الجزء التاسع
كانت رحلتهم جداً مريحة، نجود كانت تخاف من الطائرات الاان هالسفرة ماحست بشي بسبب حمد وسوالفه اللي تموووت ضحك هو واخوها. أول ماوصلوا الفندق وتوزعوا على غرفهم، دق فيصل على أبوه ويطمنهم إنهم وصلوا بالسلامة. وحمد ومحمد بغرفة بنفس الفندق طبعاً واتصل محمد لبيتهم يطمنهم على وصولهم بالسلامة..
خلود:" هلاااااااااااااا وعليكم السلام والله وحشتونا.."
محمد:"هههههه، وانتوا أكثر وين أمي وأبوي؟"
خلود تنادي امها وأبوها:" يممممممممه يبببببه محمد متصل."
ومن سمعت أمها أسم محمد، قامت بسرعه وقالت لها تسكر السماعه علشان تكلمة من التلفون الثاني..
أم محمد:" الوالسلام عليكم."
محمد:" وعليكم السلام هلا والله بأم الغالي."
أم محمد والدمعه بعينها:" شخبارك؟ عساك بخير؟ قووولي، طمني عليك؟؟"
محمد:" بديييينا يمه والله بخير دامج بخير.. ونجود بعد بخير وتسلم عليج."
أم محمد:" وينها فيه؟"
محمد:" بغرفتها هي وفيصل.."
أم محمد:" كان ودي أكلمها."
محمد:" ماعليه اخليها ادق عليج بعدين حاضرين لج عندنا جم أم محمد حنا."
وسمع محمد صوت ابوه وهو يقول لأمه:" عطيني خليني اكلمه."
أم محمد:" خلني أكلمه شوي.."
محمد وهويضحك عليهم:" أدري وحشتكم بس لااتهاوشون علي."
أم محمد:" زين حبيبي لاتنسى طمنا عليك وعلى صحتك، وأختك بعد خلها ادير بالها عليك وعلى نفسها."
محمد:"ان شاااااءالله من عيوني الثنتين."
أبومحمد:" ماخلصتي توصيات، عطيني اكلمه."
أم محمد تقول لزوجها:" زيييين خلااااص اسلم عليه،،،." وكملت كلامها ويامحمد وعطته ابوه.
أبومحمد:" ألوووو السلاام عليكم، شخبارك؟ وشلون صحتك؟؟"
محمد:" والله بخير نسأل عنك يبه."
أبومحمد:" أنا بخير ياولدي بس أنت أنتبه لنفسك ،، ولاتنسى إذا دخلت على الدكتور طمنا أنا ان شاءالله كل يوم بتصل فيك."
محمد:" ان شاءالله، الا وين أخواني يبه؟"
أبومحمد:" وين بعد نايمين، مافيه الاخلود قاعده وسمر فوق تراجع."
محمد:" زين عيل سلم عليهم، ولاتنسوني من دعواتكم."
أبومحمد:" ان شاااااءالله مابننساك، سلم على حمد وفيصل وأختك، وانتبهوا لنفسكم وعن السهر بره قووول لهم هم مب بديرتهم."
محمد:" ان شاءالله أخبرهم، مع السلامه."
^^^^^^^^^^^^^^^^^^^^^^^^
أول مافتحت عينها كان التلفون أول شي تفتحه!كان مسج من فهد ( صباح الورد والبنفسج ).
حست بشعور غريب يسري بجسدها..! ماكانت عارفة شعورها بذيج اللحظة، لكنها إبتسمت فوق كل شي لأن الغرور اللي بداخلها يخليها تنسى أي شي..! فكرت شوي وقالت لنفسها:" خله مابرسل له مسج، لايقول ملهوفة وماصدقت تلقى حد، لكن هومجرد صديق لاأكثر، يعني مايهمني أرسلت له والا..، بس شكله شايف نفسه شوي..ويمكن أكون غلطانه.."
الأفكار الشيطانية كانت تلعب براسها من صباحة الله.. وبعد ماقامت من سريرها وغسلت ويهها تذكرت أخوها فيصل ونزلت تحت لأمها. كانت العنود قاعده اتريق وياامهم وأبوهم راح لشغلة.
سحر:" صباح الخير."
العنود:" صباح الخير."
أمها طالعتها بكل حنيه:" صباح الخير حبيبتي، ان شاءالله صرتي أحسن؟"
سحر:" بخيرأحسن من البارحة."
العنود:" ليش وش فيج؟"
سحر:" راسي يعورني."
طالعتها إختها بنظرات غريبه وكأنها تسخر من أختها، ويعني راسها يعورها وش بصير فيها، اهي كل يوم يصيدها وأمها ماتسألها ولاتنتبه لها حتى، بس دلع سحر زاااااااااااااااااايد عن حده.
أم فيصل:" يمه سحر أكلي لج زين لاتتعبين، وراج مراجعه."
سحر وتتدلع عليها زود:" لايمه مابي وايد، بس بشرب العصير."
أم فيصل:" ماااااايصير يمه لااااازم تاكلين."
سحر:" صدقيني يمه اذا ابي باكل من عيوني."
العنود كانت مقهورة من أختها، ماتدري ليش ماتقدر تتقبل دلاعته وتصرفاته. ولاعبه على أمها ومدلعه عليها لآخر درجة.!!
وبعد خمس دقايق سألت سحر أمها:" يمه العصر أبي اروح بيت رفيجتي ميثة، عندها أوراق أبي آخذها منها."
أم فيصل واللي ماترفض لها شي:" براحتج حبيبتي، بس ها لاتخليني احاتيج دقي علي وطمنيني اذا بتأخرين."
سحر وشاقه الحلج:" على هالخشم." وحبة راس أمها وقامت بتروح غرفتها، وتذكرت إنها كانت تبي تسأل عن أخوها:" يمممه اتصل فيصل؟؟"
أم فيصل:" ايييه اتصل وسلم عليج، ويقول لج هالله هالله بدراستج وانتبهي لنفسج زين."
سحر:" الله يسلمه." قالتها وركبت بسرعه، العنود استغربت من إنها ماسألت عن محمد ولاشي. قالت لنفسها:" أكيد أنها بتتصل فيه والابيتصل فيها."
^^^^^^^^^^^^^^^^^^^^^^^^
كان خوفها من نظرات أمها بيذبحها، لكن إرتاح قلبها لما عرفت أن أمها ماسمعت شي ولاعرفت وش كانت تبي تقول لشوق. أمها كانت تبي تسألها عن أختها هدى..!! خوف هديل خلاها تتوهم أشياء مابتصير.. لكن شوق اللي كانت تنتظر هديل وش كانت تبي تقول لها عن ابوها، ظلت اتفكر لأن بعد دخول خالتها الغرفة تفركشت السالفة.
وكانوا قاعدين بالصالة ويتمازحون وياعبدالله، وشوي والا ابوهم داخل البيت وعلامات الإنبساط على ويهه.. طالع زوجته وفهمت من نظراته انه يبيها بكلمة. ودخلت ومعاه الميلس حتى مايسمعونهم.
أم عبدالله:" خييييييير وش فيك؟"
أبوعبدالله وهو يضحك:" وأخيييييييراً بحقق حلمي وبزيد الخير."
طالعته ومافهمت وش قاعد يقول:" فهمني لأني موفاهمه ولاشي."
أبوعبدالله:" ابوعمر قدر يدخل شركة بومحمد، وجريب بنحصل فلووووس تودينا فووووووق."
لمعت عيونها يوم سمعت طاري لفلوووس وبكل لهفه:" صج؟؟ صج اللي تقوله؟؟"
أبوعبدالله:" لاأمزح، أكيييد صج، بس أقوول لج الحين ترى جريب بنستريح منها."
أم عبدالله ومومصدقة اللي تسمعه:" متتتتتتى؟؟"
أبوعبدالله:" يمكن أقول لها الليلة، والاباجر."
أم عبدالله:" خلها الليلة أحسن."
أبوعبدالله وهو بيطلع من الميلس:" أشوف الموضوع."
بنفس الوقت كانت هديل تفكر بالسالفة يوم شافت أمها وأبوها داخلين الميلس، وقعدت تفكر شلون تقول لشوق..وقامت من مكانها وقالت لشوق:" شوق ممكن دقيقة.. أبيج بموضوع."
شوق:" اوكي." وهي قايمة:" عبووود لاتغش ترى برد مرة ثانيه."
عبدالله:" لاتخافين، مابطالع ورقتج."
شوق:" أدري فيك شاطر."
وراحت وياأختها غرفتها فوق.. شوق كانت تفكر وش الموضوع اللي تبي تقوله لها، وهديل تفكر شلون تفتح الموضوع بدون ماتسبب صدمة لها..ودخلوا الغرفة وسكرت الباب..قعدت شوق على السرير ومجابلتها هديل على الكرسي..
شوق:" خير حبيبتي وش الموضوع اللي تبيني فيه؟"
هديل وبتردد:" بصراحة مدري شلون أفتح السالفة، ولاأدري من وين أبتدي."
شوق وتحاول تسهل عليها:" السالفة تخصج؟ والاتخص أحد ثاني؟"
طالعتها وعيونها صارت حمرة من لدموع اللي تجمعت:" تخصج."
شوق بإستغراب:" أنااااا؟؟؟"
هديل:" ايه انتي.."
شوق:" وش فيني أنا؟ تكلمي."
هديل:" أبوي يبي...."
وبالصالة تحت كان أبوعبدالله طالع من الميلس وسأل هدى:" وين خواتج؟"
هدى:" فوق بغرفة هديلو."
وركب من غير مايتكلم ولاكلمة، أبوها أول مرة يسأل عن خواتها. كانت تبي تعرف السالفة وتوها بتلحق أبوها علشان تتجسس عليه طلعت أمها من الميلس وهونت عن الروحة.
شوق:" هديل، شفيج؟؟ ابوي شفيه؟؟"
هديل:" يبي يـ........," لكن باب الغرفة انفتح، وقطع عليهم حبل الكلام طلة أبوهم اللي وقفت قلوبهم. هديل حست بخوف ورعب من عيون ابوها اللي مليانه مكر وحقد..أما شوق، فماكانت عارفة باللي صاير، وودها حد يفهمها.
أبوعبدالله وهو يطالع شوق بدون أي مقدمات:" سمعيني أنتي، بعد ثلاثة أيام خطبتج على ابوعمر.."
حست إن الأرض ادور بها.. ومب مستوعبه الكلام اللي قاعد يقوله أبوها.. وكان بعده يتكلم ويقول لها:" أبيج اتجهزين نفسج بسرعه لأن الريال مستعيل ومانبي تأخير جدامج يومين اليوم الثالث الخطوبة..فاهمة والا تبين طريقة ثانية تفهمين فيها."
ظلت إطالعه ومختنقة بعبرتها، حاولت تتكلم لكنها ماقدرت. طالع إختها اللي كانت واقفة وموصدقة انه قال لها وخلااااص صج بنفذ قراره هذا.. شوق ظلت واقفة وللحين تفكر بكلامه.. طالعته وبعده واقف ماطلع وحاولت تتكلم:" مستحيل..مستحيل..أوافق عليه."
ابوعبدالله واللي كان يضحك سخرية على كلامها:"ههههههه شنو المستحيل، سمعيني بتوافقين غصباً عليج، رضيتي والاانرضيتي."
شوق بعد مااستجمعت قوتها وقالت له بصوت عالي:" مستحييييييييييييل أتزوج إنسان متزوج، يبه لاتهدم حياتي أرجووووك.أنا بنتك وش سويت علشان تسوي فيني جذي؟؟حراااااام عليك.."
طالعها والشرار شوي ويطلع من عينه وجرب منها وعطاها صفعه على ويهها وقال:" هذي علشان لااطولين صوتج مرة ثانيه.." وعطاها صفعه ثانيه:" وهذي علشان تسمعين الكلام وبتتزوجينه يعني بتتزوجينه." وطلع من الغرفة وسكر الباب بكل قوته ونزل وهو يهذر بروحه:" بنات آخر زمن يعارضون كلام الرياييل."
شوق المسكينة كانت قاعده بالأرض وتندب حظها، دموعها كانت تنزل على خدها بغزارة. وتضرب على الأرض بكل قوتها وتقول:" ليش..لييييييييييييييش،، حرااام عليك وش سويت لك علشان تجازيني بكل هذا؟ ليش تكرهني؟؟ حرااااام حراااااااااام." وظلت تضرب بيدها على الأرض وأختها مب عارفة وش تسوي لها.. ولاشلون تساعدها..
هديل وهي تحاول ترفعها من الأرض:" بس ياحبيبتي أكيد..." وسكتت ماكملت كلامها لأنها ماتعرف وش ممكن تسوي.
شوق وبكل ذرة ألم وحرّة بقلبها:" آآآآآآآه ياهديل آآآآآآآآه، أبوي يبي يدمرني بأي طريقة،يالييييييييت رحت مع أمي ولاظليت."
هديل واللي كانت ميته من لصياح عليها:" لاااااااا إسم الله عليج، لاتقولين جذي."
ماردت عليها لأن كل الكلام ضايع ومامنه أي فايدة، أبوها قرر وبنفذ اللي يبيه ومافي أي حد ممكن يخليه يغير رايه.
^^^^^^^^^^^^^^^^^^^^^^^^
دخل الشركة وعيونه شوي وتطفر، حسود برغم الخير اللي عنده. وصل عند مكتب السكرتير ودخل وهو يتفحص المكتب:" السلام عليكم، ممكن اشوف أبومحمد؟"
السكرتير:" عندك موعد معاه؟؟"
أبوعمر:" ايييه قول له أبوعمر."
السكرتير:" ماعليه بس تفضل لحظة."
أبوعمريقول بقلبه:" لحظات."
بعد ثواني طلع السكرتير:" تفضل."
دخل وأول مالفت نظرة ديكور المكتب وفخامته.. وانتبه على صوت أبومحمد:" ياهــلاااا ياهـلاااا تفضل أستريح."
أبوعمر:" زاد فضلك."
أبومحمد:" آمر وش تشرب، قهوة، شاي."
أبوعمر:" مشكور وماتقصر."
أبومحمد:" مايصير تمر هني وماتشرب شي."
أبوعمر:" شاي علشان خاطرك."
أبومحمد دق على السكرتير وطلب اييب لهم شاي.. وبعد ماخلص طالع ابوعمر وسأله:" هااا لقيت لي أراضي زينة؟؟"
أبوعمر:" وشلون ماألقى، لقيت لك أراضي بس ترى ها أقول لك من الحين ترى فيه غيرك يبون يشترونهم."
أبومحمد:"لالالاااا انا قلت لك اذا الأراضي زينة خلاص توكل على الله."
أبوعمروحس انه بلع اللعبه:" زين زين، يعني أقول لراعيهم انك تبي تشتري؟"
أبومحمد:" اييييييه، وشوف متى يبي فلوسة أنا حاضر."
أبوعمر:" كل ماسرعت خير وبركة، وش رايك أتصل فيه أيينا هني المكتب؟"
أبومحمد:" يكون أحسن."
وأتصل ابوعمر للريال وقال له ان بعد عشر دقايق بكون عندهم.طالع أبومحمد وحب يلعب عليه أكثر:" أبومحمد، عندي بعض الشاليهات والمزارع اللي تفتح النفس وش رايك؟؟"
أبومحمد:"لاااا عندي خير والأرض الحين بسوي فيها فيلا ومزرعة يكفي."
أبوعمر:" صدقني ترى لقطة لايروحون عليك."
أبومحمد ماكان مقتنع بسالفة الشالية والمزرعه وماقبل بعرض بوعمر اللي انقهر منه واااايد. وبعد ماوصل صاحب الأرض المزعومة وقع بومحمد عقد البيع والشراء، وقع الشيك وعطاه الريال، وطبعاً بومحمد عطى شيك بوعمر لأتعابه لأنه الدلال..وبعد ماطلع الريال من المكتب ظلوا اثنينهم مع بعض يسولفون..
أبومحمد:"أبوعمر أنت ولدك جم عمره؟؟"
ضحك من سمع سؤاله.. وطالعة ابومحمد بإستغراب:" وش فيك تضحك؟"
أبوعمر:" لأن ماعندي ولد بس ان شاءالله جريب."
أبومحمد:"شلون زوجتك مايابت عيال؟"
أبوعمر:"انا متزوج ثلاث الأولى توفت، وتزوجت ثنتين وحدة مايابت شي والثانية ويابت لي بنت، والزوجة الرابعة بالطريج."
طالعه والدهشة انرسمت على ويهه:"ماشاءالله وبتزوج؟؟ وينننك ياريال ووين العرس؟ أكيد كبيرة؟"
أبوعمر:" هههه لااااا غلطان عمرها 19 سنة."
بطل حلجة بومحمد:" 19 سنة؟؟ حراااااام عليك تربيها؟؟"
أبوعمر:" هههههههههههه لفلوس تسوي كل شي، وانا وش لي آخذ كبيرة بعدين وش يضمني أنها بتحمل وتييب الولد."
أبومحمد:" وانت وش ضمنك بنت ال19 بتييب الولد؟ وتعاااااال من بنته هذي؟"
ابوعمر واللي نسى نفسه:" شوق بنت بوعبدالله الخلفان."
من سمع بمحمد الإسم وقف وظل يطالعه بنظرات غضب وقهر، أبوعمرغلط وقال له بالأسم. أبومحمد كان مب مستوعب اللي يقوله وسأله مرة ثانيه:" بنته بنت زوجته هذي والااا؟"
ابوعمر:" لاااا بنت زوجته الأوليه، خبرك يبي يرتاح."
أبومحمد زاد قهره منه وكان وده ياخذه ويحذفه بره الشركة بس مسك نفسه وحاول يستفسر أكثر:" ومتى الزواج؟"
أبوعمر:" بعد ثلاثة أيام.. وش فيك؟؟ لايكون ناوي تخطبها وأنا مدري؟"
حس بغصة بحلجة وماعرف يرد عليه بغير كلمة:" لااا."
أبوعمر:"يالله عن أذنك، اخليك تشوف أشغالك."
ابومحمد وبكل برود وسرحان:" مع السلامة."
طلع من المكتب وخلى أبومحمد سرحان بأفكارة اللي للحين مب مصدق الكلام اللي سمعه، وبسرعه ألغى كل المواعيد اللي عنده ورجع البيت..
^^^^^^^^^^^^^^^^^^^^^^^^
دخل البيت منزعج وهو ينادي زوجته فاطمة:" أم محمد، فاااطمة..."
كانت قاعده بالصالة تسولف وياأختها ام فيصل بالتلفون ومن سمعته سكرت السماعه بعد ماقالت لها:" الله يستر مدري وش فيه ياي هالحزة، أكلمج بعدين."
أم فيصل:" اي طمنيني لاتنسين مع السلامة."
ام محمد:" الله يسلمج." وبسرعه راحت له:" خيييييييير وش فيك تصارخ؟؟ ليش ياي من وقت؟"
ابومحمد وأعصابة وصلت حدها:" شفتي، شفتي وش يبي يسوي ولد الـ....، أستغفرالله ربي."
طالعته ومب فاهمه كلمة من اللي قاعد يقولها:" صل على النبي وقوول لي وش صاير علشان افهم، وهدي أعصابك."
أبومحمد:"ولد الخلفان."
بس سمعته دق قلبها بقوة:" وش فيه؟؟"
ابومحمد:" المحترم الفاضل، عااالي القيم والمبادئ يبي يزوج شوق لواحد من سنه."
طالعته بصدمة وضربت بيدها على صدرها:" شلووووووووون؟"
ابومحمد:"اللي سمعتيه."
قعدت على الكرسي تحاول تفكر بالسالفة:" بس..بس مايصير؟؟."
ابومحمد:" وش اللي مايصير الله يهداج، خلاص بعد ثلاثة أيام بيزوجها."
أم محمد:"لكن هذا ابوها، وماتقدر انت تسوي لها شي، حتى لورحت وكلمته مستحيل يتراجع، وانت تعرفه ولاتنسى اللي سواه فينا."
أبومحمد:" مانسيييييت، ومستحيل أنسى.. بس مايصير مااسوي شي."
أم محمد:" وانت وش بيدك تسوية دام أبوها موجود انت ماتقدرتسوي شي."
أبومحمد:"هذااا اللي رابطني ومخليني أصبر، بس بعد مايصير أخليها تتزوج هالشايب."
بهاللحظة دخلت شيخة الصالة، اتفاجأوا اول ماشافوها وبدت أشكالهم غريبة..
شيخة بإستغراب:" السلام عليكم ،، شفيكم كأنكم شايفين جني؟؟"
أبومحمد:" وعليكم السلام.." وهو منزل راسة:" مافينا شي."
شيخة:" وين ماكو شي وانتو صوتكم لبره واصل، خير شصاير؟؟"
أم محمد واللي مستحيل تيود لسانها:" وين الخير وهذا بحياتنا."
طالعتها بإستغراب وسألتها:" منو هذا؟؟ وش صااااااير..مب فاهمة شي؟!"
أم محمد:" ولد الخلفان يبي يزوج بنته شوق لواحد كبير بالعمر."
أنصدمت بس سمعت الخبروقعدت على الكنبة:" شلووون؟؟ ومتى..؟"
أم محمد:" أبوج شاف الريال اللي بياخذها وقال إنه خطوبتها بعد ثلاثة أيام.."
شيخة:" أنا مومستوعبه شي،، مستحيل لااازم نوقفة عند حده، يبه لازم تتصرف."
أبومحمد:" مااااقدر تعرفين إن اذا تدخلت بنفتح جروح قديمة و..."
قاطعته بنته:" يبه إذا تقصد اللي صار لي منه، فأنا نسيته وحتى لو مانسيت يبه شوق منا وفينا ومايصير نخليه يدمرها بهذي الطريقة."
أم محمد:" انتي شفيج اكيد مب صاحية، لاتسمع كلامها الظاهر هي ماتخاف على عمرها وعلى عيالها."
شيخة طالعته وطالعت أبوها:" يبه واللي يسلمك واللي يخليك لاتخليها بروحها حراام يضيع مستقبل البنت."
أم محمد:" أنا قلت لك لاتسمع كلامها، هذا ينخاف منه ومن بلاوية.."
شيخة تحاول تقنعه بأي طريقة:" يبه أرجووك علشان خاطري لاتردني ، يبه وبأغلى ماعند لاتردني.."
كانت دموعها شوي وبتنزل من عيونها، لأول مرة كانت تترجى أبوها بهذي الطريقة، وكل هذا علشان من، علشان شووق اليتيمة..!! أبومحمد قام من مكان بعد خلصوا كلامهم وقف يم دريشة كبيييرة إطل على جزء من حديقة بيتهم، وتنهد تنهيدة عميقة وبعد دقايق تكلم:"إييييييييه لوتدرون كثر الألم والغيض اللي بقلبي بسبته، بعد اللي صار بينا وبينه كان لازم أنهي كل علاقة تربطنا فيه، لكن وجود شوق عنده حطم كل شي، ماقدرت آخذها منه لأن القانون بصفة لأنه ابوها.."
وقالت له شيخة:" وهذا تسميه أبو يبه؟؟ هذا عمره ماعرف معنى الأبوة.."
أبومحمد:" أدري فيه معاملته لها، والدمار اللي هو فيه أعرفة زييييين."
شيخة:" يبه وش بتسوي..؟؟"
أبومحمد طالعها بكل حنية وحط يده على جتفها:" يبه اسمعيني، فلوس الدنيا ماتقدر تسوي شي لها، واللي مقدره الله بصير.."
شيخة بإنكسار:" يعني بتتركه يزوجها؟؟"
أبومحمد:" قولي لي وش بيدي أسويه بسوية بدون أي تردد."
أم محمد:" يمه شيخة ابوج تعرفينه مابقصر، بس تعرفين الماضي والقانون.."
شيخة:" اي ماضي وأي قانون.. اللي يهمني شوق الا اذا يبه ماعادت تهمك؟"
أبومحمد إبتسم لها إبتسامة حزينة ذكرته بأيام زمان، وأيام اللي كان أبوه عايش الله يرحمه.. ويوم قال له دير بالك على لحمك ودمك..!! من أيام أم شوق كان بوعبدالله يسكر ويهيم على ويه بالشوارع، وبيوم من الليالي اللي كان طالع فيها ومفترة به الدنيا كان يمشي يم بيت بومازن. وكانت شيخة توها نازلة من السيارة وياها السايق وبيده بعض الأغراض.. بوعبدالله ماكان حواسه معاه بتأثير الخمر والعياذبالله..وظل يطالعها وتجدم صوبها وهجم عليها،، صرخت شيخة بكل قوتها وحاولت تبعدة عنها لكن بوعبدالله كان قبضته قوية عليها،وماتركها. السايق رمى الأغراض اللي بيده وراح يحاول يبعدة ودار بينهم ضرب وطلعوا الجيران بعد ماسمعوا صراخ شيخة،، السايق المسكين تشلخ من بوعبدالله.. واتصل جارهم على مركز الشرطة وأخذوا بوعبدالله. وطبعاً كالعادة تحقيق ورفع قضية.. ومن ذاك اليوم زاد كره بومحمد لولد الخلفان...!!
^^^^^^^^^^^^^^^^^^^^^^^^
دخلت البيت والفرحة مب وسعتها:" وأخييييراً باجر آخر إمتحان.."
أحمد:" سلمي بالأول.."
سمر:" السلام عليكم، وين أمي؟؟"
أحمد:" مدري طلعت يمكن."
سمر وهي ماخذ الرموت من على الطاولة:" عطني أشوف القنوات."
أحمد وهو ساحبه من عندها:" انتي اللي عطيني اياه ويالله فوق قعدي درسي."
سمربتأفف:" اووووه مابي باجر إمتحاني سهل ودارسة له من قبل يعني بس علي أعيد القراءة.."
أحمد وحاب يعاندها:" لالالا مافيييييه تقومين يعني تقومين."
سمر:"أحممممد بليييييييز."
أحمد:" أممممممم بشرط.. سوي لي شاي."
بطلت عينها:" شنوووو شنووو، قووول للخدامة مب داخله المطبخ.."
أحمد:" انا ابي اعرف انتي شلون بتزوجين."
سمر:" والله اللي باخذه بيب لي خدامة وبعييييش بآخر دلع.."
أحمد واللي فطس من الضحك عليها:"ههههههههههههههههههاااي حلوووة هذي آخردلع أنا باقوله شرط اذا تبي تاخذها لااتيب لها خدامة..وبخليه يكرفج كرف.."
سمر:" ولاتفكر تحلم بهذا الشي."
أحمد:" اوووكي بنشوف."
وقامت من عنده وراحت فوق تبدل ثيابها، وأحلامها الوردية بالزواج الرومنسي والدلع والدلال اللي تقراه بالقصص خيال وردي بعيونها..!! ياترى سمر بتلقى هذا الزواج؟؟ والا هالحياة الرومانسية الخالية من المشاكل والمشاحنات؟؟!
^^^^^^^^^^^^^^^^^^^^^^^^
وفي بيت بوفيصل..
أول مااتصل ظلت اطالع التلفون وتفكر:" أرد عليه؟؟ والا ماارد؟؟لا.. خله شوي أكيد بيتصل مرة ثانية." وفعلاً ظل تلفونها يرن لحد ماانقطع وبعد خمس دقايق اتصل فهد مرة ثانية وبعد ثواني ردت عليه:" الووو."
فهد:"هلااا والله بهالصوت."
سحر:"هلا بيك.."
فهد:" وينج ماتردين؟؟ اتغلين علي؟"
سحر:" كنت مشغولة شوي."
فهد:" اهااا، شخبارج انتي؟ وشخبار امتحاناتج؟؟"
سحر:" والله بخير، انت شخبارك؟؟"
فهد:"والله اسأل عنج، قلت ماتسألين أسأل.."
سحر:" قلت لك مشغولة."
فهد ويحاول يسحب منها الحجي:" يعني بتسألين مرة ثانية؟؟"
ظلت ساكته وتفكر، ورد قال لها:" شفيج ساكته؟ تفكرين في شنو؟"
سحر:" شنووو؟؟"
فهد:" آسف ماكان لازم اسألج وأدخل بشؤنج."
سحر:"لااااعادي."
وسكتوا ثواني وبدأ فهد الكلام:" أحسج مرتبكة والا ماتبين تتكلمين صح؟؟"
ماكانت عارفة شعورها، ولاوش تبي هي بالضبط ، بس حبها لنفسها وغرورها يخليها تسوي أي شي حتى تثبت للناس أنها تقدر تسوي اللي تبيه..!! وأنتبهت من سرحانها على صوته:"الووو وين سرحتي؟؟"
سحر:"ههه لامعاك.."
فهد:" مااعتقد..لأنج مارديتي على سؤالي.."
ردت عليه بإستغراب:" اي سؤال؟؟"
فهد:" ههههه وتقولين معاي ، شفتي أنج سرحانه بمكان ثاني، سؤالي ياإنج مرتبكة اوانج ماتبين تتكلمين معااااي صح اولا؟؟"
سحر:" لاااا."
فهد:"متأكدة؟؟"
سحر ماعرفت وش ترد عليه وظلت تفكر وش تقول له:" أ..ايييه متأكده عادي مافيني شي لامرتبكة ولاقلت مابي أكلمك بس.." وسكتت ماكملت كلامها..
فهد:" بس شنو؟ كملي كلامج."
سحر:" ولاشي.."
فهد وحب يغير الجو شوي:" سحر مافكرتي فيني، أقصد شلون يكون شكلي؟"
سحر وتحاول تحسسه انها عادي كلمته والاماكلمته عرفت شكلة اولا:" يمكن.. مذكر!!"
فهد:" زين ممكن أطلب منج طلب وأتمنى ماترديني."
سحر:" شنو؟"
فهد:" ممكن آشوفج؟"
سحر:" لااااا."
فهد ماتوقع انها ترفض:" ليش؟ ماتبين تعرفين شكل اللي يكلمج؟؟ زين اذا انتي ماتبين أنا أبي أعرف شكلج."
سحر وبشوي عصبيه:" لااا مابي أعرف، ومب لازم تعرف شكلي."
فهد:" ماعليه شفيج عصبتي ماغلطت أنا، زين فكري بالموضوع وأبي رد منج."
سحر:" لاااا مايحتاج أفكر لأني ماابي."
فهد:" وليييه بس خلاص لاتعصبين، باخليج الحين لأني مشغول شوي اوكي."
سحر انقهرت منه شلون هو اللي يقول لها يالله خلاااص!!:" مع السلامة."
فهد:" شكلج زعلتي؟"
سحر:" وليش أزعل مافي شي يزعل."
فهد:" اوكي أكلمج الليلة، انتبهي لنفسج."
سحر:" اوكي."
وصكت التلفون ورمته على سريرها منقهر:" يحسب نفسه منوو،، يالله مشغول باخليج..ولا يبي يشوفني اذا ماخليته يذل روحة ويترجاني قبل ماكون سحر!!!! وبين ماتفكر تذكرت ان عندها امتحان وماراجعت له وقامت بسرعه فتحت كتابها وقعدت تراجع لكن صوت فهد مازال بأذنها صوته يخليها تعيش أحلااام مالها أول ولاآخر، لكن غرورها يمنعها من أنها تتكلم معاه بأسلوب غير الاسلوب اللي تكلمت فيه وياه..!!والأحلام الشيطانية مازالت تتردد عليها!
^^^^^^^^^^^^^^^^^^^^^^^^
العصر بعد الصلاة كانوا قاعدين كلهم بالبيت، شيخة وعيالها، أبوها وأمها وأخوانها كلهم. سمر كانت تسولف ويابدور عن شوق، خلود وسيف مثل الأطرش بالزفة.. أما أحمد ماكان باله وياهم لأن قاعد يطالع التلفزيون>> فاضي..
خلود تسأل سيف:" ووش السالفة؟؟"
سيف:" والله مدري خبري خبرج اذا تعرفين شي قولي لي.."
خلود:" هيييييييييي بدورو سمر شالسالفة؟؟؟"
سمر:" ماكو شي سكتي." وردت تسولف ويابدور..
سيف:"هههههه سكتوها،، أقوول انا بطلع الظاهر اذا قعدت أكثر باجن، يبه أنا بطلع شوي تامرني شي؟"
أبومحمد:" لايبه بس خلصت امتحانات والاللحين؟"
سيف:" باقي علي امتحانين وأخلص."
أبومحمد:" ايه حط بالك زين بيض الويه."
سيف:" ان شاءالله ، مع السلامة."
أم محمد:" الله يحفظك."
شيخة:" يبه والحين باقي يومين.. مايصير نسكت عن الموضوع."
سمر:" إيييه يبه حرااام المسكينه يصير فيها جذي."
خلود مستغربة واطالعهم وتفكر(( وش السالفة شفيهم؟؟ منو هذي اللي حرام يصير فيها جذي؟؟)) طالعت بدور وسألتها:" بدور وش صاير؟ منو هذي اللي تسولفون عنها؟"
بدور:" بعدين بعدين مب الحين."
خلود انقهرت لأن محد عاطنا ويه وقايل لها وش صاير.. وحاولت تسأل أخوها لكن أحمد مشغول بالتلفزيون ولايدري وش صاير عندهم. بالرغم انه يعرف سالفة أخته اللي صارت.
أبومحمد:" انا قلت لكم مااقدر اتصرف على كيفي الشغلة يبالها تفكير."
أم محمد:" صاج أبوكم وش بيده يسويه، مالكم الا الدعاء لها بأن الله يفرج عنها."
بدور كان مقهورة وودها تذبح أبوشوق اللي مايخلي رحمة الله تنزل.. ظلت ساكته وتفكر شلون توصل لشوق وتتكلم وياها.
شيخة:" يبه انت شلون عرفت اللي بيتزوجها هذا؟؟"
ابومحمد:" هذا دلال على أراضي وعقارات."
شيخة:" وش أسمه؟؟"
أبومحمد:" ينادونه ابوعمر وأسمه خلف ليش؟"
شيخة:" بس اسأل،، زين ماقدرت تستفسر عنه شي ثاني.؟"
أبومحمد:" والله من سمعته دارت بي الدنيا، وماعرفت وش آقول له."
سمر كانت تفكر بشوق اللي تكسر الخاطر من المآسي اللي قاعده تصير لها، مايكفيها الضرب اللي تحصلة ويزود عليها أبوها بزواج مصلحة. أما خلود انقهرت وراحت غرفتها.
بدور:" سمر أبي اتصل فيها بس أخاف تشيله أمها وتقعد تسأل ليش؟"
سمر:" قولي لها تبين تسألين عنها، وثانياً هي تعرف أمج يعني عادي."
بدور:" يعني تهقين عادي؟؟"
سمر:" لاتعقدين السالفة، قووومي أتصلي وشوفي."
وقامت القسم الثاني من الصالة وبتتصل، وبعد دقيقة ردت مكانها والإحباط على ويهها.
سمر:" خير؟؟"
بدور:" اي خير، ردت علي أختها هدى وقالت لي أن أبوها مانعنها ترد على أي تلفون."
سمر:" صج حقير."
سمعها ابوها وطالعها، سمر:" آسفه ماقصدت اقول هالكلام."
أبومحمد:" شيخة أبيج تتصلين لأم عبدالله وتسألينها عن السالفة."
شيخة:" واذا سألتها وش بنستفيد؟؟ يبه انت لازم تواجه بوعبدالله وتحاول تمنعه ينفذ اللي براسه."
أبومحمد:" اذا واجهته بتصير مشاكل مالها آخر، ومابي أعرض سمعة العايلة لكلام الناس."
شيخة:" يعني زواج شوق مابخلينا عرضة لكلام الناس، الكل يدري انها تصير لنا."
أبومحمد:" مدام أبوها على وجه الدنيا ماقدر اسوي لها شي غير مساعدات بسيطة، مااقدر أمنعه."
شيخة:"و الشرع؟؟"
أبومحمد:" وانتي تهقين ابوها يهتم للشرع والا للدين، اللي مايصلي مايخاف الله ولاممكن انه يكترث بشي."
بدور وسمر قاموا وراحوا فوق لخلود يقولون لها السالفة، أما أحمد رقد مكانه ونبهته شيخة يروح لغرفته يرتاح..أماأبوها فكان متضايق وطلع الحديقة يقعد بره ويا أمها. وهي ظلت تفكر بالمصيبخ اللي بتصير لشوق.
^^^^^^^^^^^^^^^^^^^^^^^^
كانت قاعدة بغرفتها وناصبه العزا فيها..!! ماكانت تطلع من الغرفة ولاتاكل ولاتشرب من القهر والظيم.كانت مطلعة صورة أمها وتكلمها ودموعها مغرقة الصورة وويهها! " آآآآآآآآه،، آآآآآآآآآآآآآه يايمه شفتي وش صار في بنتج؟؟ شفتي يايمه أبووي وش يبي يسوي فيني؟؟ ليييش يايمه رحتي وخليتيني لييييييش ، لييييييييش خليتيني لعذاب ابوي وظلم زوجته..؟! شفتي يمه بنتج بزفونها لواحد أكبرمنها بسنين، لواحد مثل أبوها..!! يمه ياريييييت أخذتنيني ويااااج.."
ظلت تصيح وهي حاضنة الصورة.
وبالصالة تحت..
أم عبدالله:" هههههههه والله صدقتي بنستريح جريب من ويهها."
هدى:" بس يمه بسألج هو غني؟"
أم عبدالله:" ابوج يقول انه بخير يعني اكييييييد راح يفيدنا."
هدى:" أكييييد هذا شي ضروري.."
كانت هديل نازلة من على الدري وسمعتهم:" حرااام عليكم تسون فيها جذي، يمه لاتخلين أبوي يزوجها لأبوعمر.واللي يخليج."
أم عبدالله تضحك استهزاء:" ههههههههههههههه وش تقولين انتي أكيد خرفتي، مابغينا نفتك منها تبينا نخليه يرد بكلامها، وحتى لو قلت له مستحيل يتراجع بعد ماعطى الريال كلمة."
هديل:" انتي تقدرين تمنعينه بس ماتبين هذا الشي يصير لأن موبمصلحتج صح."
هدى كانت قاعدة وتسمع مشاحناتهم.. أم عبدالله:" شوفي اذا ماسديتي هالحلج بكسر راسج فاهمه، يالله ذلفي من ويهي."
هديل:" بروح بس الله أكبر عليكم."
ام عبدالله:" شوفي هالبنت ادعي علينا، حسبي الله عليج من ابنيه، والله لوماانتي بنتي كسرت ظلوعج."
هدى وتحاول تهدي أمها:" يمه بس خلاص ماعليج منها، لاتوترين نفسج علشانها."
أم عبدالله:" وييييين الواحد مايعصب وعنده عيال تسد النفس."
هدى:" وانا منهم؟"
أم عبدالله:" لااااا أكييييييد إنتي غير،، الاوينها ماتبين؟"
هدى:" فوق بغرفتها ذابحة روحها من لصياح، ولانزلت تاكل ولاشي."
أم عبدالله:" ههههه خلها تصيح من الحين لبعد اسبوع زواج وبتزوج غصباً عليها، حرمت نفسها من الأكل، الشرب بكيفها بس نفتك منها."
هدى والفرحة مب واسعتها:"ان شاااااااااااااااااااااااااااااءالله، ههههههه."
^^^^^^^^^^^^^^^^^^^^^^^^
وبلندن الساعة ثنتين الظهر..
حمد:" يالله ياأخي شفيك انت لمتى بتظلون متنا جووووع.."
فيصل:" بس هذا انت مايهمك الااا الأكل، صبر شوي زوجتي للحين ماجهزت."
حمد:" ولييييه انا قايل حريم ويانا مايصلح."
محمد:"ههههههه والله راحت عليك ياحمد."
فيصل:" نعم نعم وش قلت؟؟ اقووول سد حلجك وانثبر مكانك."
حمد وهو رايح عند باب غرفتهم:"افففففف انا بدخل اذا خلصتوا خبروني."
فيصل:" أحسن.. محمد وش قلت اليوم لازم تروح للمستشفى علشان تباشر علاجك."
محمد:" ماعليه بعد صلاة المغرب ان شاءالله، والله جعنا وينها؟"
فيصل:" خلصنا من هذاك تطلع لي أنت صبر بروح أشوف." وطلع من غرفتهم وراح لغرفته ودق الباب:" نجوود ماخلصتي؟؟"
نجود وهي فاتحه الباب:" خلصت."
فيصل:" يالله يابنت الحلال عورو راسي بياكلوني."
نجود:"ههههههه، يالله ماعليه خلصنا روح نادهم علشان ننزل."
وراح دق عليهم الباب وطلعوا له.. كان محمد الوحيد طبعاً على كرسي كان حاس بشوية ضيق من شكله.أخذوا سيارة من الفندق وراحوا يتغذون بمطعم، وطبعاً المطاعم ولاأروع.أول مادخلوا فتح الموظف لهم الباب:" Good afternoon sir."
حمد:" Good after noon, a table for four ."
الموظف وهو يأشر على إحدى الطاولات:" Yes, please would you like this table the window? "
حمد طالعهم وياخذ رايهم:" وش رايكم؟"
محمد:" وش رايكم أنا بالنسبة لي المكان حلوو."
نجود:" اوكي."
حمد:" yes thank you . "
وبعد ماقعدوا بأماكنهم ياب لهم المنيو:" Here's the menus. "
محمد:" thank you. "
قعدت نجود تتصفح القائمة ومحتارة وش تطلب، والشباب بعد نفس الشي:" فيصل وش بتاكل؟"
فيصل:" والله مدري وش أطلب، تعرفوني ماآكل أكل من بره وايد."
حمد:" وش رايكم تاكلون لحم خرووف."
محمد:"اكله انت مابي أنا."
فيصل:" انا قررت وش أبي، وانتي نجود؟"
نجود:"وانا بعد ، بس ماراح آكل أشياء دسمة وايد."
محمد:" كيفج بس لازم تاكلين."
حمد:" يالله شنو نطلب والابعد بتجوعونا أكثر؟"
محمد:"لااااا خلاااااص بنطلب ." وياهم الجرسون:" yes sir, what will we have first? "
محمد:" Will, we won't soup, some roast potatoes, roasted meat and beefsteak and salad ok."
حمد:" وووول كل هذا بناكله؟!"
فيصل:" انت تقول بتمووووت من الجوع ياالله شد حيلك واكل."
نجود:"هههههه اليوم بتصيده التخمة."
وسأله الجرسون وش يبون يشربون..
محمد:" هييي انتوا وش تبون تشربون؟؟"
حمد:" انا أبي عصير برتقال، وانتو؟"
فيصل:" انا احب عصير الفراولة وزوجتي بعد."
محمد:" وانا وياكم." وقال للجرسون:" And give me 3 grape-fruit and one orange-juice. "
الجرسون:" Ok just ten minute. "
محمد:"Ok "
وراح الجرسون.. وبعد وجبة دسمة للجميع قرروا يرجعون الفندق..لأن صلاة العصر جربت.
فيصل وهو داخل غرفته ويقول لها:"وتقول مابي أكل دسم بعد، اشوفج خليتي شي."
طالعته وحاطة يدينها بخصرها:" والله أنتو ماقصرتوا، كل اللي طلبتوه خفيييييييف، بس بعد ماكثرت."
فيصل:" شي أكييييييييد."
نجود:" وش تقصد؟؟"
فيصل:"هههه ماقصد شي."
نجود وبعدمافصخت عباتها وشيلتها:" يالله بقوم أصلي." وهي قايمة:" حبيبي محمد بروح المستشفى؟"
فيصل ويجهز نفسه للوضوء:" يقول بعد صلاة المغرب، ليش؟"
نجود:" لا بس اسأل."
وبعد ماصلوا صلاة العصر قعد معاها بالصالة الصغيرة.. وفتح التلفزيون وقعد يفرفر بالقنوات ولاثبت على قناة.
نجود:" فيصل دوختني وقت بس عااااااد."
فيصل:" والله برامجهم تلووع الجبد مافي شي عدل."
نجود:" من زين برامجنا يعني."
فيصل:" على الأقل في برامج تتطالع هني لااااا."
نجود:" زين ماعلي من البرامج، ممكن أكلمك بموضوع؟"
فيصل:" آمري قوولي وش عندج؟"
نجود:"حبيبي مابيك تعصب بس أبيك تسمعني بهدوء وبعدين عطني رايك اتفقنا؟"
فيصل واللي شك بالسالفة وحس انه يعرفها:" اوكي."
نجود:"انا يايه هني علشان نفحص من جديد وأنشوف اذا كان ممكن أحمـ..." وقاطعها على طول وماترك لها مجال تكمل:" لااااااا، انا قلت لج راي من قبل أنا راااااااضي باللي انقسم لي. مايحتاج اتعبين نفسج واتعبيني."
نجود:" بس يافيصل مايصير احرمك من أبسط حقوقك."
فيصل:" حبيبتي فهميني حقوقي واصلتني بالكامل مابي أي شي غيرج انتي، اذا رب العالمين كاتب لنا ماانيب عيال خلااااص ارضي يابنت الناس ولااتعبين عمرج."
نجود والدموع تنزل على خدها:"لااااا لاااازم نسوي فحوصات وندخل على أطباء يمكن نلقى علاج لاتحرمني من أمنيتي."
فيصل نزل راسة:" واذا ماكو فايدة؟"
نجود:" أوعدك أني ماراح أفتح موضوع العلاج مرة ثانيه."
فيصل وهو يمسح دموعها:" أكيييييييد؟؟"
نجود تهز راسها بالإيجاب:" صدقني أبي سعادتك بالدنيا."
فيصل:" ياعمري أنتي، سعادتي معاااج وبس."
إبتسمت وحضنته تمت تصيح لأنها مب قادرة تحقق أمنيته..
^^^^^^^^^^^^^^^^^^^^^^^^
الساعة ثمان..
أم محمد:" سيف، قوم أتصل لأخوك من زمان ماسمعت صوته.."
سيف:" يمه توج اليوم الصبح مكلمته وين من زمان؟"
أم محمد:" أخوك وأختك بغربة لازم أطمن عليهم، يالله والا بقوم انا."
سيف:" لاتقومين ولااتعبين نفسج، انا بتصل."
ودق على رقم الفندق وحولوه لغرفة محمد وحمد:" ألووووو."
حمد:"هلاااااا والله بهالصوت شخبارك؟"
سيف:" بخير الحمدلله أنتوا شخباركم؟ وش مسوين؟؟ أكييييد الجو على كيف كيفك هناك."
حمد:" اوووه، صدقني وناسة ياليتكم كنتوا ويانا."
سيف:" يالله الجايات اكثر من الرايحات، وين محمد؟"
حمد:" محمد بغرفته لحظة وحده اوكي."
سيف:" اوكي."
وراح بسرعه يناديه:" محمد تلفون من بيتكم يالله بسرعه." ودفع الكرسي له وبسرعه رد عليهم:"الووو..هلا وعليكم السلام يالقاطع."
سيف:"هههه شدعوة اللي يقول مسكت انت بالإتصال، شخبارك؟ وشخبار أختي وريلها؟"
محمد:"كلنا بخير نسأل عنكم، وين الوالد والوالدة؟ وأخواني؟"
سيف:"أحمد طلع، وانا اراجع باجي امتحانين وأخلص وسمروخلود كاهم نازلين وأمي يمي ذابحتني من الضرب علشان تبي تكلمك."
محمد:"هههههههههههه قصة هي، عطني أكلمهم."
أم محمد:"هلا يمه شخبارك؟"
محمد:"ياهلاويامرحبا بالغاليه والله عاش من سمع صوتج يمه، انا بخير بدعائج لي."
أم محمد:" يمه قول لي انت بخير لاتخشون علي شي.."
محمد:"ههههههههه يعني وش بصير فيني يايمه، والله بخير والحمدلله وان شاءالله بعد جم ساعه بروح المستشفى."
أم محمد:" ايه انتبه لنفسك، ولاتسرعون بالطريج هالله هالله يايمه."
محمد:"من عيوني انتي بس لاتحاتين، الا وين أبوي؟؟"
من سألها عن أبوه تذكرت حاله وماحبت تقول له عن شي:" ابوك بخير بس تعرف مشغول بالشركة وايد، واذا رد البيت بخليه يكلمك."
محمد:" الله يعطيه العافية وسلمي عليه وايد."
أم محمد:"ان شااااءالله، يالله ياولدي هذلين خواتك يبون يكلمونك."
محمد:"اوكي، هلا خلود هلا بهالصوت شخبارج، والله فجيتوا علي وااااااايد."
خلود:"هلا بيك، وحشتني وااااااااااايد وااااايد، شدعوة ماتسأل عني لوماني أختك."
محمد واللي فطس من الضحك عليها:"هههههههههههههههههههه لاوالله نسيت أطلب منج السماح، اللي يشوفج خطيبتي مب أختي خخخخخ."
خلود:" تطنز هاااا لكن ماعليه أوريك، المهم مابي أطول لأن الملقوفة اللي يمي تبي تكلمك."
محمد:"هههههههه من الملقوفة؟؟"
خلود:"من بعد غير سمووور."
محمد:"عطيني اياها، ألووو."
سمرماخذه السماعه وضربتها ضربه على جتفها:"ألو السلام عليكم."
محمد:"هلا وغلا سموور شخبارج حبيبتي؟"
سمر:"والله اسأل عنك، شخبارك وش أخبار نجود؟"
محمد:"بخييييييييييير كلنا، شخبار إمتحاناتج؟ وش سويتي فيها؟"
سمر:"تمام باجي إمتحان وأخلص."
محمد:"زين شدي حيلج ويبي مجموع."
سمر:"لاتحاتي، ابيض الويه."
محمد:"أعرفج ذكيه، زين سموور مابي أطول أكثر عليكم سملي على أحمد وقولي له يتصل خلنا نسمع صوته، واذا قدرت أنا بتصل فيه اوكي ولاتنسين سلموا على شيخة وقوليهلها يقولج محمد يالقاااااااطعه."
سمروهي تضحك:"ان شاءالله سلم عليهم وانتبه لنفسك."
محمد:"ان شاءالله، يالله مع السلامة."
سمر:"الله يسلمك."
وصكت التلفون وراحت لأختها الي اطالع التلفزيون ورمت عليها مخده صغيرة:"اذا انا ملقوفة انتي وش تطلعين."
خلود:"هههههههه أمممممزح معااااه والله صدقيني."
سمر:" آخر مرة لج."
^^^^^^^^^^^^^^^^^^^^^^^^
الساعات تمشي بسرعه، واليوم جرب يخلص ويبقى يوم على زواج شوق أم فيصل سمعت الخبر من أختها وقالت لها انهم مالازم يسوون شي لأن أكيد بيصيدهم كلام الناس وكلامهم مايرحمهم..!! وفي بيت أم فيصل كانت العنود قاعدة تقرأ في كتب تفيدها بوقت الفراغ، أما البرنسيسة سحر قاعدة فوق وأحلامها.
سحر:"اففففففف وش هالملل هذا، متى أخلص من هالإمتحانات وأبدأ الاجازة."
وتوها تقول جذي والا واصلها مسج، وأول مافتحته حست إن قلبها وقف بلحظة(( شحال اللي غيابه حيل يتعبنا ،عزيز إن سأل عنا وعزيز لوغاب وماتذكرنا!)).. وثواني واصلها مسج ثاني ((أبني حدود الصبر دونك وتنهااار.. مشتاق أشوفك لكن البعد جباااار.)) كانت المسجات من محمد،، ماتوقعت انه يرسل لها حست بضيق لما قرت مسجاته، عكس الأول لما كانت تقراهم اطير من الفرح وتحس بغرورها أكثر!!
سحر:"هذاااا وقته، وش اسوي له اففففف..!!"
وبعد دقايق وصلها مسج ثالث يقول(( إذا لساني مايكلمك، ترى قلبي ماينساك، ومهما يطول الوقت على بالي ذكراك.)) لكن هذا المسج كان من فهد مب من محمد. وشوي والا فهد متصل، وترددت وايد قبل لاتشيله لأن محمد شغل تفكيرها وأخيراً ردت عليه:"ألوو."
فهد:"هلاوالله، شخبارج؟"
سحر وتحاول تبين طبيعيه:" بخيرإنت شخبارك؟"
فهد:"بخير، سحر أنا آسف الظاهر اني أزعجتج اليوم يوم قلت لج إني مشغول."
سحر:"لاعاااادي."
فهد:" وش قلتي عن طلبي؟"
سحر وتسوي نفسها مب ذاكرة:" اي طلب؟"
فهد:" نسينا ماكلينا، فكرتي باللي طلبته منج؟"
سحر:"اهاااا، قلت لك لاااا مابي."
فهد:"لييييييش زين ابي اعرف السبب ممكن؟"
سحر:" شوف اذا انا ابي الشي بذيك الحزة انا بقول لكن انت تطلب لاااا."
تضايق فهد من اسلوبها وغرورها الزايد لكن تحمل علشان يوصل للي يبيه:" زين ماعليه على أمرج اللي تبينه يصير، يعني ماأمللج بعدين وانا اسألج متى؟"
سحر:" مايحتاج تسأل، وقت اللي اشوفه مناسب بخبرك."
فهد:"انطر هاليوم بفااااارغ الصبر."
سحر:"لييييش؟"
فهد واللي بدى يلعب لعبته:" والله مدري صوتج، كلامج وكبريائج كل شي يخليني أشتاق لشوفتج أكثر."
سحر كل ما سمعت كلامة حست بزيادة بالغرور والعجرفة..!! كانت ذبحتها انها تسمع كلمات الاطراء والاعجاب وخصوصاً من الشباب.
سحر:"ههه انت تشوف جذي؟؟"
فهد:" اكييييييد، الا اذا كنت اتغلين."
سحر وبدون تردد:"زين ممكن توصف نفسك؟"
فهد:"هههه لاااا لعبي غيرها، بتشوفيني يوم اللي بتحددينه، اوصف نفسي لااا."
سحر واللي ماتوقعت انه يرفض:" زين مب مشكله استفسار ثاني انت حلوو والا..؟"
وهو يضحك عليها:"والا شنو جيكر، لاتخافين وسييييييييم ويموتون علي."
حست بنوع من الغرور بكلامة:" زين بنشوف."
فهد:" قلت لج تطمني."
سحر كل اللي كان يهمها ان الشخص اللي قاعد يكلمها شكله ومستواه المادي، يعني أخلاق سمعة ماكانت تفكر فيها أبداً وهذا كان أكثر شي راح يدمرها. وبعد كلاااام شيطاني لنص الليل سكرت السماعة، كانت العلاقة بينهم تتطور بسرعه.سحر ماعادت تقدر ماتسمع صوته يوووم واحد، وهو مثل مايقول:" احلوووت اللعبه!!! "
^^^^^^^^^^^^^^^^^^^^^^^^
دخل البيت الظهر وهو مستانس لأن باقي يوم واحد وتكتمل تخطيطاته..
أبوعبدالله:" أم عبدالله وينج؟؟"
أم عبدالله بصوت عالي:" بالمطبخ."
وراح لها وهو شاق الحلج:" شووووووفي وش بيدي.."
بس شافتها طاح من يدها الصحن وانكسر من الزهقة:" ياااااالله شنو هذاااا من وين لك؟؟"
وهو يخلي شيك لفلوس بجيبه واللي عطاها اياه بوعمر:" من عند النسيب."
أم عبدالله:" بوعمر؟"
وهو يهز راسه:" لااااااااا ياخبله، هذا فوائد اللعبة اللي سويناها على بومحمد."
أم عبدالله:" وشلووون قدرتوا تاخذون كل هالفلوس؟"
ابوعبدالله:" مو شغلج هذا شغلنا احنا، لحظة بسألج وينها فيه بنت بدروه؟؟ جهزت نفسها؟"
ام عبدالله:"لاوالله من يومين وهي حابسة روحها بغرفتها تصيح، ولاأكلت ولاشي، ترى اذا مااكلت بتموت علينا عقلها احسن لها."
ابوعبدالله وعصب من سمعها:" هذا تبي تروح علينا الخير واللي سويته كله الغبيه بنت الـ,,,,." وركب بسرعه فوق وحاول يفتح الباب لكن كان مقفول وبصوته اللي زلزل البيت:" فتحي الباب لاأكسره فوووق راسج."
من سمعته دق قلبها وانملأ خوف ورعب منه، ترددت وايد قبل لاتقول من مكانها،، كانت خايفة تفتح الباب خواتها وأخوها كانوا بره يم غرفهم واقفين من سمعوا صوت ابوهم..
ابوعبدالله:" اقووولج بطلييييييه لاكسرتج انتي وياااااه."
وقامت المسكينه وفتحت الباب بيدها اللي كانت ترجف، وبس فتحته يودها من رقبتها:" اذا كنتي تعتقدين انج بتخليني اتراجع بتصرفج هذا فأنتي غلطانه وااايد، بتاكلين وبتزوجين غصباً عنج وأنا قلت لج عنادج مايفيدج ومحد يقدر يمنعني من اللي ابي اسويه." كانت حاسة انها بتختنق من كثر الضغط اللي ضغطه على رقبتها، وبعد ماخلص كلامه رماها على السرير وصادها بظهرها،وصرخت المسكينة من الألم لكنه ماهتم لها ومشى.
كانت هديل واقفة وبس طلع من الغرفة ركضت لأختها وحضنتها، وشالتها من مكانها كانت شوق هزيييييييلة بكل معنى لهالكلمة. قلة الاكل وكثر لصياح تعبها وهد حيلها.
^^^^^^^^^^^^^^^^^^^^^^^^
شيخة كانت قاعدة تتكلم ويازوجها وتحاول تلقى حل للمصيبة الثانية اللي طاحت فوق راس ابوها اللي مايدري..!! وأخيراً اتفقت وياه على انهم يروحون بيت ابوها ويكلمة بنفسه عن بوعمر. واتصلت لأبوها وقالت له ان سالم يبي يكلمه قبل لايطلع ويروح الشركة.
والساعه أربع العصر كان أبومازن وشيخة وأبومحمد قاعدين بالصالة وعيالهم فوق..أما أم محمد فكانت طالعه من البيت رايحة بيت جيرانهم.
أبومحمد:" خير سالم وش الموضوع اللي تبيني فيه؟"
طالع سالم شيخة وكأنه يسألها انه يقول له اولا، وهزت له راسها بأنه اي قول له..
سالم:" والله ياعمي مدري من وين أبدأ الموضوع معاك ، بس لازم تعرف."
أبومحمدبإستغراب:" أعرف شنو؟ تكلم لاتخليني أسحب الكلام منك."
سالم:" عمي انا سمعت من شيخة انك شاري أراضي صح؟"
ابومحمد:" ايه ليش؟"
سالم:" اللي تعاملت معاه عمي انت تعرفه زين؟"
ابومحمد:" بصراحة انا مااتعاملت وياغير هالمرة بس يقولون عنه زين."
سالم:"هه من قال لك هالحجي؟"
ابومحمد:" والله مااذكر منو، بس وش تبي فيه تبيني تشتري شي وتبيني اكلمه؟"
سالم:"لااااا مب هذا قصدي."
أبومحمد:"عيل قووول وش عندك ياولدي تراك حيرتني."
سالم:" خلف بوعمر هو الدلال اللي دلاك على الاراضي صح؟"
بومحمد:" ايه صح، وش فيييييييه لاتسكت كمل."
سالم:" عمي بصراحة هذا انسان نصاب ومحتال، ومعروف عنه بس شلون تعاملت انت معاه مدري."
ابومحمد:" مستحيل شلووون تقول عن الريال جذي."
سالم:"عمي الكلام اللي اقول لك صج، وانا اعرفه زين بوعمر، احتال على ناس وايد وباعهم اراضي مبيوعه، وأصحابها مايدرون..!!"
ابومحمد واللي انصدم من سمع هالخبر اللي مايسر:" شنوووووووووو؟؟ والأراضي اللي شريتها أنا؟"
سالم:" انت شريت جم ارض منه؟"
ابومحمد:" ارضين والوحدة بخمسه وثلاثين ألف دينار، يعني ثنتينهم بسبعين ألف."
شيخة ماتحملت تشوف ابوها اللي مايتحمل مثل هالأخبار لأنه صحته بسرعه تتدهور..
سالم:"زين انت رحت شفت الأراضي وينها فيه وموقعها وين؟"
ابومحمد:" انا قلت له وهو راح ودور ، وكنت واثق فيه وقلت مايحتاج اروح واشوفهم."
شيخة واللي كانت ساكته طول الوقت وتسمع:" يبه شلون تشتري شي بدون ماتشوفه واتأكد منه."
ابومحمد:"هذا غبااااء مني."
شيخة وسالم:" محشووم."
سالم:" زين عمي انت عطني الوصولات اللي وقعتها وانا بشوف السالفة وان شاءالله مايكون احتال عليك."
شيخة:" ان شاءالله."
ابومحمد:"الله يستر، انت تعااال معاي الشركة وبعطيك اياهم."
سالم:" ان شاءالله، توكلنا على الله."
وطلعوا من البيت وظلت شيخة قاعدة بالصالة تفكر باللي قاعد يصير فيهم..
^^^^^^^^^^^^^^^^^^^^^^^^
بعد صلاة المغرب صلوا في بيت أبوها وظلوا قاعدين هناك، عيالها ماكانوا يبون يطلعون من بيت يدهم. وهي كان بالها مشغول بأبوها وبمشكلة شوق. نزلوا البنات وظل مازن يلعب فوق وياخاله سيف.
سمر:" شيخة يسلم عليج محمد ويقول لج يالقااااااااطعه."
شيخة:" يابعد عمري والله المشاكل لهتني عنه ونسيت اتصل له."
بدور:"ههههه نفس الكلام بسفرته اللي راحت، مشغوله ومدري شنو وماتصلتي فيه."
شيخة:" سكتي انتي."
خلود:"ههههههه فضحتها، أقووول قومي اتصلي فيه احسن لامايكلمج شهر."
شيخة:" مايقدر، بس بقوم اتصل له."
وراحت طلعت تلفونها واتصلت فيه وبعد ربع ساعة من السوالف، اتصلت لأختها وقعدت تسولف معاها، وسلمت عليها بدور والبناب بعد. أما يدتهم كانت بغرفتها فوق تقرأ قرآن وتدعي من الله ان يفرج عنهم، وعن شوق اللي حاله ماتسرلاجريب ولابعيد.
وبعد سوالف بالتلفون قعدوا يطالعون فلم.. لكن بدور كان بالها مشغول بشي ثاني غير التلفزيون. شوق اللي انقطعت أخباها وصارت ماتسمع عنها شي غير آخر خبر اللي وصلهم عن زواجها.
سمر تهز بدور:" شفييييييج وين سرحتي؟"
بدور:" ابداااا بشوق."
سمر:"ايييييه المسكينه، والله تكسر الخاطر وش انسوي مدام ابوها الظالم عايش مابتفتك من ظلمة."
بدور:" والله وحشتني وخاطري اشوفهاواوقف يمها."
سمر:" صدقيني مالنا الاالدعاء لها،اكييييد رب العالمين بساعدها."
بدور:"الله يسمع منج." وسكتت شوي وتذكرت شمس:" تصدقين سموورة خطوبة شمس جريب بعد ماتطلع النتايج."
سمر:"صج؟؟؟؟"
بدور:"اييييييييه والله نسيتها المسكينه، اكيد غايصة بتجهيزاتها."
سمر:"الله يعينها والله."
بدور:" اففففف والله مدري وش اسوي بعمري، اقول لها عن شوق؟؟ والا اسكت وبعد الخطوبة اخبرها؟"
سمر:"لااا حرام مسكينه تعكرين فرحتها خليها وبعدين خبريها."
بدور:" برااايج."
^^^^^^^^^^^^^^^^^^^^^^^^
الساعة وحدة الظهر من اليوم الثالث،، وبدأ العد التنازلي عند شوق..كانت المسكينة ذابحة عمرها ومب قادرة حتى توقف على ريلها. أبوها اتصل لأبوعمر وحدد معاه الموعد وقال له ايي الساعه اربع العصر مع الشيخ اللي بيعقد عليهم. شوق كانت فوق وخالتها أم عبدالله واقفة يم باب الغرفة وتحاول تفتح الباب:" فتحي الباب...."
ابوعبدالله كان راكب فوق وسمعها:" وش صاير بعد؟"
ام عبدالله:" مب راضيه تفتح الباب.."
هديل:" يببببببه حراااااام عليك لاتزوجها منه لاتظلمها حراااااااام."
طالعها بنظرة إحتقار لها ولكلامها وكسر باب الغرفة ودخل..!! شوق كانت قاعدة على السرير وماسكة صورة أمها بيدها، وهي تهز راسها بالرفض وتقول له:" لأ..لأ.. مستحيل."
يودها من T-Shirt اللي عليها، وقومها من مكانها لكنها فلتة منه ورجعت لورى وهي تصارخ وتصيح:" حراااااام عليك، حراااااااام عليك."
ابوعبدالله والغضب وصل حده عنده:" حلااااااااااال وغصباً عليج." وهالمرة جراها من شعرها وسحبها.. وظل يسحبها على الدرج لين ماوصلها يم باب الميلس.. ونادى زوجته وقال لها :"هاتي لها غطى تتغطى فيه."
ام عبدالله:" الحين."
عبدالله كان يركض ورى ابوووه ويشوته على ريله:" لاتسوي جذي خلها."
ابوعبدالله:" عبدالله تباااااااعد لااضربك."
هديل وتمسح دموعها من على خدها:" عبدالله حبيبي تبااااعد تعاااال يمي."
وركض لها وهو يصيح:" هديل ليش ابوي يسوي جذي؟ ليش يضربها؟ انا احبها لايضربها."
هديل زادت بالصياح يوم سمعته يقول جذي:" مدري.."
الوحيدة اللي كانت مستانسة هدى، وطبعاً أمها لأنهم خلااااص بيستريحون منها للأبد.. ويابت لها عباه علشان تلبسها اياه.. كان الشيخ اللي بيعقد للحين ماوصل.. ماكانو يبون يروحون المحكمة يعقدون لأن مايبي يوديها لاتفضحة هناك. وبعد ريع ساعه من الإنتظار دق بوعمر جرس الباب ومعاه الشهود والشيخ. ودخلهم بوعبدالله الميلس.
ابوعمر:" وينها؟"
ابوعبدالله:" بره الحين بنخلص من كل شي."
وطلع بوعبدالله اييب شوق، لكن صرخة من أم عبدالله خلت الجماعه اللي هناك ايودون قلبهم من الخوف..!!
ياترى وش صار، وخلى أم عبدالله تصارخ بهذي الطريقة؟؟ شوق صادها شي؟؟ وأبومحمد اللي انصدم بأبوعمر، ياترى فعلاً غشاه بالأراضي؟؟ وسحر والمسجات اللي ياتها من محمد اللي للحين ينطر ردها عليهم؟؟ وعلاقتها مع فهد؟؟
الصفحة الأخيرة
الوحيد اللي كان متملل وماعنده شي ،، الكل كان مشغول بإمتحاناته ودراسته،، أخوه سيف وخواته عندهم إمتحانات طبعاً سيف هذا آخر كورس له ويخلص ويشتغل مع ابوه بدوام رسمي.أخته شيخة ماكانت تزورهم لأنها مشغولة وياولدها وبنتها بالإمتحانات وكانت تجري اتصالات لمحمد تسأل عن صحته.
كان قاعد على الكرسي المتحرك ويدور بالصالة اللي فوق، ويتصفح من مجلة لجريدة لحد ماوصل الملل لخشمة:" اففففففففففف وش هالملل هذا، خلني اتصل على حمد اشوفه وينه."
محمد:" الووو وينك انت؟"
حمد:" بل الناس تسلم بالأول، وثانياً بالشغل وين بكون يعني."
محمد:" تعاااال البيت لأن طاقة جبدي وابي اطلع."
حمد وغص بالعلج اللي كان بحلجة:" وووووين تطلع؟ صاحي انت وويهك هذا؟؟"
محمد:" ولييييييييه وش فيك انت؟؟ بتيي البيت اطلعني والا اروح ادور غيرك؟؟"
حمد:"لا ادور غيري ولاشي يايك بعد عشردقايق اوكي؟"
محمد:" اوكي، انطرك."
وبعد ماسكر السماعه، راح عند اللفت ونزل تحت واول ماانفتح الباب كانت أمه بويهه.
محمد:" هلا يمة."
أم محمد:" هلا حبيبي ، شيفك؟"
محمد:" لا بس مليت من القعده فوق بروحي قلت انزل وبطلع وياحمد."
بطلت عينها عليه:" شنووووووو تطلع؟؟"
محمد:" شفيكم انتي وحمد شنو تطلع، شنو تطلع؟؟ عااادي يمه مافيني شي."
أم محمد:" لايمة ماتطلع من البيت وانت جذي، أخاااف عليك."
محمد:" يمه انا ياهل تخافين علي، وين بروح بعدين غير اني بدور وياه بالسيارة."
أم محمد:" زييين وشلون بتركب فيها."
محمد:" يمه السايق هني وحمد بساعدوني."
أم محمد وهي مب مطمنه لطلعته:" بس الدكتور قال لازم ماتتحرك وايد، و.."
قاطعها:" يايمه ياحبيبتي مابصير فيني شي صدقيني ."
أمه:" ان شاءالله."
وراحت عنه وهو راح الصالة اللي مجابل الباب الرئيسي وقعد ينطر حمد.. وبس خمس دقايق والاحمد داق الجرس.. وراحت الخدامة تفتح الباب له..
أول مادخل تحجج بالخدامة:" هلا سحيلة شخبارج؟؟ والله وحشتيني من زمان شفتج."
الخدامة صار ويهها احمر وضحكت:" يوووه بابا انت ليش يقول جذي."
محمد:" هههههههههههههههه وانت ماتيوز عن سوالفك حتى وياالخدامة."
حمد:"خخخ وش اسوي احب اجاكرهم."
محمد:" وش رايك نخطبها لك؟"
حمد يطالعه بدهشه:" شنو؟ ممممممممن؟؟ خلها حقك هذي، والله زينة تمسي بويهها وتصبح بكشتها خخخ."
محمد:" هاههاااا لا حاشا لله اني تركتها اليك ياابن مرجانه."
حمد:" اقووول امش احسن لك، مو يكفي انك بتضيع علي نص الدوام."
محمد:"الله واكبببببببر اللي يشوفك مقطع نفسك بالدوام، يالله لااتأخرنا."
حمد:" يالله توكلنا على الله."
وطلع وياه بالسيارة وكانت أول طلعه لمحمد بعد الحادث.
^^^^^^^^^^^^^^^^^^^^^^^^
بعد مارجعت من المدرسة فصخت عباتها وشيلتها وعلى طووول رمت بروحها على وحده من الكنبات اللي بالصالة..
شيخة:" متى يتي؟؟"
بدور:" هلا يمة، توني من دقيقتين."
شيخة وهي قاعده على طرف الكنبه:" بشررري وش سويتي؟؟"
بدور:" والله مدري وش اقووول بصرااحة كان جدا جدا جدا جدا سهل."
شيخة:"هههههههه الحين كل هالمقدمة وطلع سهل."
بدور:" اييييييييييييي ،، يمة باجي ثلاثة أيام وأخلص بس أحس بتطلع روحي بآخر يوم."
شيخة:" ليش آخر يوم بالذات؟"
بدور:" لأن امتحانين مب امتحان واحد."
شيخة:" وليش ماخلوه لكم بيومين؟؟"
بدور:" واناااا ادري فيهم، بس يالله آخر سنة وافتك."
شيخة وهي قايمة:" الله يسمع منج ويوفقج، مدري فأخوج للحين مايه من المدرسة."
وتوها تقول جذي والاهو نازل من فوق..
بدور:" بسم الله ،يمة هذا من وين طلع؟"
شيخة مستغربه:" انت متى رديت؟"
مازن:" من ساعه."
شيخة:" ولييش ماخبرتني انك وصلت؟"
مازن:" نسيييييييت."
بدور:" وش سويت بالامتحان؟؟"
مازن:" موشغلج."
شيخة:" مازن حبيبي عيييب شفيك؟ اختك ماسألتك شي غلط يالله جاوبها."
مازن:" زييييييين لاتحاتون."
شيخة:" الله يستر منك انت."
مازن وهو طالع بره بيلعب كره:"وووش عاااد لين رسبت؟؟"
شيخة:" فال الله ولافالك، انت مدري طالع على من هذا؟"
بدور:" اهم شي مب طالع علي، يالله انا بروح لغرفتي تامريني شي قبل لااركب؟"
شيخة:" لاحبيبتي سلامتج."
وقبل لاتركب فوق وقفتها امها وسألتها:" بدور وش أخبار شوق؟"
بدور:" بخيرالحمدلله."
شيخة:" وأبوها؟؟"
بدور:" مافيه شي عادي، يمه لايفوتج هالأيام متغير عليها تقول حتى مالمسها صار له اسبوع."
شيخة بإستغراب:" لييييييييش؟"
بدور:" وانا ادري ليش، اذا شوق ماتدري."
شيخة هزت راسها وراحت للمطبخ.. وبدور راحت تغير هدومها وتريح شوي علشان تكمل مذاكرة..
^^^^^^^^^^^^^^^^^^^^^^^^
كان اليوم بالنسبة لها عادي مثل الأيام اللي راحت ويمكن أسوأ. بعد ماطلعت من قاعة الإمتحان وقفت يم الطوف تنطر ميثة تطلع. وهي واقفة شافت سمر تمشي ويارفيجاتها بغت تناديها بس تراجعت وظلت مكانها. وبعد عشردقايق وهي واقفة طلعت ميثة من الامتحان وهي تسب وتلعن فيهم:" مدري من وين ايبون هالأسئلة، طلعوا روحنا."
سحر:" قولي مومراجعه."
ميثة:" لاوالله بس دكاترتنا يحبون التعقيد، يالله ماعليه اهم شي انجح فيه."
سحر:" يعني مايهمج المجموع؟"
ميثة:" ابدااااااااً."
سحر:" مااالت عليج اجل وش حقه تدرسين؟"
ميثة:" بس جذي اقضي وقتي ، واشووف الدنياااا."
سحر:" اللي يشوفج محروومة وماتطلعين."
وتوهم بيمشون الا شذى بويهم:" مرحباااا."
سحر:" هلا."
ميثة:" هلا شذى وينج اليوم مابينتي؟"
شذى:" وين غير بقاعة الامتحان.. إلا بسألج وش صار وياعزيز؟"
ميثة:"اتصلت ياخبلة وطلعت اخته."
شذى:" اخاااف يلعب عليج."
سحر:" تقوول انها تعرف اخته وشافتها."
ميثة:" مرة ثااااينة تأكدي قبل لاتقولين شي."
شذى:" وانا وش دراني انها اخته."
سحر:" يعني لازم كل اثنين مع بعض بتشوفينهم يحبون بعض يمكن اخو واخته والايصيرون لبعض."
شذى:" افففف الحين بتسونها سالفة غلطنا ومنكم السماح."
ميثة:" زيييين خلاااص انتهينا." وطالعت سحر وتذكرت سالفتهم:" اقوول سحر وش قلتي تبين اللي قلت عنه؟"
سحر واللي ماتبي احد يعرف انها بتكلم حدغير محمد:" بعدين مب الحين."
ميثة:" اوووووووكي."
وطلعوا ثلاثتهم بسيارة شذى وراحوا ياكلون بأحد المطاعم.. وطبعاً لازم سحر قبل لاتنزل الشيطان يوسوس لها حتى تضبط نفسها وتكمل الميك آب اللي بويهها حتى تطلع سندريلا الشرق.. والشباب ينهبلووون فيها..!!!! ونزلوا من السيارة ودخلوا المطعم.. سحر كانت اكثر وحده تلفت النظر بجمالها وأسلوبها في الكلام. أما ميثة فكان صبغ البيت كله بويهها كالعاده لدرجة أن شكلها مايطالع بدون الميك آب!! وشذى ماكانت أكثر من ميثة بالميك آب..!!
^^^^^^^^^^^^^^^^^^^^^^^^
دخلت البيت وهي ذابحة روحها من لصياح..
أم عبدالله:" شفيج تصيحين؟"
هدى:" المعلمة الـ ..... ،بعد اسحبت مني الورقة وانا ماخلصت، يمممممه."
وراحت لها وحضنتها:" بس حبيبتي ان شاءالله بتنجحين وباجر بروح للمدرسة وبدخل على المشرفة وبجوف وش سالفة هالمدرسة اللي كل مرة وسحبتها منج."
هدى وبدموع الأسى:" وش بنستفيد."
أم عبدالله:" بكلمهم حتى لو افصلوها تحسب هذي نفسها منوو."
هدى وفرحت لما سمعتها:" اي احسن أنا مااحبها وياليت ينقلونها او يفصلونها حتى."
أم عبدالله:" بس انتي لاتكدرين خاطرج ولاتزعلين عمرج بسبتها."
هدى:" ولايهمج يمه."
ودخلت هدى غرفتها وهي تفكر:" هذي مايصلح لها الاجذي عيل تسحب من لورقة."
هدى عمرها ماراجعت موادها زين، بس كانت تنجح بالغش. ويوم يات هالمعلمة هذي وقفتها عند حدها.والظاهر ان رسووووب هدى السنة على يدها.
وبغرفة هديل كانت هي وشوق قاعدين يسولفون عن الامتحان اللي قدموه اليوم وبكل جداره..
شوق:" ذبحت عمري وآخرتها الامتحان أسهل منه مافيه."
هديل:" واايد زين، انا امتحاني كان يبي له شوية تفكير بس الحمدلله قدر أخلص بعد الوقت بخمس دقايق، ولو المعلمة اللي تراقبنا مب طيبه كانت سحبت مني لورقة."
شوق:" ايييه الحمدلله، بس تصدقين حاسة خايفة من المواد الياية احسهم بيذبحونا."
هديل وهي تمشط شعرها:" لاااا انتي قدها وقدود ادري فيج.."
شوق:"لاااا من قال جذي."
هديل:" انا اقووول انتي بصراحة شاطرة، لاتخافين عيني عليج بارده مابنحسدج."
تضحك عليها:" ومابخاف الامنج انتي."
وتوهم يضحكون والاهدى فاتحه الباب بدون ما ادقه..
هديل:" وانتي ماتعرفين ادقين الباب قبل."
هدى:" كيفي، وين T-shirt الوردي مالي؟"
هديل:" والله عندج روحي دوريه عدل."
شوق:" يمكن بالغسيل تحت."
هدى طالعتها بإحتقار وسكرت الباب بدون ماترد عليها..
هديل واللي ماتشتهي تشوف ويه اختها:" ماعليج منها يبي لها تأديب هذي."
شوق:" عااادي لاتحاتين تعودت عليها." وسكتت شوي وتذكرت فجأة أبوها وسرحت بتفكيرها بعييييييد عن هديل..
هديل:" شووووووق شفييييج؟؟"
شوق:" هديل مالاحظتي هالاسبوع ابوي متغير؟"
هديل تذكرت على طول الكلام اللي سمعته بين ابوها وامها وتغيرت ملامحها وسرحت اهي بدل شوق ( ياربي وش اسوي؟ لو تدري هالمسكينة على شنو متغير عليها.)
شوق:" هديل مارديتي علي؟"
هديل واللي بسرعه توترت:" اي اي لاحظته."
شوق بإستفسار:" في شي؟"
هديل:"هاااا لاااا ابداً، ماتبين تراجعين؟"
شوق وهي قايمة:" قووولي طرده."
هديل:" افااااااااا انا اطردج ، انتي قعدي وانا اطلع."
شوق:" لالالالا بس كشفتج ماتبيني اقعد بغرفتج اعترفي احسن لج."
هديل وبمزاح:" اجووووووج لاتروحين،، لاتظلمييييني بظنج بلييييييز."
وهي تضحك عليها:" شوي وتصيرين جوليو ورومييت."
هديل:" هههههههه وانتي الصاجة قيس وليلى."
شوق:" يالله بروح لغرفتي بدرس لي جم كلمة قبل لااتيي العصر وانا بعدي."
هديل:" اقووول لج ماينخاف عليج."
شوق:" عن الحسد خخخ."
هديل:" روحي قبل لاتنقلبين ضفدع هني خخخخخخ."
شوق:"عيل بشرد بااااي."
وسكرت الباب وراها وخلت هديل بأفكارها والكلام اللي سمعته:" افففف وانا وش اسوي، اخاف اقول لها وتصير سالفة، مابي اشغلها اوووه بروحي انا اللي انشغلت مدري احترت، اقووول لشيخة؟ بس شيخة مالها دخل ومابتسوي شي..!!."
وظلت تفكر لحد ما انتبهت ان الساعه صارت ثلاث العصر واهي للحين ماكملت كتابها..!!
^^^^^^^^^^^^^^^^^^^^^^^^
قاعده وتحاتي بنتها اللي للحين ماردت من الجامعه.. ومن شافت فيصل داخل البيت:" هلا وليدي اهي سحر يتكم اليوم؟"
فيصل:" لا مايتنا، ليش خير ان شاءالله؟"
أمه:" والله مدري تأخرت وايد اليوم مب من عوايدها حتى السايق يقول انها اتصلت فيه وقالت له لااتيني."
فيصل على طول طلع تلفونة واتصل فيها، وبعد أقل من دقيقة ردت عليه:" هلاااا وغلاااا."
فيصل بعصبيه شوي:" اي هلا، وينج فيه للحين؟"
سحر:" بره ويارفيجاتي ليش؟"
فيصل:" ياسلااام وامي اتحاتيج اهني وذابحة عمرها، يالله ردي البيت."
اتنرفزت منه ومن اسلوبه:" بعد الصلاه برد البيت."
فيصل وهالمرة رفع صوته اكثر:" الحيييييييييين مع السلامة."
أمه ماتحب احد يصارخ على بنتها خصوصاً سحر>> على شنو مدري..!! :" ليييييش عصب عليها، مدامها بخير خلاااص خلها على راحتها."
طالعها بإستغراب:" يمة مب توج تحاتينها وميته خوف والحين ليش صارخت وجان خليتها على راحتها."
أم فيصل:" بس مهما كان هذي اختك وانت تعرفها حساسه وايد."
فيصل:" يمه يمه هذي بنت ومالازم تطلع على كيفها، ولانرخي الحبل لها."
أم فيصل:" مااااااعليه بس اذا يت البيت لاتصارخ عليها بعد يكفي بالتلفون."
فيصل وهو رايح يشوف العنود فوق، وعلى الرغم انه مب مقتنع من تعامل أمه لسحر:" حااااضر من عيووووني، وعلى العموم انا بطلع مابشوفها."
أم فيصل:" الله يهديك ويحرسك."
وأول ماوصل عند غرفة العنود طق الباب وانخش ورى لجدار، وسمعها تقول:" الباااااب مفتوووح. لكن مادخل وطقه مرة ثانيه ونفس الشي سمع صوتها، وثالث مرة طلعت بره تشوف من وهي تتأفف:" افففففففف منوووو؟؟؟؟" طالعت لكن ماشافت أحد وتوها بتدخل والافيصل واقف على الباب:"بووووووو."
صرخت من الخوف بس فيصل حط يده على حلجها:" بببببببببس فضحتينا."
العنود:"كل منك."
فيصل:" افاااااا يعني اروح؟"
العنود:" وانت تقدر؟"
يضحك عليها:" ههههه هذي صادقة فيها، الا شخبار عنودي ويا الامتحانات؟"
العنود:" ممتازة."
فيصل:" يعني بنسولف على الباب؟ قولي تفضل ياخوي حياك أقعد والاكلش مايصير ندخل."
العنود:" ابدااااااا حياااااااااك."
فيصل:" اشكر جهودج."
وقعد على كرسي يم الدريشة اللي اطل على حديقة البيت:" الله على هالمنظر والله انه يشرح الصدر."
العنود:" شي أكيييييد ، اولاً الورد اللي بالحديقة اختياي وباقي الشتلات، وثانياً إختياري لموقع غرفتي وديكورال...."
فيصل:" هييييي انتي وييين ترى من مدح نفسه يبي له....." وسكت ماكمل..
العنود:" شفيك سكت؟"
فيصل:" اخاف انا اللي احصل الرفسة وانطرد."
تضحك عليه:"ههههههههههههه لااااا مهما كان انت اخوي العود ولازم احترمك شسوي بعمري."
فيصل:"هههههههههههههه حلووة شتسوين بعمرج هذي."
العنود:"زيييين عطيناك ويه وايد بتطلع والاشلون ابي اكمل لكتااااااااااااب."
فيصل:" بل بنطلع مايحتاج تقولين، يالله عنودي انتبهي لدراستج زين علشان تحصلين هدية."
العنود:" مشكوووووووور وماتقصر، وسلم على نجود لاتنسى لأني آدرى بتطلع من اهني وبتنسى."
فيصل:" ولايهمج اتصل الحين واسلم عليها، يالله باااي."
العنود:" باي."
كانت علاقة العنود وفيصل اقوى ببعض عكس سحر، رغم فارق السن اللي بينهم، الاانه يحبها وايد ويحب يمزح معاها، ولأنها غييير عن اختها..!
^^^^^^^^^^^^^^^^^^^^^^^^
ثلاثتهم كانوا بالمكتب يسولفون عن بعض المناقصات اللي رست عليهم وعلى بعض المشاريع اللي يبون ينفذونها خلال ثلاثة أشهر يايه. ومن ضمن سوالفهم طبعاً سفر محمد للعلاج..
أبوحمد:" وش قررت الحين؟"
أبوفيصل:" والله شوفوا اللي بتسونه أنا موافق عليه."
أبومحمد:" انا ماقلت لك انه مستحيل يعارض."
أبوفيصل:" واعارض ليش؟! مدام المشروع مضمون أميه بالأمية."
ابوحمد:" مافي شي مضمون أمية بالأمية، بس قووول ان شاءالله ينجح."
أبوفيصل:" ان شاءالله، الابسألك ياالنسيب محمد متى بسافر؟"
أبومحمد:" يقول الأربعاء والاالخميس."
أبوحمد:" وهو من بروح وياه؟"
أبوفيصل:" انا سمعت فيصل يقول انه هو وزوجته وحمد بيروحون."
أبوحمد:" وليش نجود بعد؟"
أبوفيصل:" وانا أدري فيهم."
ابومحمد وهويقلب في الأوراق:" خلهم على كيفهم، يمكن تبي ترفه عن نفسها."
أبوحمد:" ايييييه والله اشتقنا للسفر، هالأشغال تشغل الواحد عن نفسه."
أبوفيصل:" قوول كبرنا مب انشغلنا."
أبوحمد:" قول عن نفسك كبرت انا بعدي شباب وبقوتي."
أبومحمد يضحك عليه:" هااااا يعني نزوجك؟"
ابوفيصل:" ووووول عليكم وتفكرون بالزواج ماتخجلون."
أبوحمد:" وش فيها الشرع حلل أربع بشرط العدل بينهم، وانا بعدل."
أبومحمد يمزح:" يعني خلااااص نقول مبروك."
أبو فيصل:" ههههه والله جان أم لعيال تزنطك من حلجك."
أبوحمد:"ههههه واي تقدر."
أبومحمد:" وش قلت يابوفيصل اندور لك انت ونشوف."
أبوفيصل:" لااااا واللي يرحم والديك ماني ناقص وحده وتكفيني."
أبومحمد:"هههههههههههههه تخااااف."
أبوفيصل:"انا ماخاف الا من رب العالمين ، ماخاف من حرمة."
أبوحمد:" ونعم الريايل."
وانتبه ابومحمد للوقت:" اشوووف انقلبت سوالف يالله خلونا نشتغل ياجماعه ترى المغرب جرب."
ابوحمد:" ياالله انا رايح لمكتبي عن اذنكم."
أبوفيصل:" خذني معاك لايشتغل علي هذا ويزوجني."
أبومحمد:"هههه وانت ينقدر عليك."
أبوفيصل:"لاتحسد."
أبوحمد ساحبه من يده:" امش يالله وخلوها للبيت."
^^^^^^^^^^^^^^^^^^^^^^^^
بعد مارجع محمد من بره قعد وياحمد بالصالة يسولفون عن الربع والأشغال وسواليف الشباب اللي ماتخلص>> ترى مب النسوان بس اللي ماتخلص سوالفهم..
نزلت سمر من فوق وهي ماتدري ان حمد تحت وتوها داخله الصالة والاحمد بويهها، طبعاً حمد ابوعيون قوية طالعها وضحك على شكلها المنزهق..!! سمرعلى طول رجعت لورى واحت تركض غرفتها..
محمد:" وانت يافااالح ليش ماتنزل عيونك."
حمد:"وانا اشدراني اختك بتيي اهني."
محمد:" ياسلاااااااام ازنطك مرة ثانية."
حمد:" بل تزنطني مرة وحده حشى مطالع الليدي ديانا انا."
حمد ماكان يدري ان سمر نزلت ولبست شيلتها وكانت مارة يم الصالة هناك وانبطت جبدها لما سمعته:" شوف هذا يحسب نفسه منوو يعني، صج ثقيل دم لكن هين ياحمد."
محمد:" والله ديانا غصباً عليك واحسن منها بعد."
حمد:" زيييييييين عااااد اللي يقول خطيبتك مب اختك."
محمد:" لوو خطيبتي اشوتك بره البيت وبعدين اذبحك."
حمد:" اشوفك لاعب بحسبتي، ترى ازعل واروح بيتنا."
محمد بأسلوب جدي شوي:" روح احد ماسكك."
طالعه وهو فاج عيونه:" لاوالله أشكره طرده."
محمد وهو يدور بقنوات التلفزيون:" افهمها مثل ماتبي."
حمد وهو قايم:" اقوووم بكرامتي احسن لااشوف روحي بالشارع."
يضحك عليه:" تعاااااااااال يااخي وين رايح؟"
حمد:"وييين غير بيتنا."
محمد:" اقعد امزح معاك، شكلك ماتشد المزح انت."
حمد:"لا اشده بس بروح خلاااص ابي اريح شوي."
محمد:" كيفك مابي اجبرك، بس هااا لاتقطع تعااال باجر."
حمد:" يصير خير، يالله سلم على مرة عمي وسموورة."
محمد وفالعه بمخده صغيرة على ويهه:" اذلف لابارك الله في ابليس."
حمد وهو راميها له مرة ثانيه:"هههههههههه اشوه مب انا."
محمد:" مرة ثانيه انت خخخ."
حمد:" ماعليه بنشوف، مع السلامة."
محمد:" الله يسلمك."
طلع حمد ويات سمربعد فصخت شيلتها:" طلع المحروس."
يضحك على كلمتها:" اييييه طلع، وانتي بعد يالخبلة ماسمعتي صوته هني."
سمر:" ابداً ماسمعته."
محمد ويمزح وياها:" زين بس مرة ثانيه انتبهي لاانتف شعرج انتي."
سمر:"هذا اذا شاف الليدي مرة ثانيه."
محمد:"ههههههههههههههه انتي سمعتيه؟"
سمر:" اييييييييه سمعته وانبطت جبدي منه."
محمد:" يمممممممزح أكيييد."
سمر:" لاوالله ، كان خاطري ازنطه من حلجه."
محمد:" وووول عليج مفتسره."
سمر:" مب اكثر منك."
محمد:" وش دراج؟"
سمر": أخوووووي واعرفك زين."
محمد:"زين خلينا مني وش عندج نازلة؟ ماعندج إمتحان باجر؟"
سمر:" خلصت مذاكرة، وباجرلا اللي بعده عندي،وقلت انزل اقعد وياك شوي."
محمد:"اهاااا، وينها الملقوفة اختج مالها حس بالبيت."
سمر:" فووووق مشغولة بالمذاكرة المسكينة دايخة."
محمد:" يالله ماعليه هذا لها مب لنا."
وسكتوا شوي كانت سمر قاعده اطالعه وتتذكرة شلون كان رايح ياي بالبيت والحين مقعد، وهي تفكر تذكرت السفر وسألته:" محمد متى بتسافر؟"
محمد:" يمكن الأربعاءأوالخميس، بس أنا أفضل اني اسافر الأربعاء."
سمر:"لييييييييش بهالسرعه؟"
محمد:"يعني عاجبج شكلي وانا على هالكرسي؟"
سمر:"أكيييد لاااا، بس من بروح معاك؟ أخواني واحد امتحانات عنده والثاني بالشغل."
محمد:" وانا ماعندي الااخوانج، حمد مابيقصر وفيصل."
سمر:"مابتاخذ الاحمد، فيصل وبس."
محمد:" ولايفوتج ونجود بعد."
فجت حلجها عليه:" والله؟؟ ولييييييش بعد؟"
محمد:"شفيج فجيتي حلجج جذي، اي بتروح انا قلت لفيصل وقال بياخذها."
سمر:" حسااااااافة لوبس تسافرون بعد الامتحانات ايي وياكم."
محمد:"لاوالله قعدي مكانج."
سمر:" وش معنى نجود تروح وانالا؟!"
محمد:"هذيج غير بتيي ويازوجها وانتي بتيين ويامن؟"
وهي تتمسكن عليه وتدلع:" بروح وياأخوي حبييييبي."
وهو يطالع التلفزيون:" عن الدلع اناعارف هالحركات، مافيه تأجيل."
ونطت خلود عليهم:" وش تخططون وتأجيل شنو؟"
محمد:"بسم الله، متى طلعتي انتي؟"
خلود:"لوسمحت لاتغير الموضوع، وش اللي ماتبي تأجله؟"
سمر:"بسافر محمد يوم الأربعاء، ونجود بتروح معاه."
على طووول نطت وقعده يمه:"ابي اروح."
محمد:"مافيييييييييييييه سفر الابالإجازة الحيييين لاااا امتحانات."
خلود:"افاااااا واهوووون عليك تخليني اهني ، اناخلووودتك اختك آخر العنقود."
وهو يضحك:" موانتي يايه آخر العنقود وابتلشنا."
سمر:"ههههههههههههههههههههه."
خلود:"اووووه شفيج اضحكين ، وانت ليش تقول لي جذي ابتلشت مويكفي انك حبيب قلب الماما."
محمد:"ووووول وتحسد بعد."
خلود:"انا والله مب حسوده، وكلٍ يرى الناس بعين طبعه خخخخ."
ومسكها من أذنها بلين:" وش قلتي؟؟ اقص لسانج."
خلود وهي تضحك:" والله امزح."
هداها:" اقووولج انتي مدري امي ليش يابتج كنا أوكي ثلاث أولاد ثلاث بنات خربتي الفريق."
سمر:"اي صح كلامك."
خلود وهي تقلدها:"اي صح كلامك، والله انتوا محترين ليش اني آخر وحده ودلوعة البيت."
محمد:"ههههههههه والله بذبحج انتي على هاللسان اللي عليج."
خلود قايمة:"ماتقدر أدري تموووت فيني."
سمر:"هههههههههههههههه الله ياخذ ابليسها بتينن الأولي والتالي."
محمد:" محليه جو البيت."
سمر:"والله البيت موحلوووالا بوجودك انت ويانا."
يطالعها ويبتسم:"الله يخليج."
محمد تذكر سحر اللي صار له جم يوم ماسمع صوتها لأنها مشغولة بالإمتحانات.وحب يسأل سمر بس كان متردد شوي.
محمد:" سمر بغيت اسألج، انتي تشوفين سحر بالجامعه؟"
سمر:" ساعات مب دايماً."
محمد:"اهي بخير والاماتدرين عنها؟"
سمر:" والله آخر مرة شفتها كانت يوم اللي رديت من المستشفى وبعدين انشغلنا بالامتحانات، ولاادري فيها."
محمد سكت وظل يفكر فيها، وفي آخر مكالمة دارت بينهم. كان وده يتصل بس مايبي يشغلها ويشغل بالها بالتفكير، يحبها ويخاف عليها.أفكاره كانت مشوشه وكل ماكان يحاول يمسك فكرة وحده ويفكر فيها تدخل عليه أفكار وأفكار. كان شكله متضايق وااااايد، وسمر اللي لاحظت تغير ملامح ويهه ماحبت انها تسأله وتفتح معاه موضوع يمكن مايحب يتكلم فيه معاها، طالعته ووقفت يمه:"محمد فيك شي؟"
وبإبتسامه هادئة:"سلااامتج."
سمر:" زين انا بروح فوق اذا تبي شي قوول."
محمد:" على أمرج."
وراحت عنه وخلته وافكاره اللي مب راضية تنتهي.
^^^^^^^^^^^^^^^^^^^^^^^^
دخل بسرعه الصالة وقال لزوجته:" جهزي العشا الليلة بييني ضيف انا بطلع الحين وبرد بعد شوي وياه."
ام عبدالله مستغربة منه:" ضيف؟ منو هذا؟"
ابوعبدالله وهو طالع:" اقووولج بعدين."
وهي قاعده مكانها وتفكر في الضيف اللي يبيها تسوي له عشا، وشكل هالضيف وايد مهم وفجأة تذكرت بوعمر اللي تكلم عنه وصارت اتكلم روحها:"اكييييييييد هذا ابوعمر، وش سالفته يايبه البيت وعازمة بعد؟؟ اقوووم اسوي العشا لاأتأخر ويسوي لي مشكله."
وهي قاعده تطبخ بالمطبخ دخلت هدى عليها:" يمه وش تسوين؟"
أم عبدالله:" اطبخ وش تشوفيني اسوي."
هدى:" يمه توها الناس على العشا ليش من الحين تسوينه؟"
أم عبدالله:" بيي ضيف لأبوج."
هدى بإستغراب:" منو هذا الضيف؟؟"
أم عبدالله وتسوي نفسها ماتدري:"مدري."
هدى كانت تعرف امها زين، مايصير ابوها يسوي شي واهي ماتدري عنه بس هي قالت ياخبر اليوم بفلوس بكره ببلاش.طلعت من المطبخ وراحت الصالة اطالع التلفزيون. وتوها بتغير القناه والاعبدالله ماخذ الريموت منها.
عبدالله:" لاتغيرين القناه ابي اطالع."
هدى:" عبود انت من العصر للحين اطالع عطني الريموت."
عبدالله:" لاااااا."
وكانت بتاخذه منه دزاها بيده، انقهرت وبتضربه والمسكين كان حاط يدينه على راسه من الخوف انها تضربه، والاهديل نازلة من فوق:" وكسر هاليد بتضربين الياهل."
هدى:" ماشفتينه يضرب، وثانيا مايهمج."
هديل:" شنو مايهمني، وهذا ياهل مايتعاملون وياه بالضرب."
هدى:"هديل ارجوووج لاتعورين راسي بمحاضراتج."
هديل:" وياليت يفيد معاج ."
هدى بعصبيه:" هديلوو يوزي عني أحسن لج."
هديل وبكل برود:" وانا شسويت؟؟" وخلتها وراحت عنها المطبخ:" يمه تبيني اساعدج؟"
ام عبدالله:" لاااا بس ابيج تروحين الميلس وتشوفينه اذا معفس عدليه."
هديل:" في أحد بيينا؟"
أم عبدالله:" ضيف بيي لأبوج ويالله بسرعه لااتأخرين."
هديل:" ان شاءالله."
هديل طلعت وهي تفكر في الضيف اللي ياي بيتهم ومايه على بالها ابوعمر. ودخلت الميلس الاانه كان مرتب ومايحتاج اي شي وطلعت. وتوها صاكه الباب الاتسمع صوت ابوها فاتح باب الميلس اللي من بره وهو يقول:" هلا وغلا بأبوعمر حياك الله."
جمدت هديل مكانها وهي تسمعه:" مستحيل ابوي يسوي اللي في باله، حرااام عليه. شلون اقول لها اخاف يصير فيها شي." ظلت واقفه يم الباب، ودها تسمعه لكنها ماتعلمت التجسس على الغير، بس هديل ظلت محتاره بمكانها:" ذاك اليوم سمعته من غير مااقصد، والحين؟؟لالالااااا ماقدر اوقف اخاف يشوفني ويسوي لي مشكله." ودخلت الصالة وهي محتاااره اشلون اتحل المشكله هذي بالرغم انها تدري ان مابيدها شي.
وفي الميلس كان ابوعبدالله يسولف ويابوعمر.. والفرحة موواسعته انه بينتقم من ابومحمد..!!
أبوعمر:" صدقني اللي تبيه راح يصير بس انت خل ثقتك فيني وراح تمشي الامور مثل مانبي."
ابوعبدالله:" وانا خال ثقتي كلها فيك، وانا اعرفك ماراح تقصر أبداً."
ابوعمر:" مايصير فالك الاطيب بس هاااااا لاتنسى الوعد."
ابوعبدالله:" اشلون انسى؟ بس لازم نبدأ خطتنا وبعد الامتحانات يصير خير."
ابوعمر:"وهي متى بتخلص؟"
ابوعبدالله:" اشوفك مستعجل اصبر شوي، جريب اتخلص وأعطيهم خبر علشان يجهزونها."
ابوعمر:" وتتوقع توافق؟"
ابوعبدالله بإستنكار:" من اللي يوافق؟ انا كلمتي هي اللي بتمشي رضت والامارضت، انا ابوها وكيفي اسوي اللي يعجبني."
ابوعمر:"هذااا العشم فيك ههههههه."
وهو يضحك وياه:" ماناقص الايهال يمشونا على كيفنا."
أبوعمر:" زين ماقلت لي وشلون تبيني ادخل الشركة؟ يعني على اي اساس؟؟"
أبوعبدالله:" مثل ماقلت لك أنت تدخل على اساس عندك مكتب دلاله (دَلاّل) وبشطارتك تحاول تحتال على بومحمد، وتبيعه شاليه والاأراضي مبيوعه والاعليها سوالف يعني انت وشطارتك، ماعلمك شغلك انا."
أبوعمر:"ايييييه فاهم فاهم، زين وبعدين؟"
ابوعبدالله:" ابداً سلامتك، وخل الباقي علي."
ابوعمر:"خير ان شاءالله."
ابوعبدالله:" يالله يالنسيب اقوم اييب لك العشا."
ابوعمر:"ليش مكلف على عمرك؟"
ابوعبدالله:" مافيها كلافة، موبنصير نسايب."
ابوعمر:" على قولتك."
وطلع ابوعبدالله من الميلس وخلى ابوعمر وبآماله الكبيرة من زواجة بشوق اللي ماتدري بأي شي عن تخطيطات أبوها.
^^^^^^^^^^^^^^^^^^^^^^^^
الساعه ثمان والكل تجمع عند طاولة الأكل، كلهم جواعه من العصر ماكلوا شي ترقباً للعشا اللي مسويته أمهم..أبومحمد كان قاعد بصدر الطاولة كالعادة رب الأسرة ويمه أم محمد وعلى يده اليسار محمد.. أما سيف مجابل أحمد وسمر مجابلة خلود.. وبقية الطاولة فاضية..
أبومحمد:" قولوا بسم الله."
وكلهم وبصوت واحد:" بسم الله." ومدوا اياديهم علشان ياكلون. ابومحمد من عوايده مايتكلم على الطاولة وايد، ومن جذي عياله يسدون حلجهم. لكن ابوهم هالمرة خالف القاعده وقعد يسولف..
خلود وبصوت واطي:" اتشوفين اللي أنا اشوفه؟"
سمر وبنفس الصوت:" اييييه غريبه عمره ماسواها."
أحمد انتبه لهم:" وش فيكم اتبسبسون؟ فيكم شي؟"
سمر بإبتسامة ارتباك:"لاأبداً ولاشي."
أبومحمد:" زين ياولدي انت قرر متى اتسافر وانا بحجز لكم."
محمد:" ماله داعي حمد بيحجز، الله يطول لنا بعمرك."
أم محمد:" يعني خلاص بتسافر هذا الاسبوع؟"
محمد:" اي بعد بكرة انا مسافر ان شاء."
نزلت راسها ومسحت الدمعه اللي طاحت من عينها.
محمد:" ولييييه يمه شفيج تصيحين؟ مب رايح مكان رايح اتعالج."
أحمد:" انت يعني ماتعرف أمي."
محمد:" قووول وش اللي ماعرفه!!"
الكل كان يسولف الاسيف كان مجرد مستمع ومشغول بالأكل.. طالعه أبوه:" سيف، سييييف."
انتبه له سيف وكان مثل الأهبل بيده اليمين فخد دياي مشوي، وباليسار قطعة خبز محمص:" هلا بيه آمر؟ في شي؟"
أبومحمد:" لاأبد سلامتك، وش فيك كأنك ماشايف الأكل شهر."
أحمد:" يبه سيف على طول جذي ياكل ويخزن للمستقبل مثل الجمل بالضبط بس ياريت ينفع معاه."
محمد:"ههههههههه يعبي بنزين."
وصار الضحك عليه، اماهو كان مقهوووور حده من أحمد اللي بدأ التعليق:" هاهاااهاا باااايخ مايضحك."
وقعدت خلود تضحك عليه وعلى طول طالعها بنظراته التهديديه المعتاده. ومن شافته جذي سكتت خوفاً من انه يراويها بعدين.
^^^^^^^^^^^^^^^^^^^^^^^^
الساعة ست الصبح وماقرب من عيونها النوم مرة ثانيه، كانت قاعده طول الليل تراجع ونامت لها ساعه وحده بس.. قامت من سريرها وهي حاسة بإنتعاش كبير، شعورها بهذا اليوم كان غير عن الأيام الماضية والسبب مجهول. وطبعاً أول شي كانت تسويه انها تفتح الدرج واطلع صورة أمها وتقول لها:" صبااااح الخييير يالغاليه." وترجع الصورة مكانها. فتحت باب غرفتها خواتها بعدهم نايمين الكل كان يقعد من رقاده الساعه ست ونص يعني هي قعدت قبل بنص ساعه. وبعد ماخلصت من الحمام وغسلت ويهها طلعت تبدل ثيابها، ونزلت الصالة تحت بعد ماصكت باب غرفتها وقفلتها كالمعتاد اذا بتطلع. البيت كان هادئ ومافي غير صوت الساعات الموجودة على الجدران، خلت عباتها على الكنبه ودخلت المطبخ:" أمممم أسوي لي ساندويج وعصير برتقال؟ يالله." وبين ماهي تسوي لها الريوق سمعت صوت وراها، بالبداية دق قلبها وخافت يكون ابوها سكران وياي يضربها. لكن من دارت شافت هديل واقفة عند الباب.
شوق:" خرعتيني."
هديل وهي تتثاوب:" آسفه، وش اللي مقعدج من وقت؟"
شوق:" نمت ساعه ولاياني نوم، قلت أقوم أحسن."
هديل:" اوكي انا بروح اغير ثيابي."
شوق:" لحظة، اسوي لج ريوق وياي؟"
هديل:" لا مابي." وتوها بتمشي:" والا تدرين عصير بس."
شوق بإبتسامة كلها إشراقه وحيويه:" من عيووووني."
راحت هديل وظلت شوق، ثاني شخص كان قاعد هدى ست الحسن والجمال وطبعاً كانت واقفه عند باب الحمام بكشتها تحارس أختها تتطلع.
هدى:" ياااااااالله بسرعه طلعي، سنة بالحمام."
هديل وهي تصارخ عليها:" صبري شفييييج."
ظلت واقفة واهي اتأفف، ولما طلعت هديل وقفت اطالعها وقالت لها:"اذا ماتبين تنطرين مرة ثانيه دخلي قبل لاتزنين فوق راسي." طالعتها هدى بإحتقار ودخلت الحمام.
ولما خلصت هديل لبس ثيابها نزلت تحت علشان تشرب العصير اللي سوته شوق، وهم يشربونه كانوا يسولفون عن آخر يوم بالإمتحانات وش راح يسون.و الاهدى نازلة واقفة وحاطة يدها بخصرها وكأنها واحد من عصابات المافيا!!
هدى:" وين عصيري؟"
طالعوا بعضهم وياتهم الضحكة بس هديل قالت:" بالثلاجة روحي سوي لج."
هدى:"و ليش ماسويتوا لي؟".. وطبعاً كانت تقصد بكلامها شوق..
ردت عليها شوق:" والله نسيت مرة ثانيه ان شاءالله."
هديل ضحكت على ردها وطلعوا من المطبخ حتى بيروحون المدرسة.. أماهدى ظلت واقفة وخاطرها تذبح شوق وأختها:" اففففففففف مدري هذي ليش واقفة وياها ماكأني أختها، أكرهها أكرهها متى افتك منها." وطلعت من المطبخ وصكت الباب بكل قوتها!!
شعور شوق بالسعادة غريب، يمكن كان سعادة وهدوء ماقبل العاصفة..!!إحساس بالمرح والفرح!! هل لأنها بآخر السنة وخلاص راح تكون المدرسة نهاية لبداية مرحلة جديدة؟!
^^^^^^^^^^^^^^^^^^^^^^^^
الساعة عشر وللحين ماطلعت من قاعة الإمتحان، كان الإمتحان واااااااايد صعب ويبي له تشغيل مخ!! ماكانت الوحيدة اللي ماطلعت شذى وسوسن وميثة وأغلب البنات اللي تعرفهم كانوا يحاولون في حل المسائل..!! وقبل ربع ساعه من نهاية الإمتحان كانت سحر ثاني وحده تطلع بعد سوسن.
سوسن:" والله حسيت راسي بينفجر، حشى هذا مب امتحان."
سحر:"افففف سكتي زين مارميتها بويه الدكتورة، أدري فيها ناوية تسقط ثلاثة ارباع السكشن."
سوسن:" لااااا انا أخذت عندها قبل هالمرة ولاحد سقط."
سحر:"الله يستر بس."
سوسن:" سحر انتي ماينخاف عليج، أكيييد بتنجحين."
طالعتها:" اكيد بس مابي علامات زفت مثل ويهم."
سوسن:"لاأكييييييييد بتيبين A ، ومااعتقد تيبين أقل."
سحر:" قولي ان شاءالله."
سوسن:"ان شاءالله."
وعلى آخر الوقت طلعت ميثة وشذى وراسهم يدووور من الإمتحان..
سحر:" بشرووا؟"
ميثة:" وش ابشر، مافيييييييييه امل."
شذى:" انا نص ونص، وانتوا؟"
سوسن:" انا عن نفسي يمكن B- وسحر كالمعتاد."
شذى:" اي ان شاءالله، زين وين بتروحون الحين؟ لاتقولون البيييييت مابي ارد الحين."
سوسن:" والله مدري أيي وياكم والا ارد، تعرفون ابي اراجع لي جم كلمة، امتحان باجر مب سهل العن من اليوم."
شذى:" ياعيني من وين نازلة عليج الشطارة مرة وحده؟"
سوسن:" حبيبتي من زمااان بس انتي اللي خبركان."
شذى:" زين وش قلتوا؟"
ميثة:" مدري أنا مابي أطلع مالي خلق، وانتي سحر؟"
سحر بعد تفكير:" انا بعد مابطلع، برد البيت بعد نص ساعه."
شذى:" صج ماتنعطون ويه، انا بروح عنكم خلكم يالله باااي."
ردوا عليها:" باااي."
وبعد ماراحت شذى ظلت سوسن وسحر وميثة قاعدين على الكراسي اللي يم الصالة الرياضية. ميثة ظلت اطالع الرايحة والياية وتعلق عليهم، طالعي هذي وش كثر متينه وهذي القصيرة وهذي السمرة وذيج العرجة..!! ماخلت حد الا وماعلقت عليه..
سوسن:" بسسسسج شفيج انتي ،خلقة رب العالمين تعيبين."
ميثة:"ولييييه لاتسوين نفسج البنت المثالية وتبدأين بالنصايح."
سوسن:" انا ماقلت لج اني مثاليه بس ماعيب على الناس."
سحر:" ميثة بليييييييز يوزي عن هالتعليقات، وكلام سوسن صح."
ميثة:"افففففف وانا قلت شي؟ والااكيد انا كل غلط."
سحر:"حبيبتي ميثوو من ياب سالفة الغلط؟؟ ارجوج سدي السالفة."
ميثة:" زيييييييييين خلاااااص سكتنا."
وظلوا ساكتين خمس دقايق، لحد مااستأذنت سوسن منهم وراحت بيتهم بعد مايوا لها. وظلوا ثنتينهم ساكتين..سحر بعد ماظلت تفكر ولعب بعقلها الشيطان:" ميثة، انتي للحين تذكرين السالفة اللي قلتي لي ايااها؟؟"
ميثة واللي ابداً ماتنسى مثل هالسوالف:" اكييد أذكر،ليش وش صاير؟"
سحر:"لابس انا أقول اذا مازلتين عند وعدج عطيني الرقم."
ميثة وبكل خبث:" أوووكي أطلعه لج."
وفتحت تلفونها وطلعت الرقم..
ميثة هاج هذا هو الرقم:"00000000..." وعطتها الرقم..
سحر:" هو وش اسمه؟"
ميثة:" فهد."
وسكتت سحر وسيفته بإسم سارة بتلفونها.. وكانت تفكر باللي قاعده تسويه ورغم معرفتها إنه غلط الاإن ابليس لعب براسها وخلاها تسوي اللي هو يبيه.
سحر:" هو يدري انج بتعطيني رقمه؟"
ميثة:"اييييه هو بس ينتظر مسكول والامسج منج وخلي الباقي عليه."
سحر:" انتي قلتي له مجرد صداقة لاأكثر."
ميثة:" قلللللت له لاتحاتين."
سرحت بأفكارها الشيطانية اللي بتضيعها، وبتضيع مستقبلها وياها..
^^^^^^^^^^^^^^^^^^^^^^^^
كانت قاعدة بروحها بالبيت بعد ماراحوا عيالها المدرسة يقدمون إمتحانات.. ظلت اطالع التلفزيون برامج الطبخ والمنزل وغيييييييرة من هالبرامج،، وتتصفح في المجلات اللي جدامها. وهي تقرأ في أحد الصفحات شافت إسم شوق، وتذكرت شوق بنت بوعبدالله.. لأول مرة كانت تغيب عن بالها، بسبب إنشغالهم بالإمتحانات واللي صار لمحمد..ومدت يدها للتلفون علشان تتصل لبيت بوعبدالله تسأل عنهم وعن شوق بالتحديد. وبعد مادقت الرقم سمعت صوت عبدالله بالطرف الثاني:" ألووو؟"
شيخة:" السلااام عليكم، شخبارك عبدالله؟"
عبدالله واللي استحى على طوول:" انااا؟ بخير،، من إنتي؟"
شيخة:"عبود حبيبي ماعرفتني أنا شيخة أم مازن."
عبدالله:" ايييه، تبين أمي؟"
شيخة:" هي هني والا طلعت؟"
عبدالله:"لا ماطلعت اناديها لحظة."
وراح يناديها وبعد دقيقة كانت أم عبدالله ماسكة سماعة التلفون:"ألوووو."
شيخة:" السلام عليكم أم عبدالله."
وبعد ماانتبهت للصوت وعرفت انها شيخة:"هلااااااااااا وعليكم السلاااام، شخبارج؟ ان شاءالله بخير؟"
شيخة:" بخيرالله يسلمج، انتوا شخباركم؟"
أم عبدالله:" والله نسأل عنكم."
شيخة وبمجاملة:" اشوفج مريتي البيت."
ام عبدالله:" مشغووووولة وااااايد تعرفين الخدامة للحين ماوصلت ولعيال يراجعون مابي أخرب عليهم. وشغل البيت كل علي."
شيخة:" الله يعطيج العافية ان شاءالله ، انتوا ماطلبتوا خدامة؟"
أم عبدالله وطبعاً كل كلامها جذب:"طلبنا ويبناها بس طلعت حرامية ورديناها المكتب عاااد انا قلت لأبولعيال مانبي من هذا المكتب نغيرة احسن وللحين على حطت يدج ماوصلت."
شيخة واللي تعرف جذبها:" حسبي الله عليهم هالخدم، ماينسكت عنهم والواحد مايقدر يغفل عنهم دقيقة."
ام عبدالله تحسب ان شيخة بلعت الجذبة:" ايييييه وانتي الصادقة، زييين ماتمرينا البيت نشوفج؟"
شيخة:" لامشغولة شوي، تعرفين اخوي محمد بسافر باجر ولازم نروح الليلة بيت ابوي وانسلم عليهم."
أم عبدالله:" الا وش رايج أمرعليج واروح معاج؟"
شيخة هني تبلعمت وماعرفت وش تقول لها:"هاا لالااا، اييه اييه ماعليه، بس انا بروح من وقت شوي وش قلتي؟"
ام عبدالله واللي ماتحس ان الحرمة ماتبيها:" لاااااعاااادي انا اصلا ماعندي شي، الساعه جم أييج؟"
شيخة وتتأفف بقلبها:" الساعه اربع انتي بالبيت."
ام عبدالله:" صار ان شاءالله."
شيخة:" مع السلامة.. وسلمي على البنات."
بعد ماصكت التلفون تذكرت انها ماسألت عن شوق، بس أكييييد بنتها وياها وبتعرف اخبارها..بس الورطة ان ام عبدالله بتروح وياها,,
^^^^^^^^^^^^^^^^^^^^^^^^
العصر إجتمعوا بيت الخالة وبيت العم في بيت ابومحمد، ولعيال كلهم كانوا مجتمعين بالصالة، والرياييل بالميلس لأن ربع محمد كانوا بزورونه ومايصير يقعد وياهم..والفوضى واصواتهم كانت ماليه البيت بهجة وحيويه.
نوف:" خااااااالتي شوفي خلووود."
أم محمد:" خلووود شفيييييج لاتعاندين بنت عمج."
العنود:"هههههههه خلووود عليج ابها..."
نوف:" الحين بنتف شعرج انتي."
بدور:" قوومي بسرررعه..."
خلود:"ههههههاااي العنوود تباعدي لاتصيدج ضربة."
العنود وتوها بتقول مابصيدني والا فلعه يايتها على ويهها بالمخدة الصغيرة، وصار الضحك عليها..
أم فيصل:" حسبي الله على ابليس والله ماكأنكم بناااات عقلوااا شوي."
أم محمد:" خلييييييييهم على كيفهم يستانسون باجر آخر يوم عندهم إمتحانات."
أم حمد:"اي والله، الله يساعدهم بس على هالإمتحانات أنا راسي يعورني من كثر ماشوفهم حاملين هالكتب ويقرأون فيها."
أم فيصل:"افففف مايرحمونهم مساكين الكتاب كله يدرسونه، مايعطونهم نصه."
مريم:" خااالتي لازم يعطونهم اللي درسوه كله، مايصير نص ونص."
نجود:"هذا علم ياخالتي ولازم يدرسونه حتى يستفيدون منه بعدين."
أم فيصل:" انا اشوفهم فالحين بشي غيييير هاللعب طالعيهم انتي."
نجود:"هههههههه والله يضحكون، بس ماعليه ياخذون راحة من الدراسة."
سمر كانت فوق بغرفتها وتوهاا مخلصة من المراجعه ونازلة، أما سحر كانت قاعدة بعيد عنهم شوي واطالعهم بإنزعاج وتكبر وكأن الجلسة هذي مب عاجبتها..
سمر:" السلاااااام عليكم ياجماعه."
ردوا عليها كلهم:" وعلييييييكم السلااااام والرحمة."
مريم:" هلااا والله سموورة شخبارج؟"
سمر:" بخير، انتي شخبارج؟ وشخبار الدراسة وياج؟"
مريم:" تمااااااام انتي اللي خبريني عنج؟"
سمر:"والله ماشي الحال." وقامت اطالع الموجودات.. وانتبهت لسحر قاعده بعيد عنهم وسألتها:" وش فيها سحر قاعده هناك بروحها؟"
مريم:" مدري من يينا وهي قاعده هناك ولاتحركت من مكانها، انا مستغربة منها شكلها متضايقة والاااا خبري خبرج؟"
سمر:"هههههههه يمكن هذي صادقة فيها، خلينا نقوم نشوف وش فيها؟"
مريم:"لالا انا مابي اروح تعرفينها وياي،، روحي انتي."
سمر:" اووكي." وقبل لاتقوم أنتبهت لوجود بدور بس شيخة ماكانت هناك:" مريوم وين شيخة؟"
مريم:" تقول بدور انها بعدين بتيي لأنها تنطر وحده بتييبها معاها."
سمر:"اهااا اووكي، عن اذنج."
مريم وبإبتسامتها الحلووة:" اذنج معاج."
وراحت سمر تشوف وش فيها سحر..وأول ماقعدت سمر يمها..
سحر:" جان لايتي."
سمر:" وليييييه وش سويت بعد؟"
سحر مسوية نفسها زعلاااانة كلش:" لا جان قعدتي ويااهاا أحسن."
تضحك عليها:"ههههههههههه الحيييين فهمت، يعني انتي متضايقة لأني قعدت ويامريوم."
سحر:"وععععع وادلعينها بعد مايركب."
سمر تنرفزت من كلام سحر بس حاولت ماتبين لها وغيرت الموضوع بسرعه:" زين شفيج متضايقة؟ ماقلتي لي؟"
سحر:"ومن قال انا متضايقة؟"
سمر:" ويهج يقووول، اللي يشوفج من على بعد ميييييل يعرف انج متضايقة."
سحر وتحاول تنكر:"ابدااا ولاشي."
سمر:"ياااالله عاااااااااد قووولي لي وش فييييج؟ اكييييد على سفر محمد؟"
طالعتها وفرت راسها للجهه الثانيه..
سمر:" صج عنيييييييدة مااتكلمين؟؟"
سحر:" وش تبيني اقووول قولي؟"
سمر:" قووولي وش فيج ليش متعكر مزاجج جذي؟؟"
سحر:" على ماأظن انج جاوبتي على سؤالج من شوي."
سمر:"شفتي شلون، قلت لج اكيد السبب سفرأخوي.. بس انتي تعرفين انه مب رايح سياحه لعلاج."
سحر:" آدري بس مابيه يسافر.!"
بإستغراب تسألها:" ماتبينه يسافر؟!!! ليييش.؟"
سحر:"لاتفهميني غلط، ابيه يتعالج بس ليش مايكمل علاجه اهني؟"
سمر:"انتي تعرفين بره احسن له."
سحر:"مدري......... تدرين غيري السالفة."
سمر استغربت من تصرف سحر هذا، أما سحر فكان بالها مب مشغول بمحمد وبس، وانما كان مشغول بالرقم اللي عطته اياه ميثووه.
ولما صارت الساعه أربع فتحت شيخة باب الصالة ودخلت وقلبها يدق، وكانت وياها أم عبدالله..أول ماشافتها أم محمد وقفت من منصدمة، وأم فيصل قطعت سالفتها وظلت اطالعها.
شيخة كانت تحاول تبين طبيعيه:" السلااااام عليكم ياجماعة الخير."
البنات كلهم ردوا عليها،، أما الحريم كانوا ساكتين ويطالعون.. ام عبدالله دخلت وسلمت عليهم:" السلاااام عليكم."
ردت عليها ام حمد وام فيصل:" وعليكم السلام والرحمة، حياااج."
أم محمد كانت اطالعها ومب قادرة تتحمل وردت عليها غصب بعد ماقامت أم فيصل تسحب بدراعتها وبكل برود:" وعليكم السلام، تفضلي."
ام عبدالله:" زاد فضلكم." وقعد يم أم حمد على الكنبة..
بدور استغربت وجود أم عبدالله في بيت يدها، لأنها من زماااان كانت قاطعه زيارتهم. نجود ظلت اطالع شيخة وتحاول اتخليها تنتبه لها علشان اتيي يمها.. وفعلاً دارت وشافتها تلمح لها وقامت قعدت يمها
نجود وبصوت واطي كلش:" وش يابها البييييت؟"
شيخة:" قالت تبي اتيي اقول لها لا."
نجود:" وش اللي خلاها اتفكر بالجيه؟"
شيخة:" سكتي واللي يرحم والديج مو وقته."
نجود:"زيييين خلاااص."
وظلوا ساكتين ويطالعون أمهم وخالتهم، البنات طبعاً ماكانوا يدرون بشي، بس حسوا ان في سالفة او موقف صاير بينهم وبين هالحرمة الغريبة. بس كلهم ظلوا ساكتين ويتابعون الحلقة اقصد الحريم..!!
أم عبدالله:" شخبارج ياام محمد؟ عساج بخير؟"
أم محمد وبغصة في الحلج:" بخير، شخبارج وأخبار عيالج؟"
أم عبدالله:" بخيرالله يحيج."
أم محمد كانت اطالعها وكان ودها اطلعها من البيت:" هذي وش يابها البيت؟ ماتستحي على ويهها يايه هني، صج ماعندها شيمه ولاحيا، لكن الشر مب عليها على شيخة بنتي ، مدري وش اللي خلاها اتييبها البيت؟؟ أخاااف وراها شي وتبي تسويه، الله يستر منهم بس."
الكلام اللي دار بينهم جداً بسيط، سوالف عادية عن لعيال، وعن صحة محمد واحواله..أم عبدالله كانت طووول الوقت اطالعهم واطالع البيت وفخامته ، عيونها ما****لت من على البنات وثيابهم، والأثاث الموجود..!! كانت بكل لحظة وكل ثانية تمر تتمنى وتتخيل نفسها تعيش في بيت مثل هذا، عمرها ماحمدت ربها على اللي هي فيه، دايماً تتمنى اللي عند غيرها..!!
وبعد ساعه تقريباً من قعدتها، استأذنتهم وقالت لشيخة إنها بتمشي طبعاً كان لازم شيخة ترجعها البيت لأنها اللي يايبتها معاهااا.
أم عبدالله:" يالله مع السلااامة، نشوفكم على خير."
أم محمد:"الله يسلمج."
وطلعت من البيت، أم محمد حست إنه ثقل وانزاح من قلبها. ظلوا ساكتين فترة بسيطة بعد ماراحت. وأول وحده بدت الكلام كانت سمراللي كانت شاكة بهالحرمة انها شايفتها بمكان بس مب ذاكرتها:" يمممه هذي منو؟"
أمها طالعت أم فيصل وكأنها تقول لها جاوبيها:" هذي أم عبدالله جارة أختج شيخة."
سمر بسرعه تذكرتها، وعرفت أنها مرة ابوشوق. وظلت ساكته وتفكر في جيتها بيتهم بعد هالمدة الطويلة هذي. سمر كانت تعرف انه في مشكلة بينهم بس ماتدري شنو.
تعكر الجو هناك وكلهم ردوا بيوتهم بعد ماسلموا عليهم ، وقرروا يروحون يسلمون على محمد بالمطار.
وبعد ماطلعوا من البيت ركبوا البنات فوق لغرفهم وراح سيف ينام لأن عنده امتحان الفاينل وأحمد طلع وياناصر ولد عمه. أما محمد ظل وياحمد وطارق بالميلس يسولفون.
^^^^^^^^^^^^^^^^^^^^^^^^
وبالصالة كانت أم محمد قاعده وياابومحمد وسرحانه بأم عبدالله. لاحظ ابومحمد سرحانها وتغير ملامح ويهها..
أبومحمد:" خيريالغالية شفيج سرحانه، لاتقولين لي بمحمد بعد؟"
ام محمد ماانتبهت لكلامه وظلت ساكته وتفكر، استغرب ريلها وقرب يمها:" فاطمة شفيج؟ تعبانه؟ فيج شي؟"
طالعته وعيونها مليانه تفكير وأفكار:" تدري اليوم من زارنا؟"
أبومحمد:"لااا من غير بيت أخوي وأختج؟"
وبتردد وخوف:" أم عبدالله."
أبومحمد ماتذكرها وإستغرب:" من أم عبدالله؟"
وبنفس الخوف والتوتر:" مرة ابوعبدالله الخلفان."
من سمع بأسمه وقف وقام يطالعها بغضب والضغط ارتفع.. طالعته وكانت تحاول تثبت نفسها:" ماتوقعت جيتها."
أبومحمد:" وش اللي جابها البيت؟"
أم محمد:" مدري كانت يايه وياشيخة."
أبومحمد:" وياااااشيخة؟؟ شلوووون؟"
طالعته بنظرات إستفهام عن سؤاله لأنها نفسها ماتدري ليش. وساد الصمت بينهم اثنينهم لأن كل واحد فيهم كان يفكر بسبب جيتها بالرغم انها ماكان لها غرض من هالجيه هذي.
أم محمد:" بتصل بشيخة وبسألها."
وقفهاوقال لها:" لاااا،لاتتصلين لها الحين.. باجر ان شاءالله يصير خير."
ام محمد:"بس...."
ابومحمد:" لابس ولاغيره، باجر انعرف السبب."
كان مزاجه وااااااااايد متعكر لماعرف انها زارتهم، بالرغم ان السالفة صار لها سنين الاانها مستحيل تغيب عن بالهم.
^^^^^^^^^^^^^^^^^^^^^^^^
بعد ماراحوا ينامون، طبعاً الساعه كانت عشر بس الكل كان تعبان وراح يرقد.. الامحمد اللي كان فاضي وماعنده شي يسويه قعد وياحمد بالصالة بعد ماراح طارق لبيتهم..
محمد:" انت ماتستحي على ويهك وتقوم اتييب لي عشا."
حمد:" اشتغل عندك."
محمد:"لا عندي خخخخ."
حمد:" باااااااااايخة."
محمد:" زيييين جهزت نفسك والا للحين؟"
حمد:" حشى منزهق على عمري من الحين، باجر قبل لااسافر بساعه انا مجهز اغراضي."
محمد:" ياالخبل جهزهم الصبح لاتنسى شي، حنا بنقعد شهر مب يومين."
حمد:" مافي احد خبل غيرك، وش عليك انت."
يستهبل عليه:" علي ثووووب خخخ."
حمد:" ياثقلك وانت تستخف بدمك."
محمد:"اللي يشوفك يقووول خفيف."
حمد:"الحمدلله احسن منك.."
محمد:" زيييين عن الحجي الفاضي ، للحين هذا بره مارد الساعه 10:30 ابوووي اكيد بيطلع بره ينطرة."
حمد:" وليييييييه ياهل اخوك ينطرة بره؟"
محمد:" تعرفه مايعرف يرقد الااذا كنا كلنا بالبيت."
حمد:" الحمدلله، ابوووي غييييييير."
محمد:"وش تقصد؟"
حمد:"لاابدااا ولاشي، اقوول بتصل بناصر اشوفهم وين."
ودق بسرعه على آخر مكالمة صادرة:" حشى مامداه يرن التلفون."
ناصر:"ههههههه كنت بتصل فيك الاانت متصل."
حمد:" وينك فيه الحين؟ الساعه 10:35 وانتوا للحين بره، ست الحسن والدلال اللي وياك وينها؟"
ناصر واللي مافهم:" منووو اي ست حسن ودلال؟"
حمد:" بلاغباااء اقصد احمد."
ناصر:"ههههههههههههههههههههه كاهو يمي قاعد الحين بنوصل البيت لاتخاف."
حمد بمزاح:" زين يالله بسرعه لايطلع عمي ويشوتنا بره البيت."
وضربه محمد على جتفه،، وحمد يضحك عليه...
ناصر:"زيييين يالله باي."
حمد:"باااي."
محمد:" يشوتك بره البيت هااا،، انا اللي بشوتك موابوي."
حمد:"نمزح ياأخي..شفيك انت."
محمد:" سامحناك بس لاتعيدها مرة ثانيه,."
وماصارت عشردقايق والاأحمد وناصر دخالين الصالة..
أحمد:" مساء الخير."
حمد:" الناس تسلم، مب مساءالخير."
ناصر:" ووول عليك اكلت الريال بقشورة."
أحمد:" حشى ماتسوى علي."
محمد:" ماعليك منه صاير ثقيل دم."
حمد:" انا ثقيل دم لكن اوريك."
محمد:" بنشوف."
ناصر:" يالله بسرعه قوووم ورانا شغل."
حمد:"يالله هذا انا قمت."
محمد:" قعدوااا وش عاجلنكم."
حمد:"لاااا ياأخي خلنا انريح باجر سفر ومشوار طويل ابي انام بسريري."
أحمد:" هذااا اللي فالح فييييه."
ناصر:" توك داري عنه."
حمد وهو يدز اخوه علشان يطلعه:" اقوووول يالله امش جدامي، يالله انتوا بعد تصبحون على خير."
ناصر:" مع السلامة."
محمد:"الله يسلمك، سلموا على مرة عمي."
حمد:"يووووصل مع السلامة."
وبعد ماراحوا اثنينهم، ظلوا قاعدين يسولفوون شوي لحد ماحس أحمد انه خلااااص مافيه امل يستمر:" يالله انا بروح انام."
محمد:" اووكي، تصبح على خير."
أحمد:" وانت من أهله، ماتبي تنام؟"
محمد:" لامافيني نوم."
أحمد:" اوكي باااي."
وراح عنه وبقى محمد بروحة بالصالة، كانت الصالة كبييييييييرة وهاادئة وااايد، وحس بوحشة بالبيت وفضل انه يركب لغرفته أحسن له.. وأول مادخل غرفته وفتح النور راح لتلفونه.. كان فيه مسجين ولمافتحهم لقى انهم من سحر. كان أول مسج يقول ( الناس نوعين: نوع أنساه بفراقه ، ونوع يزيد الشوق بغيابه.) إبتسم محمد على باله انها فعلاً تعني الكلام اللي راسلته له!! أما المسج الثاني كانت هي كاتبته وتقول له فيه ( السلام عليكم، شخبارك محمد؟؟ أتمنى تكون بألف خير، وينك ماتسأل عني ولامفتكر؟؟ لايكون انشغل بالك بحد ثاني؟؟ )
إبتسم إبتسامة عريضة وطالع الساعه كانت 11:15 ومايبي يزعجها بإتصاله بهالوقت وقرر انه يرسل لها مسج ، سحر كانت مغمضة عينها وسرحانه!! وانتبهت على صوت المسج وعلى طول فتحته لأنها كانت متأكده انه محمد وكان يقول لها ( تدري " غلاتك " تساوي روحي وعيني وانت الذي دايم تطري على بالي!).
لكن هذا المسج مب غرضها كانت تنتظر رد على المسج الثاني وفعلاً وهي تفكر ياها المسج وفتحته ( هلا وغلا بحبيبة قلبي، إذا إنتي بخير أنا بألف خير.بالنسبة لسؤالج ليش ماأسأل أنا حبيت أخليج على راحتج تراجعين ومابي أزعجج. ومحد شاغل بالي وتفكيري غيرج، طمنيني عليج." حست بشعور الغرور بنفسها والكبرياء، لأنها متأكده انه محمد يموووت فيها.
وأرسلت له ( بصراحة أنا متضايقة وااايد.. وانت تعرف ليش.)
محمد ( حبيبتي أنا ماراح اسافر سياحة، تعرفين اني رايح لعلاج،، يعني المفروض تقدرين هذا الشي.) قرأت سحر المسج وهي متضايقة منه شعور متناقض ليش ماتدري وأرسلت له مرة ثانية ( محمد انت لوتحبني صج على الأقل تنطرني أخلص إمتحانات وأسافر وياكم.)
محمد فج عينه وضحك ( ياعمري انتي شلون أجل السفر، ماتبيني أمشي مرة ثانيه؟؟ والاعاجبج جذي شكلي؟ وثانياً مابي أشغلج وتعرفين حمد وياي وين بتروحين عنه؟)
سحر تضايقت أكثر، وكانت تتغلى عليه أكثر وأكثر!! ( شفت شلون انت ماتحبني ، لوتحبني مافضلت حمد علي، وثانياً اخوي فيصل بروح ونجود اقعد معاهم.)
محمد كان يخاف عليها من كل شي، ولايحب يزعلها ولايضايقها بأي شي بس ظروف السفره هذي غير، ومستحيل يأجل أكثر لأن تعب نفسياً من القعده على الكرسي هذا. وأرسل لها ( صدقيني ودي اتيين وياي بس مايصير، وأخوج بسافر للعلاج بعد يعني بتملين بروحج ، وانا وحمد بشقه بروحنا، يعني جذي والاجذي ماراح تشوفيني دايماً، وكلها شهر وحنا رادين ويمكن أقل بعد.)
سحر ماتوقعت ان رده عليها هذا وكانت تتوقع انه بيأجل علشانها وراح تسافر معاهم لكن خاب أملها وحسبت ان محمد مايبيها تسافر. وزعلت منه وقالت ( خلاااااص انسى، انا تعبانه حيييل وابي انام ممكن؟)
محمد زعل لما شاف هذا الرد ورد عليها( حبيبتي مابيج تزعلين ولااحب اشوفج زعلانه بسببي، بلييييز سحر لاتتوقعين اني ماحب أنج تكونين وياي انا كلي شوق لليوم اللي بيجمعنا مع بعض وراح اكووون كلللي لج..والحين أخليج تنامين، تصبحين على ألف خير.)
أول ماقرأته إبتسمت إبتسامة سخرية من نفسها ومن كلامه، شعورها بدى يتغير ليش ماتدري، زيييين ليش ماتتركه؟ ماتقدر محمد شخص غير عادي بالنسبة لها، فيه كل الموصفات اللي تبيها، غير ان الكل يدري انها له وهو راح يتزوجها! مسحت المسج وردت عليه بمسج كاتبه فيه بس ( وانت من أهله ).. وغمضت عينها ونامت بدون مااتعب تفكيرها بمحمد اذا تضايق والا لا!!
^^^^^^^^^^^^^^^^^^^^^^^^
اليوم الأربعاء آخر يوم بإمتحانات المدارس، والبنات كلهم فرحانين لأنهم بيخلصون ويبدأون الإجازة الصيفية اللي ينتظرونها على أحر من الجمر. طبعاً طلاب الجامعه باقي عليهم أسبوع بعد ويخلصون. في بيت فيصل كانت نجود قاعده اتجهز شنطهم وأغراضها اللبي بتاخذهم معاها وإختها شيخة وياها تساعدها..
نجود:"لااااااااا مب هني بالجنطة الثانية أحسن هذي خلااااص صارت مليانه."
شيخة:" لعنبوو جم جنطة بتاخذين؟"
نجود:" ثنتين فيهم ثيابنا وثنتين فيهم أغراضي من الكريمات وسوالف الحريم شفيج والجنطة الثانية لفيصل."
شيخة:" زييين اللي يشوفكم بتروحون صحراء، هناك فيه اغراض الدنيا اللي تبونها."
نجود:" ماااابي اتعب نفسي بمشتريات هناك."
شيخة:"ههههه علينا هالحجي، ادري فيج مابتخلين محل الاوبتروحينه."
وهي تضحك:"لاااا مااعتقد، بس هدايا ممكن."
شيخة:" مانبي هدايا نبي سلامتكم بس."
نجود:" ان شاءالله."
أما حمد كان مخلي تجهيز جنطته على مريوم ونوف، مريح نفسه ع الآآآآآخر. ومحمد بعد بس ظروفه غيييير أكيد. أمه كانت وايد متضايقة لسببين السبب الأول زيارة أم عبدالله، وسفر محمد عنها. ومرت الظهرية بسرعه ورجعوا من جامعاتهم ومدارسهم وكانت الفرحة مب واسعتهم لأنهم خلصوااا أخيراً.دخلت خلود البيت ورمت عباتها وشيلتها على الكنبه من الفرحة ولااهتمت لأمها اللي كل مرة إتنبهها وتقول لها لاترمين عباتج هني وشيلتج. بس اليوم عندها غييييير لأنه آخر يوم..
نجود وهي ادورهم:" يااااهل البيييييت وينكم؟؟ محمد؟ يمه؟؟"
لكن مافي حد رد عليها وسمعت صوت ضحك فوق وركبت بسرعه..كان فيصل وسمر هناك قاعدين ويامحمد..
خلود:" السلااام عليكم، انتوا هني؟؟ من متى؟؟"
سمر:" وعليكم السلام من خلصنا ردينا البيت بشري وش سويتي؟"
خلود:"اسهللللل مماكنت أتخيل."
محمد:" بنشوف الدرجات، اذا كان مثل ماتقولين والا لا."
سيف:" اهم شي ماعندج طماط بالشهاده خخخخخ."
خلود بقهر:" طماط بويهك هذا انت اللي بشهادتك الطماط والله."
محمد:"ههههههه ، زين خلود حبيبتي جهزي نفسج بنروح المطار."
فجت عينها وطالعتهم:" شنوووو من الحين بتروح؟؟؟؟؟؟؟"
سمر:" اييييه لازم يروح قبل بساعه انتي ماتدرين انه بروح الحين؟"
خلود:" لاااا على بالي المغرب."
سيف:" لااااا الحين اذا بتيين يالله بسرعه لانمشي."
خلود:" وامي؟"
سمر:" امي بتيي ويانا هي بغرفتها تلبس عباتها."
وبدون ماترد عليهم راحت غرفتها وغيرت ثياب المدرسة ونزلت تحت لبست عباتها.. وربع ساعه وكانوا بالسيارة. أبومحمد كان بروح لهم من الشركة للمطار. وعيال عمه وخالته كلهم بروحون لهم المطار بعد.. وهناك إجتمعوا وصار لصياح وسوو مناااحة!!
أبومحمد:" الله يهداكم وين بروح، لاتسوون جذي."
أم محمد:" ماقدر، محمد حبيبي انتبه لنفسك زين." وهي اطالع نجود:" تحملي بأخوج لاتخلينه يحتاج شي."
نجود وهي تمسح دموعها:" من عيووني يمة، لاتحاتين شي."
محمد:" وليييه يمه انا مب ياهل لاتخافين علي، شفيكم كلكم تصيحون اضحكوا والله اضيقون خلق الواحد."
بدور:" خاااااالي أنت ماتعرف وش كثر نحبك ونعزك."
محمد:" اعرف بس مايحتاج هالدموع."
شيخة:" يالله ياجماعه خلوهم يروحون لاتعطلونهم."
أما أم حمد سلمت على ولدها ووصته يتحمل بولد عمه. وأبوه بعد، سحر كانت اطالع وويهها كله حزن وضيق.. طالعها محمد وكان يحاول يكلمها بس ماقدر يقول لها أكثر من هالكلام:" سحر إنتبهي لنفسج زين، وبليز طمنيني عليج ولاتقطعين المسجات. وان شاءالله انا راح اتصل فيج."
سحر ابتسمت مجاملةً له وقالت:" لاتحاتيني انتبه لنفسك، مع السلامة." وابتعدت عنه وراحت اتسلم على فيصل اخوها ونجود.. وعند بيت ابوحمد كانت مريوم وأختها يسلمون على محمد وحمد وهذا اللي بط جبد سحر أكثر لقافة مريم وهي تكلم نفسها:" اففف هذي صج ملقوفة الحين أخوها بسافر تروح لمحمد ليش؟ أدري فيها تتعمد تقهرني." كانت هذي الأفكار اللي ادور بعقلها المغرور والأناني. وكان آخر واحد واصل المطار أحمد اللي كان مشغووول وااايد. وسلم على أخوه وأخته وولد عمه وولد خالته... وبعد خمس دقايق اختفوا عن انظارهم. الكل كان كأيب لأن محمد سافر، وهالمرة راح يوحشهم أربع أشخاص من العايلة.
أم محمد كانت اطالع بره وهي تدعي لولدها وبنتها:" الله يوفقهم ويحفظهم ويردهم لي سالمين يااارب." سمر سمعتها وطالعت السما:" آآآآآمين يارب."
كلهم ردوا بيوتهم وهم يفكرون فيهم، رحلتهم طويلة وأكيد بيتعبون!! وان شاءالله اذا وصلوا اكيد بيتصلون لهم..هذي كانت أفكارهم كلهم..!!
^^^^^^^^^^^^^^^^^^^^^^^^
كانت معصبه حدها ومتضايقة وبلحظة قررت انها تسوي مسكول لفهد اللي كان يترقب اتصالها.. وفعلاً سوت المسكول وانتظرت الإتصال..
فهد وبصوته اللي يسحر الكل:" الووووو.."
سحر ظلت ساكته وخايفة من انها تتكلم، لكنها ردت عليه بعد ماكرر كلامه:" ألوووووو."
سحر وبصوتها الناعم وبكل هدوء:" الووو."
فهد:" هلا وغلااا بهالصوت."
سحرماعرفت وش تقول وكانت متوترة واااايد:" اهلاً."
فهد:" شخبارج؟"
سحر:" بخير، انت شلونك؟"
فهد:"بخير دامج بخير، شفيج مستحية؟؟ "
سحر ارتبكت اكثر:"لالا، بس انت تعرف هذي اول مرة أكلم فيها حد غريب."
فهد وبضحكة هادئة:" غريب؟؟"
سحر:"اييييه، غريب والا انت تشوف شي ثاني."
فهد:" يالييييت."
سحر ماانتبهت لكلمته وسألته:" شنووو؟"
فهد:" اقوول براحتج يالغاليه."
سحر:" زين انا استأذن مشغولة شوي."
فهد:" بهالسرعه؟؟"
سحر:" ماعليه فرصة ثانيه."
فهد:" على أمرج، واذا مليتي من شي بس سوي لي مسكول."
سحر وتحاول تخلص المكالمة بسرعه:" اوكي مب مشكله، يالله مع السلامة."
فهد:" الله يسلمج."
وسكرت التلفون بسرعه، حطت يدها على قلبها وكان يدق بسرعه. قامت تضحك على نفسها وتتذكر شكلها وهي تتكلم:" الحمدلله ماكانت ميثوووه هني والا ماتت من الضحك، بس... انا وش سويت؟؟ شلون اكلم إنسان ماعرفه؟؟ شلون أخون محمد؟؟ لاااا، هذي مب خيانه، لاااعيل شنو الخيانة اذا هذي لا؟؟ بس كان صوته يهبل، واكيييد شكله حلوو احسه واثق من نسفه وايد." سحر متشوقه لسماع صوته مرة ثانيه، بس غرورها منعها انها اطول بالمكالمة. افكار شيطانية وخبيثة كانت ادور بعقلها. وماكانت تدري ان اللي تسويه كله غلط وبتندم عليه.
^^^^^^^^^^^^^^^^^^^^^^^^
ابوعبدالله وام عبدالله بغرفتهم يسولفون.. هديل كانت بغرفة شوق بعد يسولفون عن تخطيطاتهم للإجازة الصيفية. أما هدى كانت قاعده تعبد التلفزيون عباده من يات من المدرسة وبعد ماصلت للمغرب وهي اطالع حتى صلاتها متأخره، وطبعاً الوالده المصون عااادي ماتقول لها شي.أما عبود كان يلعب بالبلي ستيشن.
وفي غرفة ابوعبدالله..
أم عبدالله:" يعني متى بتقول لها؟"
ابوعبدالله:" نطري يوم يومين بعدين بقول لها، خلني اخلص أشغالي ويابوعمر."
أم عبدالله:" زين بس لاتمهل وايد ، ابي افتك منها كفاية صار شغل البيت علي ايام امتحاناتهم، ولاتنسى ابي خدامة بسرعه لأني مااتحمل الشغل بروحي."
ابوعبدالله:" اي طبعاً وانتي من متى اشتغلتي، مب كانت بنت بدروووه هي اللي تشتغل بالبيت."
طالعته وكأنها غارت من بدرية:" اشوفك للحين تذكرها، وكأنك ادافع عن بنتها بعد."
ابوعبدالله:" هههههه لاضحكيني وش اذكر فيها، لاتلوعين جبدي وثانياً انا ماادافع عنها بس اقول لج انج ماكنتي تسوين شي، بس يالله زين سويتي فيها علشان لاتأذي بوعمر."
وقعدت تضحك عليها من فرحتها..!!
أما هديل كانت قاعده وتتخيل نفسها مسافرة:" الله ياشوووق ودي اسافر لأي مكان، ودي أغير جو ابي اطلع ارفه عن نفسي."
شوق وبإبتسامتها الساحرة:" الله يعطيج ان شاءالله واتسافرين، انا مب طماعه ابي اروح العمرة بس."
هديل:" ايييييييه وهذا اول مكان ودي اروحه."
شوق:" سمعتي عن شمس انها بتنخطب؟"
هديل بإستغراب:" لاااا صج؟ متى؟"
شوق:" كانت خاشة علينا وحبت تسويها مفاجأه بعد النتايج بتسوي حفلة بسيطة وعزمتنا كلنا."
تذكرت هديل في هذي اللحظة أبوعمر وتغيرت ملامحها.. ولاحظت شوق سرحانها:" هديلووو وييييين سرحتي؟؟ اعترفي بسرعه وبمنوو؟."
هديل وبإبتسامة ذابلة ومصطنعه:" وين اسرح والا بمنو اسرح؟"
شوق:" علينا..؟!"
هديل سكتت وظلت اطالعها وهي تفكر:" اقووول لها والا ما اقوول؟؟ اخاااف اقول واتورط .اقوول وافك عمري؟؟ لا..بس مايصير اخليها على ويهها جذي تعرف من ابوي والاامي؟! اففف والله حيرة يارب ساعدني.." كانت الأفكار تودي واتييب بعقلها حست انها بينفجر.
وطالعتها بعيونها الدامعه:" شوووق ابي اقول لج شي .."
شوق وهي اتلم كتبها بعلبه كارتون علشان تنزلهم بالمخزن:" قووولي."
هديل:" ابوووي شوق........." لكنها سكتت وقبل لاتكمل كلامها فتحت امها الباب وكانت اطالع هديل بغضب وكأنها حست انها تبي تقول لها..
شوق تفاجأت من دخولها، ومن النظرات اللي كانت اطالعها فيها وماكانت قادرة تسألها وش كانت تبي تقول.. أما هديل كان قلبها يدق مثل الطبل وخايفة من أمها..!!
ياترى أمها وش راح تسوي فيها؟؟ و هديل وش بتقول لشوق انها كانت تبي تقول؟؟؟
وسحر اللي انخبلت وانجرت ورى الشيطان وسمعت كلام ميثه. راح تواصل مع فهد؟؟ ومحمد سفره هذا هل راح يلقى علاااج ويرجع مثل ماكان؟؟؟