قصه رووووعه تموت ضحك

.
.
انا انسانه  مدرعمه في الحيآه ماني لم الانوثه والذرابه يعني تشوفوني العصر العب في الحوش  مع عيال عمي الصغار واذا ماجاز لي لعبهم امردغهم .ودايما ب قمصان البيت اللي الوانها رايحه من كثر الغسيل وواصله لنص الساق لانها معي من ايام الثنوي .والقميص اللي اشتريه واحبه الله يعينه ع الكرف اللي راح يجيه 😂 .بس للامانه انا مملوحه واعرف البس واكشخ ف حال انو كان فيه مناسبه او اجتماع او هيك شي بس ف الايام العاديه الله لايوريكم 😂.
المهم (لتوضيح :عمي ساكن بجنبنا وزوجت ولد عمي اسمها شهد. مش من عايلتنا واهلها  ناس ماشاء الله جمااااال وذرابه وذوق وفلوس وكلش ).ويجي ذاك اليوم وتجي زوجت اخوي اسمها هاجر قالت يا ريم( اللي هي انا) ماسمعتي شهد وش قالت!!قلت لها لا وتقوم هاجر تغمز قالت لي انها حاطه عينها عليك تبي تخطبك لاخوها.بس لاتقولين لاحد لين يتم الموضوع 
وانا وجهي صايرن كذا😱 يعني اخوها هذاك المززز بيخطبني وبعيش ف هذيك الفله  و و و (طبعا ماوضحت ل هاجر اني خقيت عادي سويت نفسي مش مهتمه ) وللمعلوميه ترا جاني خطاب من قبل بس مدري شبلاني هالمره خقيت طمعت ف المزيون والفلوس والخير ..
عاد من هاك اليوم وانا ماغير اتميلح قدام شهد وكل سهره او عصريه او عزيمه نجتمع فيها ماتشوفوني الا ب الصواني والحلا والقهوه ..وديما اهايط ع شهد واسولف بسوالف خراطيه بس عشان تعرف اني مثقفه وانا من جنب الثقافه😂 اسوي روحي مهمه ف المجتمع وكل سوالفي صاحبتي الفلانيه قالت كذا وصاحيتي الفلانيه راحت للمكان الفلاني وصاحبتي الثانيه شرت الماركه الفلانيه .وانا ماعندي غير صديقتين 😂😂 وحده تزوجت وصبغت اشقر وسحبت ووحده نفسيه وكل يوم نتهاوش انا وياها . وكل مره تسولف شهد ع اهلها تشوفون عيوني صارت كذا 😍 افرح بطاري حمولتي ولا اذا طرت زوج المستقبل اقوم اقحص ف الحوش وارجع ^شسوي والله من الجفاف العاطفي .
وكل عزيمه تصير عند شهد ولا سهره ولا حتى قهوه حريم تشوفوني ف المطبخ مشمره ايديني واكرف يعني شوفي ترا حرمت اخوك المستقبليه سنعه وتعرف لكل شي 
ايه نسيت اقولكم القمصان اعتقتها لوجه الله وصرت ماغير البس هاتنانير  هالبناطيل ^لزوم نتعود ع العز 😂 




والبزران كل يوم جاييني يبوني العب معهم بس لاسف تكبرت عليهم ..
والمهم ويجي ذاك اليوم .كان عند عمي عزيمه وارح ك العاده اجهز صواني وحلا كل ذا عشان تعرف شهد اني سنعه المهم ذاك اليوم ماشفت شهد ولما قرب وقت العشاء استغربت انها مو موجوده سالت حرمه عمي قالت ايه شهد ي بنتي رايحه ل اهلها اليوم ملكه اخوها....😱 لاااااا ياااازمن آآآآآ💔💔^محد حس فيني الا اللي لحن 😂😂
(ايش وليه وكيف ومتى هذا زوجي من الحيوانه اللي اخذته مني ) سويت روحي عادي مش مهتمه قلت ماشاء الله اي واحد من اخوانها(باقي عندي امل انو مش الحب💔😂) قلت فلان والله ويطلع هو حقي 😱 المهم اجلس طول ذاك اليل  كارهه العشا والسوالف  وانا اتعشى احس الاكل يوقف طابور ف حلقي ماينزل من الضيقه ومبققه عيوين اخاف ارمش وتطيح الدمعه .وارجع البيت اغرق المخده ب الدموع وادعي وانام..وبعد اسبوع تقريباً ،كنا ف جلسه حريم الا يفتحون موضوع اخو شهد وانا اللي اسوي روحي اسولف مع وحده اني ما اسمع سالفه شهد وانا ف الصدق قاطه اذني بحضنها الزبده قالت. والله اخوي شروطه غريبه عجزنا لين لقينا البنت اللي ف خاطره .قال يبي بنت مزيونه ودلوووووووووعه وماتعرف تطبخ بس تعرف تتكشخ يقول ابيها من زود الدلع ماتعرف تشغل الفرن ( حسافه الصواني اللي حرقت يديني من الفرن ) يبيها من قوه الدلع لو تكلمت ينام ع صوتها ..طيب ليش ماقلتوا لي كذااا وانا اللي عذبت نفسي عشان اصير سنعه واعجبهم  لو لمحتوا لي كان شفتوني اشرب القهوه ب الشوكه من زود الدلع كان شفتوني افطر كاسه مويه ورد واتغدا وردتين جوري واتعشا مفطح.^اجل تبوني اموت من الجوع! 
كان صرت امشي ع اصابعي واجلس جلسه الدله ( عرفتوها اللي يجلسونها الحريم ف البر  ف الصور طبعاً) ..
.. يجي ذاك اليوم وانا بين هالبزران (ايه رجعت لعادتي بعد ماقطعت الامل 😂) ودابجه واحد من البزران لين عض الارض ^كنا نلعب كوره وما عرف يحرس عدل 💔.
وتطل امي من الشباك وتقول ي ريم شهد كلمتني تعزمنا للعشا عازمه اخوها وحرمته الجديده وانا قلبي يصير كذا💔 وش هو له يمه تذكريني وانا بعز وناستي وارمي هالبزر اللي ف يدي وارح ركض للغرفه واحووس واطلع هاك البس اللي يخقق واستشور واتمكيج واكششخ واناظر المرايه واسوي حركات الافلام واغمز😉 لنفسي ف المرايه واقول اكيد راح اطلع احلا منها 😌..
ونروح لبيت شهد (بس هالمره ماسويت صواني 😂😂) ونروح .دخلت وسلمت ولمن وصلت عندها قامت بكل برود وقدمت خدها بككككل برود يدوووووب لامس وجهي وتوخر وجهاا^عاد انا مايمشي عندي هاسلام امسكها من كتفها واعطيها بوستين كسرت خدها اتوقع انها صدعت منه😂😂 .
ثم بدينا سوالف وتسولف وتتغنج بشششششكل لدرجه والله حسيت اني مش انثى قدامها😂 جلست اطالع ف يديني اخاف تطلع لي حراشف ..
وكانت لابسه تنوره سندرلا منفوشه وقصيره  وروجولها ماشاااء الله قطططنه وانا رجولي كلها كدمات من الكوره وكل شوي تسولف وتلفح شعرها بدللللع  وانا ماغير مبققعه عيوني وسعبولتي واصله لركبتي كأني شايفه كائن فضائي مو بشر😂 .ولمن جاء العشاء تعشينا كلنا وقمنا وهي لسى ماكلت غير لقمتين .
حتى انا والله ذاك اليوم ماشبعت عاد استحيت من اكلتي قدامها 😂.طبعا سوالفها كانت عن اشياء ما اعرفها 😂كريمات وموديلات ومدري وش وانا ماغير ادربي راسي  ومن ظمن سوالفها قالت انتي مخطوبه قلت لها سارقه خطيبي وتسئلين بعد😂 أمزح ماقلت رديت عليها رد  ماراح اقولكم وش هو بس الوكاد اني مقصره صوتي لاتسمعني اني 😂😂ولمن كنا طالعين رايحين البيت قالت لي شهد افااا ي ريم وينك اليوم ماشرفتي مطبخي (  اقول اسكتي انتي ي النكبه كان ودي اكفخها بس كنت ف صدمه واصلا لساني صار فيه شلل ماقدت اتكلم بعد كلامه ودلع العروس 😑 ) .ولمن وخلت غرفتي رحت لنفس المرايه اللي غمزت لها وعطيتها نظره  استحقار وتفلت عليها 😒 .وارح اغرق مخدتي دموع بس هالمره مو عشان خطيبي اللي سرقته مني(مصره😂) لالا هالمرت ابكي ع انوثتي اللي مدري وينها فيه 💔.
المهم بكره العصر عندنا دوري عبدالطيف انا والبزران ادعوا لي افوز .😂