...................................................................
كل اللي يعرفوني بالايميل ... يعرفوو وش كثرر احب الاغاني ... وبالذات اغاني الفنان ]..
ووش كثر انا متعلق فيه وفي اغانيه ...
وانا بصراحه من زمااان وانا احب الاغاني .. وتقريبآ من يوم كان عمري 10 سنوات وانا احب اسمعها ..والحين عمري 30 .. يعني من 20 سنه كنت متعلق بالاغاني والعياذ بالله .. جلست فتره على هالحال وكل سنه اكثر من اللي قبلها .. لحد ماوصلت سن 18 و19 .. وصلت لمرحلة قويه جدآ في حبي لأغاني ابو نايف .. لدرجة اني كنت مااقدر انام إلا لمن اشغل اغانيه ... وانام وهي شغاله .. والعياذ بالله ... واصحى وانا اغني ... الناس تصحى وتقول اصبحنا واصبح الملك لله ولا اله الا الله ... وانا اقول : صارحيني منهو انا بدنيتك .. استغفر الله ...
ناس تنام وهي تقرأ القرآن .. وناس تدعي ربها وتستغفره ... وانا اسمع اغاني!!!! قمة الفرررق بيني وبينهم ....
وصلت لمرحلة كنت حافظ فيها جميع اغاني خالد .. واعرف كم البوم نزل .. وكل البوم اعرف كم فيه اغنيه .. وكم فيه اغنيه من كلماته والحانه .. وكم فيه اغنيه من الحانه فقط ... واعرف وش مناسبة هالاغنيه .. وفي مين ..
ووش قصتها الحقيقيه .. وليه غناها ..!! ماخليت شي إلا عرفته .. بس القرآن ماني حافظ منه إلا كم سوره ..ويمكن اغلب السور اللي حفظتها كنت حافظها من ايام المدرسه وبالغصب كمان ..
...........................................................................
وصلت سن الـ20 وانا على نفس الحال ...بس صرت احب اتطور شوي واعيش حياتي اكثر واكثر .. قلت خلوني ادخل النت ماسن وشات شباب وبنات فله وطلعاات ..ومن سن الـ20 لين الحين وانا مستمر بعالم النت .. يعني 10 سنوات متواصله ] وانا ماكنت عارف اني قاعد اضيع عمري يوم بعد يوم .. كنت بالبدايه ادخل نت وبعد كذا طفشت وصرت اسجل بالقنوات وادردش فيها .. كانت بدايتي في قناة اسمها ] ..دخلت جلست اسبوع ..وبعدها صرت مشهوووور واشهر من نار على علم .. ادخل الاقي البنات .. اهلين يامجنون خالد ... شخبارك يامجنون خالد..وينك يامجنون... وين الغيبه يامجنوون .. وحشتنا يامجنووون ] كنت مبسوط بهالمعجبات والمعجبين .. بعدها جلست ممكن سنه معهم بس حسيت مافي جديد .. نفس العينات ونفس الاشخاص.. قلت خلوني اتطور شوي ... مسكت الريموت كنترول وجالس افرفر بهالقنوات لحد مالقيت قناة اسمها ] عاااد هذي مشهوووره ومعروفه .. وقفت عندها ومسكت جوالي بسرعه وسجلت النك نيم حقي عاد نك الشهره معرووف ومايحتااج .. كان مجنون خالد عبدالرحمن ..بس الاخوان والاخوات بالنت دلعوني ورقوني شوي .. كانو ينادوني مج مج مجنون خالد ... وسجلت فيه بالقناه .. يومين جلست معاهم .. وتعالو شوفو كيف ؟ وربي حسيت اني اشهر من خالدعبدالرحمن حتى .. واااااااااااو معجبات بالهبل .. واصدقاء ] ياكثرهم .. كنت ادخل احس اني اشهر رجل بالعالم ] عاد انتفخ رأسي وقتها .. وصرت انسان مشهور ] ... لدرجة اني كنت ادخل النت وادخل شات ] الاقي ناس من نفس القناه شباب او بنات يسألون عني ... كنت احس وقتها اني وصلت لمرحلة مافي بعدها ..
كنت اغيب عن القناه يومين ..الاقي جوالي مليان بمسجات عن طريق الخاص حق القناه .. وينك يامج مج؟ وليه الغيبه؟ وحشتنا ..ولازم ترجع لنا ... وقتها احس اني قاطع ومافيني خير..واترك كل اشغالي وارجع خلال دقائق او ساعات .. بسم الله ماشاءالله .. البنات ترجع لهن بسرعه يامحمد وربك يناديك باليوم خمس مرات .يمكن ماتلبي النداء في وقته الا في فرض او فرضين .. وباقي الفروض تصليها لمن تصحى مع بعض او لمن تفضى من اشغالك ودشرتك ..استغفرالله العظيم ..
استمريت على هالحال سنوااات من الضياااع ... كل حياتي اصبحت .. نت وشات وقنوات وبنات وطلعات وروحات وجيات وكوفيهات وسهرات .. انام متى ماابغى واصحى متى ماابغى .. واذا عندي عمل خلصت وقت العمل وباقي الوقت نوم ونت وطلعاات ..والعامل الرئيسي بكل الحالات هي الاغاني .. لأنها معاي بكل مكان وانا مداوم وانا طالع من الدوام وانا بالنت وانا برى بالسياره وبالكوفي وكل مكان اغااني في اغاني في اغاني .. وياقلب لاتحززززن ..
هذي حياتي لمدة 20 سنه والعياذ بالله .. ممكن تقولون طيب وش اللي تغير ومخليك تكتب عنواان ان هذي قصتك وكلنا عارفين هالشي عنك؟ وراح اقولكم وش قصتي اللي غيرت حياتي ...وخلتني احس بالذنب وارجع لربي واول شي اتخذته اني ابطل اسمع اغاني وقبلها بطلت ادخل شات ولله الحمد ..
قصتي بدأت قبل اسبووع تقريبآ .. طبعآ كعادتي طلعت من البيت طفشااان وافرفر كالعاده بسيارتي ..كان الكلام هذا بعد المغرب ..وكعادتي افرفر واسمع اغاني .. احس ان الاغاني بالنسبه لي شي ثاااني .. احس انها الشي الوحيد اللي يسليني ويشاركني بمصايبي .. ] المهم اقترب وقت صلاة العشاء وانا لسى بنفس حالتي اسمع وصوت الاغاني مسوي لي جوو خيااال بالسياره .. كنت وقتها قريب من البيت ... ولعب في رأسي الشيطان قال روح البيت ريح شوي وبعد الصلاه كمل دشرتك .. ] قلت ببالي حلوو امر البيت واصلي بالبيت ] واطلع بعد الصلاه ... وانا جالس افكر حسيت ان فيه احد يناديني من خارج السياره .. بس طنشت واستمريت بسماع الاغاني .. كنت لحظتها اسمع اغنية : العطا ماتبادلنا العطا والخطأ لا حشا مااخطي عليك ..] ...وبعد شوي حسيت كأن احد يناديني ... قلت خلوني اقصر الصوت واشوف من وين الصوت .... وقمت قصرت الصوت ... وسبحان الله العظيم .. بنفس اللحظه اللي قصرت الصوت حق الااغنيه .. سمعت المنادي ينادي : الله واكبر الله واكبر .. الله وأكبر..الله واكبر.. اشهد ان لا اله الا الله....... كان هذا ياخوان ويااخوات أذان صلاة العشاء ... سبحان الله .. الناس تؤذن واللي يستعد للأذان والناس تطلب ربها بهالوقت .. وانا اسمع اغنيه!!!! ماتصدقون قد ايش عشت لحظات عصيبه .. خووووف وقلق وتعب .. قلبي صار ينبض بقووه وبسرعه ...اقشعر جسمي .. يديني بدأت ترتجف.. ورجولي ترتجف .. فتحت الاشاره وانا اردد الاذان وخايف وصلت البيت .. وقفت سيارتي وقبل مااطفيها قلت : يامحمد خلاص انتهى الوقت اللي كنت تسمع الاذان وتدخل البيت .. بدل ماكنت تصلي بغرفتك متأخر .. لازم الحين تروح للمسجد وتلحق الجماعه .. وعلى طول مشيت للمسجد .. دخلت المسجد ..اللي من زماان مادخلته لصلاة العشاء.. يااكون نايم او اكون طالع من الحي .. صليت جماعه وحسيت براحه .. جلست بالمسجد فتحت المصحف قرأت قرآن ..نزلت دموعي من عيوني ...وسالت على خدي كأنها جمرر ماهي دمووع..... وعاهدت ربي اني مااسمع اغاني ..واحاول اتجنبها للأبد ..والحمدلله حسيت براحه فضيعه بعدها .. ومن وقتها الحين صار لي تقريبآ اسبووع كرهت الاغاني وكرهت خالدعبدالرحمن الفنان .. وكرهت كل الاغاني وكل الفنانين والحمدلله ..
انا مااقول اني تطوعت واعفيت اللحيه وقصرت الثوب ... انا لسى ببدايتي .. انا مثلي مثل الكثيرين منكم يااخوان ويااخوات .. بس انا فقت وصحيت من غفوتي .. راح ابدأ خطوه خطوه .. من كم شهر تركت الشاتات ولله الحمد .. والحين ربي هداني وتركت الاغاني ....حتى المعسل كرهته .صحيح كنت اول اعسل بالشهرين مره ..او كل 3 شهور مره مرتين..بس الحين كرهته ولله الحمد وراح اتجنبه واتجنب كل كوفي كنت اروح له قبل.... وان شاءالله راح يهديني واحافظ على كل الفروض بالمسجد .. صدقوني من كم شهر تركت الشاتات .. والله العظيم نفسيتي صارت احسن .. مشاكلي صارت اخف .. والحين تركت الاغاني .. ومن كان يصدق اني راح اترك الاغاني؟ خصوصآ الناس اللي يعرفوني ... اتحدى احد كان يتوقع اتركها فجأه وبدون مقدمات ... وكلكم عارفين وش تعني لي الاغاني قبل .. كانت هي كل شي بحياتي ... وليتكم تشوفون وش صارت الاغاني بالنسبه لي الحين ... صرت اشوف الاغاني احقرر شي بحياتي .. ولله الحمد ..
الشات يوصل للأغاني .. والاغاني توصل للشات ... والشات يوصل للتعارف بين الاولاد والبنات بالحرام.. والتعارف بينهم كذلك يوصل للشات والاغاني ... كل شي مرتبط ببعضه ... كل شي حرام يؤدي لأشياء حرام اكبر منه .. تبغون تعرفوو قد ايش الشات سخيف وحقير وكلام اهل الشات مامنه فائده؟؟؟ بقولكم على شي واتمنى تصلحوونه كلكم وتحكمون بأنفسكم ... خصوصآ الناس اللي يدخلون الشات ..
اول شي افتح النت .. وادخل موقع قرآن كريم .. وشوف أي قارئ تحبه ..وشغل سورة من القرآن .. وبنفس الوقت وانت تسمع القرآن .. افتح الشات اللي تدخله .. لاتتكلم مع احد .. بس حط النك نيم حقك .. وشوف الكلام اللي ينكتب ... واسمع القرآن بنفس اللحظه وراح تشوف الفررررق .. وراح تشوف انك مضيع نفسك بكلام سخيف وحقير وراح تعرف انك تضيع وقتك بكلام فاضي بالشاات.. ولو انك تدخل النت وتفتح مواقع تستفيد منها وبنفس الوقت تسمع قرآن أو خطب ومحاضرات لمحمد العريفي او عائض القرني وغيرهم ..راح تشوف الفرررق ..
في شي مهم برضوو .. الحين الواحد فينا يوم يدخل النت .. ويفتح موقع طرب او طرب توب او غيرها ..ويشغل الاغاني بغرفته ..وبعضنا مايكون عنده سماعه اذن .. فيضطر انه يسمع الاغاني من السماعه الخارجيه للجهاز. ويوصل صوت الاغاني لمحيط غرفته كامل .. ويخرج لمحيط البيت احيانآ ويسمعون اهله الاغاني... تلاقي الشيطان معاه بالغرفه ..وبالبيت .. ويمكن يضايق اهله كمان ..
طيب يااخي بدل الاغاني والموسيقى ... شغل سورة البقره .. وخلي الصوت يوصل كل البيت ...عن ابي هريرة رضي الله عنه ان ر سول الله صلى الله عليه وسلم قال : (( لاتجعلو بيوتكم مقابر ان الشيطان ينفر من البيت الذي تقرأ فيه سورة البقره)).. بس حنا لازم نخلي الشيطان معانا يأكل ويشرب وينام وحتى النت يدخله معانا والعياذ بالله..
صدقوني كلنا مقصررين .. مقصرين بحق انفسنا ... مقصرين بحق اهلنا .. الواحد فينا تكون امه بجنبه وابوه ومايكلمهم الا مره مرتين باليوم .. ويمكن تعدي عليه 24 ساعه ماكلمهم ولا شافهم حتى ... كل وقته شات ووناسه .. والله يااخوان كنت ادخل الشات وحاط السماعات بأذني .. وتدخل علي الوالده ... تجلس عندي او تجيب قهوه او شاي وتجلس بجنبي وماني شايفها ولا حاس فيها ولا اكلمها .. جالس اسمع اغاني وادردش .. تجلس عندي شوي وترووح !! يالله لهالدرجه وصلت فيني اني اطنش امي عشان اضحك واسولف مع بنات بالشات وشباب؟؟ استغفر الله ... الله يتوب علي ويسامحني ويهديني ... وان شاءالله اللي صار يكون درس لي وعظه وعبره...
كلمه اخيره اقولها للناس اللي يعرفون محمد من زماان .. انا خلاص ماابغى احد يتذكرني لمن يشوف خالدعبدالرحمن ... او يتذكرني لمن يسمع اغنيه من اغاني خالد ... او من الاغاني اللي احبها ... ماابغى احد يتذكرني يوم يسمع مقطع اهديته له او اهداني اياه ... او يتذكرني يوم يشوف فيلم او ممثل او ممثله كنت احبها ..او يتذكرني بصوره او غيرها ... انا ابغاكم تتذكروني وقت صلاتكم ... وقت دعاءكم .. وتدعوون لي طبعآ مو علي هههههه... اتمنى من كل شخص اهديته اغنيه او مقطع صوت او صور او افلام او صور مشاهير .. اتمنى انه يحذفها من جهااازه ... وامااانه في اعناقكم انكم تحذفوو كل شي اهديتكم اياه ... عشان كفايه نتحمل ذنووب زياده .. وانا اوعدكم راح امسح كل شي عندي من اغاني ومقاطع وصور ... لأن الواحد فينا مايدري كم يعيش ؟ ولين متى راح يعيش ؟ والله يحسن خاتمتنا جميع ...
.....................................................................
يااخوان ويااخوات . اللي قرأ قصتي يحاول يرسلها لكل شخص حالته مثل حالتي .. لعل وعسى يكون فيها خير وصلاح له ... يمكن يكون هالايميل سبب في هداية الكثيررين من الاخوان والاخوات .. وصدقوني كلكم فيكم الخير والبركه .. وانا متأكد ان فيكم اللي يكره الاغاني والشات بس يدخلها لأنه مالقى احد يوجهه او ينصحه او يصحيه من الغفله اللي عايش فيها ..تكفوون خلونا نتساعد وننقذ بعض وننصح بعض عن الاشياء المحرمه ..وربنا معانا واهم شي نخلص النيه .. ونتوكل على الله .. واتمنى من الجميع يسوون نفس اللي سويته ويتركون الشات والاغاني وراح يشوفون الفررق ويحافظون ع الصلاة بالمسجد .. والله راح يحسوو بالراحه الطمأنينه ..
((سبحانك اللهم وبحمدك أشهد ان لا اله إلا انت استغفرك واتوب اليـــــــــــــــــك))
اخووووكم : محمـــد
اسأل الله العافيه والهدايه لبنات وابناء المسلمين..