساني ماإنحرم منه

قولو آمين .... عشان الملائكة تقول ولكي مثلهآآ :39:

وبصراحه مافكرت بيوم اني اكتب قصة ولادتي بس تعرفون سهرانه اليوم ومروقه وطفشانه

قلت يلا يامززهـ ادخلي واكتبي قصة ولادتك منتي خسرانه شي خخخخخخخ

بس أي وحده واااصله نصيحه لاتدخلين الا بعد ماتولدين مو ناقصه تخترعين وتدعين علي :icon33:

ترا أبرأت ذمتي لله

وبسم الله نبـــــدآ ...........

أنا من يوم ماحملـت وأمي تقولـي أنتي أكيييييد طالعه علي ماراح تاخذين من التاسع الا يوم يومين وأن كثرتي الأسبوع الأول وبتولدين عااااااااد أنا خلاص امممممممممملت ومستانسه قلت اشوا الحمدلله ماراح أحس بثقل التاسع اللي الكل يشكي منه عاد انا دخلت التاسع بـ 20 رمضان ومن كثر ماانا متأمله اني بولد بأأوله ماشريت شي للعيد خخخخخخخ يقالي ماراح أعيد مع أهل زوجي واهلي وقلت الحمدلله أبفتك من قروشت العيــد ... تعرفون بالشهر الثامن والتاسع مافيك حيل تحكين راسك ...

الموهم دخلت شهري وطااايرهـ من الفرح انه خلاص قربت ولادتي ومع أنه الدكتوره قالت لي 20شوال يعني أخر يوم بالتاسع وقلت بنفسي ماعندها سالفه أمي ادرى :)
ومن يوم مادخلت شهري وأنا أمشي وأمششي وأمشششششششي واكل رررطب وأدعي بكل صلاة أنها تتسهل وأدعي ربي تكون ولادتي طبيعيه كان كل أملي أني اولد طبيعي من كثررر خوفي من القيصريه والبنج ومأخفيكم من كثر ماكنت خايفه من الولادة ماخليت أحد الا وسألته عن أبرة الظهر وقلت لااا لاا مستحيل أخذها

وعدى يوم يومين أسبوع عشره أيام ولا في أي بوادر ولااادة

وتورطت العيد جاا ولا تجهزت له :09:الموهم عااد دبرتهااا هههههههههههههههه

وخلص العيد وعدى برضو أسبوع أسبوعين وشكل ماعندي نييييه أبدددددد ولا فيه أي بوادر وبطني مرتفع وكل من شافني قال بطنك مرره مرتفع وانزل وأطلع مع الدرج وأمشي وأدعي وابكي واضحك وانسى وارجع افكر وكل شي سويته ولاااااااااااا في أمل شكلي مطوله

واشوا جا الفرج باقي لي يومين وأخلص التاسع وبذاك اليوم كنت عند اهلي وادخل الحمام الله يعزكم واشوف نقطة دم وأطيررر من الفرحة ولاعلمت أحد لاني ناوية اولد وبعدين ابشررهم

الموهم كلمت زوجي على طوووووووول وجاا طياااااااارااااااان متحمس أكثر مني ههههههههههه تعرفون أول مولود ( ماشاءالله تبارك الله ) الله لايخليني
قولو ماشاءالله العين حق :32:
< لاتجي وحده مدرعمه وتقول وش بنحسدك عليه قوولي ماشاءالله وانتي ساكته موب ناقصك شي
=>> بتنجلد :hahaha:

الموهم ونروح للطورارى ماعندنا وقت .. حتى مافكرت اروح لدكتورتي ودخلت الطوارى وكشفت علي قالت اررجعي توك الرحم مفتوح نص سانتي ومررتفع

ويضيق صدررررررررررري وجتني الصيحه خلاااااااااااص تعبت من الثقل ابي اولد وارتاح الله يكتب لي الاجر يااااااارب

ويطول بعمر أميمتي ويخليها لي ياارب من جد الأم شي عظيم

وقال زوجي يلا مشينا للبيت قرووشتيني ع الفاضي قلت لااااااااا مابي البيت ودني الممشى ابي اهلك عمري بالمشي خلاااااص ابي أولد مابقى لي الا يومين واخلص التاسع

ووداني الممشى ومشييييييييييت لين انهد حيلي وارجع البيت وامسح مافي شي

وخلصت التاااااسع وخديت اسبوع من العاشر ورحت لدكتورتي مراجعه وكشفت علي قالت الرحم مفتوح 3 سانتي يلا ولاده

وتجيني أم الركب .. وقلبي يددددددق بسرعة وفيني الصيحة ... قلت دكتوره طيب ماستعديت بكرا بجي قالت لا الحين بحولك لقسم الولاده وخلصي اوراقك وعلى القسم طوالي

واطلع من عندها واروح لزوجي بالانتظار وقال ها وش قالت وانا على طول واااااااااااااااااااع أنواع البكي تقولون بزر هههههههههههههههههههههه والله كل ما اتذكر نفسي أطيح من عيني

وخلصنا الاوراق ورحت لقسم الولادة ودخلت غرفة الولادة وأنتفض وابكي وخلاص حسيت الموت جاني
وحلف زوجي اقوله بذمتك لاحد يدري لين أولد < سعوديات لاحد يشرهه هههههههههههه

وتجي الممرضه وتعطيني التحميله وشوي وع طووول على الحمام الله يعزكم وينزل معي دم

وارجع أنسدح على السرير وتجيني ذيك الطلقه توها ببدايتها بس أحسها بظهري وأصيح وطبعا الخوف زااادها معي واقول لزوجي نااااااااااادهم ابي أبرة الظهر < من أولها

قال متأكده قلت ايه ايه نادهم بسرررررررعه خايفه تجيني الطلقه الثانيه وجت الممرضه ونادت الدكتوره المناوبه مو دكتورتي وقالت بس فلوسها مايشملها التأمين ولازم توقعون على الورقه

قلت اوكي مو مشكله قالت اخصائية بتسويها لك قلت اوكي ويقرأ زوجي الورقه علي جتني أم الركب

صراحه الكلام اللي مكتوب مرره يخوف مخلين مسؤليتهم من كل حاقه عاد تررددت واناظر زوجي اقول وش رايك أخذها .. عاد يطالعني قال انا اللي بولد والا انتي ماعلي منك اللي يريحك

وأحس بالطلقه مره ثانيه بظهري وبرضوو خفيفه بس حسيت فيها قلت خلاص خلاص وقع ابيهاا

وطبعا راح زوجي دفع الظاهر كانت بـ1600 مدري 1900 والله ناسية

الموهم وتجيني الاخصائيه من يوم ماشفتها مدري ليه مرره مارتحت لها قلت انتي بتعطيني الابره قالت ايه قلت طيب لوسمحتي بشويش قالت ماتخاافي بس انتبهي تتحركين ..

وقعدوني على السرير ومنزله راسي لتحت وممنوع أي حركه وقالت اذا حسيتي بطلق قولي لي عشان أوقف قلت اوكي ..

وقامت تحوس وترطن انقلش مع الممرضات وانا احس بخوف مو طبيعي ولا ارتحت لها ابدد

قلت دكتوره اشفي فيه مشكله :mad:وانا اتكلم وماقدر اتحرك خايفه من الشلل الله يكفينا الشر

قالت لا بس لانك مشاءالله ناصحه صعبه شوي قلت خلاص خلاص لاتسوين شي مابي

عاد من يوم ماقالت ناصحه وانا غاسله يدي اعرف بنات اسمن مني بمليون مره ومشاءالله سووها

قالت لا لا خلاص انا دخلت الابرهـ اهدي شوي واشوفها تحوس وطووولت السالفه واقوم انفخ عليها قلت خلاااااااااص ماابي الابره لوسمحتي مااااااااااابيها بتفكينها والا شلون < وهدا كله وانا مشبصه ولا اقدر انحرك اي حركه حسبي الله عليها

قامت ارتبكت قالت اهدي شوي بناديلك الاستشاري مرره شاطر بأبرة الظهر .. قلت يوم انك ماتعرفين وشوله تحطينها لي .. قالت لا بس انتي صعب لانك ناصحه مشاءالله قلت طيب ناديه بسررعه وتخيلووو كل هالحكي وانا مشبصه الابره بظهري وابحلت فيهاا لاهي اللي دخلتها ولا هي اللي طلعتها وجا زوجي واصيح صياح قلت تكفى انفخ عليهم ليه تحطها من الاول وهي ماعندها سالفه

الا شوي ويجي الاستشاري ويسلم على زوجي ويشوفني ابكي كان اردني وقال لا لا لاتخافين ماتخوف لهالدرجه الابرة .. واقوم انفخ عليه قلت يادكتور طلعها ماعد ابيهاااااااااااا فكوني بس

قال خلاص هي دخلتهاا بس مادخلتها بالمكان المناسب .. انا بضبطها تطمني

وشوي واشوا ضبطها وانسدحت على السرير ويشوفون الطلق بالجهاز ويسألني تحسين بشي قلت لا
قال حلوو بدأ مفعول البنج واذا حسيتي بالطلق ناديني ازيدلك نسبة البنج ..

عاد شوي والا والله يابنات تجيني ذيك الرجفه مو طبيعيه لدرجه حتى زوجي خااف قال شفيك وانا ابكي وكل جسمي يهززز كأني من جد مشبوكه بكهررب ويطلع زوجي وينادون الدكتور ويجي وشافني وانقلب وجهه وحتى زوجي يقوله

المهم مدري وش سوا بالجهاز الخاص بالابرة والحمددلله هدا النفض اللي فيني .. وعاد نادى زوجي برا ويوم دخل زوجي ماعلمني الا بعد الولاده .. الاخصائية زادت لي نسبة البنح وهو المفروض بالتدريج

بغيت اروح فيهاا .. بس احمد الله واشكره اللي انقذني الحمدلله من جددددددددددد

الموهم كل هالكلام كان يوم الاحد الساعه 8 بالليل والحمدلله هدت أوضاعي وكل شوي تدخل الدكتوره تشييك علي وعلى الضغط والطلق وتشووف كم فتح الرحم

جت الساعه 2 بالليل وكشفت قالت 5سانتي وتدخل يدها تبي تفتح مويى الجنين وتحاول تحاول مافي أمل

قالت الرحم مرتفع قلت يعني ايش يادكتوره قالت لا ماتخافيش ان شاءالله كلها ساعتين 3 وتولدين

وانا منسدحه واقرا بورد الولاده والحمدلله مررره ارتحت وزوجي نام ع الكرسي من التعب

وجت الساعه 7 الصباح دخلت يدهاا قالت توهـ الرحم 5 سانتي وطلقك خفيف بعطيك طلق صناعي
قلت طيب يألم يادكتوره قالت انتي حاطه أبرة الظهر منتي بحاسة بشي بس عشان تولدين بسرعه
قلت اوكي وتعطيني الطلق الصناعي نص ساعه بس وااسمع الجهاز حق نبض البيبي يرن رن
واشوفها تتصل بالتليفون ومرتبكه دقيقه تخيلوو الا الغرفه كلها ممرضات ودكتورتين وانواع الحوسه وكلهم يقولون يلا يلا عمليه عمليه

وانا طاقتني البوهـ مدري وش السالفه قلت ليه فيه مشكله وابكييييييي

واللي تفسخ حلقي واللي تلبسني طاقية الشعر ولا احد فهمني وش السالفه اقولهم وش فيه قولولي ابموت ؟

وربي يابنات طريقة دخلتهم تقولون خلاص يا انا يا البيبي بيجينا شي واصررخ اقوم زوجي اقوله قووم قووم شوف ووش السالفه مابي عمليه تكفوووووووون مابي عمليه

وزوجي غرقان بالنوم وقام الا فجأه الدكتوره تقول لازم توقع لازم الحين ندخلها العمليه

وزوجي قام مرتبك وش السالفه .. قالت البيبي وضعه خطررر قلت نبضاته لازم الحين توقع عمليه ووقع زوجي

وعاد وهم يسحبون سريري بيدخلوني لغرفة العمليات وانا اقول لزوجي دق على امي بسررعه ابي اكلمها اخاف اموت :icon33:ابي اسمع صوت امي تكفووووووون

وعطاني الجوال وادق ماترد واسحبته الممرضه ودخلوني غرفة العمليات واناظر زوجي قبل لا ادخل قلت تكفى قول لامي تدعي لي

ومارضى الدكتور لزوجي يدخل غرفة العمليات يقول حالتها طارئه ممنوع

<<<<<<<<<<<<<<<<< الحين داخل غرفة العملياات

يكفي منظر الغرفه والله مابي اخوفكم سامحوني بس منظرها بالنسبه لي يخررع لاني انا اساسا اخاف من المستشفيات بشكل مو طبيعي الله يكفينا شرها ويشفي كل مريض ومريضه يارب

الموهم حطولي ستاره مغطيه الجزء السفلي من جسمي وجت دكتورتي ترركض كيف الحال كويس قلت دكتوره انا مرره خايفه وانا ابكي عاد قالت لا لا مافي خوف مافي خوف ولاعد شفتها من ورا الستاره وفوق راسي الدكتور حق البنج

قلت دكتور الله يخليك علمني وش يسوون مرره خايفه وقام يهديني من جد الله يجزاه خير ذاك الدكتور كلامه مرره ريحني يقول ليه تخافين العمليه مرره سهله والحين البنات هم اللي يوقعون على القيصري

وعاد احس بضغط مو طبيعي بالجزء السفلي احس كأن شي يضغط ويضغط << اتوقع من التوتر والنفسيه والله اعلم

واصارخ اقول دكتورر امانه قولي ابموت <<< بدت تخررررررف الله يتوب عليناا
اسأل الله حسن الخاتمة
بس والله يابنات فعلا بوقتها حسيت الدنيا ماتسوى شي أهم شي أعمال الانسان قعدت ادعي اقول ياااارب ابي اعيش ابي اكثرر من اعمال الخير اخاف اموت الحين والحمدلله انا محافظه بس فيني ذنوب

والدكتور يقول اهدي واقول دكتور امانه قولي فتحو بطني والا لا ريحني الله يريحك يقول طيب اهدي لاتتوترين قلت طيب قولي وش يسوون اااااااااااا احس بألم دكتوره خلاص خلاص احس بألم

قام الدكتور جاب زي الأكسجين قلت وش هذا قال تنفسيه بترتاحين قلت بذمتك يادكتور مو بنج كامل

قال صدقيني بترتاحين لاتخافين قلت لااااااااا اخاف مابي بنج كامل قال مو بنج

قلت ترا بذمتك يادكتور لاتغشني عاد يوم استنشقت ولاعد حسيت بشي

>> عاد انا ماخذه موقف من البنج الكامل لأن بنت خالتي الله يرحمها ويغفرلها ويسكنها جناته ماتت بسبب جرعه زايده من البنج ومن بعدها ونا اخاف منه وادري ان الاعمار بيد الله بس الخوف لابد منه الله يحسن خاتمتنا

وعاد بعدهآآ صحيت وانا بالغرفه وحوليني أهلي وزوجي الله لايخليني منهم

وطبعاا ماشفت ولدي اول شي الا بجوال اختي مصورته

واحمد الله وأشكره على النعمه اللي رزقني اياهـا من جد والله يابنااات اول ماشفت ولدي حسيت بشي هون علي كل ألم وخوف مر علي بالولاده

والحمدلله على كل حال ........

ونصيحة من أخت ... الخوف لابد منه بس حاولو تسترخون والله يابنات الخوف والتوتر يصعبون الولاده اكثر واكثر

وأتمنى لكل الحوامل بالولاده الميسره الطبيعيه المسهله من عند رب العالمين

واتمنى لكل محرومه أن الله يرزقها بالطفل السليم المعافى ولاتقنطو من رحمة الله عليكم بالدعاء ثم الدعاء

ماشاءالله تبارك الله والحمدلله والله يابنات أن بالدعاء ربي حققلي أشياء كنت أحلم فيها

كنت أدعي بآخر الليل .. واذا نزل المطرر وحسنت من نفسي تركت المعاصي ودايم اقول فقلبي من ترك شي لله عوضه خيرا منه واكيد ربي بيعوضني أحسنو الظن حتى لو طال الانتظار تأكدي ان الله مو مخيب أملك وقادر على كل شي سبحانه

وأتمنى تدعون لي أن الله يطول بعمر والدي ويخلي لي زوجي وولدي ويسخرهم لي اللهم امين < ولكم بالمثل:39:

ومتأسفه اذا خوفت اي وحده فيكم من الولاده ترا والله ماكنت اقصد بس هذا كل اللي صار معي وحاولت أختصر بقدر الأمكان

وأي سؤال انا حاضره

سـِ يـو