قصه جميله ..

 قصتي مع زوجتي يزاها الله خير .. قبل سنة و نص .. توفوا أمي و أبوي بحادث ربي يرحمهم و يغمد أرواحهم الجنة .. كنت وقتها 23 سنة و أكبر خواتي 19 و 3 خوات غيرها و أخو صغير عمره 3 شهور ! يت جدتي و سكنت ويانا .. تعاونوا هي و أختي بالمسؤولية بس بعد تعبوا ! كنت أشوف أختي تصيح لو أخوي ما رضى يسكت .. جدتي تبجي لو أختي الصغيرة طرت أمي و أبوي ! كان الضغط كبير علي وايد مع إن أعمامي و خوالي ما قصروا .. و بعد ثلاث شهور صرت أتذكر أمي و هي تقولي بزوجك فلانة ( صديقة أختي ) .. كانت مصرة عليها بشكل كبير .. شاورت أختي و جدتي و استخرت و كلمت أبوها .. ما توقعتها توافق و لا توقعت أبوها يرضى .. بعد ثلاث أيام دق علي و قالي حدد يوم و تعال مع أعمامك للملكة و الزواج .. العروس ما تبا عرس و لا أي احتفال .. تزوجت بعد أيام بعزيمة للرياييل .. و خذت زوجتي للبيت .. دخلت سلمت على جدتي و خواتي و مسكت أخوي الصغير و ضمته بحضنها .. و سكت ! أصرت إنها تنومه معانا في أول يوم من زواجنا ! و تعاونوا هي و أختي على المسؤولية بحكم إني مضطر أغيب عن البيت أيام بسبب دراستي الجامعية .. بعكسهم هم اللي جامعاتهم بنفس الإمارة .. كانت جدتي بس تكلمني تقعد تمدح في زوجتي .. و زوجتي ما عمري سمعتها تناديها غير بـ يمه .. كنت أقوم فالليل ألاقيها تتمشى بالغرفة و هي تحاول تنوم أخوي ! حضرت حفل تخرج أختي من الابتدائية .. كانت ترجع من الجامعة تعبانة بس مبتسمة .. تلاعب أخوي و تساعد خواتي فواجباتهم و تذاكر لهم مع أختي الكبيرة .. هذا غير الهدايا اللي كانت تكافأهم فيها على الصلوات اللي يصلونها .. شفتها بعيني كيف تحب جدتي و خواتي و أخوي .. كيف تتعب عشانهم .. و مع هذا و لا مرة اشتكت .. و لا مرة رجعت البيت و لقيتها مش مبتسمة و مش سعيدة .. الحمد لله و لا مرة اختلفوا هي و أختي .. و عقب سنة من زواجنا ، سألتها عن السبب اللي خلاها توافق .. قالت لي أن أمي قبل أسبوع من اللي صار دقت عليها و قالتها عن حلم حلمته و وصتها علي و على إخواني ! تحملت المسؤولية بسبب اتصال ! تقول كنت أقوم الليل و أدعي أن ربي يرزقني فرصة تحمل مسؤوليتهم و تربيتهم .. و ربي استجاب لها .. هي كبيرة في عيني .. و ما أنسى جمايلها أبد .. أخوي الصغير ( خالد ) يناديها ماما و يناديني بابا ألحين





منقوووووول