قصه الجده العجوز (واقعيه)

السلام عليكم ورحمه الله وبركاته
بدي احكيلكم قصه الجده العجوز وبدي احكيلكم هاي القصه مش لاني بحب احكي قصص بس لاني بعرف ان مشاكل الدنيا كتيره واللي بيشوف مصيبه غيره بتهون عليه مصيبته زي ما بيقولوا

شوفوا

هاي القصه واقعيه 100% لانها حصلت مع جيران اهلي
بتعرفوا كلكم ان الحرب على غزه كانت في شهر يناير يعني عز البرد او اربعينيه البرد وطبعا ما كان عنا كهربا نشغل الدفايات وما كان في غاز لحتي نشغل صوبات الغاز وكل الشبابيك من دون زجاج نتيجه القصف المتواصل
يعني عشنا في برد قارس بمعني الكلمه
كان في جده ختياره عجوز دايما بردانه وما بتدفي وانتو بتعرفوا كبار السن زيهم زي الاطفال يبردوا بسرعه
في يوم من ايام الحرب حفيدها اللي ساكن معها بالبيت قالها والله يا جده لاروح اجيب لك حطب واشعله علشان ادفيكي لانه كان يحبها كتير وكانت صعبانه عليه
راح هالصبي وجمع حطب ما بعرف من وين وحمله على اكتافه وفي هاي الاثناء كانت طائرات الاستطلاع الاسرائيليه عم ترصده وكانوا بيعتقدوا انه شايل صورايخ على كتفه
وصل هالصبي على باب البيت وصار يشعل بالحطب علشان ياخده لجدته اللي كانت عم تستناه
طبعا تجمعوا الصبيان حوله علشان ياخدوا شويه دفا
وفجا سمعوا صوت خمس صواريخ في المكان وساد الصمت للحظه
كانت الكارثه استشهد مجموعه من الصبيان من ضمنهم هالصبي يللي جمع الحطب وربنا بحبهم انه اخدهم والباقي تقطعت اطرافهم وما زالوا مرميين في المستشفى او البيت
كان الانفجار ضخم والجثث صارت اشلاء لدرجه انهم ما عرفوا مين الاشلاء ومين الحطب
ومن يومها هالجده العجوز دمعتها ما فارقت خدها
دايما تقعد على باب البيت مكان ما استشهد حفيدها وتقول يا ريتني الليمتت يا جده ولا صارلك هيك
خلص الشتا واجى الصيف وراح ييجي الشتاء من تاني والجده بتقول من يومها ما حست بالدفا
بس مش من البرد من حسرتها على حفيدها وبتطلب من ربنا اليوم اللي تلتقي فيه مع هالصبي اللي دفع حياته ثمن علشان يدفي هالجده العجوز




هاي قصه من الاف قصص الحرب
احنا عشنا علشان هيك عم نحكيلكم شو اللي صار
بس صدقوني في قصص كتيره ما حد بيعرف عنها شي لان اصحابها استشهدوا
الله يرحم جميع شهدائنا
ويربط على قلوب اهلهم