صباح الخير ..
مو عارفه من وين أبدأ ..
أبدأ من قصة فرحتي بهالدنيا اللي هو يوم ارتباطي بهالزوج الغالي
ولا أبدأ من قصة ألمي بدفنه تحت الثرى ..
بإإإختصار عشت سنتين وأربع شهور (فترة زواجي) عشت مثل الأميره
ذقت طعم الحب وحطيت نغمة جوالي له ( ألا ياوقت ) بفترة الملكه
ذقت طعم الحياه وحطيت نغمة جوالي له (علمتني كيف أحب فيك الحياه) بالسنه الأولى بزواجي
ذقت طعم السعاده وحطيت نغمة جوالي (ربي يحفظك طول الأيام ليه) بالسنه الثانيه بزواجي
ذقت طعم الفرحه وحطيت نغمة جوالي له ( أنت عندي حاجه غير ) بالشهور الأخيره
زوجي فيه صفتين علقتني في بجنون (حنون حيييييييل - كريم معي حييييل )
تزوجته وكان أكبر مني بتسع سنوات .. كنت وقتها بآخر سنه بالكليه
جدا تعاون معي .. وهو اللي دخل برأسي فكرة أني أكمل ماجستير دام تخصصي حلو وأحب أبدع فيه
ماكان بيننا أي حواجز .. ساعات أحس أننا أصدقاء ونلعب ونستهبل
وساعات أحس أني كأني بنته وقاعد يدلعني .. وساعات أحس أنه الزوج الحنون الرومنسي ..
علمني الحياه حبه حبه .. فهمني أشياء كثيره .. وربي خلال هالسنتين تعلمت منه حاجات كثير كثير ..
زوجي كان من النوع اللي يساعدني بشغل البيت ..
والله ساعات أغسل المواعين وهو جنبي يقطع السلطه عالدرج
أقول أرتاح كفايه تعبك برا .. يقول لا خاطري أسولف معك وأقطعلك السلطه ..
كنت أكثر شيئ أحبه في (مفاجآته)..
ياكم يوم دخل علي وبيده ورده حمراء ..
ياكم يوم يتصل علي يقول تجهزي بجي آخذك مجهزلك شيئ ونطلع عشاء بمطعم ..
ياكم يوم يقول اجهزي بوديك شيئ تحبينه اكثر مني ونطلع نتمشى بالسياره ونشتري آيسكريم كون زون (لأني حيل أحب الاسكريم) ..
ياكم مره بالسياره يقول اسمعي هالأغنيه اهداء لك ..
ياكم مره يصيدني وأنا سرحانه ويقول حظ من شغل بالك ..
ياكم مره يصحيني من النوم وألقاه مجهز فطورنا (مايعرف يسوي الا شكشوكه وصحن جبن وزيتون )..
ياكم مره ألقاه مغسل ملابسي وموزعها عشان تنشف (لأني كنت حامل ويبيني ارتاح)..
هذي غيض من فيض لجزء من حياتنا ..
كان من وقت الملكه يقول بعد ماتتخرجين ابيك تشدين حيلك وتجيبين بنت وأهم شيئ تشبهلك ..
حملت ووصلت الشهر السابع وبالأشعه قالت أكيد بنت 100%
بلغت زوجي ووقتها طاااااااااااار من الفرحه ..
يقول بسرعه جيبيها .. متى تجي .. متى أسميها لمى .. متى ألعب معها .. وووووو...الخ
أحلام وتحطمت .. أماني وإنكسرت ..
,,,,,,,,,,,,,,
قــــــــــــصة ألمــــــي بدت من يوم الثلاثاء 28 - 1
كنا راجعين من الديره للرياض
كنا في بيت أهله
جاب لنا عشاء سمك (أفضل أكله عندي .. والحين أسوأ أكله)
تعشينا ونمنا ..
جاء الصبح ونسمع خواته بالغرفه اللي جنبنا يشغلون الاستشوار الا يقول لي متى تجي لمى وتستشور شعرها .. وأقوله من الحين متفاول ان شعرها كشه .. وقضينا سوالف عن (لمى) وش بتلبس .. وبتطلع علي ولا عليه .. وتكلمنا وتكلمنا الين الساعه 7 ونص
وقتها قال جيبي لي مويه وعطيته وشرب .. وقتها قال الله يرضى عليك دنيا وآخره .. طبعا هالجمله أسمعها منه من بداية زواجنا .. أفطرنا وطلعنا وركبنا السياره .. طبعا ذاك اليوم كان كسوف ولا شغلنا الأغاني .. وقف عند المحطه يعبي بنزين .. قال وش تبين اجيبلك من البقاله .. قلت بنزل اختار بنفسي ونزلت وجمعت من الشوكولاتات لين قلت آمين (كنت متوحمه عالكاكاو) وركبنا السياره وقضيناها سوالف وكل ماأسرح يصيدني .. طبعا أغلب سوالفنا عن لمى ووش بنشتريلها لأن وقتها كنت بالثامن .. وقال اوك بكره الاربعاء ننزل السوق .. والجمعه بنطلع للمطعم اللي تختارينه .. المهم قربنا للمزاحميه .. وكنت أقرا اللوحه اللي على الطريق وانا بدأ النوم يدخلني .. قلت يوه أشوا قربنا .. بعد دقايق الا فجأه السياره زحلقت ولفت بالعرض .. الشبك اللي بين الخطين صار بوجهنا .. ماأتذكر الا ان زوجي مقرب للسواق وانا اناظر بصمت .. فجأه دخلنا أغماء (رحمه من ربي اني ماشفت السياره تتقلب فينا ) .. صحيت شبه صحو وفوق رأسي رجال كثير وأسمع واحد يقول الحرمه حيه تتنفس .. ماأأتذكر الا هيئه رجال كثير وظلام وشمس .. صحيت وانا بمستشفى المزاحميه وانا عالسرير والدكتور يسألني انتي حامل ؟ وانا ابكي واقول زوجي وينه .. وكان جنبي بسرير وبيننا ستاره .. قال هنا وفتح الستاره ورجع سكرها .. بكيت وفتحتها .. كان نايم ودم برأسه .. وبكييييييت قلت أسألك بالله حي ولا ميت وأصرخ وأقول لاتكذب حي ولا ميت
قال الدكتور والله حي بس في راسه خبطه جامده .. رجعت ابكي واصرخ اقول اسألك بالله حي ولا ميت .. قال حي حي لو ميت حطيناه بثلاجه الموتى .. اغمى علي وصحيت الا اخو زوجي داخل يبكي بقوه ويصيح (مفجوع) .. قال الدكتور ممنوع .. قال انا اخوها وخر .. وجاء يبوس راسي ويبكي بقوه يقول الحمدلله اللي خلاكم .. الحمدلله اللي خلاكم .. قلت انا مافيني الا العافيه روحوا شوفوا (نايف) .. ورجعت في إغمائي .. صحيت الا أخته الكبيره فوق رأسي تبكي قلت لها جوالي جوالي .. الا أخوه يبكي يقول الجوال بداله جوال اهم شيئ انتم .. وأصرخ واقول لا جوالي فيه حاجات خاصه (تذكرت صوري وصوري مع زوجي ورسايلنا) قالت خلاص .. قلت ان صارلي شيئ امانه كسري الجهاز والذاكره والصور احرقيها .. ورجعت بإغمائي وصحيت الا الممرضات يقصون ملابسي ..
قالوا بينقلونا للرياض لمستشفى الامير سلمان
الحادث صار الساعه 11 ونقلونا للرياض 3العصر
ركبونا الاسعاف .. كل مطبه أصرخ من الألم .. والممرضات يصبروني
وصلنا المستشفى .. صرخت بأعلى صوتي اقول استرني استرني (تذكرت انهم قاصين ملابسي) .. قال الدكتور ساترينك .. صرخت أقول بنج بنج .. بموت من الألم .. سمع صوت اخته تبكي .. ناديتها قلت مقدر اولد طبيعي خليهم يسوون عمليه .. لأن بمستشفى المزاحميه قالوا احتمال الطفل متوفي من صدمه الحادث .. دخلت انا غرفه العمليات ودخل زوجي غرفه العمليات عشان يشيلون الطحال بسبب النزيف .. طلعت ودخلوني العنايه المركزه .. صحيت واخوي الكبير فوق راسي والدموع والخوف بعيونه .. كان الأكسجين علي .. صرخت قلت (نايف) حي ولا ميت .. قال لا حي .. قلت احلف .. وقول عساني مااطلع من الباب انه حي .. زاد خوف اخوي قال والله حي حي بس انه على التنفس الصناعي وفي الغرفه رقم 3 اللي جنبك .. وسألني عن الحادث أجاوب وارجع بإغمائي وأصحى وأرجع .. صحيت بعدها لقيت اخته عندي تسألني هاه كيفك الحين وقالتلي ان البنت بالحضانه على التنفس الصناعي لأن الأكسجين انقطع عنها وقت ضربة الحادث .. واناظر الا اخوه بآخر الغرفه يبكي .. صرخت وقلت تكفى روح عند نايف .. تكفون لاتخلونه .. بكى بقوه وبكت اخته وبكيت ..
جاء الدكتور لي وقال عندك كسور بالحوض وكسر مضاعف بالساق اليمنى وكسر طولي بذراعك اليمين .. أما القدم اليسرى فالحديد دخل فيها وشال 3 أصابع وجزء من اللحم فوق القدم .. قلت كل هذا مايهم اهم شيئ زوجي يعيش .. قال زوجك تحت رحمه العالمين وضربة الراس قويه وحاليا بغيبوبه والتنفس صناعي .. قلت ماعليه ياربي الدعاء يرد القضاء ..
اليوم الثاني جو أخوانه من برا الرياض وأبوه .. ابوه دخل علي وهو بمنظر يبكي .. اول مره اشوفه بشكل ضعيف حيل حيل .. يبكي بقوهـ لانه تو طلع من غرفة ولده .. طبعا ماقدر يتطمن علي ولا يسألني من البكاء ..
جت اخته وقالتلي ان البنت ساعتين على التنفس الصناعي وماتت ..
ساعتها ارتحت لاني كنت اقول يارب ان كان الحياه خير لها أحيها وان كان الموت خير لها فأمتها .. لأن قالولي نقص الاكسجين عنها وقت الحادث 4 ساعات ممكن يسبب لها ضمور ..
جاني اخوه مطوع يواسيني يقول تشفعلك بدخول الجنه .. قلت طيب تشفع لأبوها ولا لا .. قال ايه لكم كلكم .. قلت اشوا
كان كل تفكيري له .. كل دعواتي في العنايه له .. والله مادعيت لنفسي بالعنايه .. رغم الكسور والرضوض اللي بجسمي ..
والله ماكنت احرك رقبتي .. مايتحرك من جسمي الا يدي اليسار وفيها المغذي واكياس الدم تعويض عن النزيف اللي صار وقت الحادث ..
جاء يوم الجمعه قالوا بننزل الاكسجين وننقلك التنويم العادي حالتك استقرت ..
قلت تكفون للممرضات بشوف زوجي من بعيد ..
نقلوني بسريري ماكنت اقدر الف رقبتي حيل بس اناظر من طرف عيني
كان نايم والتنفس الصناعي بخشمه وكان جسمه منتفخ بسبب النزيف ..
ناظرته وبكيييت وقلت بصوت عالي يارب تشفيه .. وقلت في نفسي ربي ان كان بتأخذ روحه أخذ روحي قبله يارب ..
جاني اخوه مطوع ثاني وقال لي الحادث وش سببه .. كان سببه ان شاحنه كانت تمشي وطاح منها علبة زيت سيارات وكتب ربي انها تكون سبب لفراقنا .. كتب ربي تكون بداية ألمــي .. وزحلقت السياره وصارت بالعرض .. وتقلبت فينا .. صار زوجي على السواق وانا صرت بمكان الرجول تحت .. ماقدروا يفتحون الأبواب .. جابوا الدفاع المدني يفكها قبل لاتحترق فينا الحمدلله ..
نقلوني للتنويم العادي كان خالي وزوجته جو يزوروني ورفعوني من سرير العنايه لسرير التنويم العادي .. وقتها اصرخ بأعلي صوتي واترجاهم من الألم اللي اموت منه بكسور الحوض .. راحوا الممرضات .. اناظر زوجه خالي فوق راسي وخالي بآخر الغرفه يبكي دموووووووع وعيونه حمراء .. وربي أول مره أشوف خالي يبكي بقوووه.. لحظتها اقترب ومسح دموعه ويواسيني وصوته حزن وبكاء ..
ويوم السبت بالليل نزل الضغط عند زوجي وحالته تصعب وبآخر الليل حولوه الإنعاش وتوفى صباح الأحد ..
الأحد كان يوم عمليتي التجميله للقدم اللي راحت فيها أصابع القدم .. كانت العمليه الصبح الساعه 11
جتني ممرضه سعوديه كانت تواسيني بالعنايه المركزه وجت تتطمن علي وهم مآخذيني للعمليه .. قالت هاه كيفك أحسن .. مدري ليش بكيت وقلت نايف كيف وضعه الحين .. قالت ربك رحيم .. بكيت بقوه قلت انا خسرت كثير خسرت امي واخوي الله يرحمهم ماابي اخسر نايف .. دموعها بعينها قالت كل اللي يصير لآبن آدم خير والله خير
دخلت العمليه وانا في ذيك اللحظات ابكي وادعي اقول ربي اشفي نايف واحفظه لي .. ربي خله لي .. ربي انت تعلم اني مقدر اعيش بدونه .. كانت دموع وبكاء بصوت .. قال الدكتور لاتخافي العمليه بسيطه ان شاء الله (مايدري اني ابكي خايفه على نايف مو من العمليه)
قلت ربي ماابي عافيه ولا ابي شيئ .. بس ابي تخلي لي نايف يارب
طلعت من العمليات وصحيت العصر .. صحيت وهم يغسلونه .. صحيت وهم يصلون عليه .. صحيت وهم يقبرونه ..
جاء اخوي قال هاه كيف وضعك الحين .. قلت زين زين بس قول لي نايف كيف وضعه .. قال اخوي للحين على التنفس وحالته خطره (كان يمهد لي ) اختي الكبيره بجنبه تبكي .. قلت يمكن تبكي عشاني .. انام واصحى وانام واصحى من مفعول البنج .. صحيت قلت مسكن مسكن بموت من الالم وعطوني مسكن ونمت .. ونص ساعه الا اصحى وابي مسكن .. مااشوف الا اخوي الكبير واختي الكبيره بآخر الغرفه واصواتهم مااسمعها .. اختي حطت جوالي جنبي (طبعا جهازي تكسر بالحادث وبقى الشريحه وحطيتها بجهاز ثاني)
راح اخوي وبقت اختي .. قربت الجوال بتصل على اخو زوجي عشان اتطمن على وضع نايف لاني اعرف ان اخوي واختي مستحيل يطمنوني بالصدق .. اتصل ومايتصل .. الشريحه متغيره أنا شريحتي سوا وذي موبايلي .. سألت اختي وش السالفه .. قالت يمكن وحده سرقت شريحتك وحطت شريحتها .. استغربت كيف تسرق شريحتي والرمز كيف تعرفه ؟ قلت لأختي احلفي .. قالت استغفرالله احلف عشان شريحه اذكري الله .. سكتت وبرأسي ألف استفهام من سالفه الشريحه .. ليش ماانسرق الجهاز ؟ ليش تحط شريحتها اللي سرقته ؟ ليش وليش وليش ؟
طلعت اختي من الغرفه .. شكيت ان هي واخوي اخذوها عشان لايكلمني احد ويقول لي شيئ صار لنايف .. وقلبت بالجهاز لقيت رقم اخوه اللي معنا من بداية االحادث دقيت عليه مايدق مافيه رصيد وأرسلت كولمي
بكيت قلت نايف وشلونه .. قال انتي مين الرقم مو مخزن عندي .. وخبرته من انا .. قلت وش السالفه شريحتي اخذها اخوي وانتم مازرتوا نايف اليوم ليش ؟ لايكون صايرله شيئ؟
(ماحب يفجعني بالخبر) قال والله اني جيت للمستشفى وقالولي انك بالعمليات (صح جاء بس جاء عشان يستلم اخوه من الثلاجه) قلت طيب احلفك بالله امانه نايف فيه شيئ .. قال لاتأمنيني الجبال ماشالت الأمانه بشيلها أنا .. قلت يعني وش .. يعني نايف فيه شيئ .. وكنت ابكي .. قال لا زي ماهو لانقدر نقول حي مع الحيين ولا ميت مع الميتين ونقول الله يرحمه .. قلت لالالا ربي بيشفيه .. وسكرت
جاء اليوم الثاني من وفاته وانا لسى مااعرفت .. كل شوي ارسل الممرضات يتطمنون على نايف بغرفة 3 وهم يعرفون انه مات بس اختي تقول محد له دخل يبلغها عنه حنا اهلها ونبلغها .. والممرضات يرجعون يقولون زي ماهو ..
جاء اخوي الظهر وقعد يقول حالته خطره ويمكن يعيش ويمكن لا
قلت لالالا ربي يحي العظااااام وهي رميم
سكت اخوي ماقدر يكمل والحزن والدموع بعيونه .. كنت احسبه حزنان على حالنا وطلع حزنان لانه يشوف متعلقه انه بيعيش ..
جاء العصر وانا كل ماتدخل ممرضه الا وارسلها له بالعنايه تشوف وضعه
جلس اخوي يتكلم عن وضع نايف وان الدكتور يقول احتمال يعيش واحتمال يموت .. قلت الدعاء يرد القضاء .. قال بس ماندري وش كاتب ربي له .. كل شخص مكتوب له حياته وموته .. قلت شوف فلان دخل غيبوبه اربع شهور وعاش وشوف فلان شهرين بغيبوبه وفقد الذاكره وعاش ورجعت ذاكرته .. ربي قادر على كل شيئ .. اختي تبكي وانا واخوي نتكلم .. اخوي رجع يتكلم وحسيت انه يقنعني انه ممكن يموت .. حسيت ان نايف صارله شيئ .. حسيت بسالفة ان اخوانه مازاروه امس العصر وسالفة الشريحه وسالفة تلميحاته رغم انه كان يقول لي بالعنايه بيشفيه ربي ..
قلت خلاص قول لي وين صليتوا عليه دريت انه مات بس وين صليتوا عليه بأي مسجد؟
بكت اختي بقوه وهو كان يناظر بجهه ثانيه
رجعت قلت قول وين صليتوا عليه خلاص عرفت انه مات
قال نايف مات يطلبك الحل ..
انصدمت مدري مت مدري توقف عقلي مدري مدري وش
قلت الحمدلله ثم ناظرت قدام وقلت الحمدلله على كل حال بدون دموع ثم ناظرت بأختي قلت ليتني مت ليتني مت وبكيت بقوه ورجعت اقول استغفرالله
بكيت قلت ياربي كيف بعيش .. بكت اختي قالت هذا حمد اخوي مات
قلت حمد اخوي بس نايف غير .. نايف 24 ساعه معي .. (حمد اخوي توفى الله يرحمه قبل 3 سنوات بحادث كان عمره 22)
ياربي كيف بعيش .. كل مااشوف سوق بتذكره معي .. كل مااشوف مكان بيطري علي .. مقدر مقدر .. قلت ياربي ماني لاقيه طيب مثله .. مافيه احد مثله .. قال اخوي لاتعلم نفس في اي ارض تموت اصبري ونايف محبوب وربي منزل محبته في قلوب البشر .. بكيت (لاني ماراح القى مثله).. تكلم اخوي بعض كلامه اسمعه وبعضه ماني معه
اختي كملت تواسيني واخوي طلع كلم ابوي بالجوال وبلغه اني عرفت
ابوي بالديره ولاجاء لاني كلمته وانا بالعنايه قلت لاتجي انا مافيني شيئ بس كسر بالرجل .. دخل اخوي وعطاني الجوال سمعت صوت ابوي بكييييييت قال اصبري الدنيا مراحل قلت يايبه مقدر مقدر صدري ضايق مقدر اتحمل قال بيعوضك الله والرجال كثير فيهم خير صرخت بقوه وبكيت قلت لالالالا نايف مافيه زيه .. ابوي سكت يبغى يهدي الوضع وقال ماعليه هذي الدنيا اختبار من الله وتكفير ذنوب وكلنا بنموت .. رجعت ابكي قلت يووووه كيف بصبر صدري ضايق مرا ادعلي ان ربي يربط على قلبي ادعلي قال ادعيلك انا ادعيلك قلت ادعلي بسجودك قال بدعيلك والله بدعيلك وبكيت بكيت
قال اخوي وجهه يبشر بخير يوم يغسلونه وهو محبوب عند الناس ووووو...الخ
طلع من عندي والدنيا سوداء وكريهه ..الممرضات فرحانين بالمطر وانا دموعي تنزل مع المطر وادعيله وانا مو مستوعبه .. عشت حالة صمت مدري هي صدمه ولا رابط ربي على قلبي .. مر يوم يومين ثلاث
جو أهلي للرياض .. دخلوا اخواني وخواتي مع ابوي كلهم يسلمون على راسي وانا متمدده على السرير مو قادره احرك الا رقبتي شوي حتى الاكل تأكلني اختي .. جلس ابوي وانا قلبي بجهته ناظرت فيه وسالني هاه سووا لك العمليه قلت ايه شفتها مابقى الا اصبعين قلت ماتضيع اللي راحت عند رب العالمين وبكييييييييت (بكيت من فقدي لنايف مو عشان اصابعي) وقلت مااتمنى من ربي الا انها تكون سبب لدخولي الجنه بدون حساب وتقيني عذاب القبر والنار .. بكيت وقلتله الحادث من بدايته لنهايته .. قلت يبه من تزوجت نايف وانا اقول ربي اجعل يومي قبل يومه .. كل ماصليت دعيت .. واحيان ادعي قدامه ويقول لاتدعين بهالدعاء امانه .. يبه يوم رحنا نعتمر قال لي يوم دخلنا الحرم امانه لاتدعين بدعاك ذاك قلت ابشر ومادعيت .. كنت ابكي واتكلم افضفض لأبوي .. اول مره افضفض كذا .. خواتي حولي يسمعوني ويبكون وابوي يناظر تحت ويسمعني .. قلت يبه سبحان الله كنت ادعي وصار يومه قبلي .. يبه اللي مصبرني انك قلبك رحيم وترحمنا ولانك حنون علينا .. اللي يصبرني ان عندي اخوان في قلبهم رحمه .. اختي الكبيره صارت تواسي وتهدي الوضع ..
سافروا وتركوا اختي(18سنه)مرافقه عندي
دخلت العمليات هذي العمليه الثالثه بسويها .. حطوا صيخ بالساق اليمين وحطوا شريحه باليد اليمنى عشان الكسور
جلست اسبوعين بهموم وحزن وسوالفي كلها عن نايف
لابكيت بكت معي ماكانت تعرف تواسي .. بعد اسبوعين راحت هي لااختباراتها وجتني اختي بثالث كليه ترافق عندي وصرت ابكي واسولف وكانت شاطره في انها تواسيني وتطلعني لجو الفرح شوي
تسولفلي عن مواقفهم بالكليه وضحكهم وهبالهم بديت اطلع من جو الحزن
كانت تبعث في نفسي الأمل .. كانت تحسسني كل اللي يصير خيره لي وبيعوضني ربي خير بالدنيا والآخره ..
كني حسيت روحي بدت ترجع .. حسيت الضحكه بدت تنرسم ..
جلست بالمستشفى شهر و9 أيام كانت ثقيله علي
بآخر أسبوع بديت علاج طبيعي واتعلم الجلوس وبعده تعلمت الوقوف وبعده تعلمت المشي
اول مره جلسوني العلاج الطبيبعي بكيت لان لي شهر ماجلست
عرفت نعمه الجلوس
اول مره وقفت فيها بكيت لان نسيت شكل الدنيا وانا واقفه
عرفت نعمة الوقوف
اول مره مشيت بالعكازات دموعي ماشالتني من الفرحه
عرفت نعمة المشي
عرفت ان برحمة ربي مشيت .. برحمة ربي ماأنشل جسمي .. برحمة ربي ماعاشت بنتي يتيمه ومعاقه بسبب الحادث .. برحمة ربي اخذ زوجي يرتاح في جنة ربي .. برحمة ربي ان عندي ابو رحيم وحنون وعندي أهل الحمدلله ..
اول مره دخلت الحمام (الله يكرمكم) كان بعد شهر من الحادث
بكيت من رحمة ربي لي .. ان عورتي ماعاد راح تتكشف عند الممرضات وانا بكامل عقلي ينظفوني زي ماينظفون الطفل .. شيئ يعور القلب
كل من يزورني يواسيني ويطمني بأن الكسور فتره وتجبر وأمشي
..
صحيح الكسور بتجبر والجرح بيطيب
لكن القلب لامات من بيحيه ..؟
..
عرفت وآمنت ان ربي أخذ الروح اللي في بطني والروح اللي جنبي وتركني انا لجل اعمل لنا اعمال تنفعنا وترفعنا بالجنه درجات ..
تمنيت اني مت وصرت جنبه بالقبر
زي ماكنت جنبه بالسياره
زي ماكنت جنبه بغرفة العنايه المركزه
زي ماكنت جنبه بغرفة العمليات
زي ماكنت جنبه نايمه كل يوم
زي ماكنت جنبه على سفرة الأكل
..
ربي أربط على قلبي وصبرني فمهما تكلمت محد يعلم بحبي له وحاجتي له الا انت ياربي
ربي كل ماكتبته لي راضيه فيه تمام الرضاء
ربي في هالحادث رأيت رحمتك ولطفك
ربي انت أرحم على نايف مني ولذالك أطمئنت نفسي
ربي أرزقه دار خير من داره وأهل خير من أهله وزوج خير من زوجه
ربي متعه بالحور عين .. ربي اجعل قبره روضه من رياض الجنه .. ربي مثل ماجمعت اخوي وزوجي في مقبره وحده اجمعني معهم .. ربي أجلي همي وأشرح صدري .. ربي اغسله بالماء البارد والثلج والبرد .. ربي لاتترك له ذنب الا غفرته .. ربي ضاعف حسناته وتجاوز عن سيئاته ..
لكل من قرت قصتي تدعي لنايف بالرحمه والمغفره ..
وتدعيلي بأن ربي يربط على قلبي ويصبرني ..
كنت انا اقرا عالم الارامل في هالمنتدى واحزن عليهم وارجع احب زوجي اكثر واقول ربي اجعل يومي قبل يومه وماتوقعت بيجي يوم اكون من ضمنهم ..
الحمدلله على كل حال ..
(وكل مايطري أصـــــــــــــــــد وأبكيييييييهـ )
إخصائيهـ إجتماعيهـ @akhsayyh_agtmaaayh_4
عضوة جديدة
قصــتي ووفاة زوجي .. وكل مايطـري أصــد وأبكييييييهـ ..!!.>>استوفى الحد المسموح
2K
191K
يلزم عليك تسجيل الدخول أولًا لكتابة تعليق.
لاحولا ولا قوة الا بالله
والله قالوني ضرب من قرايتي لقصتك بس فمابالك بالي عاشو معك الموقف
ولا موقفك انتي ياقلبي الصبر زين وأن شاءالله تجتمعون بالاخرة
الله بعوظك ويصبرك ويبرد على قلبيك ياحبيبتي
والله قالوني ضرب من قرايتي لقصتك بس فمابالك بالي عاشو معك الموقف
ولا موقفك انتي ياقلبي الصبر زين وأن شاءالله تجتمعون بالاخرة
الله بعوظك ويصبرك ويبرد على قلبيك ياحبيبتي
الصفحة الأخيرة
احسن الله عزاكم