الايام دواره @alayam_doarh

عضوة جديدة

قصه توبتي ..

يسعد صباحكم ...

بكل ثقه وآلم ودموع واحساس لااستطيع وصفه وكتابته .. آتيت اخط لكم معاناتي

وتجاربي مع هذه الدنيا الفانيه ... ولااريد تعليقا ساخرا .. او نقدا لاسلوبي ..

او مجرد مرررور عابر .. فلم آتي الى هنا لاتباهى بذنوبي .. فما صنعت يداي

ليس بقليل .. ولكن اريد نصح كل فتاه عازبه او امراه متزوجه لوجه الله تعالى ..

عمري كما عمر الزهور بالعشرينات .. ولكني عشت طفوله مؤلمه قاسيه .. مليئه

بالحرمان والظلم والتقيد .. محرومه من اخر الموضات .. والقصات والصبغات

كنت اتامل بنات سني من حولي .. جوالات .. قصات وملابس باخر الصيحات

وعشيق لكل واحده منهن .. واناظر لنفسي وش ينقصني عنهم .. ابوي موظف وراتبه

بالشهر يكفي شهورا اضافيه .. الله يبارك فيه ويزيده .. ولكن للاسف كان يروح بلمح

البصر ولا فيه بركه والديون من كل جهه..

تلفون .؟

كنت محاسبه على مكالماتي وعلاقاتي .فلانه اهلها سمعتهم سيئه .. فلانه وفلانه

صرت اقول لصديقاتي انا معكم بالمدرسه اذا تحتاجون اي شي لكن ماابي احد يتصل

لانها تصل لحد الضرب وبسبب مكالمه مالها داعي

ومع كذا كنت ابتسم وبداخلي حزن يطويني ويخليني منعزله حتى في البيت ..

صار همي اسمع للاغاني بكل انواعها وارقص ومنعزله .. لدرجه اصبحت اكلم نفسي

بالمرآيه والله الشاهد على مااقول .

صارت الحياه بنظري سوداء ولاعندي ذره امل بان حياتي تتغير .. ووزني كان

زائد بالنسبه لعمري .. وابوي كل ماشافني شوفي جسمك من يتزوجك

ومن يرضا فيك.. حتى الملابس اشوفها حلوه بالسوق واذا لبستيها يتشوه منظرها

كانت كلماته قاسيه ومؤلمه .. ماعندي اخوات نفس عمري وبنات عمي لاهيات بانفسهم

ولافيه احد اشكي له او يساعدني .. كنت افكر واقول الى متى انتظر احد يحل

مشاكلي .. اذا مااتحركت انا . انتظر الناس يخفوو وزني مثلا ؟ انتظرهم يسالوني

وش يحزنك ؟

وذيك الايام كان فيه كلام من قرايبينا بيخطبوني لولدهم .. الولد واهله ناس طيبين

ومايتعوضون .. بدات اسوي ريجيمات مختلفه وامشي بالساعات الطويله والكل

تفاجا بشكلي لاني منعزله وتواجدي نادرا بينهم ..

كنت بااسعد لحظات حياتي اني حققت شي واحد اتمناه .. اني ارضي نفسي واحقق

هدف واحد تعبت عشانه ..والحمد لله تزوجت وتركت حتى دراستي هروب من

حياه كانت اشبه بالنار ... سسويت كل شي تصورونه .. اغاني .. رقص .. غيبه

نفاق .. وعقوق للام .. ومالقيت شي يسعدني بالعكس احس بضيقه العالم كله بصدري

ابكي .. اجلس ابي اتغير ابتوب .. ابرضي امي ....ألخ اشياء كثيره في بالي

بس الشيطان يوسوس لا انتي باقي صغيره بدرررررررري على التوبه .. باقي وراك

دروب طويله من المعاصي .. تزوجت وسافرت وتمشيت افكر ان الزواج بس كذا

حملت جبت اول مولود .. اهملت شكلي .. مكياجي .. زوجي .. عصبيه ..

حتى جاراتي استقبال عادي جدا .. خلاص صرنا ميانه ماله داعي اسوي حتى حلا

زوجي اخر شي صرت افكر فيه .. يجي من الدوام البيت حايس .. مافي غدا ..

وهو صابر وساكت ويحاول يفهمني اني تغيرت ولا فهمت ولا حسيت على دمي

وش صار ......؟؟

صار يخونني ... تلومونه ؟؟؟

حتى اخته وهي اخته تجلس بالبيت وهي لابسه زين ومستشوره شعرها وهي مو

متزوجه

وزوجته اللي قدامه ليل ونهار شعرها طول الوقت لامته بشباصه لونها بعيد كل البعد

حتى عن لون قميصها المعتاد << لاحظو قميصها لان البناطيل وايامها راحت عندي

كشفته انصدمت وبكيت وصحت وبالاخير وش قالي .. انتي السبب ..

جلست اكابر وقلت لا انت ماتصون وانت وانت

رحت ابطلع حرتي بالنت .. عرفت بنات وشباب بالنت .. كلمت وشفت وطلعت

على بالي بارد له الصاع صاعين وارضي نفسي ..

جلست افكر طيب هو ليه خانني ؟؟؟ انا سويت وسويت وسوييت ليه اعاتبه وليه

اخونه الحين ..؟؟

لو كشفني رماني بالشارع ماراح يرحم حالي ولا حال عيالي .. وكله عشان ارد

اعتباري وش يعرف الناس اني كنت اكلم عشان ارد اعتباري اصلا ؟؟

وش هالتفكير الغبي ..

اروح لااهلي ازورهم القى مشاكل لللييييييييييل .. اتخيل نفسي ارجع اعيش معهم

جلست ابكي مااقدر مااقدر ارجع اعيش معهم مستحيل بعد الراحه اللي كنت فيها

مااقدر زوجي حتى جوالي مايفتحه ولايحاسبني ولا يسال لثقته فيني ارجع اهدم

بيتي وارجع للعذاب اللي هربت منه بايدي لييييييييييييييه لييييه وانا السبب اصلا

رجعت لنفسي .. تسبحت وتعوذت من الشيطان وكسرت شريحتي .. وبكيت وجبت رقم

ثاني وغيرت اثاث بيتي وصرت احسن حتى من العروس بس بعد ايش؟؟؟؟؟؟

بعد ماانجرحت من زوجي وانا السبب واجي ارد اعتباري بغلط افظع من غلطته

صار زوجي معي احسن من ايام زواجنا .. صرت اروح كل مكان يخطر ببالي

نتمشى ونطلع والضحكه تملا حياتنا .. تغيرت حياتي لاني تغيرت مع نفسي ومع ربي

كان همي قبل اني ارضي الشيطان وارضي غروري وعيون الناس

تعبت نفسيتي .. لقيت كل هم يجيني من ورى هالناس وكلامهم والمعاصي ..

لفيت ودرت ورحت وجيت وججربت كل معصيه مالقيت شي يرضيني

كان الطريق الصح قدامي بس الشيطان شاطر كان يربط على عيوني يقول لا امشي

معي انا اسعدك واسوي لك واسوي ....

بس والله مالقيت هالسعاده والرضا الا بطريق ربي ورضاه

كنت ايام ظلالتي اصلي وكان احد يسابقني .. اذا اذن للصلاه والله العظيم كان حجر

على صدري مهمومه ابي تنتهي هالصلاه وارتاح .. بالعكس احس ضيقه اكثر من اول

والحين سبحان مغير الاحوال صرت انتظر وقت الصلاه عشان ارتاح ويرتاح بالي

وانا اصلي واذكر الله..

مهما قلت ومهما وصفت لكم كيف كنت عايشه وكيف الحين ماااوفي هالاحساس

بنات ...

انا مااجيت هنا اتباهى بالمعاصي والخطايا .. والله لو فكرنا بذنوبنا لخجلنا حتى

من انفسنا فما بالك اجي هنا ولااخجل من الوف يقرؤؤن مااكتب ..

دعواتكم لي بالثبات ... ونصيحه لكل اخت ظاله ومهمومه وضائقه ومكروبه

كل هذه دوائها عند رب لاتنام عينه .. ادعيه بالاسحار وباوقات الاستجابه فهو

الهادي وهو مفرج كرباتنا .. لاتنتظري احد يحل مشاككلك ومصائبك وتبحثي عن حلول

بالمنتديات فكل انسان لديه مايكفي من الهموم وماراح يساعدك احد ..

كل شي بيد رب كريم غفلنا عن دعاه وطاعته وبحثنا عن الحلول بايد بشر مثلنا

لاحول لهم ولاقوه ..

اسفه اطلت الكلام ولكن اتمنى ان اكون وصلت مااكنت اعانيه وكيف لقيت الراحه

بطريقه ترضي الجميع ..

دعواتكم والله يهدي الجميع

يلزم عليك تسجيل الدخول أولًا لكتابة تعليق.

تسجيل دخول

الولود • 14 سنة

الله يهديك ويهدي ينات المسلمين

**طفله حنونه** • 14 سنة

ماشاءالله تبارك الله
اهنيك على توبتك ورجوعك لربك جل في علاه

الله ييسر امرك ويكون معك ويوفقك ويحفظ لك عيالك ويصلحهم
امين امين امين

المنفلقه • 14 سنة

ماشاءالله تبارك الله والحمدلله انك رجعتي لربك واهم شي التوبه النصوحه

sara.abdel • 14 سنة

**طفله حنونه** :

ماشاءالله تبارك الله اهنيك على توبتك ورجوعك لربك جل في علاه الله ييسر امرك ويكون معك ويوفقك ويحفظ لك عيالك ويصلحهم امين امين امين

ماشاءالله تبارك الله اهنيك على توبتك ورجوعك لربك جل في علاه الله ييسر امرك ويكون معك ويوفقك...

رانسي .. • 14 سنة