كيفكم يابنات؟؟
طبعا انا وعدت اني اسرد لكم قصه ولادتي بالتفصيل الممل وبصراحه كتبتها ولي ساعه كامله واخرتها انمسحت
والله انقهرت وايد
لاكن ماعليه برجع اكتبها وان شاءالله اكتبها بنفس الصياغه للقصه اللي انمسحت لان ماخليت شي بنفسي ماكتبته
المووووووووووهم ياطويلات العمر
انا حملي صعب يعني اجهاضات متكرره ومحد عارف السبب والدكاتره تقول ماندري من وين الخلل وكل مايصير نزيف مايعطوني مثبت ابد ويقولون اذا البيبي يبي ينزل خليه ينزل من نفسه ليش نخليه بالرحم احنه بالمثبتتات؟؟
حملت بولد قبل برهم وجبته بقيصريه لان وضعيته خطا ببطني ولاكن ربي شاء واخذه مثل مااعطاه لي وحملت وراه مرتين ونزل حملي
وشاء ربي وحملت ببرهم وسبحان الله من الشهر الثالث وانا حامل فيه لين الشهر التاسع وانا انزف هذا من غير ضغط الحمل والسكري والماي اللي حول الجنين كانت تنزل
وعدت شهور الحمل اصعب من لحضات الموووت وماصدقت لمه حددو موعد لعمليه انهم يولدوني برهم لان بعد كانت وضعيته خطا ببطني اللي هي الوضعيه المقعديه
وشرف برهم فديت عينه وكانت فرحه ابوه موواسعه الدنيا فيه وحملت بعد ولادتي ببرهم بسنه 3 مرات وكل مره ينزل ومره من الحمل الثلاث كان تؤام اولاد ونزلو بالشهر الرابع
وبعدها تابعت التبويض وحللت باجهزه تبويض وصار جماع وشاء ربي وحملت ببنتي ملوكتي وماكنت حاطه ببالي الحمل في هذاك الشهر ابد وكنت احس باعراض الدوره وحاطه في بالي انها تنزل 100%
وحصل ماكان الغير متوقع هو اني تجرات وجبت تحاليل حمل للبيت تقريبا 8 اشرطه وجه في بالي احلل قبل الدوره بيومين واول ماحطيت البول وانتم بكرامه على الجهاز بان الحمل على طوووووووووووووووووول والله يابنات شعور غريب لمه تشوفين الخط الثاني موجود وخاصه للبنات اللي متعودين على الخط الواحد:biggrin2:
وسكتت على الموضوع وقلت خليني اخذ لي نومه ولمه اصحى ارجع احلل وبس اشوف الخط الثاني بقول لزوجي ((على بالي متحلمه ))
واول ماصحيت حللت وبعد بان الخط على طول وخبرت زوجي بحملي وغلفت له شريط الحمل وزينته ولفيت عليه شريطه حمرا وحطيت له جنبها بوكيت ورد احمر والمسكين بس شاف الخط الثاني فرح حيل
وصار يهتم فيني حيل ومايرضى اشتغل وايد بالبيت وكان يساعدني واول مايشوف اني جيت من الدوام تعبانه ياخذ برهم عني ويروح لصاله ويقول انتي نامي وارتاحي(( ليته الدلع يضل على طول جذي))
(( على فكره انا وزوجي باحدى الدول الاوربيه انا وياه ندرس وبنفس الوقت هو يتلقى العلاج وماشي حالنه بديار الغربه))
هو اهله كلهم جنبه الا انا مقطوعه من شجره اهلي كلهم بالعراق بس والله يابنات حتى اهله موجودين ولاكانهم موجودين
المهم خلينا نكمل القصه مابي اطلع خارج نطاق الحديث
مرت اول 3 شهور حملي بملوكه بسلام وبعدها حصل مالم يكن بالحسبان نزيف مفاجئ
طرت طيران على المستشفى وكالعاده ماعطوني شي وقالو اذا يبي ينزل ينزل لحاله لاكن انا سمعت دقات قلبها فديتها وارتحت نفسيا وجسديا
والحمدلله ربي ستر لي على حملي وبدا ينقطع النزيف على الشهر الخامس وعدت شهور الحمل من غير تعب ولاوحم ابد وتوحمت على اللحوم والاجبان والموالح والشيبس وكرهت شي اسمه حلويات ولليوم مااطيقها ابد
وماسمنت ولا 100 غرام وبقى وزني هو هو كان قبل الحمل 53 وقبل العمنليه وزنت كان 57 واتوقع هالاربعه للياهل من وزن ومن مشيمه ومياه والخ
وكان موعد عمليتي يوم 9-6-2009 لان لازم عمليه لان سبق وولدت مرتين قيصري وبعد لان ملوكتي مقعد
ولمه كنت حامل فيها مالي بطن ابددددددددددددددددددددددددد واللي يشوفني يقول انتي موحامل ابد
وكنت متجهزه تمام للولاده بيوم الثلاثاء اللي يصادف 9-6-2009 ولاكن حصل اللي ماكنت متوقعته صادف يوم سبت يعني قبل العمليه ب 3 ايام
صحيت السبت بدري ونضفت البيت وغست ملابس ورتبت كل الخزاين وعزلت المطبخ وتحممت وحممت برهم وصارت الساعه 12 ونص الضهر ورحت للحمام وانتم بكرامه علشان بتوضى واصلي صلاه الضهر ولا اشوف الدم بسروالي :o انا بيني وبينكم خفت حيل وبغيت اموت من الرعبه وطلعت من الحمام وكان في حد خابطني على راسي من هول الصدمه
بغيت اروح اصحي ابو العيال واقول له نزل علي دم لاكن مدري وش اللي مسكني ورجعت قعدت على القنفه بالصاله وصرت ادور بهالرمونت يسار ويمين
والف حسبه وحسبه تاخذني وترجعني واقول ليش نزل دم اخاف يصير بولدي شي (( على فكره انا اخذت 9 سونارات بحملي بملوكه وكل السونارات اجزمت على ان اللي في بطني ولد ومرتين قالو مواكيد ولد ومواكيد بنت واخذت سونار رباعي وقال السونار الرباعي ولد وورتني الدكتوره العضو على شان جذي كان تجهيزي اغلبه ولادي لاكن احساسي بنت وجبت نص التجهيزات بنت واكثر من دكتوره خذيت عندها سونار لان البنات سالوني عند كم دكتوره اخذتي سونار انا اخذت عند اكثر من 5 دكتورات وحبيت اقول لكم يابنات ان ربي عالم لايعلم ومايعلم مافي الارحام الا الله سبحانه وتعالى ربي غير الي في بطني وحقق لي مااتمنى وكان يبين للاجهزه وللدكاتره انه ولد وهي بنت))
المهم كانت الف حسبه تاخذني وترجعني واقول يمكن يموت اللي في بطني وليش نزل دم بعدين عمليتي باقي لها 3 ايام شوي ولا احس بشي حار نزل واطير طيران للحمام ولا اشوف الدم عبى الدنيا وكان دم احمرررررررررررررررررر وصافي خفت حيل ورحت صحيت ابو العيال وجيت وانا العبره خانقتني وقلت له حبيبي قوم لمه طالعني قلت له لقيت دم نازل علي(( شوفو شنو قال))
(( اووووووووووووووووووف استغفر الله ياربي على دوخه الراس ليش نزل عليج دم موعمليتج بعد 3 ايام))؟؟
دار وجهه ورجع نام وانا لاشعوريا صارو عيوني جذي :icon36:
رجعت للصاله ورجعت الافكار تدور براسي والشيطان بيخنقني من الوساويس وشوي ولا احس بشي حار نزل اكثر اكثر من اللي قبله وطرت على الحمام ولا الاقي الدم نزل حتى على فخوذي :o
رجعت لابو العيال وصحيته وقلت له حبي الدم زاد (( شوفو شنو قال )):angry2:
(( والله---- وبعدين شلون تروحين للمستشفى؟؟))
والله يابنات انا عيوني صارو بالطول من الحرقه وماعرفت وش ارد عليه تبلعمت خير شر وقلت له ها بكيفك انت شتقول؟؟
من غبائي لو افتهم مارديت عليه جذي
هو بس سمع ردي رجع دار وجهه وكملها نومه:angry2:والله الدنيا بكبرها بغت تنشق وتبلعني ودموعي صارو ينزلون لاشعوريا وتذكرت اهلي كلهم واولهم امي وصرت اقول لو بين اهلي انا كان طارو فيني للمستشفى من اول نقطه دم نزلت
صارت الساعه 2 الضهر قام هو غسل وجهه وغير ملابسه وقال ها قلب شلون صرتي ؟؟ انا مارديت عليه (( مسويه فيها زعلانه)) قال يالله انا بروح للشغل واي شي يصير معاج بس اتصلي علي والافضل انج تروحين للمستشفى بلاش تنطريني للساعه 10 بالليل..
والله السكوت ذبحني ولساني انربط وماعلقت عليه ولابكلمه وصرت اطالعه من بعيد ولو قريبه عليه كان سحبته من بلعومه وشلعت رقبته:angry2:قلت له خير ان شاءالله قال خلي ابوي ياخذج على المستشفى قلت له بذمتك بذمتك ابوك ياخذني؟؟
المفروض انت اللي بتكون معاي بمثل جذي ضرف !! قال عندي شغل ماقدر اخذ اجازه واي شي يصير بس اتصلي وانا اجي(( بالله عليكم شنو الفايده انك بتروح وعقبها بترجع لي انت راح تبقى معاي بالحالتين بس تهز صورتك جدامي))
راح وبأمان الله ولاكان زوجته تنزف هو طلع وسكر الباب وانا صرت ابجي وبصورت عالي أأأأأأأأأأأأأأأه أأأأأأأأأأأأأأأأأأأأه أأأأأأأأأأأأأأأأأأأأأأأأه وينج يايما وينكم يااخواني ويااخواتي وصرت اقول اساميهم واحد ورى الثاني
وعقبها مسحت دموعي وعدلت شعراتي وجلست على القنفه ولاكان شي صار ..
شوي وصار الدم ينزل اكثر وعلى هالحاله لين صارت الساعه 3 الضهر والدم شغال وينزل اكثر واكثر وبعدها بالفعل صار الخوف يدب بقلبي على طفلي وصار طفلي يتحرك حركات غريبه وعجيبه وكان في حد خانقه .
تجرات واتصلت على بيت اهل زوجي وسالت عن ابوه قالو طالع قلت لهم ابي اروح للمستشفى قالو بس يرجع نعطيه خبر عاد انا اتصلت على المستشفى وقلت لهم الحاله وقالو تعالي باسرع وقت ممكن نستناكي واخذو اسمي ومواليدي
شوي واتصلت ام زوجي وقالت انا باخذ اخت زوجك ونروح مع ابوه لسوق الذهب اذا خلصنا بنقول له ياخذج للمستشفى
قلت لها بس انا انزق ومن الساعه 12 الضهر والحين راح تصير 3 ونص يعني لي 3 ساعات ونص انزف وقالو لي المستشفى تعالي باسرع وقت
ردت قالت ماحنا مطولين بشتري لها سبحه وارجع (( اخت زوجي خطبها واحد وبتتزوج على شهر 10))
وراحن والله صارت 4 و5 و6 وهنه مومبينات وانا صار النزيف فيضانات تنزل مني صارت 6 ونص ولا ابو زوجي متصل فيني وقال لي انا بروح لعزا واحد من الربع
راح اتصل على حد من اخوان زوجك يجي ياخذك!!
وانا صارت حالتي زي الزفت من الحرقه والدموع شغاله وصرت احقد على زوجي وقلت لو موجود جمبي مانطرت منه الناس علي وهم اصلا موحاين بألمي ومعاناتي خير شر وبدا الالم شغال يابنات سكاكين تقطع فيني في المثانه والضهر
صارت الساعه 7 وجه اخو زوجي وقال يالله بوديج قلت له ماشي لبست برهم وديته على جدته ام زوجي وانا توكلت على المستشفى وماخطر في بالي شي سوى المصحف الشريف
اخذته وحطيته على قلبي وقلت والله حتى لو يولدوني بعمليه ماني قايله لحد منهم وحتى زوجي وجعلني اموت وارتاح من الغربه ومن الناس ومن الوحده
واول ماوصلني اخو زوجي قلت له توكل انت وانا بس اخلص ادق عليك واقولك تعال اخذني
رحت لقسم الولاده واستقبلني جزاهن الله الف خير وقالن ليش تاخرتي وكان الام يقطعني تقطع ودخلني غرفه لحالي وجابو تخطيط قلب الطفل والجهاز اللي يقيس الطلق وكان يوصل 73 ومرا ت 80 واخر نص ساعه بالــ 90
انجنت القابله وجابت الدكتور الاخصائي وقال شرايج نولدج الليله لان مافي فرق بين اليوم ويوم الثلاثاء وتجنبا للمضاعفات والمخاطر وتبين ان جزء من المشيمه انفصلت عن الطفل فلذالك لازم نولدك بعمليه حتى مانفقدك ونفقد الطفل..
قلت له ماشي والله لــ 3 شغلات الاولى سلامه طفلي والثانيه للتخلص من الكرشه ومعاناه الثقل والحمل وثالثا للتخلص من الالم اللي فيني
قال اتصلي على زوجك وخليه يجي فورا عاد انا كرامتي صارت تخبطني وتقول لاتنزليني للارض:biggrin2: بعد التفكير اتصلت عليه واكلمه من ورى خشمي واقول له (( تعال- بيسون لي عمليه بعد نص ساعه)) المسكين صار مايعرف يتكلم وانحاست الدنيا وصار كل 3 دقايق يتصل يقول ها شلونج وليش وليش وليش واميه سؤال يسأل وانا مالي خلق ارد عليه من العوار
جه ولا ربع ساعه وجت دكتوره التخدير وقالت بنعطيج البنج نصفي و10 دقايق وبينزلونك غرفه العمليات شوي وجت ممرضه حطت لي مسكن وعقبها المغذي وسحبوني على غرفه الولاده ولابني ادم يدري بس انا وهو لااهله ولااهلي ولاغيره
ماشاءالله عليهم ايدهم كانت سريعه وخفيفه جت دكتوره التخدير ولافه الابره بــ 100 فوطه كانها اسلحه دمار شامل عيونج تطيح وانتي تحسبين الفوط على ماتطلع هالابره مدري ليش كل هالاحتياط
مسحت ضهري بمعقم برتقالي وكان ثلججججججججججججججج وبعدها ب 3 دقايق رجعت مسحت بنفس المعقم وتلمست الفقرات وقالت راح ابز شوي ولا تشلع ضهري بابرتها حيل عورتني كانت ايدها ثقيله حيل ولمه بزتها وضغطت المحلول نزل بجسمي شي حاااااااااااااااااااااااااااااااااااااااار مثل النار دقيقه وماعاد حسيت من صدري لتحت حطو بعدها القسطره حقت البول وانتم بكرامه وحطو الوايرات والاوكسجين بخشمي وحطو الستاره بين صدري وعزلو المنطقه السفلى وزوجي كان لابس لبس العمليات وجالس عند راسي وماسك ايدي وانا مالي خلقه معطيته طرف اصبعي
جت الممرضه ومسحت بمقعم على بطني وقالت تحسين بشي بارد او حار قلت لها لا شوي وقالو يالله راح نقص طبعا انا شرطت عليهم بنفس المكان اللي سويت فيه العمليات السابقه وشرط يكون تجميلي ليزر
قالو ماشي قصو وشوي وصارو يهزون بجسمي وانحاسو ومدري وش فيهم وبعدها ضغطو حيل لدرجه اني تشاهدت وكان حجاره حاطينها على صدري وشوي ولا اسمع صوت وااااااااااااااااااااااااااااااااء واااااااااااااااااااااااااااااااااااء وااااااااااااااااااااااااااء :icon28: قال طلعنا البيبي تلاقف زوجي وقام طل واخذ صوره وصور بطني مفتوحه وهو ماسكين ملوكه ومطلعينها قال ها ولد ولا بنت قالو ولد جلس والبرطم زعلان ثواني وجت الممرضه وقالت لا بنت الحبل السري متكون بين رجلينها وعلى بالهم ولد جت وراها وحده ولافه ملوكه قلبي بفوطه
وكاهي صورتها
انا شفتها وصليت على النبي وبعدها خيطو بطني ونقلوني لغرفه الانعاش وملوكه خلوها عندهم وقالم اول ماتطلعين بالسلامه بنجيبها لج لغرفتج ابوها الدنيا ماشالته من الفرحه وصورها اكثر من 50 صوره بغرفه العمليات وكان وزنها 2 كيلو و900 غرام وطولها 48
رحت لغرفه الانعاش وصارو يرحون ويرجعون علي وهم خايفين من النزيف وثار قلبي ضعيف حيل والجهاز يصارخ وكل شوي يجون يلتمون ويزيدون الاوكسجين وبقيت لوجهه الفجر بغرفه الانعاش وبعدها اشغل الالم وصار يعطوني بهالمهدئات مع المغذي
والحمدلله تحسنت خلال اربع ايام واتذكر وانا بغرفه الانعاش صرت اذب خيط وخيط ليش مادري مع انه البنج موكامل بس من هبط الضغط وضعفت دقات قلبي صرت اشوف الدنيا بيضا وصرت اقول كلام مومفهوم ابد
واتذكر طردت زوجي وقلت له قوم مابيك اطلع برى ويالله قوم جيب امي المسكين يبوس يدي ويقول انا امج من وين اجيب امج من العراق؟؟
الحمدلله على الصحه والعافيه يابنات
وصار برهم يزورني كل يوم مع ابوه والله المسكين ينقل لي من المطعم اكل لان مثل ماتدرون اكل المستشفى ماينوكل ابد
واهل زوجي والله حتى ماسالو شنو محتاجه وجوني يمكن 10 دقايق وراحو الله يسامحهم ويغفر لهم وطلعت لبيتي والحين شغاله ببيتي اربعه وعشرين ساعه ولاكاااااني والده بعمليه ووحده محتاجه للراحه والله اقوم وماسكه بطني بأيديني من الالم وجزاه الله الف خير ابو العيال مو مقصر بس مهما كان تحز بالخاطر
والنفسيه صايره زفت وعدم وبكا على طول والشعور بالوحده ومالي خلق اكل والله من امس موماكله
ويمكن احس براحه بس اذا دخلت المنتدى حتى اهلي بالعراق مالي رغبه اكلمهم واذا اتصل واحد منهم ماارد عليه
مدري شنو اللي صار لي
والله يسهل لكل حامل ولكل وحده تتمنى الحمل
واسفه على الاطاله
واي سؤال انا حاضره
دمتن بكل ود
ويتربون في عزج ****لله