قصه واقعيه عطوني حلولكم

روحي ثقفي نفسك

--------------------------------------------------------------------------------

و تزوجت لينا...الرجل الذي أحبته.. و بموافقة و مباركة أهلهما و ذويهما
سافرت لينا مع فهد...لشهر العسل...أول و أخر سفره لهما معاً...
كل واحد يسافر بروحه اريح واوسع صدر!

و رزقت لينا بهديل ... أول فرحتهما
كانت نعم الأم...وكان نعم الأب

فهد كان يضرب لينا..ولكن البنت السنعة تصبر على زوجها
أزمه وتعدي
عين ما صلت على النبي
بعدين فهد مو مقصر بحقوقه الماديه تجاه بيته!

ورزق فهد بمولوده الذكر
هيثم...خلاص الحين صار فهد أبو هيثم
صار عنده ولد والرجال ينادونه أبو هيثم...بدال أبو هديل
لا بارك الله في البنات و في طاريهم
على حد قول جماعه فهد!

لينا و بعشرة عمر دامت 10 سنوات ... ما عمرها شافت اهل فهد
تسمع فيهم ولا تشوفهم
فهد "مشغول"
بعدين علاقته بأهله ماهنا هاك الزود
وش يبي في اهله دام عنده بيت و اولاد و زوجه..يضربهم
و يتخلى عن مسؤليته تجاههم!!

و صارت لينا أم و أبو البيت
تصرف على البيت من جيبها..من مصدر دخلها الوحيد اللي أمنه لها ابوها...صالون نسائي

فهد تغيّر على لينا...زود على ما اهو اصلا متغير
صار يسافر بدون ما يقول لها...يقول بروح شرق ويطلع مسافر غرب
بروح مع فلان..ويطلع فلان بالديره ما سافر!
ديون و أقساط
وياعت لينا ذهبها..عشان توقف جنب زوجها و تساعده...

و حملت لينا بالطفل الثالث
وزادت توتر الامور و حدتها بينها و بين فهد!

بالرغم من الكم الهائل و الحشو في مناهجنا و خصوصا الثقافه الدينيه اللي طالما كنا تعتز بان مناهجنا قويه فيها
غفلت لينا على ان "الطلاق" يقع على المرأة الحامل..وانها تحرم على زوجها خصوصا اذا كانت طلقه ثالثه

ولجهل لينا...استمرت في بيت زوجها

واي بيت هذا!
الاثاث و باعه
و الجو كئيب
ما يتخلله الا صوت فهد يصارخ
و صوت لينا تتألم

و في لحظة شك..اتصلت لينا على الشيخ و قالها..."ما وقع بينكما زنا...انتي تحرمين عليه...شيلي قشك و روحي لبيت اهلك"

بجملة وحده اكتشفت لينا انها كانت عايشه مع شخص يعاملها كزوج و ياخذ منها حقوقه الزوجيه كامله مستغل جهلها!

اوه نسيت اقول لكم
فهد ادمن مخدرات في اخر سنتين من زواجه الشرعي بلينا
وحاول يجر زوجته معاه للادمان بانه يحط لها المخدر في العصير وهي حامل!

الفلوس تشتري النفوس...
الطبيبه المصريه اللي جت تتلاحق الوضع قبل لا تروح لينا من بين ايدين اولادها..فهمتها ان هذا "دلع" بنات..و ان الحمل يسوي اكثر!
لينا مو اول مره تحمل

الثقه عمياء ساعات!
تثق بزوجها..ابو عيالها في اعاده ترميم الصالون...و يكلفها 150000 مع ان المبلغ الفعلي ما يتجاوز 50000!

3 سنوات مرت من طلعت لينا من بيت فهد
لا مطلقه ولا مزوجه
معلقه
محاكم
شرطه
ومكاتب مكافحه تسول تحاول تدارك ما بقي لها من عاملات في الصالون قبل ان يستدرجهم فهد

سيارتها و باعها فهد بدون موافقتها
وشلون؟
جاب حرمه متغطيه وقعت بدالها

راعي المعرض يقول ابو هيثم رجال و نعم...ما اشك فيه
الشرطه تقول خلافات عائليه ما نرفع فيها شكاوي ولا بلاغات!

و رقة اللعب الناجحه الاولاد...كل ما حب يضغط عليها و يلعب ياعصابها اخذهم عنده "زياره"!
يرجعون الاطفال بقصص اغرب الخيال
"ماما ..زوجه صاحب بابا تنام عنده بالبيت..وبابا كل يوم يتزوج وحده "مسيار"!!.."
تحول البيت الى غرزة

عده بلاغات رفعت من اصحاب الحاره..بما فيهم امام المسجد الى مكتب الهيئه عن سوء سلوك فهد و كون البيت مشبوه

صار شي...لا!

اصغر اطفال لينا...بسمه...كملت السنتين بدون شهاده ميلاد
ليش؟
يقول الشيخ بالمحكه "واذا (رجع) ابوها وقال ما جاز لي اسم البنت..انا ما سميتها"!!

نفس الشيخ اللي رفض يطلق لينا او يخلعها من زوجها..."بنات هالايام...دلع و ما تعودن على المسؤوليه..على ادناة الدون ..شالت عفشها و قالت لزوجها طلقني"!
نفس الشيخ اللي رد شهاده اخوان ولينا و اصحاب ابوها بأن فهد طلق لينا قدامهم بدال المره ثلاث...
هذا طبعا غير الطلقات اللي كانت دايم على لسان فهد في البت في لحظه وساعة غضب..سكر او ادمان!

بدون اثبات ..لينا تظل زوجه فهد وأولى لها ان ترجع لها...هذي نصيحة الشيخ بالمحكمة


تتوقعون فهد بيرجع وهو اصلا واقف يصارخ ذيك الليله قدام بيت لينا و اهلها...بنتك بنت حرام وانا مو ابوها..شوفي من انتي نايمه معاه!

تتوقعون يرجع فهد و على علم لينا ان عليه تعميم بسبب تخلفه عن حضور جلسات المحاكم على مدى الثلاث سنوات الفايته...مع انه قدر يتزوج ويضيف زوجته الجديده على دفتر عائله جديد ومعدل؟
وين معمم عليه اجل!!

تتوقعون يرجع فهد..ولينا قايمه بمصاريف و تربيه 3 اطفال بروحها؟؟

تتوقعون بيرجع فهد و شيخ المحكمه يقول للينا " لا تتهمين زوجك بالشراب و المخدرات..لان القانون في صف المدعي..لو ما اثبتي عليه...انتي "تجلدين" لانك قذفتيه" !
مع ان فهد وبأعلى صوته مشهر بلينا و سمعتها قدام الله وخلقه!

تتوقعون يرجع فهد..وهو مسلط ناس تتصل على ام لينا وقت ما كانت المسكينه تتطلع لشغلها "بكم ليله بنتك؟" ..."بنتك راح تتشوه بمويه نار"

تتوقعون يرجع فهد...و لينا حايسه بعيالها..مو قادره تدخلهم مدارس حكوميه عشان تتخلص من تكاليف المدارس الخاصه اللي قصت ظهرها لان ما معها "أصل دفر العائله"!


تتوقعون يرجع فهد..وشيخ المحكمة يتهكم على لينا ومحاولاتها البائسه لحفظ حقوق اولادها كبشر.."روحي ثقفي نفسك بدل ما انتي كل يوم جايه للمحكمه"

تتوقعون يرجع فهد وهو عايش مبسوط متمتع بكل حقوقه...لا حسيب ولا رقيب...رجال عايش رافع راسه
ولينا...معلقه ..لا مطلقه ولا مزوجه...ام لثلاث اطفال..بدون اثبات رسمي لهم ولا لابسط حقوقهم!

تتوقعون هالسطور...اللي بينها هوئل اعظم من ان تتحملها صفحات المنتدى... تختصر معاناة لينا على مدى اكثر من 13 سنه
في بروع بلادي
بلاد الحرمين!


ما أقول إلا مالت على فهد، شيخ المحكمه، ضباط الشرطه...و حقين الهيئة
حسبي الله و نعم الوكيل