قصه حملي وولادتي في طفلي <طير من طيور الجنه<

السلام عليكم ورحمه الله وبركاته
كيفكم حوائيات اخباركم ؟
ابغا احكي لكم قصه حملي وولادتي انا واعوذ بالله من كلمه انا
حملت في طفلي الثاني وكان كل شي اوك الحمد لله الى بدايه الشهر الثامن حسيت بالم خفيف في بطني ورحت المستوصف اللي اتابع انا فيه طبعا انا اتابع في مستوصف لاني ابغا اتابع عند دكتورتي اللي ولدتني في طفلتي الاولى الله يحفظا ويخليها ليا المهم رحت لها وقالت لي انو الرحم مفتوح واحد سانتي واعطتني حبوب مثبته ربع حبه ثلاث مرات في اليوم يعني واحده الاربع المهم المهم اخدتها وكان كل شي طبيعي بس في بعض الايام برضو احس بالام في بطني زي الام الدوره"الله يكرمكم" رحت لها يوم وكانت عندي الام خفييييييييييييييييييفه اعطتني محلول مثبت جاني هبوط في الضغط واحس انو دقات قلبي في راسي احس راسي بينفجر ومو قادره اتكلم خففو سرعه المحلول ومشي كل شي تمام بس قالتلي لو جيتيني تاني حولدك لانك جننتيني هي قالتلها بضحكه وانا طبعا ماصدقت المهم عدى على الموضوع تقريبا اسبوع ونص جاتني الام زي الام الدوره برضو وصرت امشي في البيت قلت شكلي بولد لانو انا على حسااابي اني دخلت التاسع نفس اليوم يعني لسى دوبي المهم عبيت شنطتي وشنطت البيبي حبيبي فيصل ورحت المسوصف على اساس انو لو انفتح الرحم اخد الدكنوره واروح مستشفى خااص وتولدني والالاااام ماجلست معايا الا عشره دقايق في البيت وراحت تمامااااااااااااااااااااااااااا ما في ولا شويه الم جاء دوري ودخلت عليها الا قالت هلا هلا ها ايش في كمان اليوم قلت لها انو جاتني الااام وراحت بس انا قلت ابغا اجي اتطمن المهم طبعا شمرت ولبست القفازات وقااااااااااااااااااست الرحم وهنا كانت الفاجعه قالت لي انتي ولاده خلاص رحمك مفتوح 7 سانتي انتي ازاي بتضحكي وبتتكلمي عادي انا انصدمت لانو ماشاء الله تبارك الله ماااااافي الم مره <<اذكرو الله >> المهم قالت ماراح يمدينا انو نروح لمستشفى المهم دخلتني غرفه الولاده وحطت لي المحلول وفقعت لي الكيس وقالت لي يلا يا حبيبي ادفعي قتلها ادفع ايه وانا موحاسه بالم قالت ادفعي وصرت ادفع ادفع ادفع ولا في فايده مرررررررررررره المهم شويه الا قالت يا بنتي حرام عليكي دفي الولد قريب خلاص الغريب انو طفلي ماااااساعدني مره مره في الولاده ولدت بعد جهد وتعب لانو مو راضي يطلع لانها ماقصتني لانو مافي عندها عده مقص وابره وخيط فصارت توسع بيدها عشان كده طولت بزياده طلع البيبي مايتحرك مره ومايتنفس جلست تشفط له مويه من خشمه وشويه الا بكي بس صوته كان خفيف جدا المهم لبسته الممرضه وجات ماما وكانت جدا معصبه مني ومن الدكتوره وسوت شوشره في المستشفى لانو الدكتوره ولدتني وخرجت على طول خافت لانو الطفل تعبان ومافي في المستوصف طبيب اطفال يكشف عليه بعد الولاده خرجت من المستوصف بعد ساعه تقريبا اول اقل ماما اصرت انو اروح مستشفى عشان تتطمن عليا وعلى البيبي جات معايا عمتي اخت باابا المهم واحنا في الطريق عمتي رضعته وهيا بترضعه طلع صوت من صدره صوت مويه تبغا تطلع كانو شرقان وطبعا لانو ضلام الدنيا ليل مو شايفه وجهه كويس
المهم وصلنا المستشفى وانا جلست في السياره دخلو يجيبو لي كرسي اول مادخلو الطواري الا ولدي صار لونه كحللللللي بدون مبالغه ومتشنج المهم حطوله اكسجين وجلسوه عندهم في الحضانه وانا طلعوني تنويم كشفو عليا وكان كل شي اوك بالنسبه لي الحمدلله وطبعا زوجي ماقالي عن الولد عشان لا يفجعني اليوم الثاني قالي انو الولد تعبانه رئته ولازم يجلس طلعت انا وجلست حبيبي في الحضانه شهر كامل لانو الرئه مااكتملت وطلعت انا مادخلت التاسع اصلا عشان كده رئته تعبانه المهم طلع بعد شهر وقالت لنا الدكتوره اذا اختنق اقلبوة على بطنو وخبطو على ظهره وبعدين جيبوة على طول الحمدلله جلس شهرين كويس الشهر الثالث لاحظنا انو درجه حرارته مرتفعه وديناه طلع التهاب في حلقه مضاد وراء مضاد من دكتور لدكتور مافي فايده مافي مستشفى الا اتنومت فيها معاه من تحاليل لاشعه ماخلو شي ماسووه لنا لانو السخونه مو راضيه تفارقه كنت الف منشفه بارده على جسمه كانت توصل 40 كل يوم واذا خفت تكون 38 ماتقل عن كدا طبعا كمان كان ينقص عليه الاكسجين فجاه يزرق ومايتنفس فكانت عندنا اسطوانه اكسجين احتياط كان كل يوم ينقص الاكسجين وتشجنجات مستمره المهم ناس قالولي عن حرمه تدواي بالاعشاب رحت لها وقالت لي بتكويه لانو كانت بطنو منفوخه مرررررررره دايما بس لمن عرفت انو ينقص الاكسجين ويختنق بطلعت المهم اعطتني اشياء اروشه بيها واحطها على خشمه وقالت انو فيه مخاويه الورعان <<<ماادري انا انفجعت ومو عارفه شي كون اني صغيره المهم كنت كل مااروشه بتشنج ويختنق واستمرت الحكايه الين صار عمره 9 اشهر وهذاك اليوم رحت ازور عمتي في جده واخدت دويته وكل شي واسطوانه الاكسجين وجاه وقت نومه ونام شويه وهو نايم كان بس يضحك العبه هو نايم يضحك لي وصحي جلس تقريبا 3 ساعات اذن الفجر جلست معاه شويه بعدين نعست وابغا انام فصرت اقوله نام يلا ابغا انام طفشتني يلاااااا وهو يضحك كاني العبه انا معصبه وحبيبي يضحك المهم حطيت له الكمادات على جسمه لانو طبعا حار نار ونام ونمت انا معاه كانت الساعه 6 الفجر جاني زوجي على 8 قالي قوووومي الولد نومته مو طبيعيه:44: قمت مفجوعه قلبته لقيت وجهه مزرق وميت قمت اسويه له تنفس صناعي وحطيت له الاكسجين مافي فايده ماااااااااااااااات حبيبي الغالي :44: ودوه المستشفى قالو ميت لو ساعتين يعني من يوم مانمنا مات وانا ماادري وربي انا اكتب وابكي الى الان مو مصدقه انو مات امس كمل سنه على وفاته وبرضو مو قادره اتحمل الله يرحمه ويعوضني بطفل سليم معافا يارب العالمين ادري طولت عليكم سوري بس حبيت افضفض واطلع اللي في نفسي يمكن ارتاح
ادعولي الله يرزقني بطفل سليم معافى ويرزق كل محرومه
بس كنت بسال ليش ولادتني كانت بدون الم تتوقعو عشان كان مختنق هو في بطني ؟؟؟ واصلا انا دكتورتي قالتلي انو رحمي مايستحمل يعني ينفتح بسرعه يطرد الطفل لانو بنتي رابع يوم في التاسع ولدتها بس الحمدلله طبيعيه ماشاء الله
دعواتكم يا حوائيات