الجزء الثالث عشر
===============
في سيارة حمد ...
كان حمد يسوق .. وهو يفكر ويقول: يا سلااااام انا ما سويت شي وكل شي استوى بروحه .. انا خططت وكل شي تنفذ.. اقدر ارفع قضية على احمد واسحب الولد منه بحجه انه ما يقدر يربي ولده والحادث إلي استوى هو اكبر دليل.. كل شي يا من عند الله انا خططت وبس وما نفذت شي .. آآآه يا يوسف .. احينه بريح قلبي منك ...احينه بدمرك.. بخليك تجوف ولدك ينهار جدامك .. وباخذ حفيدك منك .. انت بتتحطم بشكل نهائي .. وتم يفكر بكل شي بس قطع تفكيره صوت حرمته ..
ام شيخه: بو محمد .. انتبه ع الطريج انته وانت تسوق
حمد: ها .. هيه زين انج نبهتيني .. انا بسير عند المحامي شوي
ام شيخه: اي محامي يا ريال
حمد: ما يخصج انتي .. احينه اقدر آخذ راشد من احمد .. بحجه ان احمد ما يعرف يربي ولا يقدر يهتم بولده
ام شيخه: صج؟؟؟ يعني خلاص
حمد: طبعا باخذه وبنسافر على طول
ام شيخه: فرحت قلبي يا ريال .. خلني ابشر حمدووه فديتها والله
حمد: بشريها
اتصلت ام شيخه على بنتها حمده بسرعة وبشرتها ان راشد بيكون عندها وهي بتربي ولد اختها .. طبعا حمده استانست واااااااايد .. لأن امنيتها تحققت اخييرا

في المستشفى ..
وصل سعيد.. ودش حجرة راشد.. وجاف احمد في حاله يرثى لها .. سار عنده وحضناه بقووو وتم يهديه ويقوله..
سعيد: يا احمد لا تسوي في عمرك جييه .. راشد ما عليه شي ان شاء الله
احمد: سعيد .. انت ما تحس بإلي احس فيه .. والكلام سهل .. يا سعيد راشد ولدي ولدي افهمني
سعيد: فاهمك والله اني فاهمك
احمد: لا محد يفهمني .. تبوني اهدى وتقولون لي انكم تفهموني
سعيد: احمد استهدي بالله .. حرام إلي تسويه في نفسك
احمد: شو تباني اسوي .. اضحك وارقص؟
سعيد: ما قلت لك اضحك ولا ارقص .. ادعي حق ولدك ترى هذا إلي بيساعده
احمد: اذا صار فيه شي .. انا بموت على طول
سعيد: ان شاء الله ما بيصير فيه اي شي .. انت ادعي الله وتوكل عليه و ولدك بيكون بخيير
احمد: ان شاء الله

وفي نفس الوقت.. كان حمد عند المحامي ويقول له انه لازم ياخذ راشد لأن ابوه ما يعرف يربيه وما يهتم فيه وكان يالس يقنع المحامي بكلامه ..

في المستشفى
احمد يصلي ويدعي ربه انه يحفظ ولده ويقومه بالسلامه .. عقب ما سلم احمد سمع صوت ولده .. قام من مكانه بسرعة وسار عند راشد ومسك يده
احمد: راشد؟؟ حبيبي انت قمت؟
راشد: ابا ماي
احمد: ان شاء الله عمري .. لو تبا روحي بعطيك اياه احينه ...
وياب الماي وسقى ولده بسرعه
وقف احمد وتم يطالع ولده ودموعه تنزل من عينه.. ما قدر يمسك عمره ابدا سار وحضن ولده وباسه وقال: رشوودي .. حبيبي لا تسوي فيني جيه مرة ثانية .. انا بموت اذا جفتك جيه .. رشودي انا احبك وااايد .. وماقدر استغني عنك لحظة .. حبيبي انت إلي بقيت لي في هالدنيا وانا ماعندي غيرك
سكت راشد وما قال شي.. بالاصح ما عرف شو يقول لأبوه .. هذي اول مرة يجوف ابوه بهالحاله حس انه ما يقدر يستغني عنه لحظة .. مسك ابوه وتم يصيح وياه
شوي ودش حمد الحجرة وقال..
حمد: مشهد مؤثر .. نزلتوا دموعي غصبا عني
احمد مسح دموعه بسرعة ولف وقال: هلا عمي
حمد: اهلين
احمد: تفضل ايلس وارتاح
حمد: انا مب ياي عشان ارتاح انا ياي عشان انهي سالفة جدييييمه من بينا
احمد: اي سالفه؟؟
حمد: سالفه راشد
لف احمد على ولده وجافه .. وبعدين طالع حمد وقال: شو بلاه راشد؟؟
حمد: الظاهر ان نسيت كلامنا عقب ما توفت امه
احمد: اي كلام؟؟؟
حمد: مب قلنا انك اذا اهملت راشد .. بتفقد حقك في رعايته
احمد: شووو؟؟ لا .. لا ما تقدر انا ابوه ما تقدر
حمد: انا اقدر .. وبسوي كل شي .. وهاي هي الاوراق إلي تثبت كل شي وانت ما تقدر تنكر كلامك
احمد: بس انا ..
حمد: انت شو؟؟ انت اب فاشل وما تقدر تعتني بولدك ولا شي .. وانت ما تستحق انك تربيه .. انا باخذ راشد وبربيه احسن تربيه .. وانت سير وسوي إلي تباه .. تبا تعرس عرس .. وسوي إلي تباه
احمد: انا ابوه .. ومحد يقدر يسوي شي
حمد: لا خلاص كل شي انتهى .. وهذي هي الاوراق جدامك ناقصه توقيعك
احمد: ما بوقع على شي
حمد: مب ع كيفك.. السالفة انتهت.. واذا انت وقعت بتنتهي السالفة بكل بساطه واذا ما وقعت بناخذ الولد من عندك بالقووه ومحد بينفعك
راشد: انا ماباك .. انا ابا ابوي .. انت جذاب
حمد: جوف تربيتك يا احمد .. اسمع ولدك .. هذا دليل ثاني
حس احمد ان ريوله ما تشله .. حس انه فقد كل شي .. فقد كل شي في لحظة وحده وقال
احمد: بتاخذون ولدي مني؟؟ شو بيكون شعورك اذا احد يا واخذ ولدك بالغصب
حمد: لا تغير السالفه .. اليوم تم عنده وودعه .. لأنه من باجر بيي عندي خلاص
احمد: شوو؟؟ .. باجر ؟؟ بس هذا ولدي انا ..ولدي انت ما تفهم
حمد: ما يخصني .. انا رحمتك شوي وعطيتك يوم تقضيه مع ولدك .. وطلع من الحجرة
سكت احمد وما قدر يرد .. لأن هالسالفة استوت وهو تعباان ومنهار وما يقدر يتحمل اي شي.. هذا ولده .. ولده إلي يموت فيه .. بيروح عنه وهو ما يقدر يسوي شي .. وقف احمد وتم يتأمل كل شي من حوله .. تم يطالع ولده وقرب منه وحضنااه بكل قوته .. وبعدين تركاه وطلع .. طلع من غرفته وحس بصداع شديد .. ما قدر يتوازن .. وطاح واغمى عليه .. ركضوا عنه الدكاتره وشلوه وتموا يحاولون انهم يقومونه .. فتح احمد عينه وقال
احمد: راشد .. لا تتركني بروحي يا ولدي .. وقال للدكاتره .. طلعوا برع وخلوني بروحي وغمض عينه

في بيت مهره
خالد راقد .. ومهره عيزت من كثر ما توعيه
مهره: خلوووود يالله قووم .. تراك طفرتني والله
خالد: يا مره خليني رااقد .. تراج اذا وعيتني وقطعتي حلمي ما بحبج وبطلقج بسرعه
مهره: إلي يسمعك احينه يقول اني ميته اباك تحبني .. يالله قووم
خالد: شو هالكلام .. عطيتج ويه ركبتي فوق راسي
مهره: انت شو بلاك؟؟ .. قوم يالله فكني ... تراك طفرتني والله لين متى بتم راقد
خالد: لا والله ... وانتي يايه تتحكمين فيني وفي وقت رقادي .. يكون في علمج اني لين احينه متحملج
مهره: صج؟؟؟؟؟؟؟
خالد: هيه .. انا ما اباج ولا كنت ابي آخذج ولا شي .. انا كنت ابي بنت خالتي بس امي اصرت عليج انتي .. وانا اطريت وخذيتج
مهره: ها كلام يديد .. اول مرة اسمعه
خالد: طبعا .. تتحريني ميت عليج .. انا ماخذج تجربه وبس
مهره: شو انا سيارة .. ولا كندوره .. تجربني وبعدين تفرني
خالد: طبعا .. اجرب بالحلال احسن مما اجرب بالحرام
مهره: انت بعقلك؟؟
خالد: شو تتحريني مينون
مهره: خالد .. انت ليش تسوي فيني جيه؟؟
خالد: كيفي .. الكل يقول اني خبل .. بس انا بثبت لهم اني اقدر اسوي الي اباه
مهره: .......... (وتمت اتصيح(
خالد: بس عاد مابي اجوف دموع التماسيح .. امسحيهم بسرعه .. تصيح بدون سبب .. امسحيهم احسن مما ايي واصكج بكف .. واخلي لدموعج سبب
مهره: لا والله .. ابوي ما سواها وانت ياي و ........
بعدها مهره ما كملت كلامها .. ولقت لها كف قووي من خالد
خالد: يوم الريال يرمس .. المرة تسكت وما تقول شي .. اطلعي برع احينه وما ابي اجوف ويهج ابدا
طلعت مهره وهي تصيييح وما عرفت شو تسوي .. تكلم امها إلي ما بتسوي لها شي .. ولا ابوها إلي بتزيد من عذابه ولا احمد إلا مب متحمل شي عقب إلي استوى لولده .. نزلت راسها وتمت اتصييح .. وقالت محد بيساعدني ومحد بيتحملني .. كل واحد لازم يتحمل مشكلته

يوم عصييب مر على احمد ومهره .. احمد بيفقد ولده وما بيجوفه .. ومهره حست انها فقدت كل شي .. فقدت حياتها وضيعت عمرها

وفي مكان ثاني .. في بيت سعيد
يلس سعيد بروحه في الصاله وتم يفكر بحال احمد وفكر بمهره.. وسرح شوي.. قطع سرحانه صوت امه وهي تناديه ..
ام سعيد: سعيد .. من متى وانا اناديك ليش ما ترد علي؟؟ شو بلاك؟
سعيد: لا ماشي .. بس كنت افكر في احمد
ام سعيد: احمد وبس؟؟؟ متأكد؟
سعيد: هيه
ام سعيد: يعني ما فكرت في اي شخص ثاني
سعيد: شخص ثاني؟؟ مثل منو؟
ام سعيد: وحده حلوه
خاف سعيد وقال في خاطره لا يكون انا قلت شي بالغلط وبعدين سأل امه : وحده حلوه مثل منو؟
ام سعيد: مالت عليك وعلى ويهك .. انا اقصد خطيبتك يا ريال .. خطيبتك إلي ما تتصل عندها ابدا .. ولا تهتم فيها ولا جنها خطيبتك .. يا ريال حرام عليك
ارتاح سعيد شوي وقل: ان شاء الله يا يمه بتصل عندها اليوم
ام سعيد: اتصل عندها احينه
سعيد: احينه؟؟ .. بس يمه
ام سعيد: لا بس ولا شي
سعيد: ان شاء الله
ام سعيد: مب تقول لها شحالج وشخبارج .. وتقفل .. ارمس عدل .. وراوني شطارتك
سعيد: ان شاء الله يمه
ام سعيد: انا بسير حجرتي وانت خذ راحتك
سعيد: لا افا عليج يمه شو انا بقول لها سر
ام سعيد: هيه ... انا بسير حجرتي
سعيد: خلاص براحتج
طلعت ام سعيد .. واتصل سعيد عند خطيبته
سعيد: الوو السلام عليكم
نورة (خطيبة سعيد) : وعليكم السلام
سعيد: شحالج؟؟
نوره: الحمدلله بخير .. انت شحالك؟
سعيد: يسرج الحال
وسكتوا اثنيناتهم فترة
سعيد: وشعلومج بعد؟
نورة: الحمدلله
سعيد: شو الدراسة؟
نورة: انا خلصت الجامعة واشتغل احينه
سعيد: صج؟؟ ما شاء الله عليييج
نوره: هيه .. سعيد .. الظاهر انك ما تعرف عني اي شي
سعيد: لا افا عليج .. بالعكس انا اعرفج عدل .. بس انا هالايام مشغووووول واايد .. ربيعي متلعوز واايد ومشغوول واايد .. انا اعزج يا مهره واايد
نوره: لا يا سعيد .. الظاهر انك ما تعرف عني اي شي .. حتى اسمي .. انا اسمي نورة
سعيد: والله اني آسف ما قصدت شي .. بس صدقيني انا
نورة: ما عليه .. ولا جني سمعت شي
سعيد: سامحيني يالغالية .. انا كنت ياي اقولج سالفه والسالفه فيها اسم مهره وقلتلج انا اعزج يا مهره
نوره: هههههه صج؟؟ .. وشو هي السالفة؟
سعيد: كله منج نسيتها .. خليتيني انساها
نوره: ههههههه لا والله
سعيد: هيه انا يوم احط في بالي شي وبعدين اي شخص ثاني يغير السالفة وجيه انسى إلي كنت بقوله
نوره: هههههههه الله يعيني دامك جيه
سعيد: ههههههه هيه والله
وتموا يتسولفون فترة طويله .. وسعيد يقول في خاطره الحمدلله عدت السالفه على خير ..

في اليوم الثاني
في بيت حمد
وقف حمد جدام المرايا وحس انه انتصر وحقق كل شي .. وانه حطم يوسف واحمد وانه كسب كل شي .. حس براحه عقب إلي سواه عقب ما حطم قلب اب حنون يموت في ولده ..
ما فكر بلحظة انه مثل ما حطم يوسف وولده ممكن اييه اليوم إلي يتحطم فيه هو ولده .. حتى اذا كان ولده ما سوى شي وماله ذنب .. الدنيا دواره .. ويوم لك ويوم عليك ..
عدل حمد غترته .. وتم يطالع تذاكر السفر .. وبعدين زقر حرمته
حمد: يالله زهبي عمرج .. بنسافر اليوم
ام شيخه: اليوم؟؟
حمد: هيه اليوم انا بيب راشد وبنسير المطار
ام شيخه: على امرك
وسارت ام شيخه وكلمت بنتها وولدها وقالت لهم انهم بيسافرون اليوم عقب ما خلصوا كل شي وحققوا امنيتهم
وصل حمد المستشفى .. وسار عند الدكتور ووقع على اوراق راشد وسار وشلاه (لأن راشد انكسرت ريله وما يقدر يمشي) .. وبعدين تذكر احمد.. سأل الدكاتره عنه وقالوا له انه مريض وانه مرقد في المسشتفى
سار حمد عند احمد ودش حجرته وهو شايل راشد
حمد: يالله انا بسير احينه .. من طيبتي يبت لك راشد .. عشان تجوفه لآخر مرة في حياتك
سكت احمد وما قال شي
ضحك حمد بصوت عالي .. وحس انه انتصر خلاص ومحد قده كسب كل شي وانه حطم احمد خلاص وشل راشد إلي كان يصيييح وهو يجوف ابوه وهو مريض
راشد: يدي حمد .. ارجوك خلني اتم عند ابوي .. يدي حمد نزلني ارجوك .. مابي ابعد عن ابوي يدي حمد .. انا احب ابوي .. يدي حمد لا تبعدوني عنه .. انا انا ماروم اعيش بعيد عنه
حمد: اسكت يا راشد انت ما تعرف شي بعدين بتشكرني لأني بعدتك عن ابوك
راشد: يدي حمد .. ارجوك خلني احضن ابوي
حمد: اففف .. خلاص بوديك عنده
وقرب حمد راشد من عند ابوه .. لصق راشد في ابوه وحط راسه ع صدره وتم يصيييييح بصووت عالي وكان يشهق ويصييح .. ما تمنى انه يبعد عند ابوه لحظة .. بس الدنيا فرقتهم
مسح احمد راس ولده وقاله: راشد.. انت ريال .. ولازم ما تصيح .. وتتحمل كل شي .. صج انهم فرقونا عن بعض .. لكن قلوبنا وارواحنا بتم مع بعض دووم.. رشودي.. كل ما تحس بضيج ولا شي .. غمض عينك وتخيلنا انا وامك .. وتذكر اننا بنكون وياك للأبد وما بنتخلى عنك ابدا.. الله فوقهم .. والله بيجازيهم كلهم .. ومثل ماهم فرقونا .. الله سبحانه وتعالى بيجمعنا ... تذكر كلامي عدل.. يمكن ما بتفهمه احينه .. لكن بيي اليوم إلي بتفهم فيه كل كلمه .. امسح دموعك .. وكن ريااال اعتمد على نفسك.. وسامح ابوك لأنه ما بيده حيله .. استغلوا ضعفي واضرابي .. وسلبوا مني اغلى ما املك .. سامحني يا رشود ما قدرت اسوي لك شي.. سامحني يا ولدي الغالي قصرت في حقك وماهتميت فيك .. وسامحيني يا شيخه .. ضيعت الامانه وما رعيتها
وطاحت دموعه على راس ولده .. رفع راشد راسه ومسح دموع ابوه وقال: يا يبه .. اقسم لك اني برجع لك .. اقسم لك اني برجع لك .. وبعيش وياك .. اترياني
ابتسم احمد .. وتم يطالع ولده وما شل عينه عنه .. قرب حمد وشل راشد وطلع من حجرة احمد.. حاول راشد انه يمسك دموعه بس ما قدر ترك دموعه تنزل ع جتف يده حمد
وحمد ماهتم بإلي صار وكمل طريجه ولا جنه جاف شي ولا حس بشي .. وهو طالع جاف يوسف في ويهه ضحك حمد ضحكت النصر بس رد عليه يوسف وقاله: لا تفرح وايد .. ترى الدنيا دواره .. يوم لك ويوم عليك .. راشد ولدنا.. وما بيعيش إلا في حضن ابوه
حمد: كلامكم هذا ما يأثر فيني انا شفيت غليلي وطفيت ناري وارتحت خلاص وما عاد يهمني شي
وطلع حمد من المستشفى .. وركب سيارته .. وسار المطار .. وسافر هو حرمته وعياله وراشد

الجزء الرابع عشر
===============
بعد يومين طلع احمد من المستشفى وكانت حالته النفسية سيئة جداً وما كان يرمس مع اي احد ولا ياكل ولا شي .. ما تحمل يوسف انه يجوف ولده بهالحاله وما يسوي شي .. سار عند ولده عسب يرمسه ويهديه شوي
يوسف: احمد .. انت مشغول؟؟
هز أحمد راسه بالنفي
يوسف: احمد .. انت ولدي الوحيد وما احب اجوفك بهالحاله ابدا .. يا ولدي خل كل شي على الله سبحانه وتعالى .. وراشد بيرد لك انت وبس
احمد: يبه .. مب انت قلت اني ولدك الوحيد ؟؟ .. تخيل اني كنت صغير ويا واحد وشلاني منك غصبا عنك شو بتسوي؟؟ .. يبه راشد ولدي الوحيد .. يبه افهمني انا ما عندي غيره ابدا
يوسف: احمد هدي اعصابك .. ولدك بيرد لك انت وبس
احمد: يبه .. انا تعبت شوي وراشد راح عني .. يا يبه حرام عليكم ما سويتوا شي .. انا طحت والكل طاح وراي.. يا يبه حرام عليكم.. كل شي على راسي انا .. راشد حفيدك وانت تحبه ولازم تدافع عنه بعد مب تستلم لحمد وخلاص
يوسف: احمد انا تفاجأت و....
احمد: يبه خلاص كل شي راح .. وانا ماقدر اتحمل بعد .. بتم بروحي ما ابي احد يرمسني ولا شي
يوسف: وانا بعد؟؟ ما تبا ترمسني؟
احمد: يا يبه ما قصدت جيه
يوسف: ما عليك انا مقدر حالتك .. اليوم مهره بتيي وتبا ترمس وياك
احمد: يبه ما ابي اجوف احد
يوسف: عاد انت تفاهم وياها
احمد: يصير خير
يوسف: انا بسير عند امك احينه .... وطلع من الحجرة
وفي الصالة كانت ام احمد يالسه بروحها وتفكر في ولدها وحفيدها وحياتها وكانت تسترجع ذكرياتها يوم كان عمرها 18 سنة.. وتقدم لها حمد (بوشيخه) لأول مرة وهي رفضته لأنه ما كان يشتغل وكان حاد الطباع.. وتقدم لها يوسف ووافقت عليه على طول لأنها كانت تبا تفك من حمد وتثبت له انها رافضته وبشكل نهائي.. تمت ام احمد تفكر بكل شي وتقول في خاطرها: معقوله .. معقوله حمد بعده يتذكر ذيج السالفة؟؟ ..بعده يتذكر اني رفضته وياي ينتقم وياي يدمر حياتنا كلنا؟؟ بعده حاقد علينا .. ماصدق ..هالشي مستحيييل .. ماقدر اصدق ولا استوعب هالشي ابدا ... وتمت تفكر اكثر وقطع تفكيرها صوت يوسف
يوسف: عاشه
ام احمد: هلا بواحمد .. شحاله حمود احينه؟
يوسف: على حاله .. يلومنا لأننا ما سوينا شي
ام احمد: هييه .. آآآآه يا ولدي .. ها كله بسببي
يوسف: ها؟ بسببج انتي؟ .. ليش شو صار؟ .. شو مسويه؟
تذكرت عاشه ان يوسف ما يعرف شي عن سالفه حمد وبعدين قالت: لا لا ماشي انا قصرت في حقه وحق راشد
يوسف: هييه
ام احمد: انا بسير حجرتي
يوسف: شو بلاج؟؟ في شي مضايجج؟
ام احمد: لا ماشي
يوسف: بس ويهج يدل على انج تعبانه .. اوديج المستشفى؟؟
ام احمد: لا ما عليه بسير وبرقد وبرتاح
يوسف: هيه مهره بتيي اليوم
ام احمد: صج؟؟ .. خير ان شاء الله
يوسف: عاشه قبل لا تسيرين بسألج
ام احمد: خير؟
يوسف: ليش ما تحبين مهره شرات ما تحبين مريم؟
ام احمد: انا احب كل بناتي
يوسف: بس انتي تحبين مريم وميره اكثر .. مهره حليلها ما سوت شي
ام احمد: لا سوت وايد
يوسف: صج؟؟ .. يعني ما تحبين مهره
ام احمد: ها .. لا لا احبها
يوسف: شو مسويه مهره؟
ام احمد: ماشي
يوسف: قولي
ام احمد: كل السالفه انها محتله قلب بواحمد
يوسف: ههههههههههههههههههههه .. احلفي انتي بس .. تغارين من بنتج؟
ام احمد: ماعرف
يوسف: صج والله تغارين منها؟؟
ام احمد: هيه
يوسف: افا عليج انتي الاصل.. انتي ام عيالي ورفيجة دربي .. وإلي ما تخش عني شي ولا اخش عنها شي .. وإلي تحملتني واايد
ما عرفت شو تقول وكيف ترد على يوسف خاصه بعد ما قال انها ما تخش عنه شي..
نزلت راسها وقالت: يوسف بسير حجرتي احينه
ابتسم يوسف وقال: خلاص ما عليه سيري وارتاحي
وقفت عاشه في مكانها وما قدرت تتحرك .. وبدت دموعها تنهمر رفعت عاشه راسها وجافت يوسف.. استغرب يوسف من إلي يجوفه عاشه تصيح .. قرب منها وقال
يوسف: عاشه فيج شي؟؟ شي يعورج؟؟ عاشه قولي بوديج المستشفى احينه
ام احمد: لا يا يوسف .. لا انا السبب فإلي صار لأحمد .. انا السبب
يوسف: منو قال .. انا اهملت احمد واهملت هالسالفة وانا إلي لازم يتحمل هالشي
ام احمد: لا يا يوسف.. انا السبب انت ما تعرف ان حمد خطبني قبلك وانا رفضته.. وانت تقدمت لي ووافقت عليك .. وبعدها قالي انه بيدمر حياتنا .. يوسف انا السبب انا السبب
يوسف: هييه احينه فهمت .. فهمت كل شي .. فهمت سبب كره حمد .. سيري الحجرة وارتاحي.. مب وقت اللوم احينه إلي صار صار
ام احمد: وشو بتسوي
يوسف: بتعرفين كل شي في وقته.. بس لا تنسين ان مهره يايه اليوم
ام احمد: ان شاء الله .. وطلعت حجرتها
وفي نفس اليوم عقب صلاة المغرب يت مهره وكان التعب ظاهر عليها .. استقبلها ابوها عند الباب وابتسم اول ما جافها وبعدين قال
يوسف: مهرووه .. شو بلاج يمه؟؟ تعبانه؟
مهره: لا ماشي
يوسف: مهره .. مهره شو هذا؟؟؟
ارتكبت مهره وبعدين قالت: شو ؟؟
يوسف: شو هالعلامه؟؟ منو ضرباج؟
مهره: اي .. هالعلامه؟؟ لا يبه انا تعورت
يوسف: تقصين علي؟؟ .. مهره منو ضرباج؟
مهره: محد .. يبه قلتلك اني تعورت
يوسف: خالد؟؟
مهره: شو بلاه؟
يوسف: مهره .. ردي علي خالد ضرباج
سكتت مهره وقالت: لا يبه .. قلتلك تعورت ... احمد وينه؟؟
يوسف: احمد في حجرته
مهره: بسير عنده
يوسف: مهروه حبيبتي .. اذا كان خالد هو إلي ضرباج تراني ما بسامحه ابدا .. ولا بسامح عمري
مهره: لا يبه ما صار شي .. وبعدين لا تقول جيه
يوسف: خير ان شاء الله .. سيري عند اخوج .. تراه محتاج لج واايد
مهره: وانا بعد
يوسف: هيه اعرف .. وابتسم
طلعت مهره بسرعه وسارت عند اخوها ودقت الباب
مهره: بدخل ها .. ودخلت
احمد: الناس يقولون ممكن ادخل .. مب بدخل ها
مهره: ههههه ... لأني اعرف اذا قلتلك ممكن ادخل بتقفطني وبتقول لأ
احمد: هههههه .. زين تعرفيني عدل
مهره: اخيييييييرا ضحكت .. من متى اتريا هالضحكه
احمد: البركه فيج
مهره: احمد .. لا تخاف على راشد .. ترانا بنيبه لك .. حمود لا تخاف ترا ابوي ما بيسكت وانت ارتاح شوي وانت بعد بتقدر تاخذه غصبا عن الكل هذا ولدك انت ومحد يقدر يتدخل
احمد: ان شاء الله
مهره: يالله انت ارتاح ولا تفكر وايد ترانا كلنا وياك
شوي ورن تلفون احمد
احمد: هذا سعيد ..
مهره: رد عليه
احمد: اوكي ... السلام عليكم
سعيد: هلااااااااا وعليكم السلام اخيرا رديت علي
احمد: اهلين
سعيد: شحااااااااااالك؟؟
احمد: الحمدلله انت شحالك ..
وفي نفس الوقت .. اشرت مهره لأحمد على اساس انها بتظهر
احمد: لحظة شوي سعيد .. مهره اتريي لا تسيرين
سكت سعيد وما قال شي
احمد: اسمح لي كنت ارمس اختي
سعيد: لا عادي بس اذا مشغول ولا شي بدق لك عقب
احمد: لا عادي مب مشغول .. شحالك وشخبارك؟؟
سعيد: والله تماام
وتموا يتسولفون ومهره كانت اطالع صورة شيخه.. وتتذكر الايام الماضية .. وايام شيخه واحمد .. وتذكرت شكثر كان احمد مرتااح ومستانس وياها.. ابتسمت مهره ابتسامه خفيفة وقالت في خاطرها: آآآه يا شيخه احمد محتاج لشورج احينه .. محتاج لج واايد في هالفترة
خلص احمد مكالمته وقفل
احمد: مهرووه ... مهره وين وصلتي؟
مهره: ها؟؟ لا وياك
احمد: هيه مبين .. شو تسوين هناك؟
مهره: ههههه لا ماشي كنت اترياك تخلص
احمد: هييه
مهره: شو بلاه سعيد؟
احمد: لا ماشي يسولف وبس
مهره: هييه
احمد: مهره؟؟
مهره: هلا
احمد: انتي مرتاحه مع خالد؟؟
مهره: هيه .. ليش تسألني هالسؤال احينه؟؟
احمد: لا بس شكلك تعبانه وايد
مهره: لا بس مب متعوده ع الجو
احمد: هيييه .. الله يعينج ويصبرج
مهره: آميين

مرت الايام والاسابيع ومروا خمس اشهر واحمد ما ترك مكتب محاماه إلا وسار له بس لأنه يبي يرد ولده بأسرع وقت ممكن .. تعب احمد ورد بيته عسب يرتاح وتفاجأ يوم لقى مهره في البيت
احمد: مهره.. خير شو بلاج؟ تعبانه من شي؟
مهره: ههههه الناس يسلمون
احمد: السلام عليكم .. شو بلاج؟
مهره: وعليكم السلام والرحمة .. ماشي اشتقت لكم وييت
احمد: لا بس شكلج تعبانه مهروه قولي شو بلاج؟
مهره: لا والله ماشي بس حسيت بتعب وييت وبسير المستشفى انا وامي بعد شوي بس كنا نترياك
احمد: هييه .. يالله عيل قومي شو تتريين .. ازقري امي
مهره: لا حمود مب احينه انت تعبان وايد
احمد: لا مب تعبان ولا شي يالله قومي
وسارت مهره وزقرت امها وساروا المستشفى.. وبعد الفحوصات عرفوا ان مهره حامل بالشهر الثاني وطلعوا من المستشفى ..
في السيارة
احمد: يمه شو قالوا لمهره؟؟
ام احمد: لا ماشي
احمد: شو لا ماشي جوفي ويهها
ام احمد: قلتلك ماشي
احمد: طالع اونه تخبون عني .. مهره شو قالوا لج
ام احمد: ياللقافه
احمد: اختي وابا اتطمن عليها
ام احمد: ماشي اختك حامل
احمد: والله؟؟ صج؟؟؟ مهره صج
مهره: ههه هيه صج
احمد: اخيييرا .. بيون يهال وبيزقروني خالي احمد
ام احمد: وعيال اختك مريم؟
احمد: لا هيول انا ما اعترف فيهم
ام احمد: لا والله؟؟ وليش ان شاء الله؟؟
احمد: عيال مهره غيير
مهره: سويتهم عياااال بعد .. هو واحد وبس
احمد: هههههه من الفرحه والله
سكتت مهره وما ردت عليه ابدا.. كانت حاسه بضيج.. وما بغت هالشي يصير بهالسرعه .. بس الله سبحانه قدر لها هالشي
احمد: مهروه .. اوصلج بيتج؟
مهره: هيه
احمد: خلاص عيل
وصلت مهره بيتها ونزلت من السيارة عقب ما سلمت على امها واخوها.. دشت بيتها وكانت تعباانه وتفكر برده فعل خالد.. تعرف انه ما يحبها وهي بعد ما تحبه ابدا .. فجت مهره باب حجرتها ولقت خالد في ويهها
خالد: وين كنتي؟
مهره: كنت عند امي .. قلتلك اليوم الصبح
خالد: هيه صح .. بس ليش تأخرتي
مهره: سرت المستشفى
خالد: ليش ان شاء الله .. شو فيج؟
مهره: كنت تعبانه واايد
خالد: صج؟؟ من متى؟
مهره: من زمان بس انت مب حاس بشي
خالد: افففف وشو قالوا لج؟
مهره: قالوا اني حامل
سكت خالد وما عرف شو يقول .. تم يطالع مهره وهو مصدوم وبعدين قال: صج؟
مهره: هيه
خالد: وليش جيه متضايجه؟
مهره: مب متضايجه تعبانه وبس
خالد: امبلا متضايجه .. لأنج تكرهيني .. وما تبين هالياهل صح؟
مهره: انت شو تقول؟
خالد: اقول الصج .. انتي تكرهيني وما تبينه صح .. انا بخلصج منه وللأبد
مهره: انت مينون؟؟
خالد: هيه قوليها .. انتي من زمان تبين تقولين هالشي .. تبين تقولين اني مينون انا اراويج يا مهره
مهره: بس خلاص تراك ذبحتني والله .. لوعت بجبدي ييت افرحك وانت قلبت السالفه هواش
خالد: انتي إلي تبين هالشي .. وبعدين انا شو ظمني انه ولدي؟
مهره: نعم؟؟؟؟
خالد: شو إلي يثبت لي انه ولدي
مهره: خالد انت فيك شي اليوم؟؟
خالد: مهرووه .. تأدبي
مهره: وانت بعد شو هالكلام.. يعني تتخيل انه مب ولدك؟.. تظن اني ....... خالد لهالدرجة يعني.. ما هقيتها منك والله.. ما هقيتها منك يا ولد عمتي.. خالد انا وانت متزوجين من خمس اشهر تعرف شو معنى هالكلام؟؟
سكت خالد وما عرف شو يرد.. بس قال في خاطره انه اذا سكت احينه مهره بتتمرد اكثر واكثر وقام وصفعها وقال: انتي في اي شهر احينه؟
مهره: الثاني
خالد: جدامج خمس اشهر وبس .. وبعدين بنتأكد اذا كان ولدي صج ولا شي ثاني
وطلع من الحجرة
يلست مهره ع الكرسي وتمت اتصيح وتقول: ياااارب .. يا رب شو هالمصيبة يارب انت اعلم بكل شي يا رب .. يارب انا زوجته من خمس اشهر يارب ساعدني.

الجزء الخامس عشر
===============
يلست مهره في الحجرة بروحها وتمت اتفكر بمشكلتها .. شوي حست بوجود شخص وراها.. ما لفت ولا جافت منو لأنها كانت واثقه انه خالد .. نزلت راسها وتمت ساكته .. قرب خالد منها اكثر واكثر وقال
خالد: مهره.. مهره اسمحي لي والله ما كنت اقصد.. مهره صدقيني.. انا ماكنت اقصد اني اقولج هالكلام .. انتي زوجتي .. وانا اعرف هالشي .. بس ماعرف.. مهره .. سامحيني والله .. مهره انا احبج بس انتي ..
مهره: انا شو؟؟.. كل شي اطيحه علي..انت دومك الصاج وانا الغلطانه.. قلتلك اني حامل .. اتهمتني وقلت لي شو ظمني انه ولدي .. يا خالد خاف ربك .. حرام عليك
خالد: مهره.. سامحيني والله ما بعيدها .. احيانا انا اقول كلام ما اعرفه ولا افكر فيه .. لازم تساعديني مب تلوميني
مهره: بحاول يا خالد .. بحاول
سكت خالد وما رد عليها .. وطلع من الحجرة .. وتمت مهره بروحها تفكر بمشكلتها

في بيت سعيد
سعيد: يمــــه .. يمــــــــه .. يمه ويييينج؟؟
ام سعيد: انا هني .. شو بلاك؟
سعيد: يمه .. ممم ماعرف شو اقولج
ام سعيد: شو بلاك؟؟
سعيد: ممم ماعرف من وين ابدأ
ام سعيد: قول شو عندك وابدأ من اي مكان
سعيد: يمه متى العرس؟
ام سعيد: عرس منو؟
سعيد: عرسي انا
ام سعيد: عرسك؟؟
سعيد: هيه .. شو بلاج يمه؟
ام سعيد: لا ماشي بس تفاجأت وااايد
سعيد: ما حددتوه بعدكم؟؟
ام سعيد: لا والله بعدنا نترياك
سعيد: يمه .. انا موافق على اي وقت تبونه
ام سعيد: صج؟؟ .. احلف يا سعيد احلف
سعيد: ههههههه شو مب مصدقتني؟
ام سعيد: من فرحتني مب مصدقه شي والله .. احلف وريحني
سعيد: ههههههه والله .. حلفت
ام سعيد: الله يوفقك يا سعيد ويرضى عليك ويريحك يااارب
سعيد: آآآآميين
ام سعيد: خلني ارمس خالتك واجوف شو رايهم
سعيد: اوووكي
وسارت ام سعيد ورمست اختها ..

بعد خمس اشهر..
وفي يوم الكل اجتمع في بيت بو احمد.. مهره وريلها.. ومريم وريلها وعيالها ..احمد يوم جاف خالد تضايج وتذكر المعاناه إلي تعانيها اخته وطلع برع البيت ..لاحظ خالد هالشي في احمد وتضايج شوي.. وتم يالس في الميلس مع بواحمد .. كلهم تموا يتسولفون وخالد كان ساكت وما يتكلم
بواحمد: خالد .. شو بلاك؟؟ متضايج من شي؟
خالد: ها؟ لا ماشي .. ماعندي شي اقوله
بواحمد: هييه ..
سكت خالد وما تكلم.. شوي ودش احمد الميلس.. طالعه خالد وعصب ودق على مهره وقالها يالله بنسير البيت.. استغرب احمد من تصرف خالد
احمد: خالد؟ شو صار؟ توكم يايين .. انا بعدني ما سلمت على اختي
خالد: لا والله؟ ما تعرف شو صار؟ اسأل عمرك .. وبعدين ما يحتاي انك تسلم عليها
احمد: وليش ماسلم عليها؟ مب اختي؟ .. خالد انت فيك شي اليوم؟
خالد: هيه قولها .. قول ان فيني شي .. هذا إلي تبونه ...
ودق على مهره
خالد: مهره اذا ما نزلتي احينه بتجوفي ..
وقفل على ويهها
بواحمد: خالد شو بلاك استهدي بالله
طلع خالد من البيت وهو معصب وركب سيارته .. شوي ويت مهره
مهره: خالد شو بلاك؟؟ صار شي؟
خالد: انتي شغلج في البيت
مهره: خالد انا شو سويت؟؟
خالد: اسكتي وما ابي اسمع صوتج
سكتت مهره وما قالت شي .. ساق خالد سيارته بسررعه ووصل بيته وقال لمهره
خالد: يالله انزلي واتريني احينه اييج
نزلت مهره شوي شوي ..كانت تعبانه واايد خاصه انها في اشهرها الاخيره.. دشت بيتها وسارت حجرتها .. دخل خالد الحجرة وقفل الباب وسار عند مهره .. وعطاها كف
مهره: ليش تضربني انا شو سويت لك؟؟
خالد: كله من اخوج .. كله منه
مهره: شو سوا؟؟
خالد: اخوج هو إلي خلى الكل يعاملني بهالاسلوب .. يتحراني مينون
مهره: خالد فهمني
خالد: ما يحتاي اني افهمج .. هو اخوج وانتي تعرفين حركاته ..
وبدأ يضربها ضرب
مهره: وليش تضربني .. انا شو سويت .. حرام عليك
خالد: انتي اخته .. ولازم تنضربين
مهره: حرام عليك .. بتذبحني وبتذبح إلي في بطني
خالد: مب ها إلي انتي تبينه؟ .. ما تبين هالياهل وانا بذبحه خلاص
مهره: خالد ارجوك .. خالد اتركني حرام عليك يا خالد .. حرام إلي انت تسويه فيني
خالد: دام انج اخت احمد .. مب حرام إلي اسويه فيج
وتم يضربها بكل قسوه.. مهره مالها لا حول ولا قوه.. طاحت ع الارض وما قدرت تتحرك .. خالد يوم جاف مهره بهالحاله خاف وطلع من البيت بسرعه .. وشرد محد درى بمكانه.. فتحت مهره عينها وكانت طايحه ع الارض ومب قادره تتحرك .. كانت تحس بوجع فظييع.. وجع ما تحملته تمت تصارخ .. بس محد سمعها .. وصدفه لقت تلفون خالد طايح ع الارض .. وقريب منها .. اخذت التلفون واستجمعت كل طاقتها.. واتصلت عند اخوها
احمد: الو ..
مهره :احمد .. احمد الحق علي
وطاحت ع الارض وما قدرت تكمل كلامها
طلع احمد من البيت بسرعه.. وساق سيارته شرات المينون ..ووصل بيت اخته .. لقى باب البيت مفتوح .. دش بسرعه وطلع عند مهره.. فج باب الحجرة وجاف اخته طايحه ع الارض .. شل اخته و وداها المستشفى
كانت حالة مهره صعبه .. ودخلوها غرفة العمليات بسرعه .. وبعد فترة طلع الدكتور وقال لأحمد
الدكتور: نحن سونا لها عملية قيصرية
احمد: وشحالها احينه؟
الدكتور: الام بخير والحمدلله اما الطفله ...
احمد: مهره يابت بنت؟؟
الدكتور: yes بنت حلووه
احمد: زييين .. وشحالها؟
الدكتور: تعباانه.. وحالتها خطيره .. لأن الام تعرضت لضرب شديد وعنيف .. وهالشي اثر ع الطفله .. واحتمال كبير انها ما تعيش
احمد: شووو؟؟ بنت مهره ما بتعيش؟ بتموت؟
الدكتور: العلم عند الله .. بس نحن بنبذل جهدنا وما تنساش ان الام تعرضت لضرب مبرح في الاشهر الاخيره .. وهالشي اكيد بيأثر عليها وعلى الطفله
احمد: الله يعينج يا مهره .. الله يعينج ... اقدر اجوفهم؟
الدكتور: ايوه.. بس بعد شوي
يلس احمد ع الكرسي وتم يفكر بمشكله اخته مهره .. كيف بتتقبل الوضع اليديد ..بنتها احتمال انها ما تعيش .. خالد اختفى ومحد يعرف وينه .. ومهره في المستشفى وما تعرف إلي صار في بنتها .. وراشد مع يده ومايعرف وين سافروا .. غمض احمد عينه وسند راسه ع اليدار .. شوي حس ان احد حاط يده على راسه
احمد: يبه؟
بواحمد: هيه .. شحال اختك؟؟
احمد: الحمدلله بخيير .. يابت بنت
بواحمد: والله؟؟ .. صج ؟؟ مهره يابت بنت .. الحمدلله
احمد: بس ..
بواحمد: بس شو؟؟ مهره فيها شي؟؟ .. احمد تكلم ولا تسكت
احمد: يبه.. خالد ضرب مهره.. وهالشي اثر عليها وايد وعلى بنتها .. بس مهره بخير اما بنتها في العنايه المركزة واحتمال ما تعيش بسبب الضرب الشديد
بواحمد: شو؟؟ .. منو قالك هالكلام؟
احمد: الدكتور
بواحمد: وهو شدراه؟؟ لا بنت مهره بتعيش باذن الله
احمد: العلم عند الله وحده .. الله يعينج يا مهره
بواحمد: هيه والله .. الله يعينها بنتي .. ها كله بسببي .. انا جبرتها على خالد .. انا السبب في كل إلي يصير لها
احمد: لا يا يبه لا تقول جيه .. حرام عليك
بواحمد: هذي غلطتي انا
سكت احمد وتم يطالع ابوه إلي كان مغطي ويهه بغترته ويصيح ..
احمد: يبه وينها امي؟ ما يت؟
بواحمد: امبلا يت .. بس انا قلتلها تترياني الصوب الثاني
احمد: هييه بسير عندها
بواحمد: انا بدش عند مهره انت سير عند امك
دخل بواحمد حجرة مهره .. وقرب منها .. فتحت مهره عينها
مهره: يبه؟؟
بواحمد: هيه حبيبتي
مهره: وينها بنتي؟ ما جفتها
بواحمد: حاطينها في الحضانة
مهره: يبه .. انت جفتها؟
بواحمد: لا بعدني .. بس بتكون حلوه شراتج
ابتسمت مهره
بواحمد: احينه بسير وبجوفها وبقول لهم ايبونها عندج اذا يقدورن
مهره: ليش؟ بنتي فيها شي؟
بواحمد: ها؟ لا ماشي .. بس تعرفين انها ماكلمت التسع اشهر
مهره: هيه ماعليه
طلع بواحمد من الحجرة .. وسار عند الدكتور وسأله عند بنت مهره
الدكتور: احب اطمنك ان البنت تعدت مرحله الخطر
بواحمد: صج؟؟ اقدر اجوفها؟
الدكتور: لأ مش دولأتي .. لازم تنحط تحت المراقبة مدة 24 ساعه
بواحمد: خير ان شالله .. مشكور دكتور
الدكتور: العفو ده واجبنا

ثاني يوم تحسنت حاله بنت مهره وااايد .. وطلعوها من العناية وحطوها في الحضانه مع باقي اليهال ..
وفي حجرة مهره .. كانت يالسه مع احمد اخوها ويتسولفون
احمد: هيه شو بتسمينها؟؟؟
مهره: انا .. بسميها .. طبعا بعد اذنك يعني .. اذا عندك مانع خلاص
احمد: هههه وانا شو يخصني؟
مهره: لا بس يمكن ما توافق ولا شي
احمد: وليش ما اوافق
مهره: مادري
احمد: ممم .. قول لي شو بتسمينها وانا بقرر
مهره: بسميها (( شيخه)) .. اذا ما عندك مانع
سكت احمد فترة طويله .. نزل راسه.. وبعدين قام من مكانه .. وطلع برع الحجره .. يلست مهره بروحها وتمت تلوم نفسها لأنها قالت له أنها بتسمي بنتها شيخه .. وبعد دقيقتين دخل احمد مرة ثانية
مهره: احمد .. اسمح والله .. ما بغيت اضايجك .. خلاص ما بسميها شيخه
احمد: لا افا عليج .. بالعكس انا استانست وااايد
مهره: متأكد؟؟
احمد: بصراحة .. انا كنت بطلب منج هالطلب .. بس استحيت واايد .. خفت انج ترفضينه
مهره: افا عليك .. انا مارفض لك اي طلب
احمد: صج؟؟
مهره: طبعا .. ها شو قلت احينه؟؟
احمد: ماعندي مااانع ابدا .. بالعكس موافق ومستاااانس واااااااايد .. تسلمين يامهره .. فرحتي قلبي واايد
مهره: الله يسلمك يالغالي
احمد: بسير وبجوف شيخه الصغيره
مهره: ههههه اووكي
طلع احمد من الحجرة وسار الحضانة بسرعه لأنه كان يبي يجوف شيخة الصغيره

بعد اربع ايام .. طلعت مهره من المستشفى .. وسارت بيت ابوها .. ويلست هناك اسبوعين .. وبعدهم ..
بواحمد: احمد .. مهره وينها؟؟
احمد: في حجرتها
بواحمد: هييه سير وازقرها
احمد: ان شالله
سار احمد وزقر اخته و ساروا الاثنين عند ابوهم
مهره: خير يبه؟
بواحمد: خير ان شالله .. يلسي هني
مهره: شو صار يبه؟
بواحمد: لا ماشي .. بس خالد
مهره: شو بلاه خالد؟
بواحمد: خالد رد البيت ويقول انه يباج تردين
مهره: وانت شو قلت ؟
بواحمد: إلي انتي تبينه هو إلي بيصير
مهره: يبه انا ماباه.. عقب إلي سواه فيني ما اباه .. يبه هذا معقد .. مرة تجوفه معصب وبعد دقيقة تجوفه يضحك.. ومرة تجوفه يرمس شرات اليهال وبعدين يتكلم بنبره جاده.. يضربني ويقول انه يحبني ويبي يعيش وياي انا وبس.. يبه انا ما اباه خلاص
بواحمد: اعرف والله .. انا وياج في كل كلمة
مهره: ووينه احينه؟؟
بواحمد: في بيت يدج
مهره: يبانا نسير هناك؟
بواحمد: هيه
احمد: يخسي ...
مهره: يبه متى بنسير؟
بواحمد: اليوم .. بعد ساعه
مهره: خلاص عيل بزهب شيخه وبسير وياك
بواحمد: خلاص عيل .. بترياج
سارت مهره حجرتها ولبست بنتها وعدلتها.. وهي بعد لبست ولبست شيلتها وعباتها وسارت عند ابوها
احمد: يبه انا بيي وياكم
بواحمد: وامك وينها؟
احمد: امي ويا مريم .. مادري شو يسون
شوي ويت ام احمد
ام احمد: خير شو صار؟ وين سايرين؟
احمد: خالد .. يبي يرد بنتج
ام احمد: صج؟؟ والله هذي الساعه المباركة .. المرة مالها إلا بيت ريلها
بواحمد: شوو؟؟؟ والله ما بيردها طول ما انا عايش .. انا بصرف على بنتي وما علي من احد
ام احمد: يا ريال حرام عليك لا تخرب حياة بنتك
بواحمد: انتي اسكتي.. البنت اختربت حياتها بسبتج انتي .. انتي غصبتيها على هالزواج .. نسيتي إلي استوى لها؟؟ نسيتي انها كانت في المستشفى
ام احمد: لا ما نسيت بس..
بواحمد: لا بس ولا شي .. وان سمعتج تعيدين هالكلام .. ترى بيتي يتعذرج
ام احمد: شو تقصد؟؟
بواحمد: اقصد شيلي اغراضج وسيري بيت ابوج
ام احمد: يا ريال حرام عليك .. انت تعرف ان ابوي توفى وين اسير ؟؟؟
بواحمد: خلاص عيل .. حطي لسانج في حلجج ويا ويلج إذا طلعتيه
وطلع بواحمد و احمد ومهره .. وساروا بيت يدهم

وفي بيت سعيد
ام سعيد: سعيد يمه .. تعال بغيتك
سعيد: خير؟؟
ام سعيد: خلاص حددنا العرس وكل شي
سعيد: صج؟؟؟
ام سعيد : هييه خلاص حددنا كل شي
سعيد: متى؟؟
ام سعيد: بعد شهرين
سعيد: هييه .. خلاص عيل .. بعد شهرين .. بعد شهرين
ام سعيد: الله يبارك فيك ويسعدك يا وليدي

الجزء السادس عشر
===============
في بيت يد احمد ومهره
كان يدهم يالس في الميلس هو وخالد وامه.. وكانوا يتريون بواحمد وعياله .. خالد ما توقع ان احمد بيي.. توقع ان مهره وابوها هم إلي بييون وبس لكن تفاجأ يوم جاف احمد.. انصدم وتم واقف في مكانه .. احمد تم يطالعه بنظرات زعل.. خاف خالد منه ونزل راسه.. سارت مهره وسلمت على يدها ويلست وبعد ما احمد سلم على يده يلس حذال اخته ..
بويوسف: يا حيالله بمن يانا
بواحمد: الله يحييك يبه .. شحالك وشخبارك؟
بويوسف: الحمد لله بخيير .. شحالكم انتوا؟؟
بواحمد: الحمدلله بخيير
بويوسف: شحالج يا ام شيخه؟
مهره: الحمدلله يدي انت شحالك وشخبارك عساك بخير؟
بويوسف: الحمدلله بخيير .. مهره .. انتي تعرفين ان خالد .. ريلج يبي يردج
مهره: يدي .. انا ..
بويوسف: اتري شوي .. بعدني ما خلصت كلامي
مهره: اسمحلي
بويوسف: يا مهره ترى خالد ولد عمتج قبل كل شي ولا تنسين هالشي
مهره: يدي .. خالد نسى هالشي .. نساه وماحترمه ابدا ..
بويوسف: هيه بس احينه هو ياي يعتذر ويرد كل شي
مهره: يعتذر؟؟؟.. يعتذر بعد شو؟؟.. يدي خلاص انا ما ابي ارد له.. ماقدر اعيش وياه مرة ثانية عقب إلي سواه فيني.. ماقدر اتقبل فكرة وجوده في حياتي مرة ثانية
بويوسف: والمعنى؟
مهره: اباه يطلقني
بويوسف: هالشي مستحييل .. وانت تعرفين انه مستحيل
مهره: وليش مستحيل؟؟.. من حقي اني اتطلق.. وبعدين خالد ضربني وكان بيذبح إلي في بطني .. واتهمني في شرفي.. قالي انه مب متأكد من ان الي في بطني ولده هو ولا ولد غيره .. انا ماقدر اعيش وياه
بويوسف: انا ما بعيد كلامي .. خالد ولد عمتج .. وما بتتطلقين منه ابدا
مهره: يدي .. يدي هذي حياتي.. انا إلي اعيشها.. انتوا مرتاحين وما تحسون بإلي انا احسه .. يا يدي حرام عليك .. يدي شو هالكلام إلي انت تقوله.. انا كل يوم انضرب من خالد.. وخالد له مليون حاله نفسية في اليوم .. كل دقيقة بحاله .. يا يدي حرام عليك.. انا ابا اعيش براحه.. انا كنت في بيت ابوي معززه وفوق الراس .. قالوا لي ولد عمتج بيحفظج وبيصونج.. وولد عمتي ضربني واتهمني .. يدي تخيل لو وحده من بناتك كانت في مكاني.. ورضت وبولد عمتها وهو سوى فيها جيه .. شو كنت بتسوي؟؟؟ قول لي ..
بويوسف: بس خالد ولد عمتج
مهره: ولد عمتي على عيني وراسي .. بس يسوي فيني جيه؟؟
احمد: وانت ليش ساكت؟؟ تكلم .. ( تم يطالع خالد(
خالد: اتكلم.. وشو اقول؟؟
احمد: يعني تعترف انك انت الغلطان
سكت خالد وما رد على احمد
مهره: يدي انا قلتلك إلي عندي.. واذا انت رفضت هالشي.. ترى الدولة مب مقصره .. انا بسير المحكمة وهناك بيطلقوني منه غصبا عنه وعن الكل
بويوسف: صج؟؟ تتوقعين ان السالفه بهالبساطه؟؟
احمد: يدي حرام عليك
بويوسف: اسمعيني يا بنت يوسف .. اذا سويتها .. تراج لا انتي حفيدتي ولا انا اعرفج
مهره: شو؟ ليش؟
بويوسف: شو ليش؟؟ شو تبين يقولون عنا الناس؟ بنت يوسف تطلقت؟؟ تبينهم يتشمتون فينا؟
مهره: يا يدي نحن احينه مب شرات قبل .. نحن في زمن ثااني .. زمانا غير زمانكم .. يدي اترك عنك هالكلام.. يدي خلك واقعي شوي .. الي صار يرضيك؟؟ .. تراه لبنتك؟؟
سكت بويوسف فترة ما عرف بشو يرد وبعدين رفع راسه وقال لولده يوسف
بويوسف: جوف .. جوف بنتك يا .. يابواحمد .. تراددني .. ماعرفت تربي
بواحمد: الله يهديك يا يبه .. حرام عليك البنت تعذبت واايد .. ولولا رحمة الله جان راحت فيها ..
بويوسف: لا والله .. احينه كلكم انقلبتوا على هالمسكين خالد ؟؟
احمد: منو ؟؟ منو المسكين؟ خالد؟؟ هييه صح حليله
بويوسف: احمد.. مابي اسمع هالكلام .. انا بقول لكم شي واحد .. اذا مهره تطلقت انا بتبرى منكم ومن ابوكم .. وما برضى عليه ابدا.. ولا هو ولدي ولا انا اعرفه
مهره: يدي ..ابوي ماله خص .. لا تدخله في السالفه
بويوسف: انتي اسكتي
مهره: يدي انا ماقدر اعيش مع خالد
احمد: طبعا.. كيف تعيش مع واحد ...... (احمد كان بيقول مع واحد حاول انه يذبح بنتها بس خالد قاطعه وقال)
خالد: قولها يا احمد .. قولها .. قول مع واحد خبل .. تراكم ذبحتوني انت واختك خبل وخبل
احمد: والله ما كنت بقول انك خبل .. والله كنت بقول انك حاولت تذبح بنتها بس انت
خالد: انا شو؟؟ انتوا كل شوي تقولون اني خبل .. حرام عليكم .. شو هالكلام .. انا انسان ولي مشاعر واحاسيس .. راعوا هالمشاعر .. حرام عليكم ..
مهره: احمد .. بس خلاص
خالد: سمعيني يا مهره .. لا تحلمين بالطلاق .. لأني ما بطلقج ابدا .. ومن اليوم ما بتجوفين ويهي .. انا حبيتج صج.. وتمنيت اني اعيش وياج طول عمري .. بس الظاهر اني ماقدرت احقق هالحلم .. بس ما بطلقج ابدا .. انا ما صدقت متى تزوجتج.. ما بتجوفين ويهي من اليوم ..وبتغير عشان ترضين وتفرحين بهالشي .. وبيي اليوم إلي انتي بتطلبين انج تردين لي فيه.. انا ما بتخلى عنج ابدا ..
وبدت الدموع تنزل من عينه .. طلع من الميلس بسرعه .. ولحقاه احمد بس خالد ركب سيارته وسار
انصدمت مهره من الكلام إلي سمعته .. ومن منظر خالد .. اول مرة تجوفه بهالحاله .. حست بشي في داخلها .. ما عرفت كيف توصفه .. يلست وحضنت بنتها وتمت اتصييح
بويوسف: ها شو قلتي؟؟
سكتت مهره وما ردت على يدها وتمت اتصيح
دش احمد الميلس ولف على اخته ولقاها وقفت وقالت: يالله يبه .. خلاص .. ماعليه .. الله فوق .. والله بيحاسب الكل .. والي فيه الخير الله سبحانه بيقدره لنا .. يالله يا احمد .. خلنا بنسير البيت
وطلعوا كلهم .. يوسف واحمد ومهره وشيخه .. من بيت يدهم وردوا بيتهم وهم شايلين في قلوبهم احزان يديده ..
دشت مهره حجرتها .. وتمت تفكر بكلام خالد .. اول مرة تسمعه يرمس بهالطريقة وبهالاسلوب.. شو إلي خلاه يقول هالكلام ؟؟ وليش ضربها اذا كان يحبها؟؟ كل هالافكار دارت في راس مهره .. بس للأسف ما عرفت الاجابه..

مرت ثمان سنوات عقب هالسالفه .. في اشياء تغيرت واشياء تمت على حالها ..
بواحمد ..صاحب القلب الكبيير والكل يحبه.. ما يحب يتدخل في احد.. بس بعده يحس بالذنب كل ما يجوف بنته مهره
ام احمد: بعدها تحن على راس ولدها احمد انه يعرس مرة ثانية
مريم.. عمرها احينه 39 سنة ما تهتم بأي احد غير ريلها وعيالها وما يخصها في احد
احمد.. عمره احينه 36 سنة وبعده ما عرس.. وطول الوقت يفكر في ولده.. ويفكر كيف يرده عنده
مهره.. عمرها احينه 30.. تخرجت من كليه الطب واستوت دكتوره.. وتشتغل في مستشفى خليفه في بوظبي.. وتعتني في بنتها شيخه إلي عمرها احينه 8 سنوات وطبعا احمد اخوها مب مقصر وياها ..
ميره.. عمرها احينه 26.. رفضت انها تعرس قبل ما تخلص دراستها الجامعه واخييرا خلصتها وانخطبت وعرسها بعد ست اشهر ..
خالد.. محد عرف عنه اي شي عقب إلي استوى في بيت بو يوسف ..
سعيد.. تزوج نورة بنت خالته.. وعنده ولد عمره 6 سنوات واسمه احمد وبنت اسمها روضه وعمرها سنتين ..

وفي مكان ثاني .. وفي دوله ثانية وتحديدا في استراليا
عاش حمد (بوشيخه) مع حرمته وعياله وراشد ..
محمد ولد حمد .. عرس وعنده ولد اسمه حمدان .. عمره 10 سنوات
وراشد.. كبر وعمره 18 سنة ..وكبر حبه ولشوقه لأبوه.. وكبر حلمه انه يرد لأبوه ويرد للامارات ويعيش مع ابوه باقي عمره ..

حمده: رااااااااشـــــــــــد ..... رشــــــــــــــــووووود .. الساعة 7 احينه متى بتقوم؟
راشد: مـابا بقوم .. انزين .. ما تخلون الواحد يرقد
حمده: لا تقوم وانا بزقر خالك محمد
راشد: اففففف ... خلاص .. قمنا ... شو هالبيت
حمده: غسل ويهك والبس ثيابك ويالله تعال واتريق
راشد: انزيين
ام شيخه: شو بلاج تزاعجين من الصبح؟؟
حمده: راشد طفرني ما يبي يقوم .. وراه مدرسه وبعده راقد .. الساعه 7 احينه
ام شيخه: حليله الولد ما رقد
حمده: وشو عنده .. ليش ما يرقد؟؟
ام شيخه: ما تدرين .. الامتحانات
حمده: يالله ماعليه .. احينه بيي وبجوف شو بلاه
راشد: صبــــاح الخير يدوو
ام شيخه: صباح النووور رشوود
حمده: وانا؟؟ ما تصبح علي
راشد: توج زفيتني .. خلاص صبحتي علي قبل لا اصبح عليج
حمده: لا والله؟؟
راشد: هههههه امزح وياج .. صباااح الخيييير يا خالتي حمدووه
حمده: حمدوه في عينك
راشد: ادلعج
حمده: مابي احد يدلعني
راشد: خلاص صباح الخيير يا خالتي حمده
حمده: صباح النوور
محمد: راشد .. انت بعدك هني؟ متى ناوي تسير؟
راشد: هلا عمي .. صباح الخير .. انا ساير احينه
محمد: وليش متأخر؟
راشد: كنت راقد .. البارحة رقدت متأخر .. كنت تعبان وراسي يعورني وما قدرت ارقد
ام شيخه: فديييتك والله .. وليش ما قلت لي
راشد: ما بغيت ازعجج
محمد: انزين خلاص .. سير يالله بسرعه .. ولا بتتأخر
راشد: OK .. Bye
ام شيخه: قلتلج انا لا تظلمين الولد حليله كان تعبان
حمده: هيه والله حليله رشوودي
محمد: انا بسير تبون شي؟
حمده: سلامتك
محمد: الله يسلمكم
وطلع محمد من البيت.. راشد كان يفكر بطريقة تخليه يرد لأبوه ..خاصه ان عمره احينه 18 سنة ومحد بيقوله شي اذا ترك البيت.. ويقدر يسافر ويرد الامارات ويعيش عند ابوه وعماته.. تم يفكر بابوه.. طول هالفترة ما كلماه ولا شي ..قال في خاطره: اكييد ابوي عرس احينه وعنده عيال..يدتي كانت تحن عليه واايد ووجودي منع ابوي من الزواج بس احينه خلاص انا مب موجود اكيد عرس ونساني .. بس انا ما نسيته .. ابوي بيتم في قلبي .. انا لازم ارد واجوفه لازم.. وعمتي مهره بعد ماعرف شو صار لها عرست وعندها عياال وعيالها كبار.. وعمتي ميره وعمتي مريم .. ولهت عليهم وااايد .. وصل راشد المدرسة وتم يفكر طول الدوام بطريقه تساعده انه يرد الامارات .. وفي النهاية لقى الحل.. اول ما خلص الدوام رد البيت بسرعه.. تم يركض يبي يوصل البيت بأسرع وقت .. فج الباب بقوو
ام شيخه: بسم الله الرحمن الرحيم .. رشوود
راشد: Hii
ام شيخه: هايين .. تعال هني
راشد: خير يدووه
ام شيخه: شو بلاك؟؟ ياي تركض .. شو مسوي شي؟
راشد: له
ام شيخه: متهاوش مع احد من الشباب؟؟
راشد: لا والله .. ما صدقت متى خلص الدوام وارد البيت
ام شيخه: متأكد؟
راشد: هيه .. اقدر اسير حجرتي؟؟
ام شيخه: هيه سير
طلع راشد حجرته بسرعه .. ودش وصك الباب .. وطلع كل البيزات إلي عنده وتم يعدهم
راشد: حلووو المبلغ كبير .. احينه ابا جوازي
طلع من حجرته.. وسار حجرة يده .. مشى على اطراف اصابعه .. فج الباب بدون ما يطلع اي صوت .. دش وقفل الباب وراه .. وفج الكبت وتم يدور ع الجواز ويقول: يا يدي وين حاطيته.. لقيت الجوازات .. احينه اي واحد فيهم جوازي .. هذا جواز خالتي .. وهذا جواز يدي .. مسك الجواز الثالث ..وقال ان شالله هذا هو جوازي انا ... يا راشد عسب يفتح ويتأكد .. شوي واحد فج باب الحجرة.. قفل راشد الدرج والكبت وحط الجواز في جيبه
حمد: رشوود .. شو تسوي هني؟
راشد: هلا يدي .. ماشي ادور ع البندول راسي يعورني واايد
حمد: هييه تعال انا بعطيك
حس راشد ان قلبه بيوقف من الخوف .. وتمنى في نفس الوقت ان الجواز إلي في جيبه يكون جوازه ..
حمد: هذا هو خذه
راشد: مشكووور يدي .. متى رديت؟
حمد: توني قبل شوي
راشد: بترقد احينه؟
حمد: شو رايك؟
راشد: هههههه .. اكيد شكلك تعبان تصبح على خير
حمد: وانت من اهل الخير
وطلع راشد بسرعه ودش حجرته وقفل الباب وتم يدعي ان الجواز إلي في جيبه هو جوازه.. طلع الجواز و تم يقول: بسم الله .. بسم الله .. يارب هذا هو جوازي .. وفتحاه
وبعدين فراه ع الارض ويلس هو ع الارض وحط راسه على ريله وتم يدق الارض بيده ويقول
بعد كل هالتعب طلع جواز يدتي .. افففففف شو هالحظ .. احينه لازم ارد الحجرة وايب جوازي.. وطلع من حجرته مرة ثانية .. وتم يمشي شوي شوي .. لين ما وصل حجرة يده .. فج الباب ودخل مرة ثانية وقفل الباب وراه .. لقى يده راقد .. سار عند الكبت وفتح الكبت والدرج.. وطلع الجواز إلي في جيبه ورداه داخل الدرج وطلع جوازه وتأكد منه.. حطاه في جيبه على طول وقفل كل شي .. وطلع من الحجرة .. وفجأة لقى خاله محمد عند الباب
محمد: راشد .. شو تسوي هني؟
راشد: خالي؟؟ انا
محمد: انت شو؟؟ .. شو كنت تسوي داخل؟
راشد: لا ماشي.. اششش يدي راقد .. توه رقد حليله
محمد: ابوي داخل؟
راشد: هيه توه رقد
محمد: اهااا .. سير حجرتك
ماصدق راشد .. سار حجرته ركض .. وقفل الباب وراه .. وطلع البيزات والجواز وحطاهم ع الطاولة وقال: اليوم بيسير وبشتري التذكره .. وبرد لبلادي ..

وفي الامارات
سعيد: هلاااااااااا حموود .. شحالك بو راشد؟
احمد: تمام .. انت شحالك؟
سعيد: بخيييييييير .. وينك ما نجوفك؟
احمد: موجود .. انت المشغول .. ما صدقت .. من يوم ما عرست وخلاص ما جفناك
سعيد: حرااام عليك
احمد: لا حرام علي ولا شي
سعيد: هيه صح حمود
احمد: هلا ..
سعيد: مممم .. حمود ودي اسألك سؤال .. بس
احمد: اسأل عادي
سعيد: احمد . ليش ما تعرس؟؟ انت عمرك احينه 36 .. وراشد خلاص راح
احمد: سعيد.. راشد ما راح .. وانا لو اعرف هو وينه احينه .. جان سرت ويبته من زماااان وما تريت كل هالوقت .. بس للأسف انا ماعرف وين سافروا
سعيد: بس حمود خلاص .. واذا رد .. شو بتسوي .. اهتم بعمرك شوي .. إلي يجوفك احينه يقول ان عمرك في الاربعينات حرام عليك
احمد: انا عمري في الاربعينات؟؟؟ .. انت جفت ويهك .. إلي يجوفك يقول انك يدي
سعيد: انا يدك ويا راسك
احمد: هيه جوف ويهك في المرايه واحكم على نفسك
سعيد: مااالت عليك
احمد: هههههههه
سعيد: يا سلااام .. ذكرتني بأيام اول
احمد: هيه والله .. كانت احلى ايام .. خاصه يوم كان راشد ويانا
سعيد: هيه والله .. الله يرده لك بالسلامه .. كم تتوقع عمره احينه؟
احمد: راشد؟؟ استوى رياال خلاص .. عمره 18
سعيد: ماشاااالله
احمد: البارحة كمل 18 سنة
سعيد: صج؟ وتذكر؟ .. انا زين اني اذكر اسماء عيالي
احمد: زين انك تذكر اسمك .. مب اسماء عيالك
سعيد: ما تطوف شي
احمد: هههههههههه طبعا ... اقول سعيد .. انا بسير احينه .. شيخوه تصيح بسير اجوفها
سعيد: وين امها؟
احمد: امها توها راده من الدوام
سعيد: هييه .. الله يعين الدكاتره
احمد: هيه والله .. الله يعينهم .. عقبال رشود ولدي
سعيد: آآآآمييييييين
احمد: يالله عيل .. اجوفك في وقت ثاني
سعيد: ان شالله
احمد: مع السلامة
سعيد: مع السلامة

الجزء السابع عشر
===============
في مكان ثاني كان راشد يلف ويدور في حجرته .. يبي يطلع من البيت بس خاله محمد يالس في الصاله .. ومايقدر يطلع من البيت جيه.. بيتم يحقق وياه وين ساير ومع منو ومتى بترد .. يلس راشد ع الكرسي وتم يفكر .. كيف يطلع من البيت بدون ما خاله يسأله وين ساير وليش ساير ؟؟ .. شوي سمع احد يدق الباب
راشد ( وهو طفراان:( ادخل
حمدان: راشد .. مممم انا ابا اطلع شوي تيي وياي؟
راشد ( وهو مستااااااانس ياته الفرصه اخييرا): اكيييييييييد .. وين تبا تسير؟؟
حمدان: بلعب شوي .. انت وصلني وخلاص سير
راشد: اوووكي .. سير وبدل ملابسك وانا بييك
طلع حمدان من حجرة راشد.. راشد نقز من مكانه وطلع البيزات وطلع الجواز ..وبدل ملابسه وطلع بسرعه .. ياته الفرصه من الله
راشد: حمدااان .. خلصت ولا بعدك؟
حمدان: هيه خلاص خلصت
راشد: يالله بنسير
ونزلوا الاثنين .. وكان محمد يالس في الصاله
راشد: هلا خالي محمد
محمد: اهلين .. وين سايرين؟
حمدان: انا ابا اسير العب شوي وراشد بيي وياي
راشد: هيه بوصله وبتم وياه
محمد: خلاص عيل لا تتأخرون
راشد: ان شااااالله .. وطلع بسرعه
حمدان: راشد اترياني
تموا راشد وحمدان يمشون.. وراشد يفكر ويقول اخيير برد بيتنا.. اخيرا برد عند ابوي وبجوفه.. انا اشتقت له واايد.. فدييييته ابووي .. كان خاطري اتصل عنده بس ما قدرت .. خالي وخالتي ما كانوا يخلوني امسك التلفون .. والحين خلاص.. انا بسير عنده وما يخصني فيهم
حمدان: راشد .. رااشد .. شو بلاك؟؟
راشد: لا ماشي .. وصلنا
حمدان: هيه وصلنا
راشد: حمدان .. انا بسير شووي وبرد
حمدان: وين بتسير؟؟
راشد: بسير السوبر ماركت
حمدان: ييب لي سنكرز وياك
راشد: ان شااااالله
حمدان: اي واحد؟
راشد: شو اي واحد؟
حمدان: اقصد اي سوبر ماركت؟
راشد: البعيد .. هذا ما فيه شي يطفرني
حمدان: اوووكي انا بتم هني وبلعب مع العيال
راشد: لا تتهاوش وياهم ما فينا ..هيول مب شرات قوم الامارات.. ما يتحملون شي .. ما فينا تعطي واحد بكس وتدخله العنايه
حمدان: ههههههه لا تخاف . هني كلهم يخافون مني
راشد: ادري بك مسوي لهم رعب
حمدان: ههههه .. خلاص انت سير احينه عشان انرد البيت بسرعه وما نتأخر
راشد: يالله عيل..
وسار راشد .. كان يركض بأسرع ما عنده .. يبي يوصل بسرعه .. وما يبي يتأخر.. سار سفارة دوله الامارات العربية المتحده.. واستااانس يوم جاف علم بلاده.. ضحك وقال: فديييت الامارات.. افديها بروحي ودمي وبعدين دش داخل .. وجاف صورة الشيخ زايد ( الله يرحمه).. وقف جدامها وتم يتأملها.. وبعدين تم يدعي للشيخ ودخل داخل
خلص كل شي .. وبعدين سار شركة الطيران .. عسب يحجز له وياخذ التذكرة.. ولحسن حظه انه لقى الحجز.. وكان السفر بعد يومين .. استانس واااااااايد ما صدق وبعدين انتبه ع الوقت
راشد: ابييييه تأخرت على حمدان واايد.. قلت اني بسير السوبر ماركت.. سوبر ماركت واربع ساعات.. بياكلني هذا .. كيف اسكته احينه.. طلع بسرعه .. وركب تاكسي وسار السوبر ماركت واشترى سنكرز ورد الحديقة مرة ثانية
راشد: حمدااان .. حمــــــــــــــــداان
حمدان: تو الناس جان تأخرت اكثر
راشد: اسمح لي والله كله منك ما لقيت لك سنكرز وتميت ادور عليه
حمدان: طول هالوقت تدور عليه؟
راشد: يالله عاد .. اذا ما تباه انا باكله
حمدان: لا شو اباه .. انا استانست هني واايد .. كل الربع يووا
راشد: زيين والله .. شو نرد البيت ولا لأ
حمدان: لا بعد شوي
راشد: ابوك بيهاوشنا
حمدان: افففف .. ماعليك
راشد: افف في عينك بيهاوشني انا انت شوراك .. يالله قوم
حمدان: انزين انزين .. يالله خلنا نسير .. يبت السنكرز
راشد: خذه وفكني
وردوا البيت وكانوا يضحكون ويتسولفون طول الطريج ..
وفي البيت
محمد: توا الناس .. جان تأخرتوا اكثر .. ردوا ليش ساكتين؟؟
راشد: ما انتبهنا ع الوقت
حمدان: هيه صح .. كنا نتسولف ونلعب وما انتبهنا
محمد: لا والله
راشد: اسمح لي خالي .. هاي غلطتني انا
حمدان: لاا غلطتني انا.. انا قلتله ابي سنكرز وهو ما لقى.. وتم يدور لي في كل مكان انا إلي اخرته هو قالي لازم نرد البيت
محمد: بس خلاص كل واحد يسير حجرته
سار راشد حجرته وقفل الباب بسرعه وطلع التذكرة وهو متساانس .. وتم يتأمل فيها وقال: لازم اخشها اخاف اذا جافها خالي ياخذها عني ويضيع تعبي

وفي الامارات في بيت بواحمد .. وفي حجرة مهره بالتحديد
كانت يالسه وتدرس بنتها.. وتضحك وتمزح وياها.. وشوي دق تلفونها اعلن بوصول رساله .. طلعت مهره تلفونها وجافت ان الرقم غريب.. اول مرة تجوفه قالت في خاطرها منو هذا؟؟ .. خلني اجوف شو مطرشين :
غايب لكنه عن القلب ما غاب...
متصور في روح روحي خياله.
ما قويت بعده وكثيرات الأسباب...
ولا قويت أسلى وأدور بداله.
ماهو مثل أهلي ولا مثل الأحباب...
له منزل وسط قلبي لحاله.
استغربت مهره من المسج .. وبعدين قالت: لا اكيد مغلطين .. ونست السالفه .. ويلست مع بنتها.. شوي ودخل احمد
احمد: مهره .. شو تسوين؟
مهره: شو تجوف؟
احمد: هههههه .. انا بطلع تبين شي؟
مهره: هيه
احمد: خير؟
مهره: طفرانه ولايعه جبدي .. ابا اطلع
احمد: شو بلاها سيارتج؟
مهره: مالت عليك .. خلاص مابي شي منك
احمد: ههههههههه .. لا والله انا ساير مع سعيد
مهره: هييه ..خلاص سير وياه انا بطلع مع شيخه
احمد: هالله هالله في شيخه
مهره: وام شيخه برايها
احمد: هههههههه لا ما قلت جيه .. افا عليج
مهره: هههه امزح وياك .. ابا سلاااامتك وبس
احمد: الله يسلمج .. ويسلم هالحلوة إلي وياج
مهره: هههههه تسلم
وطلع احمد من الحجرة .. وطلعت شيخه وسارت حجرة ميره ويلست هناك
مهره: ميرووه .. حبيبتي
ميره: هاتي من الاخر .. شو تبين؟
مهره: هههههههه انتبهي على شيخه انا عندي دوام احينه .. مالت عليهم ما يتركونا بحالنا
ميره: الله يعينج
مهره: خاطرج في شي؟
ميره: سلااامتج
مهره: الله يسلمج .. في وداعه الله
ونزلت مهره من الدري.. ووصلها مسج ثاني .. قالت: اففف منو ها .. شو هالحشره .. وانصدمت يوم لقت نفس الرقم .. وقرت المسج وكان::
ما يصير انساك لا ما يصير
وفي خفوقي لك معزة واحترام
قبلك الدنيا مثل حلم صغير
وعقبك الدنيا غرام في غرام
انت مثل النور في عين الضرير
لا لمحتك ما بقى حولي ظلام
فيك عمري فيك روحي والمصير
فيك كل ايام عمري والسلام
مهره: غريبه .. نفس الرقم؟؟ .. يمكن مغلطين .. ومسحت المسج .. طلعت وركبت سيارتها ووصلها هالمرة مسجين ورى بعض.. كان من نفس الشخص ونفس الرقم .. وبنفس الطريقه .. قالت: ما بتصل فيه ولا شي .. خله يطرش مسجات لين ما يطفر

بعد يومين .. في استراليا
راشد: هذا هو اليوم الموعود .. ما بسير المدرسه .. بحط ملابسي بدال كتبي .. وبسير
حمده: رشووووووووووووووود
راشد: ههههه بدت موسيقى الصباح ... شووووووو
استغربت حمده وسارت حجرة راشد بسرعه وفجت الباب: رشود .. غريبة .. انت ناش اليوم بروحك؟
راشد: هيه .. تصدقين
حمده: شو صار في الدنيا؟؟ من وين اشرقت الشمس؟
راشد: ههههههههه من الغرب هههههههه
حمده: ويا ويهك .. يالله انزل تحت .. وتريق وسير المدرسه
راشد: ان شاااااااالله
ونزل تحت وسلم على يده ويدته وخاله محمد.. ويلس حذال حمدان.. وتم يسولف ويضحك ويبتسم وبعدين قال: يالله انا بسير تأخرت
ام شيخه: الله يوفقك يا رشوود
راشد: آآآآآميييين .. يالله يدتي.. اجوفج على خير ان شالله .. مع السلامة يدي .. مع السلامة خالي .. بااااااااي
وطلع بسرعه .. ووقف تكسي وركب فيه وقال: international airport please وابتسم راشد
يلس راشد وتم يطالع كل مكان حوله.. يودع هالامكان ..كان يتريا هاليوم بفارغ الصبر واخيرا يا اليوم الي كان يحلم فيه .. اليوم الي برد فيه لبلاده .. وبيرد لأبوه اليوم الي بيحقق فيه وعده لأبوه اليوم إلي بيرد فيه الحق لأصحابه .. واخييرا وصل المطار .. راشد كان خايف شوي وبعده مب مرتاح.. كان يتريا انه يركب الطيارة وخلاص .. تم واقف في صف طويل وعريض .. ما صدق متى يا دوره وتحرك ودخل داخل .. وركب الطيارة ويلس في مكانه وارتااااح وغمض عينه وابتسم .. خلاص
اقلعت الطيارة وتم راشد يعد الساعات والدقايق والثواني .. يتمنى انه يوصل بأسرع وقت ممكن وبعد 14 ساعه وصل لمطار دبي .. نزل من الطيارة .. تم يطالع الكل .. يطالع الناس ويطالع العرب .. يبتسم للكل.. خاطره يسلم على الكل ويقول لهم انا اماراتي انا رديت لبلادي .. انا خلاص ما ببعد عن بلادي ما بترك بلادي.. بسير عند ابوي وبتم وياه محد بيفرقني عنه

وفي بيت بواحمد
ام احمد: ميرووه .. حموود
ميره+ احمد: هلا يمه
ام احمد: انا بسير بيت مريم ..تيون وياي؟
احمد: لا ما فيني بتم في البيت .. ابوي وينه؟
ام احمد: ابوك بيي وياي
احمد: هييه
ميره: انا بيي وياج .. بسير اتلبس وبرد
احمد: ومهره؟؟
ميره: هيييه على طاري مهره .. ترى شيخه راقده فوق
احمد: خلاص انا بتم وياها
ميره: مهره عندها مناوبه اليوم .. وبترد الساعه 11 الليل
احمد: الله يعينها .. حليلهم الاطباء
ميره: هيه والله .. انا بسير حجرتي وبرد
وطلعت ميره وتلبست ونزلت وسارت هي وامها وابوها بيت اختهم مريم.. ويلس احمد في البيت بروحه وتم يطالع التلفزيون وهو طفرااااان.. شوي وغفى وهو يالس ع الكرسي في الصاله .. وفي نفس الوقت .. كان راشد ياي في الطريج.. وهو يطالع كل مكان مب مصدق انه وصل الامارات .. تم يقول في خاطره انا بعدني اتذكر كل شي .. اتذكر بيتنا.. اتذكره عدل وما بضيعه ابدا .. وبعد ساعتين .. وصل راشد بوظبي .. وبالتحديد .. كان واقف عند باب بيتهم ويتأمل بيتهم إلي ما تغير فيه شي ..

وفي نفس الوقت في المستشفى .. كانت مهره يالسه بروحها في المكتب .. وكانت تعبانه وطفراانه .. اخييرا هذا هو وقت البريك .. سمعت احد يدق الباب
مهره: تفضل
........ : هلا مهره .. شحالج؟؟؟
رفعت مهره راسها وانصدمت من ذاك الشخص إلي ما توقعت انها تجوفه ابدا

في بيت بو احمد ..
وقف راشد عند الباب ودق الجرس.. دق الجرس مرة وثنتين وثلاث.. بس محد رد .. خاف انهم يكونون تركوا البيت.. مليون فكرة يت في راسه وبعدين سمع صوت من داخل البيت.. صوت يحبه ويموت فيه .. الصوت إلي ما تغير ابدا .. الصوت الحنون الدافي
احمد: منو؟؟؟ .. منو ع الباب
راشد تم ساكت .. ماقدر يرد على ابوه .. تم يقول في خاطره.. بيعرفني .. بيعرفني ابوي؟؟