السلام عليكم ورحمة الله وبركاته
هلا باحلى بنات وحريمات عالـــــم حواء:)
هذا الله يسلمكن صار لي مده احوس واروح واجي .. بهالقسم
وخصوصا قصص الولاده بس وراها مادري وش جاني عليها احس فيها اكشن>> ادري طولتها خلاص الزبده
الزبده سلمكن الله قصت ولادتي اللي مانسيتها الى الان وهي مار عليها سنه الله يخليلي بنتي ويصلحها
حسيت بالولاده ليله الاربعا 7/1 /1430هـ
سويت عشاي وجاء زوجي الساعه 10 باليل من الشغل وتعشينا وماعندي طاري ولاده ولا حتى فكرت فيها ذاك اليوم ويوم تعشينا وقضينا حسيت ان ودي اروح للحمام الله يكرمكن
ولمى خلصت وجيت ابي اطلع الا احس باللي يتدفق مني واوقف اشوف وش السالفه الا هو ماء قلت يمكن عادي ويروح الا يوم زاد
عاد هنا مغصني بطني من الخوف وعرفت انها ولاده:icon33: ولبست اولويز علشان المويه وطلعت من الحمام وقلت لزوجي فيني ولاده
عاد هو ماصدق يحسب اني امزح وقال تضحكين علي لان ماتوقعنها لان عندي موعد يوم السبت مع الدكتور بس سبحان الله صار حسابهم غلط0 فقلت والله ولاده نزلت مني مويه بس ماحس بشي لافي بطني ولا ضهري وقمنا نضحك انا وياه مدري من الفرحه ولا من الخرعه الله يعين وقلت بصبر شوي توي مامعي طلق والكلام هذا تقريبا الساعه 11 باليل وتتقريبا على الساعه 11ونص تبدا الطلوق خفيفه تروح وتجي قلت لزوجي رح نام وذا حسيت اني مااقدر اتحمل اصحيك توديني المستشفى
راح نام وانا ماجاني نوم كل ما بغيت انام جاني الطلق وقرصني وكرهني بالنوم رحت اجهز عباتي واغراضي ولمن خلصت جلست على النت ابحث عن الولاده واعراضها عشان اتاكد لاني بكريه ومادري وش السالفه والطلق قام يزيد ويزيد كل عشر دقايق وكل ماحسيت بالطلق قمت امشي بالبيت لانه مررره يذبحي مايرحني لا بجلوس ولاانسداح واحس المشي يخفف وكلما زاد الطلق زاد الغثيان :09:
وعلى هالحال لحد ماذن الفجر الساعه 4ونص وضيت وصليت وصحيت زوجي يصلي وقمت اتصبر وكالماجا الطلق مسكت بطني وقمت امشي وزوجي كل ماشافني قمت قال اوديك المستشقى وانا اقول لا شوي لحد ماجت الساعه6 الصباح حسيت اني خلاص ماعاد اتحمل الطلق وخفت عل الطفل لان المويه نازله ومشينا على المستشفى
ووعلى الطواري قلنا لهم ولاده وحولوني على قسم الولاد واخذتني ممرضه على غرفة الانتضار وقالت الدكتوره مشغوله عندها الحين عمليه
وتجي وتركب بيدي ابره المغذي وانا مره على السرير اذا برد الطلق ومره امشي اذا احتمى وعلى هالحال واتصل بأمي الساعه6 ونص اخبرها ان في ولاده وش اسوي الله يرحم الحال خوفت امي وبس ونصيحه يابنات لاحد يدري ان فيك ولاده الازوجك حتى امك واهلك لاتخبرينهم الابعد ماتلدين بالسلامه وصي زوجك مايخبر احد وخصوصا اهله
وماجت الدكتوره الا الساعه سبع وتشوفني قالت الرحم فاتح 3 سم
ويعطوني ابره في ذراعي والله مادري وش حقته والبس ثوب الولاده
ويودوني على غرفة التخطيط ياكرهي له حشرني ضيق علي ويربطوني فيه ماقدر اتحرك وتجيني طبيبتين مصريات وكلهم يشوفون كم فاتح الرحم اللي تقول 4 واللي تقول خمسه بهذلني ويروحن وتجيني ممرضه سعوديه الله يسعدها وتفك التخطيط تقول امشي ويوم اطلعت الا تجيني هاك الفلبينيه ياكرهي لها وتقول مافيه مشي وتاخذني على غرفتة الولاده وتنومني على سرير الولاده وتحط التخطيط علي وانا خلاص شفت الموت ماقدر اتحرك وكل ماشد على الطلق شديت مساكات السرير لين تفككت يديني وتحط على كمام الاكسجين والله احس انه يخفف علي الطلق ويزيد بكاي وصياحي :icon33: واذكر الله واستغفر وادعيه يفرج لي
وكل شوي تشوفني الممرضه وتقول الرحم فتح 5 سم يعني وقف على خمسه وتجيني دكتوره مصريه وتشوفني وتقول برضوا خمسه سم
الطلق شغال والرحم عيا يفتح اكثر من خمسه لاحول ولا قوه الا بالله
قالت لي لازم يشوفك دكتور انا قلت لا مابغي دكتور قالت مافيه الا دكتور ومادري وش واحسن لك و وحالتك خطره يمكن نعملك قيصري
قلت امري لله وش اسوي ويجي ويشوفني الله يغفر لنا قال حنصبرعليك ساعه اذا ماولدتي نعمل لك قيصري لان الرحم عليه خطر ينفجر انا هنا زاد همي وبكاي ودعاي لربي يفرجلي وكانت الساعه تقريبا 10 صباحا وزوجي يتصل عليهم وقالوله زوجتك ماولدت واحتمال نعمل لها قيصري وزوجي ما خلا احد ماعلمه الله يهديه وانا يزيد علي الطلق والوجع واقول خلاص ابغي قيصري بسرعه تعبت ويجي الدكتور ومعه الممرضات ويلبسوني لباس العمليت ويوقعوني على العمليه وياخذوني على غرفت العمليات وفي الطريق للغرفه يتصل ابوي وامي على تلفون الدكتور ويكلمون يقولون يابنتي اصبري تلدين طبيعي ماعليك منهم وانا اقول ماعاد اتحمل والدكتور يقول خطر على الطفل والرحم وقالوا امرك لله وبغرفة العمليات خدروني تخدير كامل الساعه 12 الضهر
وصحيت تقريبا 1ونص اصحي وادوخ واصحي مره ثانيه واشوف الممرضه واسالها وش جببت قالت مبروك بنت :icon28:وياسبحان الله احس ان الحياه راجعتلي بعد موت وعلى الساعه 2 يودوني الغرفه ويجيبون ملابسي وجوالي وانام الى الساعه 3 واتصل على زوجي دوبي اكلم قالي مبروك قلت انت وينك اثريه راح على طول بعد ماعرف اني ولدت بعمليه لامه وجابها ترافق عندي الله يجزاه خير مع ان المسافه بينا وبين اهله اكثر من 300 كيلو ويجيني هو امه على الساعه 5ونص والحمد لله جربت الطلوق والقيصري مره وحده:44:
والله لايضيع تعبي وتعب المسلمات ويصلح نيتنا وذريتنا
ويهون على جميع الحوامل ولادتهن ويرزقهن الولاده الطبيعيه السهله الميسره ويبعد عنهن العمليات لانها بصراحه تعب ودوخه ووجع ولو انها ارحم من الطلوق
ويارب ترزقني بالولد الذكر الصالح الطيب المبارك عاجلا غير اجلا وتسهل حمله وولادته وتخليلي بنتي وتقر عيني فيها وتهدي زوجي وتهديني وتصلح حالنا وجميع من قال امين
وجزاكــــــــــن الله خير
سامحني طــــــــــــولت عليكن:26:
ام فطومه الحلوه @am_ftomh_alhloh
محررة ذهبية
يلزم عليك تسجيل الدخول أولًا لكتابة تعليق.
الحمدلله أهم شي أنك بخير...وبنتك بخير...
بس انتي بأي مستشفى.. ومين الدكتور..
يارب أنا بكريه بعد ... يارب يسهل ولادتي وييسرها ويسرعها ... ويرزقني الذرية الصالحه
بس انتي بأي مستشفى.. ومين الدكتور..
يارب أنا بكريه بعد ... يارب يسهل ولادتي وييسرها ويسرعها ... ويرزقني الذرية الصالحه
الصفحة الأخيرة
والله يكتبلك الذرية الصالحه امييين..
ويهون على الجميع..